ဝၼ်းတီႈ 03/06/2025 ယၢမ်းဝၢႆးဝၼ်း 3 မူင်း သိုၵ်းယၢင်းၽိူၵ်ႇ KNU ယိုတ်းၵုမ်းလႆႈၶိုၼ်း တပ်ႉပၢင်သဝ်းသိုၵ်းမၢၼ်ႈ တေႇပေႃးပူဝ်း ဢၼ်မီးႁိမ်းၸမ် လႅၼ်လိၼ်ထႆး – မၢၼ်ႈၼႆ ႁူဝ်ပဝ်ႈ ၸႄႈဝဵင်းၵေႃႉၵရဵတ်ႉ သိုၵ်းယၢင်းၽိူၵ်ႇ KNU ယိုၼ်ယၼ်လၢတ်ႈဝႆႉၼင်ႇၼႆ။

ၸွမ်းၼင်ႇၽႅၼ်ႇလိၼ် ၼႃႈတီႈၽွင်းငမ်း သိုၵ်းယၢင်းၽိူၵ်ႇ KNU ၸိုင် တပ်ႉပၢင်သဝ်းသိုၵ်းမၢၼ်ႈ တေႇပေႃးပူဝ်းၼႆႉ မီးဝႆႉတီႈဝဵင်းဝေႃးလေႇ ၸႄႈတွၼ်ႈတူႇပလႃႇယႃႇ ၶဝ်ႈပႃးၼႂ်း ၸႄႈဝဵင်းၵေႃႉၵရဵတ်ႉ ဝႃႈၼႆ။

တႃႇတေယိုတ်းလႆႈ တပ်ႉပၢင်သဝ်းၼၼ်ႉ တႄႇႁၢင်လိူၼ်မေႊ ဝူင်ႈထီႉသၢမ် သိုၵ်းယၢင်းၽိူၵ်ႇ KNU ၸႂ်ႉၶိူင်ႈတရူၼ်ႊ ၶိူင်ႈၵွင်ႈလူင်သေ ယိုဝ်းတိုၵ်းတပ်ႉသိုၵ်းမၢၼ်ႈ ႁၢဝ်ႈႁႅင်း။ ၾၢႆႇသိုၵ်းမၢၼ်ႈၵေႃႈ ၼင်ႇႁိုဝ် တေဢမ်ႇလႆႈပွႆႇၽႃႈတပ်ႉပၢင်သဝ်းၼၼ်ႉ ၶဵင်ႈၶႅင်ၵၢၼ်သိုၵ်းသေ ယိုဝ်းတိုၵ်းၶိုၼ်း ႁၢဝ်ႈႁႅင်း။

တပ်ႉပၢင်သဝ်း တေႇပေႃးပူဝ်းၼႆႉ သိုၵ်းမၢၼ်ႈၵုမ်းဢဝ်ဝႆႉ ႁိုင်မႃးၶၢဝ်းတၢင်း 3 ပီ၊ ပဵၼ်ဢွင်ႈတီႈ လွင်ႈယႂ်ႇတႃႇသဵၼ်ႈတၢင်း မျႃႉဝတီႇ – ဝေႃႇလေႇ။

ၵဵဝ်ႇၵပ်းပၢင်တိုၵ်းတီႈ လႅၼ်လိၼ်ထႆး – မၢၼ်ႈၼၼ်ႉ သိုၵ်းမၢၼ်ႈ ဢမ်ႇပိုၼ်ၽၢဝ်ႇပဵၼ်တၢင်းၵၢၼ်သင်။ ယွၼ်ႉပၢင်တိုၵ်းသေ ၾၢႆႇတပ်ႉပႂ်ႉလႅၼ်လိၼ်ထႆးၵေႃႈ တူင်ႉၼိုင်ပႂ်ႉတူၺ်းၸွမ်းဝႆႉယူႇၼႆ သိုဝ်ႇထႆးႁၢႆးငၢၼ်းဝႆႉၼင်ႇၼႆ။