ဝၼ်းတီႈ 1/6/2025 ၼႆႉ ၾၢႆႇသိုၵ်းမၢၼ်ႈယိုတ်းမိူင်း ဢၼ်ၶဝ်ႈၵုမ်းၵမ်ၶိုၼ်း ဝဵင်းလႃႈသဵဝ်ႈၼၼ်ႉ တႄႇပိုတ်ႇ ႁူင်းႁဵၼ်းၵႂႃႇ တႃႇ 42 လင် တီႈၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
တႃႇပီၵၢၼ်ႁဵၼ်း 2025-2026 ၼႆႉ ပိုတ်ႇႁူင်းႁဵၼ်းၸၼ်ႉသုင်ၵႂႃႇ တႃႇ 14 လင်၊ ၸၼ်ႉၵၢင် 20 လင်၊ ၸၼ်ႉဢွၼ်ႇ 4 လင်၊ ႁူင်းႁဵၼ်းသွၼ်လိၵ်ႈၵျွင်းမုၼ်ၸဝ်ႈ တႃႇ 4 လင်။ လုၵ်ႈႁဵၼ်းၸိူဝ်းၵႂႃႇၶိုၼ်ႈႁူင်းႁဵၼ်း ၼႂ်းဝၼ်းတီႈ 2/6/2025 ၼႆႉ မီးယူႇမွၵ်ႈ သွင်မိုၼ်ႇၵေႃႉ။
ၵူၼ်းမိူင်းၼႂ်းပိုၼ်ႉတီႈဝဵင်းလႃႈသဵဝ်ႈၵေႃႉၼိုင်ႈ လၢတ်ႈၼႄငဝ်းလၢႆးလုၵ်ႈႁဵၼ်း ၼႂ်းဝဵင်းလႃႈသဵဝ်ႈ တီႈၽူႈတွႆႇႁွၵ်ႈဝႃႈ “ၸႂ်ႈယဝ်ႉၶႃႈ ဢၼ်ၶဝ်ပိုတ်ႇၼႆႉ တေမီးယူႇ 40 ၵျွင်းပၢႆ။ ပေႃးတူၺ်းၸွမ်းႁူဝ်ၼပ်ႉလုၵ်ႈဢွၼ်ႇ ဢၼ်ၵႂႃႇၶိုၼ်ႈႁူင်းႁဵၼ်း ၵျွင်းလႂ်ၵျွင်းၼၼ်ႉတႄႉၵေႃႈ ဢမ်ႇပေႃးၼမ်။ မၼ်းႁၼ်ဢေႇလိူဝ်ၵူႈပွၵ်ႈတေႉတေႉ။ ၵမ်ႈၽွင်ႈၵေႃႈ ပေႃႈမႄႈ လုၵ်ႈဢွၼ်ႇ ဢမ်ႇတမ်းၸႂ်တႃႇဝႆႉတီႈလႃႈသဵဝ်ႈၼႆႁႄ ၵႂႃႇၶိုၼ်ႈၵျွင်းတၢင်ႇဝဵင်း၊ ၵမ်ႈၽွင်ႈၵေႃႈ ဢမ်ႇပေႃးၶႂ်ႈပႃးၸႂ် လိၵ်ႈ ယဝ်ႉလႄႈ ဢမ်ႇၵႂႃႇႁဵၼ်းၵေႃႈမီး” ဝႃႈၼႆ။
ႁွင်ႈၵၢၼ်ၾၢႆႇပၢႆးပၺ်ႇၺႃႇ ၾၢႆႇတႂ်ႈသိုၵ်းမၢၼ်ႈၵုမ်းၵမ် ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်တႄႉဝႃႈ ပေႃႈမႄႈလုၵ်ႈဢွၼ်ႇ ၸိူဝ်းမႃးသႂ်ႇသဵၼ်ႈၸိုဝ်ႈလုၵ်ႈႁဵၼ်း တွၼ်ႈတႃႇတေၶဝ်ႈႁဵၼ်းသွၼ်လိၵ်ႈ ၼႂ်းႁူင်းႁဵၼ်း ဢၼ်သိုၵ်းမၢၼ်ႈယိုတ်းမိူင်း ပိုတ်ႇၼႂ်းဝဵင်းလႃႈသဵဝ်ႈၼၼ်ႉ တေႃႇထိုင် လိူၼ်ၵျုၼ်ႊ ဝၼ်းတီႈ 2 ၼႆႉ လုၵ်ႈႁဵၼ်းၸၼ်ႉ သုင်မီးယူႇ 1250 ၵေႃႉ၊ ၸၼ်ႉၵၢင်မီးယူႇ 3500 ၵေႃႉ၊ ၸၼ်ႉဢွၼ်ႇ မီးယူႇ 13500 ၵေႃႉ ဝႃႈၼႆ။
တီႈဝဵင်းလႃႈသဵဝ်ႈၼႆႉ ၾၢႆႇသိုၵ်းမၢၼ်ႈယိုတ်းမိူင်းၶဝ် ၸီႉသင်ႇႁႂ်ႈၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ၾၢႆႇပၢႆးပၺ်ႇၺႃႇ ပိုတ်ႇႁပ်ႉ သဵၼ်ႈၸိုဝ်ႈလုၵ်ႈႁဵၼ်း တင်ႈတႄႇ လိူၼ်မေႊ ဝၼ်းတီႈ 22 တေႃႇ ႁူဝ်လိူၼ်ၵျုၼ်ႊ။ ပိုတ်ႇလႆႈႁူင်းႁဵၼ်း ၸိူဝ်းမီးယူႇၼႂ်းဝဵင်း ၸိူဝ်းၶဝ်ႈပႃးၼႂ်း 12 ပွၵ်ႉၼၼ်ႉၵွႆး ၼႆယဝ်ႉ။
တႅမ်ႈ-ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ