ၼႂ်းဝၼ်းတီႈ 03/06/2025 ၼႆႉ မိူင်းၵူဝ်ႊရီႊယိူဝ်ႊၸၢၼ်း ၸတ်းႁဵတ်းပၢင်လိူၵ်ႈတင်ႈ ၸွမ်ၸိုင်ႈ ၵမ်းႁႅၵ်ႈ ဝၢႆးလင် ပဵၼ်ၵႂႃႇလွင်ႈပိုၼ်ၽၢဝ်ႇၸႂ်ႉတိုဝ်းပိူင်ၵၢၼ်သိုၵ်းၼၼ်ႉ လီႇၵျေႇမျွင်ႇ (Lee Jae-myung) ႁူဝ်ပဝ်ႈ ပႃႇတီႇ တီႇမူဝ်ႇၶရႅတ်ႉတိတ်ႉ (Democratic Party) လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈသေ ဢွင်ႇပေႉပၢင်လိူၵ်ႈတင်ႈၵႂႃႇ ဝႃႈၼႆ။
မိူဝ်ႈၽွင်း ၼပ်ႉဢၢၼ်ႇၶႅပ်းၵၢင်ၸႂ် ယဝ်ႉတူဝ်ႈၵႂႃႇ 99.11 % ၼၼ်ႉ ၼေႃႇၸွမ်ၸိုင်ႈ လီႇၵျေႇမျွင်ႇ (Lee Jae-myung) ပႃႇတီႇ တီႇမူဝ်ႇၶရႅတ်ႉတိတ်ႉ လႆႈၶႅပ်းၵၢင်ၸႂ် 49.31%၊ ၶိမ်ႇမုၼ်ႇသူႇ (Kim Moon- soo) ပႃႇတီႇ People Power Party – PPP သမ်ႉ လႆႈၶႅပ်းၵၢင်ၸႂ် 41.3%၊ လီႇၵျႅၼ်ႇသူႇ (Lee Jun-seok) ပႃႇတီႇ New Reform Party သမ်ႉ လႆႈၶႅပ်းၵၢင်ၸႂ် 8.29% ၼႆယဝ်ႉ။
ဝၢႆးၸွမ်ၸိုင်ႈၵဝ်ႇ မိူင်းၵူဝ်ႊရီႊယိူဝ်ႊၸၢၼ်း Yoon Suk Yeol ပိုၼ်ၽၢဝ်ႇ ပိူင်ၽွင်းငမ်းသိုၵ်းယဝ်ႉ ႁိုင်မႃးၶၢဝ်းတၢင်း 6 လိူၼ် ၸင်ႇပဵၼ်ၸတ်းႁဵတ်းပၢင်လိူၵ်ႈတင်ႈ။ ၽွင်းၼၼ်ႉ ယူႇတီႈလုမ်းသၽႃး ဢွၼ်ၵၼ်တွတ်ႈၶႅပ်းၵၢင်ၸႂ် တႅပ်းတတ်းလႄႈ ပိူင်ၽွင်းငမ်းသိုၵ်း တၼ်းႁိုင်ထိုင် 6 ၸူဝ်ႈမူင်းၵူၺ်း။ ၸွမ်ၸိုင်ႈၵဝ်ႇၵေႃႈ ၺႃးပူတ်းတၼ်းႁဵင်းပႅတ်ႈသေတႃႉ ႁဵတ်း ႁႂ်ႈၵၢၼ်မိူင်း မိူင်းၵူဝ်ႊရီႊ ယိူဝ်ႊၸၢၼ်း မီးလွင်ႈသုၵ်ႉယုင်ႈမႃး။
ဝၢႆးလင်ဢွင်ႇပေႉပၢင်လိူၵ်ႈတင်ႈယဝ်ႉ လီႇၵျေႇမျွင်ႇ ပႃႇတီႇ တီႇမူဝ်ႇၶရႅတ်ႉတိတ်ႉ တေလႆႈႁပ်ႉပုၼ်ႈၽွၼ်းတၼ်းႁဵင်း ပဵၼ်ၸွမ်ၸိုင်ႈၵႂႃႇ တႃႇၶၢဝ်းတၢင်း 6 ပီ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ