မိူဝ်ႈၼႆႉ ဝၼ်းတီႈ 29/05/2025 ယၢမ်းၵၢင်ၼႂ် သိုၵ်းမၢၼ်ႈ ထႅမ်ႁႅင်းသိုၵ်း လေႃႇတိုၵ်း တပ်ႉသိုၵ်းတဢၢင်း TNLA တီႈဝၢၼ်ႈၼွင်လဵၵ်ႉ တေႃႇထိုင်ဝၢၼ်ႈသူၺ်ႇမူႉတေႃး ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းလၢတ်ႈတီႈ သိုဝ်ႇၶၢဝ်ႇသူၺ်ႇၽီႇမျေႇဝႃႈ – “ပၢင်တိုၵ်းၼႆႉ တႄႇပဵၼ်ၸဵမ် မိူဝ်ႈဝႃး ဝၼ်းတီႈ 28 တေႃႇထိုင်ၼႂ်ၼႆႉ ဝၼ်းတီႈ 29 ၵေႃႈ ပၢင်တိုၵ်းယင်းပႆႇယဝ်ႉတူဝ်ႈ။ သိုၵ်းမၢၼ်ႈ ၶဝ်ႈ လေႃႇတိုၵ်း တီႈဝၢၼ်ႈၼွင်လဵၵ်ႉ ဢွၼ်တၢင်းယဝ်ႉ ၸင်ႇသိုပ်ႇတိုၵ်းတီႈဝၢၼ်ႈသူၺ်ႇမူႉတေႃးဝႆႉယူႇ။ ၼွၵ်ႈလိူဝ်ပဵၼ်ပၢင်တိုၵ်း ၸွမ်းၼႂ်းပိုၼ်ႉတီႈၼႃႈလိၼ်ယဝ်ႉ သိုၵ်းမၢၼ်ႈ ယင်းတိုၵ်ႉဢဝ် ၶိူင်ႈမိၼ်တိုၵ်း ဢဝ်တရူၼ်ႊ မႃးပွႆႇမၢၵ်ႇသႂ်ႇပႃးထႅင်ႈ”- ဝႃႈၼႆ။

ဝၢၼ်ႈသူၺ်ႇမူႉတေႃးၼႆႉ ယၢၼ်ၵႆၵၼ်တၢင်း ဝၢၼ်ႈတွင်းၶမ်း ဢၼ်မီးတပ်ႉၵွင်ႈလူင်သိုၵ်းမၢၼ်ႈ မွၵ်ႈ 10 လၵ်း။ ၵဵဝ်ႇလူၺ်ႈလွင်ႈၼႆႉ ယူႇတီႈသၢႆၶၢဝ်ႇသိုၵ်းမၢၼ်ႈတႄႉ ပိုၼ်ႇၽၢဝ်ႇဢွၵ်ႇၼႂ်း Telegram ၼၼ်ႉဝႃႈ တိုၵ်းယိုတ်းလႆႈၶိုၼ်း တပ်ႉပၢင်သဝ်းသိုၵ်းမၢၼ်ႈ တီႈဝၢၼ်ႈသူၺ်ႇမူႉတေႃးၼႆႉယဝ်ႉ ဝႃႈၼႆ။

ယၢမ်းလဵဝ် သိုၵ်းမၢၼ်ႈ ၶတ်းၸႂ်ၶဝ်ႈလေႃႇတိုၵ်း တႃႇတေလႆႈၶိုၼ်း တပ်ႉၵွင်ႈလူင် ဢၼ်မီးတီႈဝၢၼ်ႈတွင်း ၶမ်းၼႆလႄႈ ၸင်ႇဢဝ်သိုၵ်း လုၵ်ႉတီႈဝၢၼ်ႈဢုမ်ႇတီး ၶဝ်ႈမႃးတိုၵ်း ဢမ်ႇထၢတ်ႇဢမ်ႇဝၢႆး ယၢမ်းလဵဝ် သိုၵ်းတဢၢင်း TNLA ယင်းလႆႈထွႆပၼ်တပ်ႉပၢင်သဝ်းလၢႆတီႈ ၼႂ်းၼၼ်ႉပႃးတပ်ႉပၢင်သဝ်း ဢၼ်မီးတီႈဝၢၼ်ႈယႃႇပျိၼ်ႇ၊ ဝၢၼ်ႈတယႅတ်ႉၶျဵူဝ်ႇ ၸိူဝ်းၼႆႉ ။