တႄႇဢဝ် လိူၼ်ၵျႅၼ်ႊၼိဝ်ႊရီႊတေႃႇထိုင် လိူၼ်မေႊၼႆႉ လုၵ်ႈဢွၼ်ႇၸိူဝ်းလူႉတၢႆ ယွၼ်ႉတၢင်း ပဵၼ်ၼၢဝ်ၶႆႈလိူတ်ႈဢွၵ်ႇ ၼႂ်းမိူင်းမၢၼ်ႈ မီး 4 ၵေႃႉ၊ လုၵ်ႈဢွၼ်ႇၸိူဝ်းတိတ်းၸပ်းတၢင်းပဵၼ်ၵေႃႈ မီးၼမ်ႁႅင်းဝႆႉၼႆ ႁွင်ႈၵၢၼ် ၽွင်းလူင်ၾၢႆႇပၢႆးယူႇလီ လၢတ်ႈပၼ်ၾၢင်ႉဝႆႉ ၼင်ႇၼႆ။

ၼႂ်းပီ 2025 ၶၢဝ်းတၢင်း 5 လိူၼ်ၼႆႉ လုၵ်ႈဢွၼ်ႇၸိူဝ်းပဵၼ် ၼၢဝ်ၶႆႈလိူတ်ႈဢွၵ်ႇ မီး 860 ၵေႃႉ၊ ၵမ်ႈၼမ် ပဵၼ်ၸၼ်ႉတၢင်းပဵၼ်ႁၢဝ်ႈႁႅင်းသေ လႆႈၵႂႃႇယူတ်းယႃတူဝ် တီႈႁူင်းယႃ၊ ၸိူဝ်းလႆႈထႅမ်လိူတ်ႈ ၵေႃႈ မီးၼမ်။

လုၵ်ႈဢွၼ်ႇၸိူဝ်းလူႉတၢႆ ယွၼ်ႉတၢင်းပဵၼ်ၼၢဝ်ၶႆႈလိူတ်ႈဢွၵ်ႇၼႆႉသမ်ႉ ပဵၼ်ၼႂ်းတိူင်းတႃႈၵုင်ႈ၊ တိူင်းတၼၢဝ်းသီလႄႈ မိူင်းမွၼ်း ၸိူဝ်းၼႆႉ။ လုၵ်ႈဢွၼ်ႇ ဢႃယု 15 ၶူပ်ႇလူင်းတႂ်ႈ ၵႆႉတိတ်းၸပ်း တၢင်းပဵၼ်ၼၢဝ်ၶႆႈလိူတ်ႇဢွၵ်ႇၼမ်။

ႁူဝ်ၼပ်ႉၵူၼ်းတိတ်းၸပ်းတၢင်းပဵၼ် ၼၢဝ်ၶႆႈလိူတ်ႈဢွၵ်ႇ ၼႂ်းပီ 2025 ၶၢဝ်းတၢင်း 5 လိူၼ်ၼႆႉ သင်တႅၵ်ႈၵၼ်တင်း မိူဝ်ႈပီ 2024 ၶၢဝ်းယၢမ်းလဵဝ်ၵၼ်ၸိုင် တေလႆႈဝႃႈ လူတ်းယွမ်းဝႆႉ။ တၢင်းပဵၼ်ၼၢဝ်ၶႆႈလိူတ်ႈဢွၵ်ႇ ၼႂ်းမိူင်းမၢၼ်ႈၼႆႉ ၵႆႉပဵၼ်ၼႂ်းၶၢဝ်းၾူၼ် ၼမ်လိူဝ်ပိူၼ်ႈ။ ယူႇတီႈ ႁွင်ႈၵၢၼ် ၽွင်းလူင်ၾၢႆႇလဵၼ်ႈႁႅင်းလႄႈ ပၢႆးယူႇလီၵေႃႈ လႆႈႁဵတ်းသၢင်ႈၵၢၼ် ၵႅတ်ႇၶႄႇႁႄႉၵင်ႈဝႆႉယူႇ ဝႃႈၼႆ။