တွၼ်ႈတႃႇ တေၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်း ၸုပ်ႈတီႈ 12 တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၼၼ်ႉ ၵၢင်ႉၵႄႇၵဵပ်းငိုၼ်းၵူၼ်းမိူင်း ၼိုင်ႈႁိူၼ်း 3 မိုၼ်ႇပျႃး ဝႃႈၼႆ။
မိူဝ်ႈဝႃး ဝၼ်းတီႈ 05/06/2025 ယၢမ်းၵၢင်ၼႂ် 10 မူင်း ၵၢင်ႉၵႄႇ ႁွင်ႉဢဝ်ၵူၼ်းပိုၼ်ႉတီႈ ၼႂ်းပွၵ်ႉၼႂ်းယွမ်ႇ ႁဵတ်းပၢင်ၵုမ်ၵၼ်သေ ၶၢၼ်းငိုၼ်း ၵူၼ်းမိူင်းၼိုင်ႈႁိူၼ်း 3 မိုၼ်ႇပျႃး တႃႇၸၢင်ႈၵူၼ်း ၵႂႃႇႁၢပ်ႇၵၢၼ်သိုၵ်း ၸုပ်ႈ 12 ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ၼႂ်းပၢင်ၵုမ်ၼၼ်ႉ ၵၢင်ႉၵႄႇဝႃႈ ၊ ႁွင်ႉၽႂ်ၵေႃႈ ဝႃႈဢမ်ႇၶႂ်ႈၵႂႃႇ။ ၵွပ်ႈၼႆတေႁႃငိုၼ်းသေ ၸၢင်ႈၵူၼ်းသူင်ႇဢဝ်ၼႆဝႃႇ။ ၵွပ်ႈၼႆ ၶၢၼ်းႁႂ်ႈသႂ်ႇငိုၼ်း ၼိုင်ႈႁိူၼ်း 3 မိုၼ်ႇပျႃး။ မၢင်ႁိူၼ်းလႆႈသႂ်ႇ 2 မိုၼ်ႇပျႃး။ ပေႃးၼႃႈႁိူၼ်းလဵၵ်ႉ 1 မိုၼ်ႇပျႃးၸိူဝ်းၼႆႉ။ လွင်ႈလႆႈသႂ်ႇငိုၼ်းဢမ်ႇပဵင်း ၵၼ်”- ဝႃႈၼႆ။
တီႈဝဵင်းၼမ်ႉၸၢင်ၼႆႉ ဢၼ်ထုၵ်ႇၶၢၼ်းၵႂႃႇႁဵတ်းသိုၵ်းမၢၼ်ႈၼႆႉ ပွၵ်ႉၼိုင်ႈလႄႈ ပွၵ်ႉၼိုင်ႈဢမ်ႇမိူၼ်ၵၼ်။ မိူၼ်ၼင်ႇ ပွၵ်ႉ 5 ပွၵ်ႉ 3 သမ်ႉ ၾၢႆႇသိုၵ်းမၢၼ်ႈ သူင်ႇလိၵ်ႈၸူးသေ ၶၢၼ်းၵူၼ်းၵႂႃႇႁၢပ်ႇၵၢၼ်သိုၵ်း။ မၢင် ပွၵ်ႉသမ်ႉ သိုၵ်းမၢၼ်ႈ သင်ႇႁႂ်ႈၵဵပ်းငိုၼ်းၼႂ်းပွၵ်ႉသေ ႁႃၸၢင်ႈၵူၼ်းသူင်ႇပၼ် တႃႇၾိုၵ်းၵၢၼ်သိုၵ်းဢဝ် – ၵူၼ်းပိုၼ်ႉတီႈလၢတ်ႈၼင်ႇၼႆ။
တႄႇႁၢင်လိူၼ်မေႊၼႆႉမႃး ပလိၵ်ႈမၢၼ်ႈသိုၵ်းမၢၼ်ႈတင်း ႁွင်ႈၵၢၼ် ၾၢႆႇၽွင်းငမ်းၵူႈလွင်ႈလွင်ႈ သူင်ႇ လိၵ်ႈၸူးၵူၼ်းမိူင်း ပွၵ်ႉ 1 တႃႇ 20 လင် ၊ ၼႂ်းပွၵ်ႉ 2 သူင်ႇ 10 လင်၊ ႁိူၼ်း ဢၼ်လႆႈလိၵ်ႈၼၼ်ႉ ႁႂ်ႈသူင်ႇ လုၵ်ႈလၢၼ်ၸဝ်ႈၵဝ်ႇ ၵႂႃႇၸူၵ်းမႄးတီႈသိုၵ်းမၢၼ်ႈ။ ႁိူၼ်းလႂ်ၸူၵ်းမႄးလႆႈ တႃႇႁၢပ်ႇၵၢၼ်သိုၵ်းၵေႃႈ တေလႆႈၶတ်းၸႂ်ႁႃၵူၼ်းသူင်ႇပၼ်ၼႆလႄႈ ႁဵတ်းႁႂ်ႈၵူၼ်းပိုၼ်ႉတီႈတူၵ်းၸႂ်တိုၼ်ႇသၢၼ်ႈ။
ၸၢႆးၸၢႆး ဢႃယု 35 ပီ ၵူၼ်းမိူင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ် ၶဝ်သူင်ႇလိၵ်ႈထိုင်ႁိူၼ်း ၼႆႉ တေပဵၼ်သႅၼ်းဢႃယု 35-36 ၼႆႉ။ တႆးၵေႃႉၶႃႈ ပႃးၵႂႃႇႁၢပ်ႇၵၢၼ်သိုၵ်းမူတ်း ၊ ၶႃႈၵေႃႈထႅင်ႈၸုပ်ႈ လႅပ်ႈပႃးယူႇ ၊ ၼႂ်းပွၵ်ႉႁဝ်းတႄႉ လႆႈၸူၵ်းမႄးဢဝ် ၊ ၶႃႈၼႆႉ မႄႈၵေႃႈ ဢမ်ႇယူႇလီ ၊ တေပၢႆႈပႅတ်ႈၵေႃႈ ဢမ်ႇၸႂ်ႈ တေလႆႈႁဵတ်းၸိူင်ႉႁိုဝ်ၵေႃႈ ဢမ်ႇႁူႉယဝ်ႉ”- ဝႃႈၼႆ။
တီႈဝဵင်းၼမ်ႉၸၢင်ၼႆႉ ၵွၼ်ႇၼႃႈၼၼ်ႉ လွင်ႈသူင်ႇလိၵ်ႈၸူးၵူၼ်းမိူင်းသေ ၶၢၼ်းႁႂ်ႈမႃးၸူၵ်းၶႅပ်းမႄး တႃႇ ၵႂႃႇၾိုၵ်းၵၢၼ်သိုၵ်းၸိူင်ႉၼႆ ဢမ်ႇပႆႇယၢမ်ႈမီး။ ယူႇတီႈ ပလိၵ်ႈသိုၵ်းမၢၼ်ႈ လမ်းႁႃတီႉၺွပ်း ၵူၼ်းၵိၼ် လဝ်ႈၵိၼ်ယႃႈသေ ဢဝ်သူင်ႇတႃႇႁၢပ်ႇၵၢၼ်သိုၵ်းၵူၺ်း။ ယၢမ်းလဵဝ် ဢၼ်သူင်ႇလိၵ်ႈသေ ၶၢၼ်းႁွင်ႉဢဝ် ႁိူၼ်းလႂ်ႁိူၼ်းၼၼ်ႉၸိူင်ႉၼႆ လႆႈဝႃႈပဵၼ်ပွၵ်ႈ ဢွၼ်တၢင်းသုတ်း။ ၵွပ်ႈၼႆ ၵူၼ်းပိုၼ်ႉတီႈ ဢွၼ်ၵၼ်ပၢႆႈ ယၢၼ်ႁိူၼ်းယေးတီႈယူႇ။ တႃႇတေလွတ်ႈၼၼ်ႉ ၵမ်ႈၼမ်ၵႂႃႇႁဵတ်းပျီႇတူႉၸိတ်ႉ – ၵူၼ်းပိုၼ်ႉတီႈ လၢတ်ႈၼင်ႇၼႆ။
တီႈဝဵင်းၼမ်ႉၸၢင်ၼႆႉ လိူဝ်သေလႆႈၵူဝ်လွင်ႈႁွင်ႉႁဵတ်းသိုၵ်းယဝ်ႉ ယၢမ်းလဵဝ်သမ်ႉ ၾၢႆႇတၢင်းပလိၵ်ႈသိုၵ်းမၢၼ်ႈ လႄႇလမ်းၵူတ်ႇထတ်းတီႉၺွပ်းဝတ်းဝႂ်လၢႆႊသိၼ်ႊရူတ်ႉၵႃးလႄႈ ႁဵတ်းႁႂ်ႈၵူၼ်းပိုၼ်ႉတီႈ ယၢပ်ႇၸႂ်လၢႆလွင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ