ဝၼ်းတီႈ 04/06/2025 ၼႆႉ တီႈႁိူၼ်းႁေႃၶၢဝ် မိူင်းဢမေႊရိၵၼ်ႊ ပိုၼ်ၽၢဝ်ႇဝႃႈ – ယူႇတီႈ မိူင်းဢမေႊရိၵၼ်ႊ ပိၵ်ႉဢိုတ်းပႅတ်ႈ လွင်ႈပၼ်ၶႂၢင်ႉၵူၼ်းမိူင်း 12 ၸိုင်ႈမိူင်း ၶဝ်ႈမိူင်းၶဝ် ၼႂ်းၼၼ်ႉ ပႃးၵူၼ်းမိူင်းမၢၼ်ႈ မိူင်းၼိုင်ႈ ဝႃႈၼႆ။
ၵူၼ်းမိူင်းမၢၼ်ႈ ၸိူဝ်းၸႂ်ႉဝီႊသႃႊဢႅဝ်ႇလႄႇ၊ ဝီႊသႃႊလုၵ်ႈႁဵၼ်းသေ ၶဝ်ႈၵႂႃႇယူႇသဝ်း ပူၼ်ႉလိူဝ် ၶၢဝ်းယၢမ်း ၼမ်ၶိုၼ်ႈမႃး၊ ၾၢႆႇၼိုင်ႈၵေႃႈ ၸွမ်းၼင်ႇပၵ်းပိူင်မိူင်းဢမေႊရိၵၼ်ႊသေ တႃႇသူင်ႇ တူဝ် ၵူၼ်းမိူင်းမၢၼ်ႈ ၸိူဝ်းၺႃးယုၵ်ႉလိူၵ်ႈပႅတ်ႈ ဝႂ်ၶႂၢင်ႉပဵၼ်ၵူၼ်းၵိုၵ်းမိူင်းဢမေႊရိၵၼ်ႊသေ ပွၵ်ႈမိူဝ်းမိူင်းမၢၼ်ႈၶိုၼ်းၼၼ်ႉ ယူႇတီႈမိူင်းမၢၼ်ႈ ဢမ်ႇပၼ်တၢင်းႁူမ်ႈမိုဝ်းၸွမ်းတဵမ်တီႈ။ ႁူဝ် ၼပ်ႉၵူၼ်းမိူင်းမၢၼ်ႈ ၸိူဝ်းယိပ်းဝီႊသႃႊသႅၼ်း B1/ B2 သေ ယူႇသဝ်းလိူဝ်ၶၢဝ်းယၢမ်းၼႆႉ မီး 27.07%၊ ၸိူဝ်းယိပ်းဝီႊသႃႊ သႅၼ်း F/M/J သေ ယူႇသဝ်းလိူဝ်ၶၢဝ်းယၢမ်းသမ်ႉ မီးဝႆႉ 42.17% ဝႃႈၼႆ။
ၸိုင်ႈမိူင်း ၸိူဝ်းၺႃးပိၵ်ႉဢိုတ်း ဢမ်ႇပၼ်ၶႂၢင်ႉၶဝ်ႈၼႂ်းမိူင်းဢမေႊရိၵၼ်ႊၼၼ်ႉ ပဵၼ်မိူင်းဢႅပ်ႊ ၾ်ၵၢၼ်ႊၼိသ်တၢၼ်ႊ၊ မိူင်းမၢၼ်ႈ၊ ၶျႅၵ်ႉ၊ ၵုၼ်ႇၵူဝ်ႇ ၊ ဢီႇၵူၺ်ႇတူဝ်ႇရီႇရႄႇလ်ၵီႇၼီႇရႃႇ ၊ ဢီႇရီႇထ ရီးယႃး ၊ ႁေႇတီႇ ၊ ဢီႊရၢၼ်ႊ ၊ လိတ်ႉပျႃး ၊ သူဝ်ႇမႃႇလီႇယႃႇ ၊ သုၺ်ႊတၼ်ႊလႄႈ မိူင်းယီႇမိၼ်ႇ ၸိူဝ်းၼႆႉ။
တႄႇဢဝ် ဝၼ်းတီႈ 20/01/2025 ၼႆႉမႃး ၸွမ်ၸိုင်ႈထရမ်ႉ လႆႈၸီႉသင်ႇ ႁႂ်ႈႁွင်ႈၵၢၼ် ၽွင်းလူင် ၾၢႆႇၼွၵ်ႈမိူင်း မိူင်းဢမေႊရိၵၼ်ႊ၊ ႁွင်ႈၵၢၼ် ၾၢႆႇႁူမ်ႇလူမ်ႈၸိုင်ႈမိူင်းလႄႈ ႁွင်ႈ ၵၢၼ် ၾၢႆႇသွပ်ႇၶၢဝ်ႇၶဝ် ႁူမ်ႈႁွမ်းၵၼ်သေ ၵဵပ်းသဵၼ်ႈမၢႆၸိုင်ႈမိူင်း ၸိူဝ်းမီးၽေးတေႃႇမိူင်းဢမေႊရိၵၼ်ႊ။ ဝၢႆးလင်ၼၼ်ႉ ၸင်ႇဢွၵ်ႇမႃး ၶေႃႈပိုၼ်ၽၢဝ်ႇၼင်ႇၼႆ။
သင်ပဵၼ်ၵူၼ်းမိူင်း ဢၼ်ၺႃးမိူင်းဢမေႊရိၵၼ်ႊ ပိၵ်ႉဢိုတ်းသေ သမ်ႉယူႇသဝ်းမီးဝႆႉ ၼႂ်းမိူင်းဢမေႊရိၵၼ်ႊ – မိူၼ်ၼင်ႇယူႇသဝ်း မႅၼ်ႈၸွမ်းပၵ်းပိူင်မၢႆမီႈ မိူင်းဢမေႊရိၵၼ်ႊ၊ ၵူၼ်းၸိူဝ်းယိပ်းဝႆႉ ဝီႊသႃႊ ဢၼ်တိုၵ်ႉမီးဢႃယု၊ ၵူၼ်းၸိူဝ်း တေၸွႆႈသၢင်ႈပၼ် ပုၼ်ႈပၢင်ႈၽွၼ်းလီ မိူင်းဢမေႊရိၵၼ်ႊ ၸိူဝ်းၼၼ်ႉတႄႉ တေပၼ်ၶႂၢင်ႉ ယူႇသဝ်းၵႂႃႇယူႇ ဝႃႈၼႆ။
ဢိင်ၼိူဝ်ငဝ်းလၢႆး လွင်ႈႁူမ်ႇလူမ်ႈ ဢၼ်လႅၵ်ႈလၢႆႈယူႇၼႂ်းလုမ်ႈၾႃႉၼႆႉသေ သဵၼ်ႈမၢႆၸိုင်ႈမိူင်း ၸိူဝ်းၺႃးပိၵ်ႉဢိုတ်း ဢမ်ႇပၼ်ၶႂၢင်ႉၶဝ်ႈမိူင်းဢမေႊရိၵၼ်ႊၼၼ်ႉ တေၸၢင်ႈတိူဝ်းၼမ်မႃးထႅင်ႈ။
ယွၼ်ႉသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းသေ ၵူၼ်းမိူင်းမၢၼ်ႈ ၸိူဝ်းပၢႆႈဢွၵ်ႇၼွၵ်ႈမိူင်း မီးၼမ်။ ၼႂ်းပီ 2025 ၼႆႉ ၵူၼ်းမိူင်းမၢၼ်ႈ ၸိူဝ်းပၢႆႈၵႂႃႇယူႇသဝ်း တီႈမိူင်းဢမေႊရိၵၼ်ႊ မီးမွၵ်ႈ 5 သႅၼ် – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ