တႄႇဝၼ်းတီႈ 27/05/2025 မႃး ႁွင်ႈၵၢၼ် ၾၢႆႇၵူတ်ႇထတ်းၶဝ်ႈဢွၵ်ႇမိူင်း (လဝၵ) တီႈဝဵင်းလႃႈသဵဝ်ႈ ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ တႄႇႁပ်ႉႁဵတ်းပၼ် မၢႆၾၢင်ၵူၼ်းမိူင်း ၵၢင်ၼႂ် 9 မူင်း တေႃႇဝၢႆးဝၼ်း 4 မူင်း တွၼ်ႈတႃႇၵူၼ်းမိူင်းတႆးပွတ်းႁွင်ႇ။
မိူၼ်ၼင်ႇ ၵူၼ်းမိူင်းၸိူဝ်းယူႇၼႂ်းၸႄႈဝဵင်းသႅၼ်ဝီလႄႈ ၸႄႈဝဵင်းၵုၼ်လူင် တႂ်ႈသိုၵ်းၵဝ်ႈၵၢင်ႉ (MNDAA) ၵုမ်းၵမ်ၼၼ်ႉၵေႃႈ မႃးႁဵတ်းလႆႈမၢႆၾၢင်၊ ဝႂ်မုင်ႉႁေႃႁိူၼ်းလႄႈ Smart Card (သမၢတ်ႉသ်ၵၢတ်ႉ) လႆႈယူႇ ဝႃႈၼႆ။
ႁွင်ႈၵၢၼ် ၾၢႆႇလုမ်း လဝၵ ပိုတ်ႇၶိုၼ်း၊ ႁပ်ႉႁဵတ်းပၼ် မၢႆၾၢင် တႃႇၵူၼ်းမိူင်းပိုၼ်ႉတီႈ ၸိူဝ်းယူႇသဝ်း ၼႂ်းမိူင်းတႆးပွတ်းႁွင်ႇၼႆသေတႃႉ တွၼ်ႈတႃႇၵူၼ်းမိူင်းပိုၼ်ႉတီႈၸိူဝ်းဢမ်ႇမီးငိုၼ်းၼၼ်ႉတႄႉ ယင်းပႆႇမီးသုၼ်ႇလႆႈႁဵတ်း ၼႆယဝ်ႉ။
ၵူၼ်းမိူင်းၵေႃႉၵႂႃႇ ပႂ်ႉၶဝ်ႈထႅဝ်ႁဵတ်းမၢႆၾၢင် တီႈဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “တႃႇတေလႆႈႁဵတ်းမၢႆၾၢင်ၼႆႉ လႆႈလုၵ်ႉၵႂႃႇၸႅၼ်ႇထႅဝ်ၸဵမ်ၸဝ်ႉ ပုၼ်ႉၶႃႈ ၼေႈ။ ပေႃးၵၢင်ၼႂ် မိူင်းလႅင်း 6 မူင်းၸိူဝ်းၼႆႉ ၵူၼ်းၸႅၼ်ႇထႅဝ်ဝႆႉၼၼ်ႉ ပေႃးမီးၵႂႃႇႁူဝ်ပၢၵ်ႇမၼ်းယဝ်ႉ။ ပေႃးပဵၼ်ၵူၼ်းမိူင်း ယူဝ်းယူဝ်း ၸိူင်ႉႁဝ်းၼႆႉ တႃႇတေလႆႈၶဝ်ႈၵႂႃႇ ၼႂ်းလုမ်းၶဝ်ႁႄ ႁဵတ်းမၢႆၾၢင်လႆႈၼၼ်ႉဢမ်ႇငၢႆႈ။ ၸိူဝ်းပဵၼ်ၶႄႇၶဝ်တႄႉ ပၼ်ငိုၼ်းတီႈ ပွႆးၸႃးၶဝ်ၼမ်ၼမ်ႁႄ ႁဵတ်းၼၼ်ႉၼႃႇ။ ပွႆးၸႃးၶဝ်သမ်ႉ ၶိုၼ်းသိုပ်ႇၾူၼ်းၸူး ၵူၼ်းလူင်ၼႂ်းလုမ်းၼၼ်ႉႁႄ ႁွင်ႉၶဝ်ႈၵႂႃႇႁဵတ်းပၼ်ဢွၼ်တၢင်း။ ပေႃးၶဝ်ႁဵတ်းပၼ် ၵူၼ်းၸိူဝ်းပၼ်ငိုၼ်းတီႈ ၶဝ်ၼမ်ယဝ်ႉၼၼ်ႉၵွၼ်ႇ ၸင်ႇၺႃးၵမ်းၵူၼ်း မိူင်းပိုၼ်ႉတီႈတႄႉတႄႉၼၼ်ႉၼႃႇ”- ဝႃႈၼႆ။
သင်ပဵၼ်ၸၢဝ်းၶိူဝ်း ၸိူဝ်းယူႇၼႂ်းပိုၼ်ႉတီႈ ဢၼ်ဢမ်ႇၸႂ်ႈၸၢဝ်းၶႄႇလႄႈ ၵြႃးၼၼ်ႉ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ် လဝၵ ၶဝ် ယွၼ်းငိုၼ်းၵႃႈႁဵတ်းမၢႆၾၢင် ၼိုင်ႈၵေႃႉလႂ် တူၵ်းမႅၼ်ႈယူႇ 150,000 တေႃႇ သွင်သႅၼ်ပျႃးၼႆ – ၵူၼ်းမိူင်းပိုၼ်ႉတီႈ ၼႂ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄၼင်ႇၼႆ။
“ပေႃးမိူၼ်ၵူႈပွၵ်ႈတႄႉ ၶႃႈႁၢပ်ႇၵၢၼ်ၶုၼ်ၸိူဝ်းလႆႈငိုၼ်းၵႃႈႁဵတ်းမၢႆၾၢင်ၼၼ်ႉ ၵၢင်ၶိုၼ်းၵေႃႈၶဝ်ႁဵတ်း ယဝ်ႉဝႃႈ။ လဝၵၼႆႉ ၶဝ်လႆႈငိုၼ်းၼမ်တႄႉဢိူဝ်ႈ ဢမ်ႇလႃႈလီဝႃႈ။ ဝၢၼ်ႈမိူင်းႁဝ်းလူႉၼႆႉ ၸၢဝ်းၶိူဝ်းၶႄႇ၊ ၸၢဝ်းၶိူဝ်းၵြႃးၶဝ် ၶဝ်ႈမႃးယူႇလႆႈ ၼႂ်းမိူင်းႁဝ်းၼႆႉ ပဵၼ်ယွၼ်ႉလဝၵၼႆႉယဝ်ႉ။ ပေႃးယဝ်ႉ ၶိုၼ်းဝႃႈႁင်းပိူၼ်ႈ ဢမ်ႇၶဝ်ႈတၢင်းၵၢၼ် (တြႃးဢမ်ႇဝၢင်ႇ) ၼႆၵေႃႈ ပဵၼ်ၶဝ်ယဝ်ႉဝႃႈ။ ၶဝ်ထၢင်ႇႁၢင်ႈႁဵတ်းၵိၼ်ၼၼ်ႉၼႃႇ”။
လႆႈႁူႉဝႃႈ ယၢမ်းလဵဝ် ႁွင်ႈၵၢၼ် ၾၢႆႇၵူတ်ႇထတ်းၶဝ်ႈဢွၵ်ႇမိူင်း (လဝၵ) တီႈဝဵင်းလႃႈသဵဝ်ႈၼႆႉ ႁပ်ႉႁဵတ်းပၼ်မၢႆၾၢင်ဢၼ်မႂ်ႇ မဵဝ်းလဵဝ်ၵူၺ်းသေ ဝႂ်မုင်ႉႁေႃႁိူၼ်း၊ မၢႆၾၢင်ၸိူဝ်းလူႉႁၢႆၵႂႃၼၼ်ႉလႄႈ ဝႂ်ၶၢမ်ႈမိူင်း (Passport) ၸိူဝ်းၼႆႉတႄႉ ၵူၼ်းၸိူဝ်းႁဵတ်းၵၢၼ်ၼႂ်းလုမ်း လဝၵ ၶဝ် ပၼ်ၶေႃႈဢၢင်ႈဝႃႈ ၶေႃႈမုလ်းတင်းသဵင်ႈ ဢမ်ႇမီးဝႆႉတဵမ်ထူၼ်ႈၼႆသေ ယင်းပႆႇႁပ်ႉႁဵတ်းပၼ်ၶိုၼ်း ၼႆယဝ်ႉ။
ၼင်ႇႁိုဝ် တေႁပ်ႉႁဵတ်းပၼ်လႆႈ မၢႆၾၢင်ၵူၼ်းမိူင်းၼႆႉ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်လဝၵ ၺႃးသိုၵ်း မၢၼ်ႈၸီႉသင်ႇ ႁႂ်ႈတႄႇပၼ်ႇၵၢၼ်မႃး ၸဵမ်မိူဝ်ႈဝၼ်းတီႈ 19 လိူၼ်မေႊၼႆႉ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ