ၵူၼ်းႁပ်ႉၸၢင်ႈၶပ်းရူတ်ႉၵႃး ၼပ်ႉႁူဝ်ပၢၵ်ႇၵေႃႉ ၼႄၵၢင်ၸႂ်သၢၼ်ၶတ်းတေႃႇ လွင်ႈၶွမ်ႊပၼီႊ GRAB တင်း GOTO တေႁူမ်ႈၵၼ်ၼၼ်ႉ ဝႃႈၼႆ။

ဝၼ်းတီႈ 20/05/2025 ၼႆႉ ၵူၼ်းႁဵတ်းၵၢၼ် ႁပ်ႉၸၢင်ႈၶပ်းရူတ်ႉၵႃး ဢွၼ်ၵၼ်ဢွၵ်ႇၼႄၵၢင်ၸႂ်သၢၼ်ၶတ်း လွင်ႈၶွမ်ႊပၼီႊပၢႆး IT ဢၼ်ယႂ်ႇလိူဝ်ပိူၼ်ႈသုတ်း ၼႂ်းမိူင်းဢိၼ်ႇတူဝ်ႇၼီးသျႃး GoTo လႄႈတင်း ၶွမ်ႊပၼီႊႁပ်ႉၸၢင်ႈတေႃႉသူင်ႇ Grab တေႁူမ်ႈႁွမ်းၵၼ် ၼႆယဝ်ႉ။

တီႈႁိမ်းလုမ်းၸွမ်ၸိုင်ႈ၊ လုမ်းသၽႃးလႄႈ ႁွင်ႈၵၢၼ် ၽွင်းလူင်ၾၢႆႇၵပ်းသိုပ်ႇတေႃႉသူင်ႇ ၼႂ်းဝဵင်းၵျႃႇၵႃႇတႃႇ၊ မိူင်းဢိၼ်ႇတူဝ်ႇၼီးသျႃးၼၼ်ႉ မီးၵူၼ်းႁဵတ်းၵၢၼ် ႁေႃႈၶပ်းရူတ်ႉၵႃးႁပ်ႉၸၢင်ႈၶဝ် ဢွၵ်ႇၼႄၵၢင်ၸႂ် ၼပ်ႉႁူဝ်ပၢၵ်ႇၵေႃႉ။

ၸိူဝ်းၶဝ် တိုဝ်းမူၵ်ႇႁူဝ်၊ ၼုင်ႈသိူဝ်ႈၶူဝ်း ဢၼ်ပႃးတင်း မိၵ်ႈမၢႆၶွမ်ႊပၼီႊ၊ ယိပ်းတင်းပၢႆႉလိၵ်ႈ ဢၼ်တႅမ်ႈ ဝႆႉဝႃႈ ၶွမ်ႊပၼီႊဢၼ်မူႇဝႃႇတ ဢမ်ႇမီးလွင်ႈၽဵင်ႇပဵင်းၼႆသေ ႁေႃႈၶပ်းရူတ်ႉၵႃး လတ်းၶၢမ်ႈသဵၼ်ႈတၢင်းလမ်ႇလွင်ႈ ၼႂ်းဝဵင်းၵျႃႇၵႃႇတႃႇသေ ၼႄၵၢင်ၸႂ်။

တီႈၼႂ်းၵုၼ်ၶဵဝ်ဢေးသျႃး ၸဵင်ႇၸၢၼ်းဝၼ်းဢွၵ်ႇၼႆႉ မိူင်းဢိၼ်ႇတူဝ်ႇၼီးသျႃး ပဵၼ်မိူင်းပၢႆး မၢၵ်ႈမီး ယႂ်ႇလိူဝ်ပိူၼ်ႈသုတ်း။ ၵွပ်ႈၼၼ် ၵၢၼ်ႁပ်ႉၸၢင်ႈတေႃႉသူင်ႇၼႆႉၵေႃႈ ၶဝ်ႈပႃးၼႂ်း ၶၵ်ႉတွၼ်ႈလမ်ႇလွင်ႈ ဢၼ်ၼိုင်ႈ။ ပိူင်လူင် ရူတ်ႉၶိူင်ႈႁပ်ႉၸၢင်ႈၼႆႉ ၵူၼ်းၸိူဝ်းယူႇသဝ်းၼႂ်း ဝဵင်းလူင်ၶဝ် တိူဝ်းၸႂ်ႉတိုဝ်းၼမ်။

တီႈၼႂ်းမိူင်းဢိၼ်ႇတူဝ်ႇၼီးသျႃးၼႆႉ ၵူၼ်းၸိူဝ်းၸႂ်ႉတိုဝ်း Gojek app ၶွင်ၶွမ်ႊပၼီႊ GoTo သေ ႁေႃႈ ၶပ်းရူတ်ႉၵႃးႁပ်ႉၸၢင်ႈ မီး 3.1 လၢၼ်ႉပၢႆ။ မိူၼ်ၼင်ႇ Grab တႄႉ တိုၼ်းသုမ်ႇငမ်းဝႆႉၼိူဝ်လွၵ်းၵၢတ်ႇ မိူင်းဢိၼ်ႇတူဝ်ႇၼီးသျႃးမႃး ပီယၢဝ်းၶၢဝ်းႁိုင်ယဝ်ႉ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။