ၸွမ်ၸိၵ်းသိုၵ်းမၢၼ်ႈ ယိုတ်းမိူင်း မိၼ်းဢွင်ႇလၢႆႇ လၢတ်ႈတီႈပၢင်ႁူပ်ႉထူပ်းၵူၼ်းၼုမ်ႇ လုၵ်ႈႁဵၼ်း တပ်ႉၼမ်ႉ ၸၼ်ႉပိုၼ်ႉထၢၼ်လႄႈ ၸၼ်ႉသုင် မိူဝ်ႈဝၼ်းတီႈ 21/05/2025 ၼၼ်ႉဝႃႈ လွင်ႈပၢႆးပၺ်ႇၺႃႇ လုၵ်ႈဢွၼ်ႇၼႆႉ ပဵၼ်ဢၼ်လမ်ႇလွင်ႈ ဝႃႈၼႆ။

ၵူၺ်းၵႃႈ သိုၵ်းမၢၼ်ႈတႄႉ ဢဝ်ၶိူင်ႈမိၼ်သိုၵ်းသေ ပွႆႇမၢၵ်ႇသႂ်ႇဝၢၼ်ႈသူၼ်ႁူၼ်းယေး ႁူင်းႁဵၼ်း လုၵ်ႈဢွၼ်ႇယူႇပတ်းပိုၼ်ႉ ၸိုင်ႈမိူင်းၼႆႉ ၸွမ်ၸိုၵ်းသိုၵ်းမၢၼ်ႈမိၼ်းဢွင်ႇလၢႆႇ လၢတ်ႈတီႈပၢင်  ႁူပ်ႉထူပ်းၵူၼ်းၼုမ်ႇလုၵ်ႈႁဵၼ်း တပ်ႉၼမ်ႉၼၼ်ႉဝႃႈ – ယူႇတီႈ တပ်ႉသိုၵ်းသေ ဝႆႉၼမ်ႉၼၵ်းယုၵ်ႉ မုၼ်းလွင်ႈၵူၼ်းၼုမ်ႇ ယူႇၵူႈဝၼ်း။ ၼႂ်းၶေႃႈယိူင်းမၢႆလွင်ႈၵေႃႇသၢင်ႈၸိုင်ႈမိူင်းၼၼ်ႉၵေႃႈ ပႃးဝႆႉ ဝႃႈ ၼႂ်းၵၢၼ်ပူၵ်းပွင်ၸိုင်ႈမိူင်းၼႆႉ ဢဵၼ်ႁႅင်းၵူၼ်းၼုမ်ႇၵေႃႈ ပဵၼ်ဢၼ်လမ်ႇလွင်ႈလႄႈ ယူႇတီႈ ၸိုင်ႈမိူင်းသေ တေပူၵ်းပွင်ပၼ် လုၵ်ႈဢွၼ်ႇ/ ၵူၼ်းၼုမ်ႇ ႁႂ်ႈပဵၼ်မႃး ၵူၼ်းၼုမ်ႇၽူႈမီးၼမ်ႉၵတ်ႉ – ဝႃႈၼႆပႃး။ ၵွပ်ႈၼႆလႄႈ ၵူၼ်းၼုမ်ႇ ၸိူဝ်းၵိူတ်ႇၼိူဝ်ၽႅၼ်ႇလိၼ်ၸိုင်ႈမိူင်းၼႆႉ တၵ်းလႆႈႁူႉပိုၼ်း ၸိုင်ႈမိူင်းသေ တေလႆႈပႂ်ႉပႃး ၵတိသဵတ်ႉၸႃႇ တေႃႇၸိုင်ႈမိူင်း – ဝႃႈၼႆ။

သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ ပၢင်သွၼ်တပ်ႉၼမ်ႉတပ်ႉလူမ်းၼႆႉ တႄႇပိုတ်ႇမႃးၸဵမ်ပီ 2014 ။ လႆႈ ၾိုၵ်းသွၼ်ပၼ် ၸၼ်ႉပိုၼ်ႉထၢၼ် 9 ၵမ်း ၸၼ်ႉသုင် 8 ၵမ်းယဝ်ႉ။ လုၵ်ႈႁဵၼ်းတင်းမူတ်းမီး 1 မိုၼ်ႇပၢႆယဝ်ႉ ဝႃႈၼႆ။

ၼွၵ်ႈလိူဝ်ၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၼႆႉ ၽွင်းမိူဝ်ႈၸတ်းႁဵတ်းပၢင်ၵုမ်လူင် တီႈ ၼေႇပျီႇတေႃႇ မိူဝ်ႈဝၼ်းတီႈ 19/05/2025 ၼၼ်ႉၵေႃႈ လၢတ်ႈပႃးလွင်ႈပၢႆးပၺ်ႇ ၺႃႇ မိူင်းမၢၼ်ႈသေ လၢတ်ႈဢွၵ်ႇဝႃႈ ၸုမ်းယိပ်းၵွင်ႈၵၢင်ႇ ပိုတ်းယိုဝ်းသိုၵ်းမၢၼ်ႈယူႇၸိူဝ်းၼႆႉ ပဵၼ်ၸုမ်းၵေႃႇ ၵၢၼ်ႁၢႆႉ။ ၸိူဝ်းၶဝ်ယႃႉပၢႆးပၺ်ႇၺႃႇလႄႈ မိူဝ်းၼႃႈလုၵ်ႈ ဢွၼ်ႇႁဵၼ်း ႁၢဝ်ႈႁႅင်း။ ယွၼ်ႉပိူဝ်ႈၶဝ် ယႃႉ ပၢႆးပၺ်ႇၺႃႇလႄႈ ပိုၼ်ႉတီႈလႆႈတုမ်ႉတိူဝ်ႉၼၼ်ႉ လွင်ႈႁုၼ်ႈမုၼ်းမႂ်ႇသုင် ၵူႈလွင်ႈလွင်ႈ တေတူၵ်းလႃႈတူၵ်းလိုၼ်း။ ႁဵတ်းႁႂ်ႈတုမ်ႉတိူဝ်ႉ ပၢႆးပၺ်ႇၺႃႇလုၵ်ႈဢွၼ်ႇၼႆႉ မိူၼ်ယႃႉ ဢၼႃႇၵၢတ်ႈမိူဝ်းၼႃႈ ၸဝ်ႈၵဝ်ႇၵူၺ်း – ဝႃႈၼႆ။

လွင်ႈၼႆႉ မေႃသွၼ်ဢၼ်ႁဵတ်း CDM တေႃႇသိုၵ်းမၢၼ်ႈ လၢတ်ႈဝႃႈ – ဢၼ်ပူၼ်ႉပႅၼ်သုၼ်ႇလႆႈ ၵူၼ်းလႄႈ ယႃႉမိူဝ်းၼႃႈ ဢၼႃႇၵၢတ်ႈလုၵ်ႈဢွၼ်ႇ ၵူၼ်းၼုမ်ႇၵမ်းသိုဝ်ႈၼႆႉ ပဵၼ်တူဝ် ၸွမ် ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၵမ်းလဵဝ်။ ယၢမ်းလဵဝ်သမ်ႉ ၶိုၼ်းမႃးလၢတ်ႈၸိူင်ႉၼႆၼႆႉ လႅၼ်ၵူၼ်းမိူင်းလူၺ်ႈ ဢမ်ႇမီးၼႃႈဢၢႆ – ဝႃႈၼႆ။ 

မိူဝ်ႈဝၼ်းတီႈ 12/05/2025 ၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်သိုၵ်း ပိုတ်းယိုဝ်းသႂ်ႇႁူင်းႁဵၼ်းတီႈ ဝၢၼ်ႈဢူဝ်းတဵင်ႇ ၸႄႈဝဵင်းတီႇပႄးယိၼ်း ၊ လုၵ်ႈဢွၼ်ႇႁဵၼ်းတၢႆ 20 ပၢႆ။

ၸွမ်းၼင်ႇ ၶေႃႈမုလ်းတီႈ NUG တႄႉ လႆႈႁူႉဝႃႈ ဝၼ်းတီႈ 01/01/2023 တေႃႇထိုင်မႃး 12/05/2025 ၼႆႉ သိုၵ်းမၢၼ်ႈ ဢဝ်ၶိူင်ႈမိၼ်ပိုတ်းယိုဝ်းလႄႈ ၼႂ်းပတ်းပိုၼ်ႉၸိုင်ႈမိူင်းၼႆႉ ၵူၼ်းမိူင်းတၢႆ 3,000 ပၢႆ ႁူင်းႁဵၼ်းၵွႆ 240 ပၢႆ – သိုဝ်ႇၶၢဝ်ႇ Than Lwin Times ဢွၵ်ႇဝႆႉၼင်ႇၼႆ။