ၼႂ်းလိူၼ်မေႊ 2025 ၼႆႉ ၶလိပ်ႉဝီႊတီႊယူဝ်ႊ ဢၼ်ၵူၼ်းမိူင်းႁူမ်ႈတုမ် ၵႃႉၶၢႆတီႈလိၼ်ၼႂ်းမိူင်းထႆး လိုဝ်းၸွတ်ႇတူဝ်ႈဝႆႉၼိူဝ်သူဝ်ႊသျႄႊမီႊတီႊယိူဝ်ႊ၊ လွင်ႈၼႆႉ ႁဵတ်းႁႂ်ႈၵူၼ်းထႆး ၸီႉၸမ်ႈဝႆႉ လၢႆယၢင်ႇလၢႆပိူင်။ ပႃးၸဵမ်သိုဝ်ႇၶၢဝ်ႇယႂ်ႇၼႂ်းထႆး လၢႆလၢႆဢၼ်ၵေႃႈ ပိုၼ်ၽၢဝ်ႇ တူၵ်ႇတၵ်ႉဝႆႉလွင်ႈၼႆႉ။ ၵူၼ်းထႆး ၸိူဝ်းၶွမ်ႊမႅၼ်ႉ ဢမ်ႇႁၼ်လီၸွမ်းၵေႃႈ မီးတင်းၼမ်။

ဝၢႆးသေ ၶလိပ်ႉဝီႊတီႊဢူဝ်ႊ ၵူၼ်းမိူင်းႁူမ်ႈတုမ် ၶၢႆတီႈလိၼ်ၼႂ်းမိူင်းထႆး လိုဝ်းယူႇၼိူဝ်ဢွၼ်ႊလၢႆႊၼႆႉသေ ၺႃးၵူၼ်းထႆးၸီႉၸမ်ႈဢွၵ်ႇလၢတ်ႈၼိူဝ်ဢွၼ်ႊလၢႆႊလၢႆလွင်ႈ။ လွင်ႈၼႆႉ ႁဵတ်းႁႂ်ႈႁႅင်းၵၢၼ်ယၢၼ်မိူင်း မႆႈၸႂ်ၵူဝ်ၸဝ်ႈၼႃႈတီႈထႆး လမ်းသွၵ်ႈၵူတ်ႇထတ်း ၵူဝ်ယူႇယၢပ်ႇၼႂ်းၵႄႈၵူၼ်းထႆးထႅင်ႈ။

လွင်ႈၵူၼ်းမိူင်းႁူမ်ႈတုမ် ၵႃႉၶၢႆတီႈလိၼ်ၸိူဝ်းၼႆႉ မီးၼမ်မႃးလႄႈ ၵူၼ်းထႆးၶဝ် ၸင်ႇၾၢင်ႉမႅၼ်ႈသေ ဢွၼ်ၵၼ် တင်ႈၶေႃႈထၢမ်ဝႃႈ ၸွင်ႇမႅၼ်ႈၸွမ်းပၵ်းၸွမ်းပိူင် ၼႆၸိူဝ်းၼႆႉ။

ဢိင်ၼိူဝ် လွင်ႈၵူၼ်းမိူင်းႁူမ်ႈတုမ် ၶၢႆတီႈလိၼ်ၼႂ်းမိူင်းထႆးၼႆႉသေ ၽူႈတူင်ႉၼိုင်ၼႂ်းၸုမ်းၸွႆႈတူင်ႇ ၵူၼ်းၵေႃႉၼိုင်ႈတႄႉ လၢတ်ႈတၢင်းႁၼ်ထိုင်ဝႆႉၼင်ႇၼႆ –

“တီႈတႄႉမၼ်း ဢမ်ႇၸႂ်ႈၵူၼ်းတႆးႁဝ်းၶၢႆလေႃႇ။ မၼ်းပဵၼ်ၵူၼ်းမိူင်းၵူၼ်းထႆးၶဝ် ၵူၼ်းဢၼ်ၶၢႆၼၼ်ႉ။ ဢၼ်ဝႃႈ ၵူၼ်းတႆးမႃးၶၢႆတီႈလိၼ်ဢၼ်ဝႃႈၼၼ်ႉ မၼ်းဢမ်ႇၸႂ်ႈတီႈလိၼ် ၶဝ်ၶႃႈလူး။ မၼ်း ပဵၼ်တီႈလိၼ်ၶွင်ၵူၼ်းယူၼ်းၵူၼ်းထႆးၶဝ် ပေႃးၶဝ်ၶၢႆသမ်ႉ ၶၢႆဢမ်ႇလႆႈလႄႈ ၶဝ်ၵေႃႈမႃးၸၢင်ႈဢဝ် ၵူၼ်းၸိူဝ်းမီးၸိုဝ်ႈသဵင် ၵႂႃႇၶၢႆပၼ်ၼၼ်ႉၼႃႇ။ မၼ်းမိူၼ်ဝႃႈ ၵႂႃႇၶၢတ်ႈဢဝ်တူဝ်ၵူၼ်း ၸိုဝ်ႈယႂ်ႇမႃး ၶၢႆပၼ်ၶဝ်။ မိူၼ်တင်းဝႃႈ ၸၢင်ႈႁႅင်းၵၢၼ်မႃးၶၢႆပၼ်ၼၼ်ႉၵူၺ်းၼင်ႇၵဝ်ႇ မၼ်းဢမ်ႇၸႂ်ႈတီႈလိၼ် ၵူၼ်းဢၼ်မႃးၶူဝ်ႊသၼႃးၶၢႆမၼ်း ၶဝ်တေႃႉတႄႉလႆႈၵိၼ်ပိူဝ်ႊသႅၼ်ႊမၼ်းၵူၺ်း”- ဝႃႈၼႆ။  

တီႈလိၼ် ဢၼ်ၵူၼ်းမိူင်းႁူမ်ႈတုမ် ပႃးၸဵမ်ၵူၼ်းတႆး ပိုၼ်ၽၢဝ်ႇၶၢႆယူႇၼၼ်ႉ ၸဝ်ႈၶွင်တႄႉမၼ်း ၵမ်ႈၼမ် ပဵၼ်ဝႆႉၵူၼ်းထႆး၊ ယူႇတီႈ ၵူၼ်းထႆးၼၼ်ႉသေ ၶိုၼ်းၸၢင်ႈၵူၼ်း ၸိူဝ်းၸိုဝ်ႈလိုဝ်းၼႂ်းၵၢၼ် ပၢႆးမွၼ်းလႄႈသင် ၼႂ်းဢွၼ်ႊလၢႆႊၸိူဝ်းၼႆႉလႄႈသင် မႃးပိုၼ်ၽၢဝ်ႇၶၢႆပၼ်ၵူၺ်းၼႆ ၵူၼ်းၵဵင်းမႆႇ ၵေႃႉၼိုင်ႈလၢတ်ႈ။

ၼႂ်းသိုဝ်ႇၶၢဝ်ႇ ThaiNews – ไทยนิวส์ ၼၼ်ႉတႄႉ ႁၢႆးငၢၼ်းဝႆႉဝႃႈ -“မီးၶလိပ်ႉဝီႊတီႊယူဝ်ႊ ဢၼ်ၵူၼ်း တႆး ၶူဝ်ႊသၼႃႊၶၢႆတီႈလိၼ် လိုဝ်းယူႇၼိူဝ်ဢွၼ်ႊလၢႆႊ။ တီႈလိၼ်ဢၼ်ပိုၼ်ၽၢဝ်ႇၶၢႆယူႇ ၸိူဝ်းၼႆႉ မီး ၼႂ်းပိုၼ်ႉတီႈၵဵင်းႁၢႆးလႄႈ မႄႈသွတ်ႇ ၸိူဝ်းၼႆႉ။ ပဵၼ်ဝဵင်းဢၼ်တိတ်းၸပ်း တင်းၸိုင်ႈမိူင်းႁူမ်ႈတုမ်မၢၼ်ႈ။ ပိုၼ်ၽၢဝ်ႇၶၢႆ ႁႂ်ႈၵူၼ်းမိူင်းမၢၼ်ႈမႃးသိုဝ်ႉ”- ဝႃႈၼႆ။

ၼႂ်းၶၢဝ်ႇထႆး – Nation TV ၵေႃႈတႅမ်ႈဝႆႉဝႃႈ – ၵူၼ်းမိူင်းတႆး မႃးထႅၵ်ႇၶၢႆတီႈလိၼ် မိူင်းထႆး။ ယွၼ်ႉဝၢၼ်ႈ မိူင်းၶဝ် ဢမ်ႇၵတ်းယဵၼ်လႄႈ ၸူဝ်းၵၼ်မႃးယူႇမိူင်းထႆး။ ပေႃးဢဝ်ႁူဝ်ၵူၼ်းမိူင်းထႆးၵူၺ်းတႄႉ မၼ်းပႆႇမီးၼမ်၊ ဢမ်ႇထိုင်တီႈလႆႈၵႂႃႇထႅၵ်ႇဢဝ်တီႈလိၼ်သူၼ်ႁႆႈၼႃး မႃးၶၢႆမႅင်ႇၵၼ်လေႃႇ – ဝႃႈၼႆပႃး။

ဢိင်ၼိူဝ် ၶလိပ်ႉဝီႊတီႊဢူဝ်ႊ ဢၼ်ၵူၼ်းမိူင်းႁူမ်ႈတုမ် ၶူဝ်ႊသၼႃႊၶၢႆတီႈလိၼ်ၼၼ်ႉသေ မီးၵူၼ်းထႆးၵမ်ႈၼမ် ၸီႉၸမ်ႈပၼ်တၢင်းႁၼ်ထိုင် ၼႂ်းၶွမ်ႊမႅၼ်ႉၾဵတ်ႉသ်ပုၵ်ႉၶ်ၸိူဝ်းၼၼ်ႉဝႃႈ – “ၵူၼ်းမိူင်း မၢၼ်ႈ မႃးထႅၵ်ႇတီႈလိၼ်ထႆးၶၢႆ ၊ ဢၼ်ၼႆႉ ဢမ်ႇထုၵ်ႇလီပဵၼ်။ ၶႂ်ႈႁႂ်ႈၸဝ်ႈၼႃႈတီႈၶဝ် လူင်းထတ်းထွင် ပၼ် ၊ တီႈလိၼ်ထႆးၸိူဝ်းၼႆႉ တေယဵၼ်းပဵၼ်တီႈလိၼ် ၵူၼ်းယၢၼ်မိူင်းၸိူဝ်းၼၼ်ႉၵႂႃႇယဝ်ႉ”- ဝႃႈၼႆ။

ဢိင်ၼိူဝ်လွင်ႈၼႆႉ ၸၢႆးသႅင်မိူင်း မင်းၵွၼ်း ႁူဝ်ပဝ်ႈ ၵေႃသိုဝ်ႇတႆး (ASP) လၢတ်ႈတီႈ MAP radio ဝႆႉၼင်ႇၼႆ –

“ၶၢႆတီႈလိၼ်ဢၼ်ဝႃႈၼႆႉ သင်ႁဝ်းၶႃႈဢမ်ႇပႅတ်ႉဢမ်ႇလႅၼ် ၊ တီႈလိၼ်ၼၼ်ႉၵေႃႈ မီးတႄႉ ထုၵ်ႇ ၸွမ်းပၵ်းယူႇတႄႉၼႆၸိုင် ၵူၼ်းၶၢႆၵေႃႈ မီးသုၼ်ႇၶၢႆ ၊ ၵူၼ်းသိုဝ်ႉၵေႃႈ မီးသုၼ်ႇသိုဝ်ႉ ၵူၺ်းၵႃႈ ငိုၼ်း ဢၼ်တေဢဝ်မႃးသိုဝ်ႉၼၼ်ႉ လုၵ်ႉလႂ်မႃးၼႆၼၼ်ႉတႄႉ ပဵၼ်ထႅင်ႈၶၵ်ႉတွၼ်ႈၼိုင်ႈ။ ၵူၼ်းသိုဝ်ႉ ၽိတ်းႁႃႉၼႆၵေႃႈ ဢမ်ႇၽိတ်း ၵွပ်ႈဝႃႈ ႁဝ်းဢမ်ႇလႆႈသိုဝ်ႉၶူဝ်းၶွင်ၽိတ်းမၢႆမီႈလူး။ ဢမ်ႇၸႂ်ႈဢဝ်ယႃႈ မႃႉယႃႈယွင်ႇမႃးတမ်းၶၢႆၶႃႈလူး။ ၵူၺ်းၵႃႈ သင်ၸိူဝ်ႉဝႃႈ တီႈလိၼ်ၼႆႉ ၸဝ်ႈၶွင်တႄႉတႄႉမၼ်း ယင်းပႆႇ ပၼ်ၶႂၢင်ႉလႄႈ တီႈလိၼ်ၼၼ်ႉ ဢမ်ႇၸႂ်ႈတီႈလိၼ် တႃႇတေသိုဝ်ႉၶၢႆၼႆတႄႉ လႆႈဝႃႈၽိတ်းယဝ်ႉ”- ဝႃႈၼႆ။

ပေႃးမႃးတူၺ်း ၾၢႆႇၵူၼ်းသိုဝ်ႉမၼ်းၼႆၵေႃႈ ဝၢႆးသေမၼ်းသိုဝ်ႉယဝ်ႉ သင်ၶႂ်ႈၶၢႆၶိုၼ်းၼႆၸိုင် ယူႇတီႈ သုၼ်ႇမၼ်း။ ယွၼ်ႉဝႃႈပဵၼ်သုၼ်ႇၵူၼ်းသိုဝ်ႉလႄႈ ၵူၼ်းၶၢႆ။ ၵူၺ်းၵႃႈ တၵ်းလူဝ်ႇႁူႉဝႆႉဝႃႈ ၸဝ်ႈၶွင် တီႈလိၼ်တႄႉတႄႉ တၵ်းတေလႆႈပဵၼ်ၵူၼ်းထႆးၵူၺ်း။ ဢၼ်ၵူၼ်းၼွၵ်ႈမိူင်းသိုဝ်ႉသေ ပဵၼ်လႆႈၸိုဝ်ႈ ၶဝ်ၵမ်းသိုဝ်ႈၼၼ်ႉ ပဵၼ်ႁွင်ႈၶွၼ်ႊတူဝ်ႊ ၵူၺ်းၼႆ – ၸၢႆးသႅင်မိူင်းမင်းၵွၼ်း သိုပ်ႇလၢတ်ႈ။

မိူၼ်ၼင်ႇ ပွတ်းတၢင်းမႄႈသၢႆ ၊ မႄႈၾႃႉလူင် (ၼႂ်းၵဵင်းႁၢႆး) ၸိူဝ်းၼႆႉၵေႃႈ မီးၵူၼ်းမိူင်းႁူမ်ႈတုမ်မၢၼ်ႈ ပိုၼ်ၽၢဝ်ႇၶၢႆမိူၼ်ၵၼ်။ တီႈလိၼ်ဢၼ်ၶၢႆတေႃႇၵၼ်ယူႇ ၸိူဝ်းၼႆႉ ၵမ်ႈၼမ် တိတ်းၸပ်းဝႆႉ လွႆၼၢင်း ၼွၼ်း ၸႄႈတွၼ်ႈၵဵင်းႁၢႆး။

ၵူၼ်းပိုၼ်ၽၢဝ်ႇၶၢႆၼိူဝ်ဢွၼ်ႊလၢႆႊၵေႃႈ ပဵၼ်ၸၢဝ်းမၢၼ်ႈ ၸၢဝ်းတႆး ဢၼ်မီးၵူၼ်းတိတ်းတၢမ်း follower ၼပ်ႉႁူဝ်သႅၼ်။ သင်ဝႃႈ ၶၢႆလႆႈတီႈလိၼ်ၼႆၵေႃႈ ၸဝ်ႈၶွင်တီႈလိၼ်သမ်ႉၶိုၼ်း မႅင်ႇၸႅၵ်ႇ ပၼ်ၶိုၼ်းပိူဝ်ႊသႅၼ်ႊမၼ်း ငၢႆးမိူၼ်ၼၢႆႈၼႃႈ(ပွႆးၸႃး) ၵူၼ်းထႆးၶဝ်ၵူၺ်း။ လွင်ႈၼႆႉ မၼ်းၽိတ်းပၵ်းပိူင်မၢႆမီႈ – ၼႆ ThaiNews – ไทยนิวส์ ႁၢႆးငၢၼ်းဝႆႉ။

ဢွင်ႈတီႈဢၼ် ၵူၼ်းမိူင်းႁူမ်ႈတုမ်မၢၼ်ႈ ဢၼ်ထႆးၶဝ်ႁွင်ႉဝႃႈ ၵူၼ်းတၢင်ႇၻၢဝ်ႊ ၸိူဝ်းၼႆႉ မႃးၶၢႆယူႇ ၸိူဝ်းၼၼ်ႉၵေႃႈ ဢမ်ႇၵွမ်ႉၵူၺ်း ပိုၼ်ၽၢဝ်ႇၶၢႆၼႂ်းဢွၼ်ႊလၢႆႊ မိူၼ်ၼင်ႇ ၸွမ်းသဵၼ်ႈတႃႈသၢႆတၢင်း၊ တၢင်းၶဝ်ႈမူႇဝၢၼ်ႈၸိူဝ်းၼႆႉၵေႃႈ ႁၼ်ပူၵ်းပၢႆႉပိုၼ်ၽၢဝ်ႇၶၢႆဝႆႉ(တႅမ်ႈလိၵ်ႈထႆး) မိူၼ်ပဵၼ်တၢင်းၵၢၼ် ၵူၺ်း။ တႅမ်ႈပိုၼ်ၽၢဝ်ႇပႃးဝႃႈ သင်သိုဝ်ႉတီႈလိၼ်ယဝ်ႉ လႆႈပႃးၼမ်ႉ ပႃးၾႆး ဢမ်ႇလႆႈမႆႈၸႂ် ၼႆၸိူဝ်းၼႆႉ။

ၵူၼ်းၸၢဝ်းတႆး ၸိူဝ်းပိုၼ်ၽၢဝ်ႇၶၢႆၵေႃႈ သမ်ႉမိူၼ်ၼင်ႇႁူၺ်းႁွင်ႉဢဝ် ၵူၼ်းမိူင်းႁူမ်ႈတုမ်မၢၼ်ႈ မႃး သိုဝ်ႉတီႈလိၼ်၊ လၢတ်ႈဝႃႈ ၽွၼ်ႇဢဝ်ၵေႃႈလႆႈ ဢမ်ႇဢဝ်ၶီႈ ဢမ်ႇဢဝ်ၼမ်ႉတွၼ်းသင်ၼႆၸိူဝ်းၼႆႉ။ တီႈတႄႉမၼ်း ၵူၼ်းမိူင်းမၢၼ်ႈဢမ်ႇသိုဝ်ႉ ဢမ်ႇၽွၼ်ႇလႆႈတီႈလိၼ်ၵမ်းသိုဝ်ႈ။ လွင်ႈၼႆႉ ၵူဝ်ပဵၼ်လွင်ႈ ယွၵ်ႇလႅၼ်ၵၼ်လူးၵွၼ်ႇ – ၼႆ ThaiNews – ไทยนิวส์ ႁၢႆးငၢၼ်းဝႆႉပႃး။

ၵူၺ်းၵႃႈ ဢၼ်သိုဝ်ႉတီႈလိၼ်ၼႂ်းမိူင်းထႆးၼၼ်ႉ ၵူၼ်းမိူင်းမၢၼ်ႈ မိူင်းတႆး ပဵၼ်ၵမ်ႈဢေႇၵူၺ်း။ ၸိူဝ်းပဵၼ်ၸၢဝ်းၶႄႇ ဢိင်းၵလဵတ်ႈ ၸိူဝ်းၼႆႉယိင်ႈၶႅၼ်းသိုဝ်ႉယူႇ/ သိုဝ်ႉႁဵတ်းၵၢၼ်ပၢႆးမၢၵ်ႈမီး – မီးၼမ်ၼႆ – ၵူၼ်းၼႂ်းတူင်ႇဝူင်းၶၢႆတီႈလိၼ်ၵေႃႉၼိုင်ႈၵေႃႈ လၢတ်ႈၼင်ႇၼႆ။

ၸွမ်းၼင်ႇ ပၵ်းပိူင်ထႆး မတ်ႉတႃ 93 ပိူင်းၼႄဝႆႉတႄႉ တႃႇၵူၼ်းၼွၵ်ႈမိူင်း တေပဵၼ်ၸဝ်ႈၶွင် တီႈလိၼ် မိူင်းထႆးလႆႈၼၼ်ႉ လူဝ်ႇလႆႈပဵၼ်ပီႈၼွင်ႉၵူၼ်းထႆး ဢၼ်ၶဝ်ႈပဵၼ်တၢင်းၵၢၼ်တႄႉတႄႉ တေလႆႈမီး ငဝ်ႈႁၢၵ်ႈလၵ်းထၢၼ် ဢၼ်လူင်ပွင်ႈၸိုင်ႈထႆး ပၼ်ၶႂၢင်ႉဝႆႉ။ ၵူၺ်းၵႃႈ တီႈလိၼ် တေဢမ်ႇလႆႈၼမ်လိူဝ် 1 ရႆႉ(ႁႆႈ) ၊ သင်ဝႃႈ ပဵၼ်တီႈလိၼ် ႁူင်းၵၢၼ်လႄႈ တီႈလိၼ်ၽုၵ်ႇသွမ်ႈၼႆၵေႃႈ တေဢမ်ႇလႆႈၼမ်လိူဝ် 1 ႁႆႈ။

သင်ဝႃႈ ပဵၼ်ၵူၼ်းၼွၵ်ႈမိူင်း ဢၼ်မႃးလူင်းတိုၼ်းလၢင်းႁဵတ်းၵၢၼ်ပၢႆးမၢၵ်ႈမီးဝႆႉ ဢမ်ႇယွမ်း 40 လၢၼ်ႉဝၢတ်ႇ ငိုၼ်းထႆး ၶၢဝ်းတၢင်း 3 ပီ ၼႆၸိုင် ၸၢင်ႈပဵၼ်ၸဝ်ႈၶွင်တီႈလိၼ်လႆႈ ဢမ်ႇယွမ်း 1 ႁႆႈ ၼႆႉၵေႃႈ လူဝ်ႇမီးဝႂ်ၶႂၢင်ႉတီႈလူင်ပွင်ၸိုင်ႈထႆး။

လိူဝ်ၼၼ်ႉ သင်ဝႃႈ ပဵၼ်ၵူၼ်းၼွၵ်ႈမိူင်းသေ မႃးလူင်းတိုၼ်းလၢင်း မႃးပိုတ်ႇၶွမ်ႊပၼီႊဝႆႉၼႆၸိုင် ပဵၼ်ၸဝ်ႈၶွင်တီႈလိၼ်လႆႈမိူၼ်ၵၼ်။ ၵူၺ်းၵႃႈ ၼႂ်းၶွမ်ႊပၼီႊ ဢၼ်ၶဝ်လူင်းတိုၼ်းလၢင်းဝႆႉ ၸိူဝ်း ၼၼ်ႉ တေလႆႈပႃးၵူၼ်းထႆး 51% ၶိုၼ်ႈၼိူဝ် ဝႃႈၼႆဝႆႉ။

ထႅင်ႈဢၼ်ၼိုင်ႈၵေႃႈ ၵူၼ်းၼွၵ်ႈမိူင်း သိုဝ်ႉႁွင်ႈၶွၼ်ႊတူဝ်ႊသေ ပဵၼ်ၸဝ်ႈၶွင်လႆႈ ။ ၵူၺ်းၵႃႈ တေ ဢမ်ႇလႆႈ သိုဝ်ႉၶွၼ်ႊတူဝ်ႊတင်းတိုၵ်း ဝႃႈၼႆဝႆႉ။

လွင်ႈၼႆႉၵေႃႈ ထႆးယၢမ်ႈဢွၵ်ႇၶၢဝ်ႇဝႃႈ – ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း မႃးၼႆႉ ၵူၼ်းမိူင်းမၢၼ်ႈ မႃးသိုဝ်ႉႁွင်ႈၶွၼ်ႊတူဝ်ႊယူႇသဝ်းၼမ် – ၼႂ်းဝဵင်းလူင်ၵုင်းထဵပ်ႈ – ဝႃႈၼႆ။