မိူဝ်ႈပီၵၢႆပူၼ်ႉမႃးၼႆႉ ၵၢၼ်ၵိူတ်ႇလဵင်ႉလုၵ်ႈဢွၼ်ႇ တီႈမိူင်းၵျပၼ်ႊ ယွမ်းလူင်းၵႂႃႇ ၾၢႆႇတႂ်ႈ 7 သႅၼ်၊ လွင်ႈၼႆႉ ပဵၼ်ပွၵ်ႈၵမ်းႁႅၵ်ႈ – လူင်ပွင်ၸိုင်ႈမိူင်းၵျပၼ်ႊ ပိုၼ်ၽၢဝ်ႇဝႆႉ ၼႂ်းဝၼ်းတီႈ 4 ၼႆႉ ၼင်ႇၼႆ။
တီႈမိူင်းၵျပၼ်ႊၼႆႉ ၼႂ်းပီ 2024 တင်းပီ လုၵ်ႈဢွၼ်ႇ ၸိူဝ်းၵိူတ်ႇမႂ်ႇ မီး 686,061 ၵေႃႉ၊ ယွမ်းလူင်း လိူဝ်သေ မိူဝ်ႈပီ 2023 ၼၼ်ႉ 41,227 ၵေႃႉ။
ၼႂ်းလုမ်ႈၾႃႉၼႆႉ ၵျပၼ်ႊ ပဵၼ်မိူင်းမီးၵူၼ်းဢႃယုယႂ်ႇ (ၵူၼ်းထဝ်ႈ) ၼမ်လိူဝ်ပိူၼ်ႈထီႉသွင်၊ ထီႉၼိုင်ႈသမ်ႉ ပဵၼ်မိူင်းမူဝ်ႊၼႃႊၵူဝ်ႊ။
ႁွင်ႈၵၢၼ် ၽွင်းလူင်ၾၢႆႇပၢႆးယူႇလီ မိူင်းၵျပၼ်ႊ လၢတ်ႈဝႃႈ – ၼႂ်းပီ 2024 ပူၼ်ႉမႃးၼႆႉ ႁူဝ်ၼပ်ႉၵူၼ်းလူႉတၢႆ ၼႂ်းမိူင်းၵျပၼ်ႊ မီး 1.6 လၢၼ်ႉၵေႃႉ၊ ၼမ်ၶိုၼ်ႈမႃးလိူဝ် မိူဝ်ႈပီ 2023 ၼၼ်ႉ1.9% ။
ႁူဝ်ၼပ်ႉၵူၼ်းမိူင်းၵျပၼ်ႊၼႆႉ တင်းမူတ်း မီး 123 လၢၼ်ႉၵေႃႉ၊ ၸွမ်းၼင်ႇ ႁူဝ်ၼပ်ႉၵူၼ်းဢႃယုယႂ်ႇ ၼမ်ၶိုၼ်ႈမႃးသေ မိူင်းၵျပၼ်ႊ လႆႈႁူပ်ႉလွင်ႈယၢပ်ႇၽိုတ်ႇ လွင်ႈႁႅင်းၵူၼ်းႁဵတ်းၵၢၼ် ဢမ်ႇၵုမ်ႇထူၼ်ႈ။
မိူၼ်ၼႆ မိူင်းၵူဝ်ႊရီႊယိူဝ်ႊၸၢၼ်း ဢၼ်ပဵၼ်မိူင်းႁိမ်းၸမ် မိူင်းၵျပၼ်ႊၼႆႉၵေႃႈ ၼႂ်းပီ 2024 ပူၼ်ႉမႃးၼႆႉ လွင်ႈၵိူတ်ႇလဵင်ႉလုၵ်ႈ ယွမ်းလူင်းၵႂႃႇ လိူဝ်သေမိူင်းၵျပၼ်ႊ 0.75%။ ၵူၺ်းၵႃႈ လွင်ႈၵူပ်ႉၵူႈတႄႇၼႃႈႁိူၼ်းတႄႉ ၼမ်ၶိုၼ်ႈမႃးဢိတ်ႉၼိုင်ႈယူႇ – သိုဝ်ႇၶၢဝ်ႇ CNA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ