မိူဝ်ႈဝႃး ဝၼ်းတီႈ 29/05/2025 ယၢမ်းႁူဝ်ၶမ်ႈ 6 မူင်းပၢႆ မၢၵ်ႇတႅၵ်ႇၼႂ်းဝၢင်းႁိူၼ်း ၽွင်းၸဝ်ႈႁိူၼ်းတိုၵ်ႉၵႂႃႇ ၽဵဝ်ႈယုၵ်းယၢၵ်း ႁဵတ်းလွင်ႈမူတ်းသႂ် တီႈဝၢၼ်ႈႁူဝ်တႃႈ ဝဵင်းသႅၼ်ဝီ ၸိုင်ႈတႆးပွတ်းႁွင်ႇ။
ႁိူၼ်းဢၼ်ၺႃးမၢၵ်ႇတႅၵ်ႇၵႂႃႇၼၼ်ႉ ၸဝ်ႈႁိူၼ်းလႆႈပၢႆႈၽေးပၢင်တိုၵ်း 1027 လွပ်ႈၼိုင်ႈသေ တိုၵ်ႉလႆႈပွၵ်ႈမႃးယူႇ ၶိုၼ်းႁိူၼ်းၵူၺ်း သမ်ႉၺႃးမၢၵ်ႇတႅၵ်ႇသႂ်ႇ ၽွင်းတိုၵ်ႉၵႂႃႇၽဵဝ်ႈၼႂ်းသိုင်ႇလႄႈ ႁဵတ်းႁႂ်ႈတူၵ်းၸႂ်ၵူဝ် ၵႂႃႇႁႅင်းတႄႉတႄႉၼႆ ၵူၼ်းမိူင်းပိုၼ်ႉတီႈ ဝၢၼ်ႈႁူဝ်တႃႈ ၵေႃႉၼိုင်ႈ လၢတ်ႈၼႄၼင်ႇၼႆ။
“ၶဝ်ၵူဝ်ႁႄ ပၢႆႈၵႂႃႇႁိုင်ယဝ်ႉ။ ဢၼ်မၢၵ်ႇတိူဝ်ႉၺႃးၼႆႉ ပဵၼ်ၵူၼ်းထဝ်ႈ ဢႃယု 60 ပၢႆ ၵေႃႉၼိုင်ႈ လႆႈမၢတ်ႇၸဵပ်းဢေႃႈ။ တိုၵ်ႉႁႃပွၵ်ႈမႃးလႆႈ 3- 4 ဝၼ်းၵူၺ်း။ ၶဝ်ၸူး မႃးၽဵဝ်ႈႁိူၼ်းၶဝ်။ ၽဵဝ်ႈႁႄၵေႃႈ မၼ်းသမ်ႉ ဢမ်ႇႁၼ်မႅၼ်ႈမၢၵ်ႇၼၼ်ႉ ၸူးၵႂႃႇ ၸၼ်ပႅတ်ႈဢွၵ်ႇမႃးႁႄ တူၵ်းသွင်ႉသႂ်ႇ တိၼ်မၼ်း သမ်ႉၵႂႃႇတိူဝ်ႉၺႃး မၢၵ်ႇႁူဝ်လိူင် ဢၼ်ၶဝ်သႂ်ႇပၢႆ ၵွင်ႈၶဝ်ႁႄယိုဝ်းၼၼ်ႉၼႃႇ။ ပဵၼ်မၢၵ်ႇဢၼ်ၶဝ် ယိုဝ်းၵႂႃႇ တူၵ်းဝႆႉႁႄ ဢမ်ႇတႅၵ်ႇၸိူင်ႉၼၼ်ၶႃႈဢေႃႈ။ တႅၵ်ႇၵႂႃႇၼႂ်းသိုင်ႇၶဝ်ဢေႃႈ။ ႁိူၼ်းၶဝ်ၵေႃႈ ၺႃးမၢၵ်ႇႁႄ ၾႆးမႆႈၵွႆၵႂႃႇ မိူဝ်ႈပၢင်တိုၵ်းၼၼ်ႉ ဢေႃႈ”။
လႆႈႁူႉဝႃႈ ပဵၼ်မၢၵ်ႇဢၼ်ၵိုတ်းၶင်ႉဝႆႉ မိူဝ်ႈၽႅၼ်ယၼ်ႇသိုၵ်း 1027 လွပ်ႈၼိုင်ႈၼၼ်ႉသေ ၾၢႆႇသိုၵ်းၵဝ်ႈၵၢင်ႉ (MNDAA) ၶဝ် ဢမ်ႇႁပ်ႉပုၼ်ႈၽွၼ်း သွၵ်ႈႁႃၽဵဝ်ႈပၼ်ၶိုၼ်း မၢၵ်ႇမႅင်းၸိူဝ်းၵိုတ်းၶင်ႉဝႆႉ ၼႂ်းထုင်ႉဢွင်ႈတီႈပဵၼ်ပၢင်တိုၵ်း ၸႄႈဝဵင်းသႅၼ်ဝီ။ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ မီးလွင်ႈမႆႈၸႂ်လၢႆလၢႆလွင်ႈ ၼႆ ယဝ်ႉ။
ၵူၼ်းမိူင်း ၵေႃႉယူႇၼႂ်းဝဵင်းသႅၼ်ဝီၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ -“မိူဝ်ႈဢွၼ်တၢင်းၵေႃႈ ယၢမ်ႈၵႂႃႇတုၵ်းယွၼ်းတီႈ ၽူႈယႂ်ႇၵူၼ်းလူင် ၼႂ်းသိုၵ်းၵဝ်ႈၵၢင်ႉၶဝ် ႁႂ်ႈၶဝ်မႃးၵူတ်ႇထတ်း ၽဵဝ်ႈပၼ်ၵဵပ်း ဢဝ်မၢၵ်ႇဢၼ်ၵိုတ်းဝႆႉၼၼ်ႉ ပႅတ်ႈပၼ်ၼႆယူႇ။ ၵူၺ်းၵႃႈ ၶဝ်သမ်ႉဢမ်ႇမႃးၵူတ်ႇထတ်းပၼ်ၼၼ်ႉၼႃႇ။ ႁဝ်းၵေႃႈဢမ်ႇၸၢင်ႈႁဵတ်းႁိုဝ်။ ၸူးၸႂ်တႄႉ ၶႂ်ႈႁႂ်ႈၾၢႆႇၽူႈမီးပုၼ်ႈၽွၼ်းၶဝ် မႃးၵူတ်ႇထတ်းၽဵဝ်ႈ ပၼ်မၢၵ်ႇယူႇဢိူဝ်ႈ။ ပေႃးၼၼ်ၸင်ႇ ႁဝ်းၵူၼ်းမိူင်း တေမီးလွင်ႈလွတ်ႈၽေးၼၼ်ႉၼႃႇ”- ဝႃႈၼႆ။
ဝၢႆးလင် ၽႅၼ်ယၼ်ႇသိုၵ်း 1027 ယဝ်ႉ ဝဵင်းသႅၼ်ဝီၼႆႉ ၾၢႆႇသိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉသေ ၼႂ်း ၶၢဝ်းတၢင်း ပီပၢႆၼႆႉ ၵိူတ်ႇပဵၼ်ပၼ်ႁႃ လၢႆလၢႆလွင်ႈ။ မိူၼ်ၼင်ႇ လွင်ႈတဵၵ်းၸႂ်ႉၶၢႆႉၵၢတ်ႇ၊ လွင်ႈတဵၵ်းတဵင် ၶၢတ်ႈဢွင်ႈတီႈလိၼ်ၽုၵ်ႇသွမ်ႈ၊ လွင်ႈႁႄႉႁၢမ်ႈၸႂ်ႉတိုဝ်းလိၵ်ႈတႆး ၸဵမ်ၸိူဝ်းၼႆႉ။
မၢၵ်ႇမႅင်း ဢၼ်ၵိုတ်းၶမ်ဝႆႉ ၼႂ်းဝၢင်းႁိူၼ်း၊ ၸွမ်းၵိဝ်ႇဝၢၼ်ႈ၊ ၸွမ်းသူၼ်ႁႆႈၼႃး ၵူၼ်းမိူင်းၸိူဝ်းၼႆႉၼၼ်ႉ ၾၢႆႇသိုၵ်းၵဝ်ႈၵၢင်ႉၶဝ် ဢမ်ႇႁပ်ႉပုၼ်ႈၽွၼ်း ၵဵပ်းၽဵဝ်ႈပၼ်ၶိုၼ်းလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ဝဵင်းသႅၼ်ဝီ ၵႆႉယဵပ်ႇၺႃးသေ ထိုင်တီႈလႆႈတႅပ်းၶႃ၊ တႅပ်းမိုဝ်းပႅတ်ႈ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ