တႄႇႁၢင်လိူၼ်မေႊမႃး တေႃႇပေႃးထိုင် ၼႂ်းႁူဝ်လိူၼ်ၵျုၼ်ႊၼႆႉ ပလိၵ်ႈၾၢႆႇၵုမ်းရူတ်ႉၵႃး ဢွၵ်ႇတီႉၺွပ်းရူတ်ႉၶိူင်ႈ လႄႈ ၵႃး ၸိူဝ်းဢမ်ႇမီးဝႂ် ( လၢႆႊသိၼ်ႊ)  – ၸိူဝ်းၶဝ် ဢွၵ်ႇပႂ်ႉၸွမ်းသဵၼ်ႈတၢင်းလူင်၊ ၸွမ်းပွၵ်ႉ၊ ၸွမ်းၵိဝ်ႇသေတီႉၺွပ်း ၼႂ်းၸႄႈဝဵင်းဢၼ်သိုၵ်းမၢၼ်ႈယိုတ်းမိူင်း ၵုမ်းၵမ်ဝႆႉ ၸိုင်ႈတႆးပွတ်းႁွင်ႇ၊ ပွတ်းၸၢၼ်း ၸဵမ်ၸိူဝ်း ၼႆႉ။

 ဝၼ်းတီႈ 1/6/2025  ၼၼ်ႉ ပလိၵ်ႈၾၢႆႇၵုမ်းရူတ်ႉၵႃး လႄႈ ၸုမ်းပလိၵ်ႈၾၢႆႇတႂ်ႈသိုၵ်းမၢၼ်ႈၵုမ်းၵမ် ႁူမ်ႈၵၼ် သေ ပႂ်ႉၸွမ်းပွၵ်ႉ၊ ၸွမ်းၵိဝ်ႇ၊ သဵၼ်ႈတၢင်းဢွၼ်ႇ၊ သဵၼ်ႈတၢင်းလူင် ၼႂ်းၸႄႈဝဵင်းတူၼ်ႈတီး။ ပိူဝ်ႈတႃႇတီႉၺွပ်း ရူတ်ႉၵႃး ၸိူဝ်းဢမ်ႇမီးဝႂ် လၢႆႊသိၼ်ႊ ပဵၼ်တၢင်းၵၢၼ်။ ရူတ်ႉၵႃး လႄႈ ရူတ်ႉၶိူင်ႈၸိူဝ်းၺႃးတီႉၺွပ်းၼၼ်ႉ ဢမ်ႇၸၢင်ႈထုတ်ႇဢဝ် ၶိုၼ်းလႆႈၼႆ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဝဵင်းတူၼ်ႈတီႈၵေႃႉၼိုင်ႈ လၢတ်ႈၼႄၼင်ႇၼႆ။

“ၵႃးဢွၼ်ႇၶႃႈ ၶႃႈၵၼ်ႉၼႅတ်ႈၶတ်းၸႂ်ႁဵတ်းၵၢၼ်ႁႄ ႁွမ်ငိုၼ်းၵႃႈႁိူဝ်ႇၵႃႈၶႆး ၵႃႈႁႅင်းၶႃႈႁႄသိုဝ်ႉဝႆႉၼၼ်ႉ ၺႃးၶဝ်ၺွပ်း ဢဝ်ၵႂႃႇယဝ်ႉ။ တေလႆႈၵႂႃႇထုတ်ႇဢဝ်တီႈႁူင်းပလိၵ်ႈလႂ် ႁိမ်းလႂ်ၼႆၵေႃႈ ဢမ်ႇလၢတ်ႈသင်။ ပေႃးႁေႉၵိုတ်းၵေႃႈ ထတ်းထၢမ်ႁႄ ပေႃးဢမ်ႇမီးၸွမ်းၼင်ႇၶဝ်မၵ်းမၼ်ႈဝႆႉၼၼ်ႉၼႆ ယွင်ႈၵႂႃႇၵမ်းလဵဝ်ယဝ်ႉ။ မၢင်ၸိူဝ်းထၢင်ႇဝႃႈ ပေႃးပဵၼ် ၵႃးတီႈၵျွင်းမုၼ်ၸဝ်ႈၼႆဢမ်ႇၺွပ်းယူဝ်ႉၼႆ ၶီႇၵႃးၵျွင်းၵႂႃႇ။ ၼၼ်ႉၵေႃႈ ၶဝ်ဢမ်ႇဝႆႉၵွႆး။ ပၢႆၶဝ်ႈၺွပ်းထိုင် ၼႂ်းဝၢင်းၵျွင်း မုၼ်ၸဝ်ႈထႅင်ႈၵွၼ်ႇ။ ပေႃးမီးၵူၼ်းပၼ်ၶၢဝ်ႇၼႆ ၶဝ်ႈၺွပ်းဢဝ်ထိုင် ၼႂ်းႁိူၼ်းၸိူဝ်းၼႆႉၵွၼ်ႇ။ ၵၢင်ၶမ်ႈၵၢင်ၶိုၼ်းၵေႃႈ ဢမ်ႇဝႆႉ။ ၺွပ်းတိၵ်းတိၵ်းယဝ်ႉ။”

ၸုမ်းပလိၵ်ႈၾၢႆႇၵုမ်းရူတ်ႉၵႃး လႄႈ ပလိၵ်ႈတႂ်ႈသိုၵ်းမၢၼ်ႈၵုမ်းၵမ်ၶဝ် ၽႅၼ်ၵၢၼ်ဝႆႉ တေသိုပ်ႇႁၢင်ႈႁႅၼ်း တီႉၺွပ်းၵႂႃႇ ၼႂ်းၸႄႈဝဵင်းဢၼ်သိုၵ်းမၢၼ်ႈၵုမ်းၵမ်ဝႆႉ ၼႂ်းမိူင်းတႆးပွတ်းႁွင်ႇ လႄႈ ပွတ်းၸၢၼ်း၊ ပွတ်းဢွၵ်ႇၸဵမ်ၸိူဝ်းၼႆႉ တင်းသဵင်ႈ ဝႃႈၼႆ။

ၵဵဝ်ႇၵပ်းလူၺ်ႈ ၵၢၼ်တီႉၺွပ်းရူတ်ႉၵႃး ၼႂ်းမိူင်းတႆးပတ်းပိုၼ်ႉၼႆႉ သင်ဝႃႈ ဢဝ်ငိုၼ်းၼမ်ၼမ်ၵႂႃႇထုတ်ႇဢွၵ်ႇမႃးၶိုၼ်း တႄႉ ၾၢႆႇပလိၵ်ႈၶဝ် ပွႆႇပၼ်ၶိုၼ်းယူႇၵမ်ႈၽွင်ႈၼႆ ၸဝ်ႈၵႃး ဢၼ်လႅၼ်ႈၸွမ်းသဵၼ်ႈတၢင်း မိူင်းတႆးပွတ်းႁွင်ႇ ၵႂႃႇပွတ်းၸၢၼ်းၵေႃႉၼိုင်ႈ လၢတ်ႈၼႄၼင်ႇၼႆ။

“ပေႃးတေႁဵတ်းဝႂ် လၢႆႊသိၼ်ႊၵေႃႈ ၵႃႈမၼ်းႁမ်ႉသုင်ၼႃႇ။ ပေႃးတၢၼ်ႇၵႃႈၵႃးဢမ်ႇမီးဝႂ်သွင်လမ်းယဝ်ႉလႄႇ။ ၵွပ်ႈၼၼ် ႁဝ်းၵေႃႈဢမ်ႇႁဵတ်းဝႂ် လၢႆႊသိၼ်ႊႁင်။ ပေႃးၺႃးၺွပ်းၵေႃႈ ဢဝ်ငိုၼ်းယဵတ်ႈယွတ်ႈပၼ်ၶဝ်ၼမ်ဢိၼ်ႉႁႄၵႂႃႇလႆႈယူႇ။ ပေႃးႁဵတ်း လၢႆႊသိၼ်ႊႁမ်ႉ ၶၵ်ႉၵၢၼ်မၼ်းၼမ်ၼႃႇ။ ယဝ်ႉၵေႃႈ တႃႇတေလႆႈၼႆႉ ႁိုင်ထူၼ်ႈယဝ်ႉ။ ပေႃးသိုဝ်ႉၵႃး ၼိုင်ႈလမ်း 100 သႅၼ်ၼႆ ၵႃႈႁဵတ်း လၢႆႊသိၼ်ႊမၼ်းပေႃးပဵၼ်ယူႇ 200 သႅၼ်ယဝ်ႉ။ ရူတ်ႉၶိူင်ႈၵေႃႈ မိူၼ်ၼၼ်ၵွႆး။ ပေႃး ၼၼ်ၼႆ ၽႂ်ႁမ်ႉတေႁဵတ်းလႆႈယဝ်ႉလႃႇ။ ၾၢႆႇၶဝ်ႁမ်ႉ ဢမ်ႇလူတ်းပၼ်ၵႃႈႁဵတ်းဝႂ်မၼ်းလူး။ ပေႃးယဝ်ႉ ၶႃႈႁၢပ်ႇၵၢၼ် ၶုၼ်ၸိူဝ်းႁဵတ်းၼႂ်းႁွင်ႈၵၢၼ်ၸိူဝ်းၼၼ်ႉၵေႃႈ လၢတ်ႈၵႂၢမ်းၶႅင်ၼႃႇ။ ပေႃးၶဝ်မႃးပႂ်ႉၸွမ်းတၢင်းၼႆ ပေႃးလူဝ်ႇယွၼ်းၵိၼ် ယဝ်ႉ ၼိုင်ႈပွၵ်ႈ 5000 ပျႃး၊ ၼိုင်ႈမိုၼ်ႇၸိူဝ်းၼႆႉ။”

ၸူဝ်ႈၶၢဝ်းယၢမ်း ၾၢႆႇပလိၵ်ႈၶဝ် ပႂ်ႉၵူတ်ႇထတ်းတီႉၺွပ်း ရူတ်ႉၵႃးဢမ်ႇမီးဝႂ် လၢႆႊသိၼ်ႊၼၼ်ႉၼႆ ၵူၼ်းမိူင်းၼႂ်းပိုၼ်ႉတီႈ ႁူပ်ႉတၢင်းယၢပ်ႇတႃႇၵႂႃႇသိုဝ်ႉတၢင်းၶၢႆ လႄႈ ႁပ်ႉသူင်ႇ လုၵ်ႈဢွၼ်ႇႁဵၼ်း ဢိၵ်ႇပႃး ၼႂ်းၵၢၼ်ဢွၵ်ႇၶၢဝ်းတၢင်းၸိူဝ်းၼႆႉ ၵေႃႈ မီးပၼ်ႁႃလၢႆလၢႆလွင်ႈ ဝႃႈၼႆ။

ၼႂ်းမိူင်းတႆးပွတ်းၸၢၼ်းၼႆႉ ၾၢႆႇပလိၵ်ႈၶဝ် တီႉၺွပ်း ရူတ်ႉၵႃးဢမ်ႇမီးဝႂ် လၢႆႊသိၼ်ႊ ၸိူဝ်းပဵၼ်ၼႂ်းဝဵင်းလူင်တူၼ်ႈတီး၊ ဢွင်ႇပၢၼ်း၊ လွၵ်ႉၸွၵ်ႇ၊ ပၢင်လွင်း၊ ႁၢႆးဝူဝ်း၊ ယွင်ႁူၺ်ႈ၊ ပၢင်လူင်၊ လွႆလႅမ်၊ မိူင်းပွၼ် ၸိူဝ်းၼႆႉၵွႆးဢမ်ႇၵႃး ၼႂ်းမိူင်းတႆး ပွတ်းဢွၵ်ႇ ဝဵင်းတႃႈၶီႈလဵၵ်းၸိူဝ်း ၼႆႉၵေႃႈ ပလိၵ်ႈၶဝ် သွၵ်ႈႁႃလမ်းတီႉၺွပ်းယူႇမိူၼ်ၵၼ် ဝႃႈၼႆ။

တႅမ်ႈ- ၼၢင်းၽူၺ်းၼုမ်ႇ