တႃႇၵမ်ႉၸွႆႈ သိုၵ်းမၢၼ်ႈလႄႈ ပျီႇတူႉၸိတ်ႉ PNO ၼႆသေ ၵၢင်ႉၵႄႇၼႂ်းပွၵ်ႉဝဵင်းပၢင်လွင်း ၸိုင်ႈတႆး ပွတ်းၸၢၼ်း လူင်းၵဵပ်းငိုၼ်းၵူၼ်းမိူင်း ဝႃႈၼႆ။
တႄႇႁူဝ်လိူၼ် ၵျုၼ်ႊၼႆႉမႃး ၵၢင်ႉၵႄႇၼႂ်းပွၵ်ႉ ဝဵင်းပၢင်လွင်း ပၼ်ၶေႃႈဢၢင်ႈဝႃႈ တႃႇၵမ်ႉၸွႆႈ ၼႂ်းပွၵ်ႉၼႂ်းယွမ်ၼႆသေ လူင်းၵဵပ်းငိုၼ်းၵူၼ်းမိူင်းၼိုင်ႈႁိူၼ်းလႂ် 2 မိုၼ်ႇပျႃး။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃးၼႆႉ မႃးၵဵပ်းၼိုင်ႈႁိူၼ်း 2 မိုၼ်ႇ ၶဝ်မႃးၵဵပ်းၼႆႉ ၶဝ် ဢမ်ႇလၢတ်ႈဝႃႈ တႃႇၵမ်ႉၸွႆႈသိုၵ်းမၢၼ်ႈၼႆၵမ်းသိုဝ်ႈ၊ ၶဝ်မႃးလၢတ်ႈဝႃႈ တႃႇ ၸွႆႈၼႂ်းပွၵ်ႉၼႂ်းယွမ်ၼႆ၊ ၵူၺ်း ပဵၼ်တႃႇ ၵမ်ႉၸွႆႈသိုၵ်းမၢၼ်ႈၼၼ်ႉယဝ်ႉ၊ ၶဝ်ၸႂ်ႉၶေႃႈၵႂၢမ်းႁၢင်ႈလီလီသေ လူင်းၵဵပ်းငိုၼ်း ၊ ၵူၼ်းပိုၼ်ႉ တီႈၵေႃႈ ၵႃႈလႆႈပၼ်ဢေႃႈ ၊ ၼိုင်ႈလိူၼ် – သွင်လိူၼ်ၼႆႉ လႆႈပၼ်တႃႇသေ လႆႈပၼ် 3-4 ပွၵ်ႈယဝ်ႉ”- ဝႃႈၼႆ ။
တီႈဝဵင်းပၢင်လွင်းၼႆႉ မီး 8 ပွၵ်ႉ၊ ၵၢင်ႉၵႄႇလူင်းၵဵပ်းငိုၼ်း တႃႇၵဵပ်းၸွႆႈသိုၵ်းမၢၼ်ႈ ၵူႈပွၵ်ႉ။ လိူဝ်သေ လႆႈ သႂ်ႇငိုၼ်း ၵမ်ႉၸွႆႈယဝ်ႉ ၽွင်းသိုၵ်းမၢၼ်ႈ တၢင်းပျီတူႉၸိတ်ႉပဢူဝ်း PNO ထႅမ်ႁႅင်းသိုၵ်း ပဵၼ်ပၢင်တိုၵ်း ၵၼ်တင်း ၸုမ်းၵႅတ်ႇၶႄႇၵူၼ်းမိူင်း PDF တီႈတၢင်းဝၢၼ်ႈသွင်းပျွင်းၼၼ်ႉၵေႃႈ ၵူၼ်းမိူင်းဝဵင်းပၢင်လွင်း လႆႈႁဵတ်းႁေႃႇၶဝ်ႈသူင်ႇပၼ် သိုၵ်းမၢၼ်ႈတင်း ပျီတူႉၸိတ်ႉ ၼိုင်ႈပွၵ်ႈ တႃႇႁူဝ်ၵူၼ်း 400 ၵေႃႉ ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ငိုၼ်းဢၼ်ၶဝ်ၵဵပ်းလႆႈၼၼ်ႉၵေႃႈ ၶဝ်ဢဝ်ၸႂ်ႉ ၽွင်းမိူဝ်ႈ သိုၵ်းမၢၼ်ႈတင်းPDF ပဵၼ်ပၢင်တိုၵ်းၵၼ်တီႈသွင်းပျွင်းၼႆႉ ၵၢင်ႉၵႄႇၼႂ်းပွၵ်ႉ ၸၢင်ႈၵူၼ်း ႁုင်ၶဝ်ႈၽၵ်း ပွၵ်ႉလႂ်ပွၵ်ႉၼၼ်ႉ သူင်ႇပၼ် ၼိုင်ႈဝၼ်းၼိုင်ႈပွၵ်ႉ တႃႇႁူဝ်ၵူၼ်း 400 ၵေႃႉ၊ ဢမ်ႇၵႃးၼႂ်းဝဵင်းၵူၺ်း ႁိမ်းၸမ်ဝၢၼ်ႈၸိူဝ်းၼႆႉၵေႃႈ ၶဝ်ၸႂ်ႉသူင်ႇႁေႃၶဝ်ႈၵူႈဝၼ်းယဝ်ႉ”- ဝႃႈၼႆ။
မိူၼ်ၼင်ႇၼႆမိူဝ်ႈ ဝၼ်းတီႈ 02/06/2025 တီႈဝၢၼ်ႈသီႇၵိပ်ႇလႄႈ ဝၢၼ်ႈၽြႃးၽိူၵ်ႇ ဢၼ်မီးၾၢႆႇႁွင်ႇ ယၢၼ်ၵႆၵၼ်တၢင်းဝဵင်းပၢင်လွင်း 20 လၵ်းၼၼ်ႉၵေႃႈ ၵၢင်ႉၵႄႇလူင်းၵဵပ်း ငိုၼ်းတႃႇၵမ်ႉထႅမ်ပၼ် သိုၵ်းမၢၼ်ႈ ၼိုင်ႈႁိူၼ်း လႆႈပၼ် 15,000 ပျႃး ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ငိုၼ်းၼႆႉ ၶဝ်ၵဵပ်းႁိုင်ယဝ်ႉ၊ ၼႂ်းၸႄႈဝဵင်းပၢင်လွင်းၼႆႉ ၶဝ်ၶႂ်ႈၵဵပ်းၵႂႃႇၵူႈတီႈယဝ်ႉ၊ တၢင်းဝၢၼ်ႈသီႇၵိပ်ႇ ဝၢၼ်ႈၽြႃးၽိူၵ်ႇ ၸိူဝ်းၼႆႉၵေႃႈၵဵပ်း၊ ပေႃးပဵၼ်ဝၢၼ်ႈပဢူဝ်း မိူၼ် ၼွင်တရႃး ၊ ၸၢမ်ၵႃး ၸိူဝ်းၼႆႉ လႆႈပၼ်ပႃး တႃႇပျီႇတူႉၸိတ်ႉထႅင်ႈ ၵူၼ်းမိူင်းလႆႈယၢပ်ႇၸႂ်ၼႃႇ”- ဝႃႈၼႆ။
တႄႇဝၼ်းတီႈ 17/05/2025 ၼႆႉမႃးတေႃႇထိုင်ဝၼ်းတီႈ 29/05/2025 ၼႆႉ သိုၵ်းမၢၼ်ႈတင်း ပျီႇတူႉၸိတ်ႉ ပဢူဝ်း PNO ႁူမ်ႈၵၼ်ပိုတ်းယိုဝ်းၵၼ်တင်း ၸုမ်းၵႅတ်ႇၶႄႇၵူၼ်းမိူင်း PDF ႁၢဝ်ႈႁႅင်း ၶိုၼ်းတၢင်းဝၢၼ်ႈ သွင်းပျွင်း ၾၢႆႇတၢင်းသိုၵ်းမၢၼ်ႈ ဢဝ်ၾႆးၽဝ်ႁိူၼ်းၵူၼ်းပိုၼ်တီႈ ပႃးၵူၼ်းမိူင်း လႆႈငိူင်ႉပၢႆႈၽေးသိုၵ်း ႁူဝ်ၵူၼ်းမီး 2,000 ပၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ