တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈပႂ်ႉၵူတ်ႇထတ်းလႄႈ တီႉရူတ်ႉၵႃး ဢမ်ႇမီးဝႂ်လၢႆႊသိၼ်ႊ ၸိူဝ်းဢမ်ႇတၢင်ႇမၢႆၾၢင်ဝႆႉၸိူဝ်းၼၼ်ႉ ၼႂ်းဝၼ်းလဵဝ်ၵူၺ်းတီႉလႆႈ 100 လမ်းပၢႆ ဝႃႈၼႆ။  

မိူဝ်ႈဝႃး ဝၼ်းတီႈ 22/05/2025 ယၢမ်းၵၢင်ဝၼ်း ပလိၵ်ႈသိုၵ်းမၢၼ်ႈ ပႂ်ႉတီႉၺွပ်း ရူတ်ႉဢမ်ႇမီးမၢႆၾၢင် တီႈႁိမ်းႁူင်းထမ်း ထမ်ႇမႃႇယူင်ႇ ၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၵူၼ်းၸိူဝ်းဢမ်ႇတိုဝ်းမၢၵ်ႇႁူဝ် ရူတ်ႉၶိူင်ႈ ဢမ်ႇမီးၶႅပ်းမၢႆ(ပၢႆႉ) ရူတ်ႉ ၸိူဝ်းၼၼ်ႉၵေႃႈ တီႉၺွပ်းဢဝ်ၵႂႃႇပႃး။

ၵူၼ်းၸၢႆး ဢႃယု 30 ပီ လၢတ်ႈၽူႈတွႆႇႁွၵ်ႈဝႃႈ -“ သိုၵ်းမၢၼ်ႈ ပလိၵ်ႈမၢၼ်ႈလႄႇႁႃတီႉရူတ်ႉၵႃးဢမ်ႇမီးပၢႆႉ ၸဵမ်မိူဝ်ႈၼႃႈလိူၼ်ႁႃႈပုၼ်ႉယဝ်ႉ။ ၵူၺ်းၵႃႈ ၶဝ်ၶိုၼ်းမႃးပိုၼ်ၽၢဝ်ႇ တေတီႉၼႆႉ မိူဝ်ႈႁူဝ်လိူၼ်မေႊၼႆႉသေ သိုၵ်းမၢၼ်ႈၵေႃႈ တႄႇတီႉမႃးႁၢဝ်ႈႁႅင်း။ ၶဝ်ပႂ်ႉတီႉရူတ်ႉဢမ်ႇမီးမၢႆၾၢင်၊ ဢမ်ႇတိုဝ်းမၢၵ်ႇႁူဝ်ရူတ်ႉ၊ ဢမ်ႇမီးၶႅပ်းမၢႆရူတ်ႉ ၸိူဝ်းၼႆႉ”- ဝႃႈၼႆ။

မိူဝ်ႈဝၼ်းတီႈ 20 လိူၼ်မေႊၼႆႉ ၸုမ်းသိုၵ်းမၢၼ်ႈ ၸတ်းႁဵတ်းပၢင်ၵုမ် တီႈၼေႇပျီႇတေႃႇ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မွၵ်ႇလၢတ်ႈပႃးၵႂႃႇ လွင်ႈတေၵူတ်ႇထတ်းရူတ်ႉၵႃး ၸိူဝ်းဢမ်ႇတၢင်ႇဝႆႉမၢႆၾၢင် (လၢႆႊသိၼ်ႊ) ၼၼ်ႉသေ တီႉၺွပ်းဢဝ်လိူင်ႈၵႂႃႇၼႆလႄႈ တေၸၢင်ႈႁဵတ်းႁႂ်ႈၵႃႈၶၼ် ရူတ်ႉၵႃးၼႂ်းမိူင်း တိူဝ်းၶိုၼ်ႈသုင်ထႅင်ႈလိူဝ်ၵဝ်ႇ။ တေႁဵတ်းႁႂ်ႈၵူၼ်း ၼႂ်းမိူင်း ႁူပ်ႉတၢင်းယၢပ်ႇၽိုတ်ႇ ၼႂ်းၵၢၼ်ဢွၵ်ႇၶၢဝ်းတၢင်း ဝႃႈၼႆ။

ၵူၼ်းၸၢႆး ယူႇဝဵင်းတူၼ်ႈတီး ၵေႃႉၼိုင်ႈ လၢတ်ႈဝႃႈ -“ပေႃးပဵၼ်ရူတ်ႉၶိူင်ႈၼႆ ပေႃးဝႃႈၺႃးၶဝ်တီႉယဝ်ႉ ပေႃး ထုတ်ႇဢဝ်ၶိုၼ်းတီႈၼၼ်ႈၵမ်းလဵဝ်ၼႆႉ တေလႆႈသဵင်ႈငိုၼ်းမွၵ်ႈ 8 မိုၼ်ႇထိုင် 1 သႅၼ်ပျႃး ၸိူဝ်းၼႆႉ။ ပေႃးပႂ်ႉၶိုၼ်ႈလုမ်းတြႃးသေ တေႃႇသူႈဢဝ်ၶိုၼ်းတႄႉ လႆႈသဵင်ႈငိုၼ်းမွၵ်ႈ မိုၼ်ႇ – မိုၼ်ႇႁႃႈ ၸိူဝ်းၼႆႉၵူၺ်း။ ပေႃး ပဵၼ်ရူတ်ႉၵႃးတႄႉ ဢမ်ႇလႆႈ ၶဝ်ဢမ်ႇပၼ်ထုတ်ႇၶိုၼ်း၊ ၶဝ်ဢဝ်လၢႆပႅတ်ႈဢေႃႈ”- ဝႃႈၼႆ။ 

ၼႂ်းပၢင်ၵုမ်ၼၼ်ႉ ၸွမ်ၸိၵ်းသိုၵ်းမိၼ်းဢွင်ႇလၢႆႇ လၢတ်ႈၵႂႃႇဝႃႈ – ယၢမ်းလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်း မိူင်းၸိူဝ်းၶီႇရူတ်ႉၵႃး Without ၼမ်ႁႅင်း မၢင်ၸိူဝ်းႁဵတ်းပႃး ဝႂ်ရူတ်ႉၵႃးဢၼ်ပွမ်၊ မၢင်ၸိူဝ်းႁပ်ႉႁဵတ်း ဝႂ်ရူတ်ႉၵႃး (လၢႆႊသိၼ်ႊ) ဢၼ်ပွမ်ၸိူဝ်းၼႆႉလႄႈ ၾၢႆႇၶႃႈႁၢပ်ႇၵၢၼ်ၶုၼ် ၸိူဝ်းၵဵဝ်ႇၶွင်ႈ တေလႆႈၵူတ်ႇထတ်းသေ ဢဝ်လိူင်ႈ (တၢင်းၽိတ်း) ၵႂႃႇ ဝႃႈၼႆ။

ၼႂ်းဝၼ်းတီႈ 19/05/2025 ပလိၵ်ႈသိုၵ်းမၢၼ်ႈၶဝ်ႈတီႉၺွပ်းၵႃးဢမ်ႇမီးဝတ်းဝႂ်လၢႆႊသိၼ်ႊ လမ်းၼိုင်ႈ တီႈၼႂ်းပွၵ်ႉမျႃႉၵၢၼ်ႇတႃႇ ၸဝ်ႈၵႃးလႆႈဢဝ်ငိုၼ်း 20 သႅၼ် ၵႂႃႇထုတ်ႇဢဝ်မႃးၶိုၼ်း ဝႃႈၼႆ။

ဢၼ်လိုပ်ႈလမ်းတီႉၺွပ်း ရူတ်ႉၵႃး ဢမ်ႇမီးဝႂ်ၼႆႉ ယူႇတီႈ ပလိၵ်ႈမၢၼ်ႈသိုၵ်းမၢၼ်ႈ ဢွၼ်ႁူဝ် ၊ တေမီးၸုမ်းယွႆႈ 10 ၸုမ်းသေ တေၶဝ်ႈတီႉၺွပ်းထိုင် ၼႂ်းပွၵ်ႉၼႂ်းယွမ်ႇ ၊ ၼႂ်းဢိူင်ႇ ၼႂ်းဝၢၼ်ႈ ၸွမ်းၵိဝ်ႇ ၸွမ်းတၢင်း ၊ ၸၢင်ႈထိုင်ၼႂ်းဝၢင်းႁိူၼ်းယေးလႄႈ ႁၢၼ်ႉၶၢႆ / ႁၢၼ်ႉလၢင်ႉရူတ်ႉၵႃး ၸိူဝ်းၼႆႉ ၵူၼ်းၸမ်ၸႂ်ၵၼ် တင်းၾၢႆႇၽွင်းငမ်း တီႈဝဵင်းတူၼ်ႈတီးလၢတ်ႈဝႆႉၼင်ႇၼႆ။