ၼႂ်းဝဵင်းမိူင်းၵုတ်ႈၼႆႉ မီးၵူၼ်းမႃးပွႆႇမၢၵ်ႇသႂ်ႇၸွမ်းၼႂ်းပွၵ်ႉယွမ်ႇသေ ႁဵတ်းႁႂ်ႈၸၢၵ်ႇမၢၵ်ႇတိူဝ်ႉသႂ်ႇၵူၼ်းမိူင်း မၢတ်ႇၸဵပ်း 5 ၵေႃႉ။

ဝၼ်းတီႈ 23/05/2025 မီးၵူၼ်းၸၢႆးသွင်ၵေႃႉ ၶီႇရူတ်ႉၶိူင်ႈမႃး ပႃးတင်းမၢၵ်ႇသေ မႃးပွႆႇသႂ်ႇ တီႈႁိမ်းတႃႈ ရူတ်ႉ ဢၼ်မီးၾၢႆႇဢွၵ်ႇဝဵင်းမိူင်းၵုတ်ႈ ၵူၼ်းမႃးပွႆႇမၢၵ်ႇၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ်မႃးပွႆႇတႄႉ ဢမ်ႇႁူႉ ၼႆယဝ်ႉ။

ၵူၼ်းပိုၼ်ႉတီႈ မိူင်းၵုတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 23 ၼႆႉ မီးၵူၼ်းၸၢႆး သွင်ၵေႃႉ မႃးပွႆႇ မၢၵ်ႇသေ ႁဵတ်းႁႂ်ႈၵူၼ်းမိူင်းတိူဝ်ႉမၢတ်ႇၸဵပ်း 5 ၵေႃႉ ၵူၼ်းမႃးပွႆႇမၢၵ်ႇ ၼၼ်ႉ ပဵၼ်ၽႂ် ပဵၼ်မူႇလႂ်ၸုမ်းလႂ် ဢၼ်ဝႃႈၼၼ်ႉ ဢမ်ႇလႆႈႁူႉ ယဝ်ႉၵေႃႈ ပႆႇတီႉၺွပ်းလႆႈ။ ဢၼ်ၵူၼ်းမႃးပွႆႇမၢၵ်ႇၼႆႉ ဢမ်ႇၸႂ်ႈဝႃႈပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း၊ ယၢမ်းၺႃးမႃး 2-3 ပွၵ်ႈယဝ်ႉ”- ဝႃႈၼႆ။

ဢိင်ၼိူဝ် လွင်ႈၼႆႉသေ ပူၼ်ႉမႃးမိူဝ်ႈဝၼ်းတီႈ 12/05/2025 ၼၼ်ႉၵေႃႈ တီႈပွၵ်ႉလႄႇဢူး (လယ်ဉီး) မီးၵူၼ်းၶီႇရူတ်ႉၶိူင်ႈမႃး 2 လမ်း မႃးပွႆႇမၢၵ်ႇသႂ်ႇလႄႈ တိူဝ်ႉၺႃးၵူၼ်းသိုၵ်းတဢၢင်း TNLA ယဝ်ႉ ၵမ်းၼိုင်ႈ။

လိူဝ်ၼၼ်ႉ မိူဝ်ႈဝၼ်းတီႈ 11 ၼၼ်ႉၵေႃႈ ၽွင်းသိုၵ်းမၢၼ်ႈ ၸႂ်ႉၶိူင်ႈမိၼ်ပၼ်ႇလဵပ်ႈၸွမ်းဝဵင်းမိူင်းၵုတ်ႈ ၼၼ်ႉ မီးၵူၼ်းၸၢႆး 2 ၵေႃႉ ဢဝ်မၢၵ်ႇမႃးပွႆႇသႂ်ႇ ၾၢႆႇၼႃႈ Music Zone KTV လႄႈ ႁဵတ်းႁႂ်ႈၵူၼ်းမိူင်း ဢွၼ် ၵၼ်တူၵ်းၸႂ်ၵူဝ်ႁႄ ၼႆယဝ်ႉ။  

ၼႂ်းဝဵင်းမိူင်းၵုတ်ႈၼႆႉ ယၢမ်းလဵဝ် ဢမ်ႇမီးပၢင်တိုၵ်းသင်သေတႃႉ ငဝ်းလၢႆးပိုၼ်ႉတီႈတႄႉ ဢမ်ႇၼိမ်သဝ်း။ ၵႆႉမီးၵူၼ်းဢမ်ႇႁူႉၾၢႆႇ မႃးပွႆႇမၢၵ်ႇႁၢင်ႈၵၢင်မၢၵ်ႇ။ မိူၼ်ၼင်ႇ ၼႂ်းလိူၼ်ၼႆႉ ၵူၺ်း မီးၵႂႃႇ 3 ပွၵ်ႈယဝ်ႉ။ ယွၼ်ႉၼၼ် ၵူၼ်းမိူင်းတႄႉ ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈ ၼႆယဝ်ႉ။

တႅမ်ႈ – ၸၢႆးၶႂၼ်မိူင်း