သူမ်သၵ်ႇ ထဵပ်ႉသူႇထိၼ်း (Somsak Thepsutin) ၽွင်းလူင် ၾၢႆႇပၢႆးယူႇလီၵူၼ်းမိူင်း မိူင်းထႆးလၢတ်ႈဝႃႈ – ၵူၼ်းၸိူဝ်းတေၸႂ်ႉယႃႈပၢင်း (ၵၼ်းၶျႃး) တီႈၼႂ်းမိူင်းထႆး တေလႆႈမီးပႃး ဝႂ်ႁပ်ႉႁွင်းၾၢႆႇပၢႆးယူႇလီ ပိူဝ်ႈတႃႇ ႁႄႉႁၢမ်ႈ လွင်ႈၸႂ်ႉတိုဝ်းယႃႈပၢင်း လူၺ်ႈဢမ်ႇမႅၼ်ႈတီႈမႅၼ်ႈတၢင်း ဝႃႈၼႆ။

လိူဝ်ၼၼ်ႉ ၽွင်းလူင်ၾၢႆႇပၢႆးယူႇလီ လၢတ်ႈဝႃႈ ၼႂ်းၶၢဝ်းတၢင်း 40 ဝၼ်းၼႆႉ ၶႂ်ႈႁႂ်ႈႁဵတ်းဢွၵ်ႇမႃး ပၵ်းပိူင်မႂ်ႇ ၵဵဝ်ႇလူၺ်ႈ ၵၢၼ်ၸႂ်ႉတိုဝ်းယႃႈပၢင်းၼႆ – သိုဝ်ႇၶၢဝ်ႇ Bangkok Post ႁၢႆးငၢၼ်းဝႆႉ ၼင်ႇၼႆ။ 

ပိူဝ်ႈတႃႇ တေၵုမ်းထိင်း ၵၢၼ်ၽုၵ်ႇသွမ်ႈႁဵတ်းဢွၵ်ႇ ယႃႈပၢင်း၊ တႃႇႁႄႉႁၢမ်ႈၵၢၼ်ၸႂ်ႉတိုဝ်း ယႃႈပၢင်း ႁႂ်ႈမႅၼ်ႈၸွမ်းၼင်ႇ ပၢႆးယႃႈယႃလႄႈ ပၢႆးယူႇလီၼႆသေ မိူဝ်ႈလိူၼ်သႅပ်ႊထႅမ်ႊပိူဝ်ႊ ပီ 2024 ပူၼ်ႉမႃးၼၼ်ႉၵေႃႈ လူင်ပွင်ၸိုင်ႈထႆး လႆႈမၵ်းမၼ်ႈ ပၵ်းပိူင်ယုၵ်းယၢင်ႇမႂ်ႇ ၵဵဝ်ႇလူၺ်ႈၵၢၼ်ၸႂ်ႉ တိုဝ်းယႃႈပၢင်း။

ဝၢႆးလင် ၸွမ်ၽွင်းလူင် ၽႄးထွင်းထၢၼ်း သျိၼ်ႊၼဝတ်း ၶိုၼ်ႈႁပ်ႉတၼ်းႁဵင်းယဝ်ႉ လၢႆဝၼ်းၵူၺ်း ႁွင်ႈၵၢၼ် ၽွင်းလူင်ၾၢႆႇပၢႆးယူႇလီ မိူင်းထႆး ပိုၼ်ၽၢဝ်ႇဢွၵ်ႇပၵ်းပိူင်ယုၵ်းယၢင်ႇမႂ်ႇၼႆႉ။

ပိူဝ်ႈတႃႇ ယုၵ်ႉမုၼ်းပၵ်းပိူင် ၵၢၼ်ၸႂ်ႉတိုဝ်းယႃႈပၢင်း ၼႂ်းမိူင်းထႆးၼၼ်ႉ ၵူၼ်းၸိူဝ်းသူႇ/ လုတ်ႇ ယႃႈပၢင်း ၵူၼ်းၼွၵ်ႈမိူင်း ဢိၵ်ႇၵူၼ်းၼႂ်းမိူင်းထႆး တေလႆႈၼႄဝႂ်ႁပ်ႉႁွင်း ၾၢႆႇပၢႆးယူႇလီ ဢၼ်ၽူႈလူင်ႉလႅၼ်ႇ ၾၢႆႇပၢႆးယႃႈယႃ ၊ မေႃယႃၶဝ်ဢွၵ်ႇပၼ်ဝႆႉ ၼႆယဝ်ႉ။