သဵၼ်ႈမၢႆဢွင်ႇပူၼ်ႉၸၼ်ႉသိပ်းသွင် တႃႇၶဝ်ႈႁဵၼ်းၸၼ်ႉၸွမ်ၼၼ်ႉ တေပိုၼ်ၽၢဝ်ႇဢွၵ်ႇ ၼႂ်းဝၼ်းတီႈ 13/06/2025 ယၢမ်းၵၢင်ၼႂ်ၼႆ ဝႃႈၼႆ။
ၼႂ်းဝၼ်းၼၼ်ႉ ယၢမ်းၵၢင်ၼႂ် 4 မူင်း ၶဝ်ႈတူၺ်းလႆႈတီႈ ဝႅပ်ႉသၢႆႉ ႁွင်ႈၵၢၼ် ၾၢႆႇထတ်းလိၵ်ႈ မိူင်းမၢၼ်ႈ www.myanmarexam.org ၶၢဝ်းယၢမ်းၵၢင်ၼႂ် 6 မူင်းၼႆႉသမ်ႉ ၵႂႃႇတူၺ်းလႆႈတီႈ ႁူင်းႁဵၼ်း ဢၼ်ၵဵဝ်ႇၶွင်ႈ ၸႄႈဝဵင်းၸဝ်ႈၵဝ်ႇ။ တွၼ်ႈတႃႇ ဢွင်ႈတီႈယၢၼ်ၵႆဝဵင်း ၵႂႃႇမႃးယၢပ်ႇၽိုတ်ႇ၊ တီႈဢမ်ႇလႆႈလႅင်းၼဵတ်ႇလႅင်းၾူၼ်းၼၼ်ႉ ယူႇတီႈလၢႆးၵၢၼ်ပွႆႇသဵင် မျၢၼ်ႇမႃႉဢတၢၼ်ႇ တေပိုၼ်ၽၢဝ်ႇၵႂႃႇ ၼႂ်းဝၼ်းၼၼ်ႉ ဝႃႈၼႆ။
ပီၵၢၼ်ႁဵၼ်း 2024-25 ၼႆႉ လုၵ်ႈႁဵၼ်းၸၼ်ႉသိပ်းသွင် ၶဝ်ႈတွပ်ႇလိၵ်ႈ ႁူမ်ႈသဵၼ်ႈမီးဝႆႉမွၵ်ႈ 150,000 ၵေႃႉ။
ၼႂ်းလုၵ်ႈႁဵၼ်းၸၼ်ႉသိပ်းသွင် 6 မိုၼ်ႇၵေႃႉၼၼ်ႉ ဝႂ်တွပ်ႇလိၵ်ႈလႆႈလူႉၵွႆၵႂႃႇ ယွၼ်ႉၽေးဢိင်ႇသၼ်ႇ(ၽႅၼ်ႇလိၼ်ဝႆ) တီႈဝဵင်းလိူဝ်ႇလႄႈ ၸႄႈၵႅင်း မိူဝ်ႈႁၢင်လိူၼ်မၢတ်ႊၶျ်ပူၼ်ႉမႃးၼၼ်ႉ။ ၼၼ်ႉတႄႉ ၶိုၼ်းလႆႈတွပ်ႇလိၵ်ႈၶိုၼ်း ၼႂ်းႁူဝ်လိူၼ်မေႊ။
မိူဝ်ႈပီ ၵၢၼ်ႁဵၼ်း 2023 – 24 ၼၼ်ႉ သိုၵ်းမၢၼ်ႈယိုတ်းမိူင်း လႅၵ်ႈလၢႆႈၶိုၼ်း လၢႆးပိူင်မႂ်ႇသေ ၸတ်းပၢင်တွပ်ႇလိၵ်ႈမႃးၵမ်းႁႅၵ်ႈ။ မိူဝ်ႈၼၼ်ႉ မီးလုၵ်ႈႁဵၼ်း ၼိုင်ႈသႅၼ်သွင်မိုၼ်ႇပၢႆ၊ ၼႂ်းၼၼ်ႉ လုၵ်ႈႁဵၼ်းဢွင်ႇပူၼ်ႉၸၼ်ႉမီး 7 မိုၼ်ႇပၢႆ။
ၼႂ်းႁူဝ်လိူၼ်ၵျုၼ်ႊၼႆႉ ႁွင်ႈၵၢၼ် ပၢႆးပၺ်ႇၺႃႇ တႂ်ႈသိုၵ်းမၢၼ်ႈ ပိုတ်ႇႁူင်းႁဵၼ်းၶိုၼ်းသေ မီးဝႆႉလုၵ်ႈႁဵၼ်း 6 လၢၼ်ႉပၢႆ ၊ ပေႃးတႅၵ်ႈၼိူင်းၵၼ်တင်းပီၵၢႆၼႆ ယွမ်းဢေႇၵႂႃႇမွၵ်ႈ 3 သႅၼ်ၵေႃႉၼႆ ၸွမ်းၼင်ႇသဵၼ်ႈမၢႆ ႁွင်ႈၵၢၼ် ၾၢႆႇပၢႆးပၺ်ႇၺႃႇသိုၵ်းမၢၼ်ႈ လႆႈႁူႉၸွမ်းၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ