ယၢမ်းလဵဝ် တီႈဝဵင်းႁူဝ်ပူင်းၼႆႉ ႁွင်ႈၵၢၼ်ၾၢႆႇလိူမ်ႈလႆႇ ၵဵပ်းၶွၼ်ႇယွၼ်းငိုၼ်း ၵူၼ်းၵႃႉၶၢႆၸွမ်းၵၢတ်ႇၵူႈလိူၼ် ၵူၺ်းၵႃႈ တႃႇမႃးၵဵပ်းၽဵဝ်ႈပၼ်ၶိုၼ်းသမ်ႉ ဢမ်ႇပေႃးၵႆႉမီး လွင်ႈၼႆႉ ႁဵတ်းႁႂ်ႈၵူၼ်းမိူင်းပိုၼ်ႉတီႈ ထူပ်းလွင်ႈယၢပ်ႇ တႃႇၵႂႃႇမႃးၵႃႉၶၢႆ။

ၵူၼ်းပိုၼ်ႉတီႈ ဝဵင်းႁူဝ်ပူင်း လၢတ်ႈတီႈၽူႈတွႆႇႁွၵ်ႈဝႃႈ -“ၾၢႆႇလိူမ်ႈလႆႇသိုၵ်းမၢၼ်ႈ မႃးၵဵပ်းငိုၼ်း ၵဵပ်းၶွၼ်ႇ ၵူႈလိူၼ် ၵူၺ်းၵႃႈ တႃႇတေၵဵပ်းၽဵဝ်ႈပၼ်ၶိုၼ်းယုၵ်းယၢၵ်းၸိူဝ်းၼႆႉသမ်ႉ ဢမ်ႇပေႃးၵႆႉမီး ယွၼ်ႉၼၼ် ၸွမ်းၵၢတ်ႇၸိူဝ်းၼႆႉ မၢင်တီႈၵေႃႈ ပဵၼ်ဢၼ်ဝူၺ်ႇႁၢင်ႈဝႆႉၵူၺ်းဢမ်ႇၵႃး ၵမ်ႈၽွင်ႈၵေႃႈ တူႇၼဝ်ႈ မီးသႅဝ် မဵၼ်ဝႆႉ။ မိူၼ်ၼၼ်ၼင်ႇၵဝ်ႇ ၸွမ်းပိုၼ်ႉတီႈၼႂ်းဝဵင်းၸိူဝ်းၼႆႉၵေႃႈ ၾၢႆႇလိူမ်ႈလႆႇၶဝ် ဢမ်ႇဢဝ်ရူတ်ႉၵႃးမႃး ၵဵပ်းၽဵဝ်ႈပၼ် ယုၵ်းယၢၵ်းႁိုင်ယဝ်ႉ မိူၼ်ၵၼ် ၵူၺ်းၵႃႈ ငိုၼ်းၵႃႈၶွၼ်ႇယုၵ်းယၢၵ်းတႄႉ ၶဝ်မႃးၵဵပ်းၵူႈလိူၼ် ယဝ်ႉ”- ဝႃႈၼႆ။

ႁိူၼ်းယေးၵူၼ်းမိူင်း ၼႂ်းဝဵင်းႁူဝ်ပူင်းၵမ်ႈၼမ် လႆႈပၼ်ၶွၼ်ႇတီႈၾၢႆႇလိူမ်ႈလႆႇ ၼိုင်ႈလိူၼ်ဢမ်ႇယွမ်း 2 မိုၼ်ႇ မိူၼ်ၼင်ႇ ၵူၼ်းမႃးတမ်းၶၢႆၽၵ်းၶဵဝ်သမ်ႉ ၼိုင်ႈဝၼ်းၼႆႉ လႆႈပၼ်ၶွၼ်ႇ 2 ႁဵင် ၼႆယဝ်ႉ။

ယွၼ်ႉယုၵ်းယၢၵ်းလိူင်ႇၼမ် တူႇၼဝ်ႈဝႆႉလႄႈ  ႁဵတ်းႁႂ်ႈယုင်း၊ မူင်ႈမႅင်း ၸိူဝ်းၼႆႉလိူင်ႇၼမ်မႃး ယၢမ်းလဵဝ် သမ်ႉ ၶဝ်ႈၶၢဝ်းၾူၼ်မႃးယဝ်ႉလႄႈ တၢင်းပဵၼ်ၵေႃႈလိူင်ႇၼမ် သင်ဢမ်ႇၵဵပ်းၽဵဝ်ႈၶိုတ်းတၼ်း ၸွမ်းၼင်ႇ ပၵ်းပိူင်ဢၼ်မီးဝႆႉၸိုင် ၵူၼ်းမိူင်းၸိူဝ်းယူႇႁိမ်းၵိၼ်ၸမ်ၵေႃႈ ၸၢင်ႈထူပ်းတၢင်းပဵၼ်တွင်ႉၵႂႃႇတွင်ႉႁေႈ လႄႈ ၸဵပ်းမႆႈၶႆႈၼၢဝ်ၸိူဝ်းၼႆႉပႃး။

မိူၼ်ၼၼ်ၼင်ႇၵဝ်ႇ ၵူၼ်းမိူင်းပိုၼ်ႉတီႈၵမ်ႈၽွင်ႈၵေႃႈ ပႅတ်ႈယုၵ်းယၢၵ်းဢမ်ႇမႅၼ်ႈၸွမ်းပၵ်းပိူင် ၵမ်ႈ ၽွင်ႈ တင်ႈၸႂ်မႃးပႅတ်ႈၸွမ်းႁိမ်းၵၢတ်ႇ။ ၵမ်ႈၽွင်ႈ ဢၼ်ယူႇဝႆႉၸွမ်းၼႂ်းၵၢတ်ႇသမ်ႉ မႃးပႅတ်ႈသမ်ႉ ဢမ်ႇ မႅၼ်ႈၸွမ်းပၵ်းၸွမ်းပိူင်ၵေႃႈမီး ၼႆယဝ်ႉ။

ၼင်ႇႁိုဝ် ၵူၼ်းမိူင်းပေႃးတေလွတ်ႈၽေး မီးပၢႆးယူႇလီတဵမ်ထူၼ်ႈၼၼ်ႉ ၽူႈတူင်ႉၼိုင်တူင်ႇဝူင်းၵူၼ်း ၶဝ်တႄႉလၢတ်ႈဝႃႈ ၾၢႆႇလိူမ်ႈလႆႇၶဝ် ထုၵ်ႇလီမႃးၵဵပ်းၽဵဝ်ႈပၼ် ၸွမ်းၼင်ႇပၵ်းပိူင်လႄႈ ၶၢဝ်းယၢမ်း ၵူၺ်းဢမ်ႇၵႃး လိူဝ်ၼၼ်ႉ ၵူၼ်းမိူင်းၸိူဝ်းယူႇသဝ်းၼႂ်းဝဵင်းၸိူဝ်းၼႆႉၵေႃႈ ထုၵ်ႇလီသႂ်ႇၸႂ် လွင်ႈမူတ်းသႂ် ႁိမ်းႁွမ်းၸဝ်ႈၵဝ်ႇလႄႈ ဢမ်ႇထုၵ်ႇလီပႅတ်ႈယုၵ်းယၢၵ်း လူၺ်ႈဢမ်ႇမီးပၵ်းပိူင် ၼႆယဝ်ႉ။

တႅမ်ႈ – သႅင်ဢၢႆႈ ပိၼ်ႇၽႃသႃ ၸၢႆးၶႂၢၼ်ၸဵင်