ဝၼ်းတီႈ 25/05/2025 ယၢမ်းၵၢင်ၶမ်ႈ 7 မူင်းထိုင် 10 မူင်းၵၢင်ၶိုၼ်း ယူႇတီႈ ၸုမ်းၵူၼ်းၼုမ်ႇတႆး ၵဵင်းမႂ်ႇ ၸတ်းႁဵတ်းပၢင်ၶုၵ်းထူပ်း ၶွပ်ႈတဵမ် 25 ပီ (ပီၵွၼ်းငိုၼ်း) တီႈႁၢၼ်ႉ Fragrant Brown Rice Garden ဝဵင်းၵဵင်းမႂ်ႇ ၸိုင်ႈထႆး ယိူင်းဢၢၼ်း တႃႇႁႂ်ႈၵူၼ်းၼုမ်ႇၶွၼ်ႈႁႅင်း ၽွမ်ႉႁူမ်ႈၵၼ် ၼႆယဝ်ႉ။

ၸၢႆးတႃႇဢူး ၽူႈဢွၼ်ႁူဝ် ၶွတ်ႇၽွတ်ႈ ၸုမ်းၵူၼ်းၼုမ်ႇတႆး ၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ယိူင်း ဢၢၼ်း တီႈလႆႈၶွတ်ႇၽွတ်ႈၸုမ်းၵူၼ်းၼုမ်ႇမႃးၼႆႉ တႃႇႁႂ်ႈၶွၼ်ႈႁႅင်းၵၼ်သေ ၽွမ်ႉႁူမ်ႈတူင်ႉၼိုင်မႃး မိူၼ်ၼင်ႇ ၾၢႆႇပၢႆးမွၼ်း၊ ၾၢႆႇလဵၼ်ႈႁႅင်း၊ ၾၢႆႇသၢႆမၢႆ၊ ၶွမ်ႊပိဝ်ႊတိူဝ်ႊ၊ ၾၢႆႇၸွႆႈထႅမ်ၶႅၵ်ႇလီပၢင်ၸႃႉ ၸဵမ်ၸိူဝ်းၼႆႉမႃး”- ဝႃႈၼႆ။

မၢႆတွင်း ဝၼ်းၵူၼ်းၼုမ်ႇတႆး ၶွပ်ႈတဵမ် 25 ပီၼႆႉသေ မိူဝ်ႈဝႃး ဝၼ်းတီႈ 25 ယၢမ်းၵၢင်ၼႂ် 9 မူင်း ထိုင် 6 မူင်း ႁူဝ်ၶမ်ႈ ၵူၼ်းၼုမ်ႇတႆး ႁူမ်ႈၵၼ်လဵၼ်ႈမၢၵ်ႇၼင် တင်းမူတ်း 24 ၸုမ်း ၼိုင်ႈၸုမ်းလႂ် ၵူၼ်းၼုမ်ႇလဵၼ်ႈ 7 ၵေႃႉ ၼႆယဝ်ႉ။

ၼႂ်းၸုမ်းၵူၼ်းၼုမ်ႇလဵၼ်ႈမၢၵ်ႇၼင် 24 ၸုမ်း ဢၼ်လႆႈၶႅင်ႇၵၼ်သေ လႆႈၵႂႃႇသူးထီႉၼိုင်ႈသမ်ႉ ပဵၼ်ၸုမ်းဝၢၼ်ႈၶုမ်ႉ လွႆဢၢင်ၶၢင် ဝဵင်းမိူင်းၾၢင် ၊ ထီႉသွင်သမ်ႉ ပဵၼ်ၸုမ်းသလႃးဝိၼ်းလႄႈ ထီႉသၢမ်သမ်ႉ ၸုမ်းၵူၼ်းၼုမ်ႇတႆး ၵဵင်းမႂ်ႇ ၼႆယဝ်ႉ။

ၸုမ်းၵူၼ်းၼုမ်ႇတႆး ၵဵင်းမႂ်ႇၼႆႉ လႆႈၶွတ်ႇၽွတ်ႈမႃး မိူဝ်ႈပီ 2001 သေ မိူဝ်ႈၽွင်းၼၼ်ႉ မီးၵူၼ်းၼုမ်ႇၶဝ်ႈ ႁူမ်ႈမွၵ်ႈ 400 ၵေႃႉသေ တူင်ႉၼိုင်မႃး။ ယၢမ်းလဵဝ် ယူႇတီႈ ၸုမ်းၵူၼ်းၼုမ်ႇတႆးၼႆႉသေ တူင်ႉၼိုင်ဝႆႉ မိူၼ်ၼင်ႇ ၾၢႆႇပၢႆးမွၼ်းလႄႈ ၾၢႆႇလဵၼ်ႈႁႅင်း ၸိူဝ်းၼႆႉဝႆႉ။