မိူဝ်ႈၼႆႉ ဝၼ်းတီႈ 8/6/2026 ယၢမ်းၵၢင်ၼႂ်ၸဝ်ႉ  5 မူင်း ၾူၼ်တူၵ်းႁၢဝ်ႈႁႅင်း တီႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ  ႁူဝ်ႉၵူၼ်ႇတဵင်သႂ်ႇ ၼၢင်းယိင်းၵေႃႉၼိုင်ႈ  ထိုင်တၢႆ ဢၼ်ယူႇတီႈပွၵ်ႉ6 ဢိူင်ႇႁူဝ်ၼမ်ႉ   ။

ၵူၼ်းၸၢႆးဢႃယု 30 ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ မိူဝ်ႈဝႃးၼႆႉ ၾူၼ်တူၵ်းတင်းဝၼ်း ၼႂ်ၼႆႉၵၢင်ၼႂ် ၼႃႈမိူင်းၸမ်လႅင်း မၢၵ်ႇႁိၼ်ၵူၼ်ႇသႂ်ႇႁိူၼ်း  ႁဵတ်းႁႂ်ႈ မႄႈၸဝ်ႈႁိူၼ်း လႆႈလူႉတၢႆၵႂႃႇၵေႃႉၼိုင်ႈ ၊ ၵူၼ်းဢၼ် တၢႆၼၼ်ႉပဵၼ်ၸၢဝ်းၶႄႇၶႃႈဢေႃႈ”– ဝႃႈၼႆ ။ 

ၸုမ်းၶႄၾႆးၼႂ်းပိုၼ်ႉတီႈပိုၼ်ၽၢဝ်ႇလၢတ်ႈဝႆႉဝႃႈ ၼၢင်းယိင်းဢၼ်ထုၵ်ႇ လိၼ်ၵူၼ်ႇတဵင်လူႉ တၢႆၼၼ်ႉ ၸိုဝ်ႈ တေႃႇဢေးယိၼ်း (ဒေါ်အေးယင်း )  ဢႃယု 49 ပီ ၊ ထုၵ်ႇ လိၼ် မၢၵ်ႇႁိၼ် ၵူၼ်ႇတဵင်သႂ်ႇသေ မၢတ်ႇၸဵပ်းႁႅင်း တၢႆၵႂႃႇထင်တီႈ တီႈႁိူၼ်းမၼ်းၼၢင်း ဝႃႈၼႆ ။

ၵူၼ်းပိုၼ်ႉတီႈဢၼ်ႁူႉႁၼ်ၸွမ်းတႄႉလၢတ်ႈဝႃႈ -“ ႁႂ်ႈဝႃႈ လိၼ်ၵူၼ်ႇတႄႉဢမ်ႇၸႂ်ႈ ပဵၼ်လိၼ် မၢၵ်ႇႁိၼ် ဢၼ်ထူမ်ႇဝႆႉတီႈႁူဝ်ႉၼၼ်ႉၵူၼ်ႇတဵင်သႂ်ႇသေတၢႆ”– ဝႃႈၼႆ ။

ယၢမ်းလဵဝ် တီႈၼႂ်းပွၵ်ႉ 6 ယွၼ်ႉၾူၼ်တူၵ်းႁၢဝ်းႁႅင်း လိၼ်ၵူၼ်ႇဝႆႉလႄႈ ၵူၼ်းပိုၼ်ႉတီႈ လႆႈၶၢႆႉ ယူႇ ဢွင်ႈတီႈဝႆႉသေဢမ်ႇၵႃး ၼႂ်းဝဵင်းတၢင်ႉယၢၼ်းၵေႃႈ ၼမ်ႉၼွင်းထူမ်ႈဝႆႉလႄႈ ႁႂ်ႈၵူၼ်းမိူင်းၾၢင်ႉ ယူႇၾၢင်ႉၵိၼ်ၵၼ်ဝႆႉၼႆ ၸုမ်းၶႄႇၾႆးၼႂ်းပိုၼ်ႉတီႈ ပိုၼ်ၽၢဝ်ႇဝႆႉၼင်ႇၼႆ ။  

ၾၢႆႇၼိုင်ႈတီႈဝဵင်းတၢင်ႉယၢၼ်းၼႆႉ ပေႃးၾူၼ်တူၵ်းၼႆ  ၼမ်ႉၵိုင်ႉၵၢင်ႉ ၼွင်းထူမ်ႈ ၊   ပဵၼ်ယွၼ်ႉ ၾၢႆႇလိူမ်ႈလႆႇၸႄႈဝဵင်း ဢမ်ႇတူၺ်းလူပၼ်ႁွင်ႈၼမ်ႉ လၢႆႇၼမ်ႉၵၢင်ဝဵင်း တၼ် ဢမ်ႇလႆလီ ၊ ၵူၼ်းမိူင်းၵမ်ႈၽွင်ႈသမ်ႉ ၵေႃႇသၢင်ႈႁိူၼ်းယေး  ၵေႃႇသၢင်ႈႁၢၼ်ႉ ဢမ်ႇၾၢင်ႉ ဢမ်ႇသႂ်ႇၸႂ် ဝႆႉပၼ်တႃႇႁွင်ႈၼမ်ႉလၢႆႇလႆလႆႈလီ။ ၸင်ႇဝႃႈၼမ်ႉၵမ်းၵမ်းထူမ်ႈၸွမ်းသဵၼ်ႈတၢင်း ၊ ၶဝ်ႈႁိူၼ်းၶဝ်ႈႁၢၼ်ႉၵူၼ်းပိုၼ်ႉတီႈၼႆယဝ်ႉ ။

လွင်ႈၼႆႉယူႇတီႈၽူႈမီးပုၼ်ႈၽွၼ်းၼႂ်းပိုၼ်ႉတီႈၵေႃႈဢမ်ႇဢဝ်ပုၼ်ႈၽွၼ်းႁႂ်ႈထိုင်တီႈၼႆ ၵူၼ်းၸၢႆးယူႇဝဵင်းတၢင်ႉယၢၼ်းၵေႃႉၼိုင်ႈလၢတ်ႈၼႄႇၼင်ႇၼႆ ။  

“ပေႃးၼမ်ႉထူမ်ႈၼႆႉ ႁဵတ်းႁႂ်ႈလုၵ်ႈဢွၼ်ႇၸိူဝ်းၵႂႃႇႁဵၼ်းလႄႈသင် ၊ ၵူၼ်းမိူင်းၸိူဝ်းလူဝ်ႇၵႂႃႇၵႃႉၶၢႆလႄႈသင် မၼ်းဢမ်ႇၸၢင်ႈၵႂႃႇၸၢင်ႈမႃးလီလီ တလဵဝ်ၼႆႉ ဢဝ်လေႃးၽ လိၼ်သေ ႁဵတ်းႁွင်ႈၵႅပ်ႈၵႅပ်ႈ ။ ႁွင်ႈဢၼ်ယၢမ်ႈမီးတၢင်းၵႂၢင်ႈၼိုင်ႈဝႃးၼႆႉ ၵိုတ်းၼိုင်ႈသွၵ်ႇ ၊ ႁွင်ႈဢၼ်ယၢမ်ႈမီး သွင်သွၵ်ႇသမ်ႉ ၵိုတ်း ၼိုင်ႈထတ်း(ၼိုင်ႈပေႇ ) ၊ ႁွင်ႈမီးၼိုင်ႈထတ်းသမ်ႉ ဢဝ်ႁၢႆလၢႆ ႁွင်ႈၵၢၼ်လိူမ်ႈလႆမူတ်းသႂ် လႄႈ ၵၢၼ်ႁူၼ်ႈမုၼ်းၼႂ်းပွၵ်ႉၼႂ်းဝဵင်း ၸိူဝ်းၼႆႉ လူင်ပွင်ၸိုင်ႈလႄႈ ၸုမ်းၵဵဝ်ၶွင်ႈၶဝ်ၵေႃႈ ဢမ်ႇတၼ်းဝၢႆတူၺ်း ဢမ်ႇၵႄႈလိတ်ႈပၼ်သင်”– ဝႃႈၼႆ ။

ပွၵ်ႉဢၼ်ႁွင်ႈၼမ်ႉၵႅပ်ႈတိုၼ်ႈ ၼမ်ႉၵႆႉၼွင်းထူမ်ႈၼႆႉ ပဵၼ်ၼႂ်းသဵၼ်ႈတၢင်းၼွင်ၽႃ ၾၢႆႇႁွင်ႇၸဝ်ႈမိူင်း ၊ တီႈတႅၼ်ႈၼမ်ႉပူၵ်ႇ လႄႈ သွင်ၾၢၵ်ႇၶၢင်ႈတၢင်းၼႂ်းဝဵင်းတၢင်ႉယၢၼ်း- ၵူၼ်းပိုၼ်ႉတီႈလၢတ်ႈ ။

တႄႇႁၢင်လိူၼ်မေႊ ပူၼ်ႉမႃး တေႃႇထိုင်ဝၼ်းမိူဝ်ႈၼႆႉ ၼႂ်းမိူင်းတႆးလၢႆလၢႆၸႄႈဝဵင်း မိူၼ်ၼင်ႇ ဝဵင်းပၢင်လွင်း ၊ ယွင်ႁူၺ်ႈ ၊ ၼမ်ႉၸၢင်ႇ ၊ ၾၢႆၶုၼ်  ၾူၼ်တူၵ်းထပ်းၵၼ်၊ မၢင်တီႈ ၼမ်ႉၼွင်းထူမ်ႈ ၶဝ်ႈထိုင်ၼႂ်းႁိူၼ်း ၼႂ်းႁူင်းႁဵၼ်း ၊ ၵူၼ်းပိုၼ်ႉတီႈတုၵ်းယွၼ်း ႁႂ်ႈၽူႈမီးပုၼ်ႈၽွၼ်းၶဝ် ၸွႆႈၵႄႈလိတ်ႈပၼ်ဝႆးဝႆး ဝႃႈၼႆ။

ယၢမ်းလဵဝ် ၼႂ်းၸိုင်ႈတႆးလၢႆလၢႆၸႄႈဝဵင်းၼႆႉ မွၵ်ႇၵုမ်ႈၼမ်ၼႃဝႆႉ။ ယွၼ်ႉၼၼ် ၾူၼ်ၸၢင်ႈတူၵ်းၼမ်ႁႅင်းသေ ၸၢင်ႈပဵၼ် လွင်ႈၼမ်ႉၼွင်းၼမ်ႉထူမ်ႈ။ လိူဝ်ၼၼ်ႉ ၵႆႉပဵၼ် ၾႃႉၽႃႇၾႃႉမႅပ်ႈ၊ လူမ်းထွင်းႁႅင်း၊ မၢၵ်ႇႁဵပ်းတူၵ်းၸိူဝ်းၼႆႉပႃးလႄႈ ႁႂ်ႈလႆႈၾၢင်ႉၵၼ်ၼႆ ႁွင်ႈၵၢၼ်ၾၢႆႇလၢမ်းၶၢတ်ႈၾိင်ႈၾႃႉ ပိုၼ်ၽၢဝ်ႇပၼ်ၾၢင်ႉဝႆႉၼင်ႇၼႆ ။