သိုၵ်းမၢၼ်ႈတင်း PNO ၽဝ်ႁိူၼ်းယေးၵူၼ်းမိူင်း ဝၢၼ်ႈသွင်းပျွင်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၾႆးမႆႈလူႉၵွႆၵႂႃႇၼပ်ႉႁူဝ်သိပ်းလင်။

တႄႇဝၼ်းတီႈ 17/05/2025 ၼႆႉမႃးတေႃႇထိုင်ဝၼ်းတီႈ 29/05/2025 ၼႆႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ႁူမ်ႈၵၼ်ပိုတ်းယိုဝ်းၵၼ်တင်း ၸုမ်းၵႅတ်ႇၶႄႇၵူၼ်းမိူင်း PDF ႁၢဝ်ႈႁႅင်း။ ၽွင်းၸုမ်း လုၵ်ႉၽိုၼ်ႉထွႆဢွၵ်ႇၼႂ်းဝၢၼ်ႈၼၼ်ႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉ PNO ၽဝ်ပႃး ႁိူၼ်းၵူၼ်း ပိုၼ်ႉတီႈလူႉ သုမ်းပႃး။

ၵူၼ်းၸၢႆး ဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ ၽႂ်ၵုမ်းဝၢၼ်ႈႁဝ်း ဝဵင်းႁဝ်းတႄႉတႄႉၼႆ ႁဝ်းၶႃႈ ၵူၼ်းဝၢၼ်ႈပေႃးဢမ်ႇၶႂ်ႈႁူႉယဝ်ႉ။ မိူဝ်ႈပူၼ်ႉမႃးသွင်ဝၼ်းၼႆႉ PDF ထွႆၶိုၼ်း ၊ ထွႆတၢင်း ၾၢႆႇၼိူဝ် သွင်းပျွင်း တီႈတၢင်းဝၢၼ်ႈတွင်ပႃ ၸိူဝ်းၼႆႉ။ ၾၢႆႇတၢင်းသိုၵ်းမၢၼ်ႈၵေႃႈ ၶဝ်ႈၽဝ်ႁိူၼ်းယေး ၵူၼ်းမိူင်း ပဵၼ်လင်ပဵၼ်လင် ၵူၼ်းဝၢၼ်ႈပေႃးဢမ်ႇၸၢင်ႈယူႇၸၢင်ႈသဝ်း ၊ လႆႈပၢႆႈၽေးသိုၵ်းတင်းဝၢၼ်ႈထႅင်ႈၵမ်း”- ဝႃႈၼႆ။

ႁိူၼ်းၼႂ်းဝၢၼ်ႈသွင်းပျွင်း ဢၼ်ထုၵ်ႇၽဝ် လူႉလႅဝ်ပႅတ်ႈၼၼ်ႉ ယွၼ်ႉပၢင်တိုၵ်းပဵၼ်ႁၢဝ်ႈႁႅင်းဝႆႉလႄႈ လူႉၵွႆၵႃႈႁိုဝ် ပဵၼ်ႁိူၼ်းၽႂ်လၢႆလၢႆယင်းပႆႇၸၢင်ႈႁူႉလႆႈ။ ယၢမ်းလဵဝ် ၵူၼ်းပိုၼ်ႉတီႈဝၢၼ်ႈသွင်းပျွင်း လႆႈပၢႆႈၽေးသိုၵ်း ႁူဝ်ၵူၼ်းမီးၸမ် 2,000 ပၢႆ – ၵူၼ်းပိုၼ်ႉတီႈလၢတ်ႈၼင်ႇၼႆ။

“ပေႃးၶဝ်ႁဵတ်း ၶဝ်ဢမ်ႇတွၼ်ႉ ယွမ်းႁပ်ႉသေပွၵ်ႈ သိုၵ်းမၢၼ်ႈတင်း ပျီႇတူႉၸိတ်ႉၼႆႉ။ ၶဝ်ၵူၺ်းၼႄး PDF တိၵ်းတိၵ်းၵူၺ်း။ ယွၼ်ႉၼၼ် လုၵ်ႈဢွၼ်ႇၼႂ်းဝၢၼ်ႈသွင်းပျွင်းၼႆႉ ၶဝ်ၸဵပ်းၸႂ် သိုၵ်းမၢၼ်ႈၼႆလႄႈ ၶဝ်ႈ ၵႂႃႇႁဵတ်းသိုၵ်းၼႂ်း PDF ပဵၼ်သိပ်းပဵၼ်သၢဝ်း ၊ ၾၢႆႇတင်း PNO ၶဝ်ၵႆႉၵဵပ်းၶွၼ်ႇ ၵိၼ်တီႈၵူၼ်းမိူင်းၸိူဝ်းၼႆႉၼႃႇ”- ဝႃႈၼႆ။ 

ၼႂ်းပၢင်တိုၵ်းၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်မႃးပွႆႇမၢၵ်ႇသႂ်ႇၵူႈဝၼ်းလႄႈ ၵူၼ်းမိူင်း ၸိူဝ်းယူႇႁိမ်းႁွမ်း ၼၼ်ႉ ဢမ်ႇၸၢင်ႈယူႇၸၢင်ႈသဝ်း။ ၵူၼ်းဝၢၼ်ႈလွႆၵဵင်ႈ၊ ဝၢၼ်ႈႁူဝ်ဝူဝ်း၊ ဝၢၼ်ႈသွင်းပျွင်း၊ ဝၢၼ်ႈၼွၵ်ႇဝူဝ်း၊ ဝၢၼ်ႈသေႃလမ်၊ ဝၢၼ်ႈၼမ်ႉၽႃမူလႄႈ ဝၢၼ်ႈမႂ်ႇ လႆႈပၢႆႈၽေးသိုၵ်းဝႆႉ လူဝ်ႇတၢင်းၸွႆႈထႅမ်တၢင်းၵိၼ် တၢင်းယႅမ်ႉတီႈယူႇတၼ်းသဝ်းဝႆႉ ဝႃႈၼႆ။

ၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ -“ပေႃးပဵၼ်ပၢင်တိုၵ်းၸိူင်ႉၼႆႉ ၵူၼ်းမိူင်းဢေႃႈလႆႈယၢပ်ႇ ပၢႆႈ ယဝ်ႉပၢႆႈထႅင်ႈတိၵ်းတိၵ်း၊ တေႃႈလဵဝ် တီႈဝၢၼ်ႈသွင်းပျွင်း ဢမ်ႇမီးၵူၼ်းႁတ်းယူႇယဝ်ႉ ဢွၼ်ၵၼ်ပၢႆႈသေ မၢင်ၸိူဝ်းႁႃၵိၼ်ၸၢင်ႈဝၼ်းလႂ်ဝၼ်းၼၼ်ႉ၊ မၢင်ၸိူဝ်းဢမ်ႇမီးၵၢၼ်မီးငၢၼ်း ပေႃးႁိုင်ၶၢဝ်းယၢဝ်းတႄႉ တေ ႁႃၵိၼ်သင်ၵေႃႈ ဢမ်ႇႁူႉယဝ်ႉ”- ဝႃႈၼႆ။

ၵူၼ်းဝၢၼ်ႈၸိူဝ်းပဵၼ်ပၢင်တိုၵ်းၼၼ်ႉၵေႃႈ ဢွၼ်ၵၼ်လႆႈၶၢႆႉယူႇသဝ်းၸွမ်း ႁိူၼ်းယေး ပီႈၼွင်ႉ ပၢႆႈၵႂႃႇ ယူႇတၢင်းဝဵင်းၸၢမ်ၵႃး၊ ဝၢၼ်ႈမွၵ်ႇပီ (မေႃႇပီႇ)၊ ဝၢၼ်ႈပၢင်ၶုၼ် (ပင်ခွန်)၊ ၼမ်ႉထႃး(နန်းထာ) လႄႈ ဝၢၼ်ႈဝႃးလီး ၸိူဝ်းၼႆႉၵေႃႈမီး ဝႃႈၼႆ။

တႄႇဢဝ်ၵၢင်လိူၼ်ၵျုၼ်ႊ ပီ 2024  ပူၼ်ႉ ၾၢႆႇသိုၵ်းမၢၼ်ႈ ထႅမ်ႁႅင်း ၵႂႃႇတၢင်းဝဵင်းၾၢႆၶုၼ်၊ ၽွင်းႁွတ်ႈ ထိုင် တီႈဝၢၼ်ႈသွင်းပျွင်း ယၢၼ်ၵႆဝဵင်းၾၢႆၶုၼ် မွၵ်ႈ 11 လၵ်းၼၼ်ႉ ၸုမ်းလုၵ်ႉၽိုၼ်ႉၶဝ် ႁႅၼ်းသိုၵ်း လေႃႇတိုၵ်းသေ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်းသေ ၵူၼ်းဝၢၼ်ႈသွင်းပျွင်းလႆႈပၢႆႈၽေးသိုၵ်းမႃးယဝ်ႉ ပွၵ်ႈၼိုင်ႈ၊ ထိုင်မႃးၼႂ်းႁၢင်လိူၼ်မေႊၼႆႉ ပၢင်တိုၵ်း ပဵၼ်ႁၢဝ်ႈႁႅင်းၶိုၼ်း ထႅင်ႈပွၵ်ႈၼိုင်ႈလႄႈ ၵူၼ်းပိုၼ်ႉတီႈလႆႈပၢႆႈၽေးသိုၵ်းဝႆႉပွၵ်ႈၵမ်းသွင် ဝႃႈၼႆ။