ၽႅၼ်ႇလိၼ်ဝႆႁၢဝ်ႈႁႅင်း မိူဝ်ႈႁၢင်ႈလိူၼ်မၢတ်ႊၶျ် 2025 ၼႆႉ ႁိူၼ်းယေးၵူၼ်းမိူင်း ထုင်ႉၼွင်ႁၢႆး ယႃႈ ၵူၼ်ႇပင်းလူႉၵွႆ တေႃႇထိုင်ယၢမ်းလဵဝ် ပႆႇလႆႈပူၵ်းပွင်ၶိုၼ်း ယၢမ်းလဵဝ် ၾူၼ်ၵေႃႈတူၵ်းမႃး ၵူၼ်းမိူင်းၼႂ်းၼွင်ဢွၼ်ၵၼ် ၵူဝ်ၼမ်ႉထူမ်ႈၼမ်ႉၼွင်းမိူၼ်ၵူႈပီ ယွၼ်ႉဢမ်ႇပႆႇလႆႈပူၵ်းပွင်ၶိုၼ်း ႁိူၼ်းယေး ဝႃႈၼႆ။
တႄႇၼႂ်းႁၢင်လိူၼ်မေႊၼႆႉမႃး ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈၼမ်ႉၼႂ်းၼွင်ႁၢႆးယႃႈ ဝၢၼ်ႈတွင်ႇပူဝ်ႉၵျီး ၶိုၼ်ႈၸမ်သွၵ်ႇလႄႈ ၵူၼ်းပိုၼ်ႉတီႈပဵၼ်ဢၼ်မႆႈၸႂ်၊ ၵူဝ်ၼမ်ႉထူမ်ႈၼမ်ႉၽွင်း ဢမ်ႇ တၼ်းလႆႈဢဝ် မၢၵ်ႇၶဝ်ႈတဝ်ႈၼမ်ႉၼႂ်းသူၼ် ဝႃႈၼႆ။
ၼၢင်းယိင်း ၵူၼ်းဝၢၼ်ႈတွင်ႇပူဝ်ႉၵျီး လၢတ်ႈၽူႈတွႆႇႁွၵ်ႈဝႃႈ – “ၼႂ်းႁၢင်လိူၼ်ၼႆႉၵူၺ်း ၾူၼ်ၵေႃႈ တူၵ်းဢမ်ႇထၢတ်ႇ ၊ ပေႃးတူၵ်းၼိုင်ႈပွၵ်ႈ ထပ်းၵၼ် 4 ဝၼ်း ၊ တေႃႈလဵဝ်ၼမ်ႉၼႆႉ ၶိုၼ်ႈမႃး ၸမ်သွၵ်ႇ ၊ တႃႇၶၢဝ်းၾူၼ်ၼႆႉ ၵူၼ်းဝၢၼ်ႈၶဝ်ၵေႃႈ ဢွၼ်ၵၼ်မႆႈၸႂ်ဝႆႉယူႇယဝ်ႉ၊ ၵူၺ်းပႆႇလႆႈ ႁၢင်ႈႁႅၼ်းသင်ဝႆႉ”- ဝႃႈၼႆ။
ၵူၼ်းမိူင်းၼႂ်းၼွင်ႁၢႆးယႃႈ ဢွၼ်ၵၼ်လၢမ်းၶၢတ်ႈဝႃႈ ၼမ်ႉၸၢင်ႈထူမ်ႈ ၼႂ်းၼွင်ႁၢႆးယႃႈၼႆလႄႈ ယၢမ်းလဵဝ် ဢွၼ်ၵၼ် ၼႅတ်ႈဢဝ်မၢၵ်ႇၶဝ်ႈတဝ်ႈၼမ်ႉ ဢၼ်ၽုၵ်ႇဝႆႉသေ ႁႃၶၢႆၵႃႈထုၵ်ႇၵႃႈပေႃး- ၵူၼ်းပိုၼ်ႉတီႈလၢတ်ႈၼင်ႇၼႆ။
“ပေႃးဢမ်ႇဢဝ်ၶၢႆၵေႃႈ ပေႃးၾူၼ်တူၵ်းႁႅင်းထႅင်ႈၼႆ တေထူမ်ႈႁႅင်းသေ တေတၢႆပႅတ်ႈသဵင်ႈယဝ်ႉ ၊ လႆႈၵႃႈၶၼ်ထုၵ်ႇသေတႃႉၵေႃႈ ၶႅၼ်းသေသုမ်းပႅတ်ႈလၢႆလၢႆ ၊ တိုၼ်းလၢင်းမၼ်းတႄႉ တိုၼ်းဢမ်ႇလႆႈၶိုၼ်းယူႇယဝ်ႉ”- ဝႃႈၼႆ။
ၶၼ်ၶၢႆမၢၵ်ႇၶဝ်ႈတဝ်ႈၼမ်ႉ ၼႂ်းၼွင်ႁၢႆးယႃႈ ႁၢင်လိူၼ်မေႊၼႆႉ မၢၵ်ႇၶိူဝ်ၶိူဝ်း ၼိုင်ႈလုၵ်ႈ 30 ပျႃး ၊ မၢၵ်ႇၶိူဝ်ၼိုင်ႈၸွႆႉ 500 ပျႃး ၊ မၢၵ်ႇၼမ်ႉတဝ်ႈ 100 ပျႃး ၊ မၢၵ်ႇၶိူဝ်သူမ်ႈ ၼိုင်ႈသႃႉ 40,000 ပျႃး ၊ မၢၵ်ႇၽိတ်ႉလူင် 200 ပျႃး – ဝႃႈၼႆ။
မိူဝ်ႈပီ 2024 ၼမ်ႉထူမ်ႈၼမ်ႉၼွင်းလႄႈ ႁဵတ်းႁႂ်ႈႁိူၼ်းယေးၵူၼ်းမိူင်းၵူၼ်ႇပင်းလူႉၵွႆ။ ဝၢႆးၼၼ်ႉ ထူပ်းၽေးၽႅၼ်ႇလိၼ်ဝႆထႅင်ႈ။ ယၢမ်းလဵဝ်သမ်ႉ ပေႃးၾူၼ်တူၵ်းဢမ်ႇထၢတ်ႇၼႆ ၼမ်ႉၸၢင်ႈ ထူမ်ႈထႅင်ႈ။ ၵွပ်ႈၼႆ ၸုမ်းၸွႆႈထႅမ်ၵၼ် ၼႂ်းၼွင်ႁၢႆးယႃႈ ပၼ်ၾၢင်ႉၵၼ် ႁႂ်ႈႁၢင်ႈႁႅၼ်းၶူဝ်းၶွင် တၢင်ႇဝႆႉတီႈသုင် ၊ ၶၢႆႉဝႆႉတီႈလွတ်ႈၽေးသေၵမ်း ဝႃႈၼႆ။
မိူဝ်ႈဝၼ်းတီႈ 24/05/2025 ၼႆႉၵေႃႈ ယွၼ်ႉၾူၼ်တူၵ်းဢမ်ႇထၢတ်ႇလႄႈ ၼမ်ႉၵိုင်ႉၵၢင်ႉထူမ်ႈ လၢႆလၢႆပွၵ်ႉၼႂ်းဝဵင်းတူၼ်ႈတီး ႁဵတ်းႁႂ်ႈၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉယၢပ်ႇၽိုတ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ