ဝၼ်းတီႈ 30/05/2025 ယၢမ်းၵၢင်ဝၼ်း ပလိၵ်ႈမၢၼ်ႈသိုၵ်းမၢၼ်ႈ ၵူတ်ႇထတ်းရူတ်ႉၵႃး ဢၼ်ဢမ်ႇမီး ဝတ်းဝႂ်လၢႆႊသိၼ်ႊ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

ၼၢင်းယိင်း ၵူၼ်းမိူင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃး တႄႇတီႉတီႈတၢင်းလဵပ်ႈဝဵင်းတူၼ်ႈတီးလႄႈ တၢင်းဢထၵ 4 ပလိၵ်ႈသိုၵ်းမၢၼ်ႈ ၵူတ်ႇထတ်းၵႃး ၸိူဝ်းဢမ်ႇမီးလၢႆႊသိၼ်ႊ၊ ၵူႈပွၵ်ႈတႄႉ ၶဝ်ၵူတ်ႇထတ်းရူတ်ႉၵူၺ်း၊ တႄႇမိူဝ်ႈဝႃးတႄႉ တီႉၺွပ်းပႃး ၵႃးယဝ်ႉ”- ဝႃႈၼႆ။

ဝၢႆးလင် သိုၵ်းမၢၼ်ႈ မိၼ်းဢွင်ႇလၢႆႇ ႁဵတ်းပၢင်ၵုမ် တီႈၼေႇပျီႇတေႃႇ မိူဝ်ႈဝၼ်းတီႈ 20 ၼႆႉ မၼ်းၸီႉသင်ႇလၢတ်ႈဝႃႈ – တေၵူတ်ႇထတ်းရူတ်ႉၵႃး ၸိူဝ်းဢမ်ႇတၢင်ႇဝႆႉမၢႆၾၢင် (လၢႆႊသိၼ်ႊ) ၼၼ်ႉသေ တီႉၺွပ်းဢဝ်လိူင်ႈၵႂႃႇသေဢမ်ႇၵႃး ၸီႉသင်ႇလၢတ်ႈပႃး တေတီႉၺွပ်းပႃး ၵူၼ်းၸိူဝ်းႁပ်ႉႁဵတ်း ဝႂ်ရူတ်ႉၵႃး (လၢႆႊသိၼ်ႊ) ဢၼ်ပွမ်ၸိူဝ်းၼႆႉ ဝႃႈၼႆ။

ၼႂ်းဝၼ်းတီႈ 27/05/2025 သိုၵ်းမၢၼ်ႈ တီႉၺွပ်းၵူၼ်းမိူင်းႁဵတ်းမၢႆရူတ်ႉၵႃး ဢၼ်ပွမ်ၶၢႆ တီႈဝဵင်းဢေး သႃႇယႃႇလႄႈ သူၺ်ႇၺွင်ႇ ၼႂ်းၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။

တီႈႁၢၼ်ႉလၢင်ႉၵႃး GTR ဢၼ်မီးၼႂ်းပွၵ်ႉသိၼ်ႉႁႄႇ( စဉ့်ဟယ်) ဝဵင်းသူၺ်ႇၺွင်ႇ ၼၼ်ႉၵေႃႈ သိုၵ်းမၢၼ်ႈ ဝႃႈ ႁဵတ်းၶႅပ်းမၢႆ (နံပတ်ပြား) ရူတ်ႉၵႃး ဢၼ်ပွမ်ၶၢႆၼႆသေ ၸူဝ်းဢဝ်ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ ၶဝ်ႈ ၵူတ်ႇထတ်း တီႉၺွပ်းဢဝ်ၸဝ်ႈၶွင်ႁၢၼ်ႉ ၸိုဝ်ႈႁွင်ႉ မူဝ်းမိၼ်းဝေႇယၢၼ်ႇ ၼၼ်ႉၵႂႃႇ။ သိုၵ်းမၢၼ်ႈ ပိုၼ် ၽၢဝ်ႇဝႆႉဝႃႈ တီႉလႆႈပႃးမၢႆၵႃးဢၼ်ပွမ် 189 ၶႅပ်းသေ ယိုတ်းဢဝ်ၵႂႃႇပႃး ဝႃႈၼႆ။

ၼၢင်းယိင်း ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ငိၼ်းတႄႉ လႆႈငိၼ်းဝႆႉ 2-3 ဝၼ်းယဝ်ႉ။ ၶဝ်ၸင်ႇႁႃ မႃးၵူတ်ႇထတ်း မိူဝ်ႈဝၼ်းတီႈ 27 ၼႆႉ။ ဢၼ်ယၢပ်ႇၼႆႉ ၶဝ်ၶဝ်ႈၵူတ်ႇထတ်းပႃး ႁၢၼ်ႉႁဵတ်းၶႅပ်းမၢႆရူတ်ႉ ဢၼ်ပွမ်ၼၼ်ႉၼေႈ။ တီႈဝဵင်းတူၼ်ႈတီးၼႆႉ ႁၢၼ်ႉႁဵတ်းၸိူင်ႉၼၼ်မီးၼမ်ၼႃႇလူး။ ၵူၼ်းမိူင်းတႄႉ ဢမ်ႇၸၢင်ႈသိုဝ်ႉၶၢႆသင်ၵၼ်လွတ်ႈလႅဝ်းသေမဵဝ်းယဝ်ႉဢေႃႈ”- ဝႃႈၼႆ။

မိူၼ်ၼႆၼင်ႇၵဝ်ႇ သိုၵ်းမၢၼ်ႈ ၶဝ်ႈၵူတ်ႇထတ်းတီႉၺွပ်းထႅင်ႈ တီႈႁၢၼ်ႉမႄးၵႃး BFBM ဢၼ်မီးၼႂ်းဝဵင်း ဢေးသႃႇယႃႇ။ ၼၼ်ႉၵေႃႈ တီႉလႆႈၶႅပ်းမၢႆရူတ်ႉၵႃးဢၼ်ပွမ် 600 ၶႅပ်းလႄႈ ၸင်ႇႁွင်ႉဢဝ်ၵႂႃႇပႃး ၸဝ်ႈ ႁၢၼ်ႉ ၸိုဝ်ႈႁွင်ႉ ၸေႃႇမဵဝ်း။

ယၢမ်းလဵဝ် ၾၢႆႇတၢင်းပလိၵ်ႈသိုၵ်းမၢၼ်ႈ ဢဝ်လိူင်ႈ မူဝ်းမိၼ်းဝေႇယၢၼ်ႇလႄႈ ၸေႃႇမဵဝ်း လူၺ်ႈမၢႆမီႈ မတ်ႉတႃ 420/ 468 ဝႆႉယဝ်ႉ ဝႃႈၼႆ။

ၵူၼ်းမိူင်းဝဵင်းတူၼ်ႈတီးလၢတ်ႈဝႃႈ တီႈဝဵင်းတူၼ်ႈတီးၼႆႉ ၵူၼ်းမိူင်း ၵမ်ႈၼမ်သိုဝ်ႉၶီႇရူတ်ႉၵႃး ဢမ်ႇမီးဝႂ်။ ၵႂႃႇႁဵတ်းဝႂ်ၶႅပ်းမၢႆႇဢၼ်ပွမ်သေ မႃးသႂ်ႇသေၸႂ်ႉ။ ယွၼ်ႉဝႃႈတီႈလုမ်း ဢမ်ႇပိုတ်ႇႁပ်ႉႁဵတ်းပၼ်ဝႂ် လၢႆႊသိၼ်ႊရူတ်ႉၵႃး။ ပေႃးႁႃလၢႆးတၢင်းသေ ၵႂႃႇႁဵတ်းဝႂ်လၢႆႊသိၼ်ႊမႂ်ႇမႂ်ႇ သမ်ႉလႆႈပၼ်ၵႃႈၶၼ်ယႂ်ႇ ပေႃးၶႂ်ႈပဵင်းၵႃႈရူတ်ႉၵႃးဢမ်ႇမီးဝႂ်ၼၼ်ႉ ၼိုင်ႈလမ်း။ ရူတ်ႉ ဢၼ်မီးဝႂ်လၢႆႊသိၼ်ႊပဵၼ်တၢင်းၵၢၼ်ၵေႃႈ သမ်ႉၵႃႈၶၼ်ယႂ်ႇသုင်လိူဝ်ႁႅင်း – ဝႃႈၼႆ။ 

ၵူၼ်းၸၢႆးပိုၼ်ႉတီႈ ဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“ပေႃးသိုဝ်ႉရူတ်ႉ 50 သႅၼ်ၼႆႉ ပေႃးပႃးလၢႆႊ သိၼ်ႊ 100 ၊ ၶႂ်ႈၵႂႃႇၶိုင်ႈၶိုင်ႈၵၼ်ယဝ်ႉ။ ပေႃးပဵၼ်ၵႃး Without ဢၼ်ၸႃႉလႆႈသိုဝ်ႉ 2,000 သႅၼ်ၼၼ်ႉ လႆႈသိုဝ်ႉ 6,000 သႅၼ် ၸိူဝ်းၼႆႉယဝ်ႉ ပေႃးၵႂႃႇႁႃတၢင်ႇလၢႆႊသိၼ်ႊတီႈလုမ်း ဢၼ်ႁဵတ်းပၼ်လၢႆႊသိၼ်ႊ ၼၼ်ႉၵေႃႈ ၶဝ်ဢမ်ႇႁဵတ်းပၼ်ၼင်ႇၵဝ်ႇ၊ ရူတ်ႉၵႃး ဢၼ်ပႃးဝတ်းဝႂ်လၢႆႊသိၼ်ႊၼၼ်ႉ ၵူၼ်းမိူင်းၽႂ်ၵေႃႈ ဢမ်ႇမီးငိုၼ်းသိုဝ်ႉၶီႇ၊ တႃႇယူႇတႃႇၵိၼ်ၵူၺ်းၵေႃႈ ပေႃးၵိၼ်းၸႂ်ၼႃႇယဝ်ႉ”- ဝႃႈၼႆ။

ပေႃးၶႂ်ႈႁႂ်ႈ ၵူၼ်းမိူင်းပိုၼ်ႉတီႈ ၶီႇရူတ်ႉၵႃးဢၼ်မီးဝႂ်လၢႆႊသိၼ်ႊၵေႃႈ ၽူႈမီးပုၼ်ႈၽွၼ်းၶဝ်ထုၵ်ႇလီ ႁဵတ်း ပၼ်ဝႂ်လၢႆႊသိၼ်ႊ လူၺ်ႈၵႃႈၶၼ်ထုၵ်ႇ ႁႂ်ႈၵူၼ်းမိူင်းပွင်ပဵၼ်လႆႈ – ၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

တႄႇသိုၵ်းမၢၼ်ႈ မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇလႆႈတၢင်ႇဝႆႉမၢႆၾၢင် (လၢႆႊ သိၼ်ႊ) ဝႆႉၸိူဝ်းၼၼ်ႉယဝ်ႉ ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ လိုပ်ႈလၢမ်းတီႉၺွပ်းရူတ်ႉၵႃးသေ ၸႂ်ႉဢဝ် ငိုၼ်း ထုတ်ႇဢဝ်ၶိုၼ်း 1 လမ်း 8 မိုၼ်ႇထိုင် 1 သႅၼ်ပျႃး။ ၼႂ်းဝၼ်းတီႈ 22/05/2025  ဝၼ်းလဵဝ် တီႈဝဵင်းတူၼ်ႈတီး တီႉၺွပ်းလႆႈရူတ်ႉၵႃး 100 လမ်း ဝႃႈၼႆ။