ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁွတ်ႈထိုင်တီႈၵဵင်းတုင်သေ ႁူပ်ႉထူပ်းဢုပ်ႇဢူဝ်းၸွမ်း ၸုမ်းမိူင်းလႃး NDAA ယဝ်ႉ လၢတ်ႈဝႃႈ တေၸွႆႈထႅမ်ပူၵ်းပွင်ပၼ်ၼႂ်းပိုၼ်ႉတီႈမိူင်းလႃး ႁႂ်ႈၶိုၼ်ႈယႂ်ႇမုၼ်းလႅင်းၵႂႃႇ ဝႃႈၼႆ။

ဝၼ်းတီႈ 25/05/2025 ၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇတင်း ၵႅမ်ႁူဝ်ပဝ်ႈ ဢူးသၢၼ်းပိူဝ်ႇ၊ ၸဝ်ႈၶုၼ်သၢင်ႇလူႇလႄႈ ဢူးၵျီႇမိၼ်ႉ ၾၢႆႇၸုမ်းမိူင်းလႃး ႁူပ်ႉထူပ်းဢုပ်ႇဢူဝ်းၵၼ် တီႈႁူင်းႁေႃ ၼႂ်းတိူင်းသိုၵ်းသၢမ်ၸဵင်ႇ ၵဵင်းတုင် ၸိုင်ႈတႆးပွတ်ႈဢွၵ်ႇၶူင်း ၼႆယဝ်ႉ။

ဢိင်ၼိူဝ် သွင်ၸုမ်းလႆႈႁူပ်ႉထူပ်း ဢုပ်ႇဢူဝ်းၵၼ်ၼႆႉသေ တၢင်းၾၢႆႇမိူင်းလႃးတႄႉ လႆႈဢုပ်ႇလၢတ်ႈၼႄ – ၼႂ်းပိုၼ်ႉတီႈ ဢၼ်ယူႇတီႈ မိူင်းလႃးၵုမ်းၵမ်ဝႆႉၼႆႉ ဢမ်ႇလႆႈႁပ်ႉဝႆႉ ၸုမ်းယိပ်းၵွင်ႈၵၢင်ႇလႄႈ ၸုမ်းပႃႇတီႇ ပၢႆးမိူင်းသင်သေမူႇသေၸုမ်း – ဝႃႈၼႆ။

လိူဝ်ၼၼ် တၢင်းၾၢႆႇသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇသမ်ႉ တေၸွႆႈထႅမ်ပူၵ်းပွင်ပၼ် ၾၢႆႇပၢႆးပၺ်ႇ ၺႃႇ ဢၼ်ပဵၼ်လၵ်းသုတ်ႇ ၶွင်မိူင်းႁူမ်ႈတုမ် ႁဵတ်းဢွၵ်ႇဝႆႉၼႆႉ။ ယဝ်ႉၵေႃႈ ၵၢၼ်ႁုၼ်ႈမုၼ်းပၢႆးမၢၵ်ႈမီး သူၼ်ယၢင်(ရႃႇပႃႇ) ၊ ၵၢၼ်ၵပ်းသိုပ်ႇၵပ်းသၢၼ်လႄႈ သဵၼ်ႈတႃႈသၢႆတၢင်း ၸိူဝ်းၼႆႉၵႂႃႇ ဝႃႈၼႆ။

မိူဝ်ႈႁူဝ်လိူၼ်ဢေႃႊၵတ်ႊသ် ပီ 2024 ၼၼ်ႉ ၸဝ်ႈၸၢႆးလိုၼ်း ၵေႃႉပဵၼ်ႁူဝ်ပဝ်ႈၵဝ်ႇ တပ်ႉသိုၵ်းမိူင်းလႃး NDAA လႆႈလူႉသဵင်ႈၵႂႃႇ ယွၼ်ႉတၢင်းပဵၼ်မလဵင်း (ၵႅၼ်ႊသိူဝ်ႊ) ။ ဝၢႆးၼၼ်ႉ ၵေႃႉပဵၼ်လုၵ်ႈၸၢႆး ၸဝ်ႈၸၢႆးလိုၼ်း ၸိုဝ်ႈႁွင်ႉ ၸၢႆးထဵင်ႇလိၼ်း ၶိုၼ်းသိုပ်ႇပုတ်ႈဢဝ်ပုၼ်ႈၽွၼ်းမႃး ႁၢၼ်ႉတေႃႇထိုင်ယၢမ်းလဵဝ်။

မိူဝ်ႈပၢင်ႁူပ်ႉထူပ်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဝၼ်းတီႈ 25 ၼႆႉ ၸၢႆးထဵင်ႇလိၼ်း ႁူဝ်ပဝ်ႈ တပ်ႉ သိုၵ်းမိူင်းလႃး ဢမ်ႇလႆႈမႃးႁူပ်ႉထူပ်း ဢုပ်ႇဢူဝ်းၸွမ်း ၼႆယဝ်ႉ။  

မိူဝ်ႈပီ 1989 ၼၼ်ႉ ၸဝ်ႈၸၢႆးလိုၼ်း ဢွၼ်ႁူဝ် ၽိုၼ်ႉဝၢႆႇၽၢတ်ႇဢွၵ်ႇ ပႃႇတီႇၶွမ်ႊမိဝ်ႊၼိတ်ႉ မိူင်းမၢၼ်ႈ သေ ၵိုတ်းသိုၵ်းၵၼ်တင်း ၸုမ်းသိုၵ်းမၢၼ်ႈ ၵေႃႇတင်ႈၼႃႈလိၼ်ၶိုၵ်ႉတွၼ်း မၢႆ 4 ႁိူဝ်ႈႁိူင်းၶိုၼ်ႈယႂ်ႇမႃး။

ၶၢဝ်းတၢင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇတင်း မေးၼၢင်း တေႃႇၸူႇၸူႇလႃႉ ႁွတ်ႈထိုင်မႃး တီႈဝဵင်း ၵဵင်းတုင် မိူဝ်ႈဝၼ်းတီႈ 23 ၼႆႉသေ လိူဝ်ၼၼ်ႉ သိုပ်ႇၵႂႃႇတၢင်ႇထီးထၢတ်ႈ တီႈသူၼ်ပုတ်ႉထဢူးယဵၼ်  လွႆပၢင်ၵႂၢႆး ဢၼ်ယူႇတီႈ ၸဝ်ႈတူၼ်ၶူး ဝႃႇသီႇပိတ်ႉ ႁဵတ်းသၢင်ႈဝႆႉၼၼ်ႉလႄႈ ပိုတ်ႇႁူင်းယႃလူင် ၵူၼ်း မိူင်း ၸိူဝ်းၼႆႉ။

ပူၼ်ႉမႃး မိူဝ်ႈဝၼ်းတီႈ 11 ၼၼ်ႉၵေႃႈ မိၼ်းဢွင်ႇလၢႆႇ ဢွၵ်ႇၶၢဝ်းတၢင်း ၵႂႃႇတၢင်ႇထီးထၢတ်ႈ တီႈဝဵင်း တူၼ်ႈတီး ၼႆယဝ်ႉ။

တႅမ်ႈ – ၸၢႆးၶႂၼ်မိူင်း ပိၼ်ႇၸၢႆးယွတ်ႈၶမ်း