ႁွင်ႈၵၢၼ် ၽွင်းလူင် ၾၢႆႇႁႅင်းၵၢၼ်မိူင်းထႆး ဢွၵ်ႇလိၵ်ႈမွၵ်ႇႁွင်ႉၸုမ်းပေႃႈလဵင်ႉ ၸဝ်ႈၵၢၼ်ငၢၼ်း တႃႇမႃးဢုပ်ႇဢူဝ်းၵၼ်လွင်ႈ “ႁႅင်းၵၢၼ်ယိင်းယွၼ်းလိုဝ်ႈလူၺ်ႈဢမ်ႇထုၵ်ႇတတ်းၵႃႈႁႅင်း ၼႂ်းဝၼ်း လိူတ်ႈႁူဝ်လိူၼ်မႃး” ဢၼ်ၸုမ်းတူင်ႉၼိုင်သုၼ်ႇလႆႈႁႅင်းၵၢၼ် တုၵ်းယွၼ်းဝႆႉယူႇၵူႈပီ။

လိူဝ်ၼၼ်ႉ မီးၽႅၼ်ၵၢၼ်ပႃး တေဢုပ်ႇၵုမ်လွင်ႈ တႃႇဝႆႉပၼ်ၽႃႈဢွမ်ႈ တႃႇၸႂ်ႉၼႂ်းႁူဝ်လိူၼ် ၼၢင်းယိင်း၊ ႁႂ်ႈလႆႈဢဝ်ၸႂ်ႉၾရီး တေဝႆႉပၼ်ၼႂ်းလၢႆလၢႆပိုၼ်ႉတီႈ ၸဵမ်ၸိူဝ်းၼႆႉ။

လွင်ႈၼႆႉ လူင်ပွင်ၸိုင်ႈထႆးလႄႈ ၸုမ်းပေႃႈလဵင်ႉ တေဢုပ်ႇၵၼ်သေ သင်ဝႃႈတူၵ်းလူင်းလႆႈ ၸင်ႇ တေၸၢင်ႈဢဝ်ဢုပ်ႇၼႂ်းသၽႃးပေႃႈလဵင်ႉ သၽႃးႁႅင်းၵၢၼ်ယဝ်ႉ ၸင်ႇတေၸၢင်ႈမၵ်းမၼ်ႈ ၸႂ်ႉ ပဵၼ်တၢင်းၵၢၼ်။

လွင်ႈၼႆႉ ၸုမ်းတူင်ႉၼိုင်လွင်ႈႁႅင်းၵၢၼ် လႆႈယိုၼ်ႈယွၼ်းတီႈလူင်ပွင်ၸိုင်းထႆး တႃႇသေႇ မိူၼ်ၼင်ႇ –  

1 – မိူဝ်ႈၼၢင်းယိင်း ပဵၼ်သိၼ်ႈႁူဝ်လိူၼ်သေ ယွၼ်းလိုဝ်ႈၵၢၼ်ၼၼ်ႉ ႁႂ်ႈပေႃႈလဵင်ႉမႄႈလဵင်ႉ ဢမ်ႇႁၢၵ်းငိုၼ်းလိူၼ်။ 

2 – ႁႂ်ႈလူင်ပွင်ၸိုင်ႈၸႅၵ်ႇပၼ် ၽႃႈဢွမ်ႈၼၢင်းယိင်း (ၾရီး) ဝႆႉ ၸွတ်ႇတူဝ်ႈၼႂ်းၸိုင်ႈထႆး ၊ ႁူမ်ႈပႃး ဢွင်ႈတီႈႁဵတ်းၵၢၼ်လႄႈ ႁူင်းႁဵၼ်း။

3 – မိူဝ်ႈၽွင်းႁႅင်းၵၢၼ် တူၵ်းတၢင်းယၢပ်ႇၽိုတ်ႇ (ၽေးၵိုင်ႉၵၢင်ႉ၊ ၽေးႁဵတ်းႁၢႆႉၸႃႉ၊ ၽေး ၵၼ်ႉၸၼ်လူလၢႆ) ၸိူဝ်းၼႆႉ ႁႂ်ႈလူင်ပွင်ၸိုင်ႈႁဵတ်းဝႆႉပၼ် တီႈယူႇတၢင်းသဝ်းတႃႇလိုဝ်ႈ ၸူဝ်ႈၶၢဝ်း။ 

4 – လုၵ်ႈဢွၼ်ႇႁႅင်းၵၢၼ် ဢမ်ႇဝႃႈၸၢဝ်းၶိူဝ်းလႂ် ဢၼ်ၶဝ်ႈမႃးႁဵၼ်းၼႂ်းမိူင်းထႆး ႁႂ်ႈမီးလွင်ႈ ၽဵင်ႇပဵင်းၵၼ် ၊ ယႃႇႁႂ်ႈလႆႈၸႅၵ်ႇၸၼ်ႉထၢၼ်ႈလႄႈ ၸိူဝ်ႉၸၢတ်ႈ။

5 – ႁႂ်ႈလူင်ပွင်ၸိုင်ႈ ၸွႆႈပၼ်ႁႅင်းဢီး ႁႂ်ႈၼၢႆးၸၢင်ႈ သၢင်ႈပၼ်ႁူင်းလဵင်ႉလုၵ်ႈဢွၼ်ႇ ၼႂ်းဢွင်ႈ တီႈ ႁဵတ်းၵၢၼ်၊ ႁႂ်ႈပေႃႈလဵင်ႉမႄႈလဵင်ႉ မီးပၼ်ၵူၼ်းလုမ်းလႃးတူၺ်းထိုင် လုၵ်ႈဢွၼ်ႇ မိူဝ်ႈၽွင်းယၢမ်း ပေႃႈမႄႈႁဵတ်းၵၢၼ် – ၸဵမ်ၸိူဝ်းၼႆႉ။