မိူဝ်ႈၼႆႉ ဝၼ်းတီႈ 28/05/2025 ယၢမ်းၵၢင်ၼႂ်မွၵ်ႈ 7 မူင်း သိုၵ်းမၢၼ်ႈ ယိုတ်းမိူင်းတင်း တပ်ႉသိုၵ်းၶၢင် KIA ႁူမ်ႈတင်း KPDF ပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈၼႂ်းဝၢၼ်ႈလူင်ၶၢင်း ၸႄႈဝဵင်းၽႃၵၢၼ်ႉ ၸႄႈတွၼ်ႈဝဵင်းၼႃး (ၸေႊၼႃး/ မိတ်ႉၵျီးၼႃး) ၸႄႈမိူင်းၶၢင်။

ၵူၼ်းပိုၼ်ႉတီႈ ဝဵင်းၽႃၵၢၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး မိူဝ်ႈသိုၼ်းၼႆႉ သိုၵ်းမၢၼ်ႈ တႄႇယိုဝ်းၶဝ်ႈမႃး ၼႂ်းဝဵင်းၽႃၵၢၼ်ႉ။ မိူဝ်ႈၼႆႉ ယၢမ်းၵၢင်ၼႂ်မွၵ်ႈ 7 မူင်း ၶဝ်သိုပ်ႇယိုဝ်းၵၼ်ထႅင်ႈႁၢဝ်ႈႁႅင်း တီႈဝၢၼ်ႈ လူင်ၶၢင်းၼႆႉ။ ယွၼ်ႉပၢင်တိုၵ်းၼႆႉသေ ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ ယၢမ်းလဵဝ် ၵူၼ်းမိူင်းတႄႉ ဢမ်ႇႁတ်းဢွၵ်ႇႁိူၼ်းယေးယဵၼ်သီႇမူတ်း။ ပၢင်တိုၵ်းတႄႉ ထူၼ်ႈယဝ်ႉၶႃႈ မိူဝ်ႈၼႆႉတႄႉ”- ဝႃႈၼႆ။

ပၢင်တိုၵ်း ဢၼ်ပဵၼ်ယူႇမိူဝ်ႈၼႆႉသမ်ႉ သိုၵ်းၶၢင် KIA တင်း KPDF သမ်ႉ ယူႇတၢင်းဝၢၼ်ႈလူင်ၶၢင်းသေ ယိုဝ်းဢွၵ်ႇ ၊ သိုၵ်းမၢၼ်ႈသမ်ႉ ဢဝ်ႁႅင်းသိုၵ်းၼပ်ႉႁူဝ်ပၢၵ်ႇသေ ထႅမ်ႁႅင်းၶဝ်ႈၸူး ဝၢၼ်ႈလူင်ၶၢင်း။

ဢိင်ၼိူဝ် လွင်ႈၼႆႉသေ ဢွင်ႈတီႈတပ်ႉပၢင်သဝ်း သိုၵ်းမၢၼ်ႈ မိူၼ်ၼင်ႇ – ႁူၺ်ႈၶႃႇ၊ ၽႃၵၢၼ်ႉလႄႈ သႅင်းတွင်ႇ ၸိူဝ်းၼႆႉ သိုၵ်းၶၢင်ၶဝ် လႆႈယိုတ်းၵုမ်းဝႆႉ တင်ႈတႄႇပဵၼ်ပၢင်တိုၵ်းၵၼ် မိူဝ်ႈပူၼ်ႉမႃးၼၼ်ႉ။ ယၢမ်း လဵဝ် တပ်ႉၵွင်ႈလူင် (ဢမျွၵ်ႈ) တီႈဝဵင်းၽႃၵၢၼ်ႉတႄႉ တိုၵ်ႉၵိုတ်းဝႆႉယူႇ။

“မိူဝ်ႈလဵဝ် ဢၼ်ၶဝ် ပဵၼ်ပၢင်တိုၵ်းၵၼ်ယူႇ ႁၢဝ်ႈႁႅင်းၼႆႉ သိုၵ်းမၢၼ်ႈသမ်ႉ လုၵ်ႉတၢင်းၼွၵ်ႈဝဵင်းၽႃၵၢၼ်ႉၼႆႉသေ ထူဝ်းႁႅင်းသိုၵ်းၶဝ်ႈမႃးလႄႈ ၸင်ႇပဵၼ်ပၢင်တိုၵ်းၵၼ် တီႈတပ်ႉ ဢမျွၵ်ႈလူင်ၶဝ်ၼၼ်ႉတႄႉ ယဵၼ် ဝႆႉယူႇ။ လွင်ႈၶိူင်ႈမိၼ်မႃးပွႆႇသႂ်ႇတႄႉ ပႆႇမီးၶႃႈ၊ ၶဝ်ၸႂ်ႉမၢၵ်ႇလူင်၊ မၢၵ်ႇဢွၼ်ႇလႄႈ ၵွင်ႈၸိူဝ်းၼႆႉ ယိုဝ်းၵၼ်ၵူၺ်း။ တီႈၽႃၵၢၼ်ႉၼႆႉၵေႃႈ ၾူၼ်တူၵ်းႁႅင်း တေမီးမွၵ်ႈၼိုင်ႈဝူင်ႈၼႆႉယဝ်ႉ”- ၵူၼ်းဝဵင်းၽႃၵၢၼ်ႉ သိုပ်ႇလၢတ်ႈၼႄၼင်ႇၼႆ။

ၵဵဝ်ႇလူၺ်ႈ လွင်ႈပၢင်တိုၵ်း တင်းသွင်ၾၢႆႇၼႆႉသေ လွင်ႈမၢတ်ႇၸဵပ်းလူႉတၢႆတႄႉ ပႆႇလႆႈႁူႉ။

သိုၵ်းမၢၼ်ႈတင်း သိုၵ်းၶၢင် KIA – KPDF ၼႆႉ ပဵၼ်ပၢင်တိုၵ်းၵၼ်မႃး ၶၢဝ်းတၢင်းႁိုင်ယဝ်ႉ ၸွမ်းသဵၼ်ႈ တၢင်းလူင် မိူင်းၵွင်း – ၵႃးမၢႆး – မၢၵ်ႇဢူႇပိၼ်ႇ – ၼမ်ႉယႃး – ဝဵင်းၼႃး (မိတ်ႉၵျီးၼႃး) ၸိူဝ်းၼၼ်ႉမႃး။ ယွၼ်ႉသွင်ၾၢႆႇ ပိုတ်းယိုဝ်းၵၼ်မႃး ႁၢဝ်ႈႁႅင်းၸိူင်ႉၼႆသေ ပၢင်တိုၵ်းၼၼ်ႉ လၢမ်းထိုင်မႃး တီႈဝဵင်းၽႃၵၢၼ်ႉၼႆႉ – ၵူၼ်းပိုၼ်ႉတီႈလၢတ်ႈ။

မိူဝ်ႈဝႃး ဝၼ်းတီႈ 27 ယၢမ်းၵၢင်ၶမ်ႈ ယွၼ်ႉသိုၵ်းမၢၼ်ႈတင်း KIA – KPDF ပဵၼ်ပၢင်တိုၵ်းၵၼ် ႁိမ်းဝဵင်းၽႃ ၵၢၼ်ႉၼႆႉသေ ႁဵတ်းႁႂ်ႈၵူၼ်းသိုဝ်ႉၶၢႆၼႂ်းၵၢတ်ႇၵၢင်ၶမ်ႈ တီႈဝၢၼ်ႈလူင်ၶၢင်း ဢွၼ်ၵၼ်တိုၼ်ႇသၢၼ်ႈ တူၵ်းၸႂ်ၽူင်ႉပၢႆႈၵၼ်။

ယွၼ်ႉဝႃႈ တၢင်းပွတ်းတွၼ်ႈၼႆႉသမ်ႉ ပဵၼ်ပိုၼ်ႉတီႈ သိုၵ်းၶၢင် KIA ႁူမ်ႈတင်း KPDF ယိုတ်းၵုမ်းလႆႈဝႆႉလႄႈ ၵွပ်ႈၼႆ သိုၵ်းမၢၼ်ႈ ၸင်ႇထႅမ်ႁႅင်းသိုၵ်း ၶဝ်ႈတေႃႇတိုၵ်းမႃး ႁၢဝ်ႈႁႅင်း ၼႆယဝ်ႉ။