မိူဝ်ႈႁၢင်လိူၼ်မေႊၼႆႉ တူဝ်တႅၼ်းၸုမ်းသိုၵ်းၶၢင် KIA လႄႈ တူဝ်တႅၼ်း သိုၵ်းရၶႅင်ႇ AA လႆႈၵႂႃႇႁူပ်ႉၵၼ်တင်း တိူင်ႉသျီႊ ၵျုၼ်ႊ (Deng Xijun) ၽွင်းလူင် ၾၢႆႇၼွၵ်ႈမိူင်း တူဝ်တႅၼ်းလူင်ပွင်ၸိုင်ႈမိူင်းၶႄႇ တီႈၼႂ်းမိူင်းၶႄႇသေ ၾၢႆႇမိူင်းၶႄႇ လၢတ်ႈပၼ်ႁႅင်းဢီး ႁႂ်ႈၵိုတ်းၵၢၼ်လေႃႇတိုၵ်းသိုၵ်းမၢၼ်ႈ ၼႂ်းၸႄႈဝဵင်းမၢၼ်ႈမေႃႇ လႄႈ ၸႄႈဝဵင်းၵျွၵ်ႉၽိဝ်ႇ  ။

လႆႈႁူႉဝႃႈ တိူင်ႉသျီႊၵျုၼ်ႊ (Deng Xijun) လၢတ်ႈတီႈၸုမ်းသိုၵ်းၶၢင် KIA ဝႃႈ ပိူဝ်ႈတႃႇယုၵ်ႉမုၼ်းလွင်ႈမိုတ်ႈၵိုဝ်းၸမ်ၸႂ် ၵၼ်ၶိုၼ်ႈသင်ႉသုင်ထႅင်ႈၼၼ်ႉ ၶႂ်ႈႁႂ်ႈၵိုတ်းၵၢၼ်လေႃႇတိုၵ်းသိုၵ်းမၢၼ်ႈ တီႈဝဵင်းမၢၼ်ႈမေႃႇ။ ၾၢႆႇသိုၵ်းရၶႅင်ႇ AA ၵေႃႈ  ၶႂ်ႈႁႂ်ႈၵိုတ်းၵၢၼ်လေႃႇတိုၵ်း သိုၵ်းမၢၼ်ႈ တီႈဝဵင်းၵျွၵ်ႉၽိဝ်ႇ ဢွင်ႈတီႈမီးႁူင်းၸၢၵ်ႈတေႃႈလွတ်ႇၵႅတ်ႉသ်မိူင်းၶႄႇ ၼၼ်ႉ ဝႃႈၼႆ။

ၽူႈလူင်ႉလႅၼ်ႇၾၢႆႇၵၢၼ်မိူင်း မိူင်းတႆးၵေႃႉၼိုင်ႈ လၢတ်ႈၼႄဝႃႈ “ တၢင်းယိူင်းဢၢၼ်းမိူင်းၶႄႇတႄႉ ပိူဝ်ႈတႃႇၵိုတ်းၵၢၼ် ၵိုတ်းတိုၵ်းၵူႈၸုမ်းၼၼ်ႉၵွႆး။ ပေႃးယဝ်ႉ မၼ်းတေႁႂ်ႈဢုပ်ႇဢူဝ်းတင်းသိုၵ်းမၢၼ်ႈ။ ပေႃးထိုင်မႃး ၼႂ်းလိူၼ်ဢေႃးၵၢတ်ႉသ် ၼႆႉ ၾၢႆႇမိူင်းၶႄႇ ႁွင်ႉဢဝ်ၸုမ်းသိုၵ်းတဢၢင်းဝႆႉ တႃႇဢုပ်ႇဢူဝ်းၵၼ်ထႅင်ႈ။ ပေႃးတူၺ်းငဝ်းလၢႆးယၢမ်းလဵဝ်ၼႆၸိုင် တူၺ်းၾၢႆႇမိူင်းၶႄႇၼႆႉ လမ်ႇလွင်ႈသုတ်း မိူၼ်ႁၢင်ႈမၼ်းၵူဝ်ၸုမ်းသိုၵ်းမၢၼ်ႈတႅၵ်ႇယၢႆႈဝႆႉ။ ၵွပ်ႈၼၼ် ၼင်ႇႁိုဝ် ၸုမ်း သိုၵ်းမၢၼ်ႈတေဢမ်ႇတႅၵ်ႇၼၼ်ႉ မၼ်းၸင်ႇၶတ်းၸႂ်သၢင်ႈႁႂ်ႈၸုမ်းသိုၵ်းၸၢဝ်းၶိူဝ်းၵိုတ်းတိုၵ်း။ ၵူၺ်းၵႃႈ ၼႂ်းပၢင်လုၵ်ႉ ၽိုၼ်ႉၼႆႉသမ်ႉ ပႃးဝႆႉၸုမ်း PDF ။ ၸုမ်းၼႆႉသမ်ႉ မၼ်းဢမ်ႇဝူၼ်ႉသွၼ်ႇပႃးၼႆတႄႉ တႃႇဝၢၼ်ႈမိူင်းတႄႇၼိမ်တႄႉ တေပႆႇၸၢင်ႈပဵၼ်လႆႈ” ဝႃႈၼႆ။

ဢိင်ၼိူဝ်ပၢင်တိုၵ်း တီႈဝဵင်းဝၢၼ်ႈမေႃႇၼၼ်ႉသေ ၸဝ်ႈသိုၵ်းလူင် ၼေႃႇပူႇ ၽူႈမီးပုၼ်ႈၽွၼ်းႁွင်ႈၵၢၼ်ၾၢႆႇပွင်ႇၶၢဝ်ႇ သိုၵ်းၶၢင် KIO ယၢမ်ႈလၢတ်ႈဝႆႉဝႃႈ ၸတ်းႁဵတ်းပၢင်တိုၵ်းၵၼ်မႃးႁိုင်မွၵ်ႈ 6 လိူၼ်ယဝ်ႉသေ ယိုတ်းလႆႈ ငဝ်ႈတပ်ႉၵွင် လၢႆလၢႆတီႈလႄႈ ၵုမ်းၵမ်လႆႈ လၢႆ လၢႆပွၵ်ႉၼႂ်းဝဵင်းဝၢၼ်ႈမေႃႈ(ဗန်းမော်)သေတႃႉ ယင်းတိုၵ်ႉၵိုတ်း တပ်ႉၵွင် ၶလရ 47 လႄႈ တပ်ႉငဝ်ႈငုၼ်းၵမ်းၵုမ်ၵၢၼ်သိုၵ်း မၢႆ 21 ထႅင်ႈယူႇ ၼႆယဝ်ႉ။

မိူဝ်ႈဝၼ်းတီႈ 20 လိူၼ်မေႊၼၼ်ႉၵေႃႈ ၾၢႆႇသိုၵ်းၶၢင် KIA ယိုဝ်းတူၵ်းလႆႈ ၶိူင်ႈမိၼ်သိုၵ်းမၢၼ်ႈ 2 လမ်း ဢၼ်တေႃႉၶိူင်ႈ ၵွင်ႈၵၢင်ႇလႄႈ ၵူၼ်းသိုၵ်းမၢၼ်ႈမႃးၽိူမ်ႉႁႅင်း တီႈဝဵင်းမၢၼ်ႈမေႃႇသေ ၾၢႆႇသိုၵ်းမၢၼ်ႈၵေႃႈ ၸႂ်ႉတိုဝ်းၶိူင်ႈတရူၼ်း လႄႈ ၶိူင်ႈ မိၼ်ၸိူဝ်းၼႆႉသေ တိုၵ်းၶိုၼ်းႁၢဝ်ႈႁႅင်းယူႇ။

ဝၢႆးလင်ပၢင်ယၼ်ႇသိုၵ်း 1027 မႃး ၽွင်းၶၢဝ်းသိုၵ်းမၢၼ်ႈ သုမ်းသိုၵ်းယူႇၶိူဝ်းၶိူဝ်းယႂ်းယႂ်းၼၼ်ႉ ၾၢႆႇလူင်ပွင်ၸိုင်ႈမိူင်းၶႄႇ ၶဝ်ႈယူႇၵႄႈၵၢင်သေ ႁဵတ်းၶဵဝ်ဢုပ်ႇဢူဝ်းပၼ်တီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း MNDAA၊ TNLA၊ AA၊ KIA ၸိူဝ်းၼႆႉ သေ ပၼ်ႁႅင်းဢီးလၢတ်ႈႁႂ်ႈၵိုတ်းၵၢၼ်လေႃႇတိုၵ်းသႂ်ႇၸုမ်းသိုၵ်းမၢၼ်ႈယိုတ်းမိူင်းမႃးယူႇ ဢမ်ႇထၢတ်ႇ။

မိူဝ်ႈတႄႇႁွင်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းဢုပ်ႇဢူဝ်းၼၼ်ႉ ၾၢႆႇမိူင်းၶႄႇ ႁွင်ႉဢဝ် ၸုမ်းသိုၵ်းၵဝ်ႈၵၢင်ႉ MNDAA၊ သိုၵ်းလွႆ TNLA သိုၵ်းရၶႅင်ႇ AA ၶဝ်ၵႂႃႇဢုပ်ႇဢူဝ်းၸွမ်းၵၼ်သေတႃႉ ယွၼ်ႉႁဵတ်းၶေႃႈတူၵ်းလူင်းၵၼ်ယၢပ်ႇၵိၼ်းလႄႈ ဝၢႆးလင်မႃး ၸင်ႇတႅပ်းတတ်း ႁွင်ႉဢဝ်ၵႂႃႇ ၵမ်းၸုမ်းၸုမ်းသေ ဢုပ်ႇဢူဝ်းမိပ်ႇငႅၼ်းပၼ်ႁႅင်းဢီး ႁႂ်ႈၵိုတ်းၵၢၼ်တိုၵ်းၸွမ်း သိုၵ်းမၢၼ်ႈ ၼၼ်ႉယဝ်ႉ။

ယွၼ်ႉလူင်ပွင်ၸိုင်ႈမိူင်းၶႄႇ ပၼ်ႁႅင်းဢီး မိပ်ႇငႅၼ်းလႄႈ သိုၵ်းၵဝ်ႈၵၢင်ႉ MNDAA ပေႃးလႆႈထွႆဢွၵ်ႇပၼ်ၶိုၼ်း တီႈၼႂ်း ဝဵင်းလႃႈသဵဝ်ႈသေ ဢွၵ်ႇၵႂႃႇယူႇဝႆႉၾၢႆႇၼွၵ်ႈ ၸွမ်းသၢပ်ႇဝဵင်းလႃႈသဵဝ်ႈ။ မိူဝ်ႈႁၢင်လိူၼ်ဢေႊပရႄႊ ၼၼ်ႉၵေႃႈ ၾၢႆႇလူင် ပွင်ၸိုင်ႈမိူင်းၶႄႇ ႁွင်ႉဢဝ် သိုၵ်းတဢၢင်း TNLA ၵႂႃႇဢုပ်ႇဢူဝ်း လွင်ႈႁႂ်ႈၵိုတ်းတိုၵ်းတီႈဝဵင်းၼွင်ၶဵဝ်၊ ၵျွၵ်ႉမႄးၸိူဝ်းၼႆႉ သေ ႁႂ်ႈထွႆဢွၵ်ႇပၼ် ၼႂ်းဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းၵုတ်ႈ လႄႈ မိူင်းမိတ်ႈ။

ပေႃးထိုင်မႃးႁၢင်လိူၼ်ဢေႃးၵၢတ်ႉသ်ၼႆႉ ၾၢႆႇလူင်ပွင်ၸိုင်ႈမိူင်းၶႄႇ ႁွင်ႉဢဝ် ၸုမ်းသိုၵ်းတဢၢင်း TNLA ၵႂႃႇဢုပ်ႇဢူဝ်း ၵၼ်ထႅင်ႈ ပိူဝ်ႈတႃႇၵၢၼ်ၵိုတ်းတိုၵ်း ဝႃႈၼႆ။

တႅမ်ႈ- ၽူၺ်းၼုမ်ႇ