ယေးငိုၼ်းလုမ်ႈၾႃႉ ပိုၼ်ၽၢဝ်ႇဝႃႈ ယွၼ်ႉၽႅၼ်ႇလိၼ်ဝႆၵႂႃႇႁၢဝ်ႈႁႅင်း ၼႂ်းမိူင်းႁူမ်ႈတုမ် မိူဝ်ႈလိူၼ်မၢတ်ႊၶျ်ၼၼ်ႉသေ မိူင်းမၢၼ်ႈလူႉသုမ်းၵႂႃႇ ၵိုင်ႇငိုၼ်းတေႃႊလႃႊ မွၵ်ႈ 11 ပီႊလီႊယႅၼ်ႊ ငမ်ႇမႅၼ်ႈၵၼ်တင်း GDP တႃႇ 14% (ဝၢၵ်ႈ) ၼႆယဝ်ႉ။
မိူဝ်ႈဝၼ်းတီႈ 07/05/2025 ၼႆႉ ယေးငိုၼ်းလုမ်ႈၾႃႉ ပိုၼ်ၽၢဝ်ႇၽိုၼ်လိၵ်ႈႁၢႆးငၢၼ်း ၵဵဝ်ႇၵပ်းလူၺ်ႈ ၽႅၼ်ႇလိၼ်ဝႆၵႂႃႇ ၼႂ်းမိူင်းႁူမ်ႈတုမ် မိူဝ်ႈလိူၼ်မၢတ်ႊၶျ် 28 ဝၼ်း သုၼ်ၵၢင်မီးတီႈဝဵင်းလိူဝ်ႇ (မၼ်းတ လေး) လႄႈ တိူင်းၸႄႈၵႅင်း တင်းႁႅင်း 7.7 မႅၵ်ႊၼီႊၵျုတ်ႉၼၼ်ႉဝႃႈ ၵူၼ်းမိူင်းၸိူဝ်းယူႇ ၼႂ်းမိူင်းတႆး၊ တိူင်းဝဵင်းလိူဝ်ႇ၊ တိူင်းၸႄႈၵႅင်း၊ တိူင်းၼေႇပျီႇတေႃႇ၊ တိူင်းပႃႇၵိူဝ် လူႉတၢႆၵႂႃႇ မွၵ်ႈ 4,000 ၵေႃႉ။ ႁူင်းၵေႃႇၵၢႆႇမိူၼ်ၼင်ႇ ႁိူၼ်းတိူၵ်ႈလႄႈ ၵွင်းမူး ဢိၵ်ႇတင်း ဝတ်ႉဝႃးၽႃသိူဝ်ႇၸိူဝ်းၼႆႉ တင်းမူတ်းလူႉၵွႆၵႂႃႇ ၵိုင်ႇတႃႇၵၢၼ်ႁဵတ်းဢွၵ်ႇၶူဝ်း ၵုၼ်ႇၸိုင်ႈမိူင်း GDP ၼႂ်းမိူင်းမွၵ်ႈ 14% (ဝၢၵ်ႈ) ဝႃႈၼႆ။
ၼႂ်းမိူင်းႁူမ်ႈတုမ်ၼႆႉ ၸႄႈဝဵင်းတင်းသဵင်ႈ မီးယူႇ 330 ဝဵင်း ၼႂ်းၼၼ်ႉ ၵူၼ်းမိူင်းၸိူဝ်းယူႇသဝ်း တႃႇ 57 ဝဵင်းၼႆႉ လႆႈႁူပ်ႉၽေးၽႅၼ်ႇလိၼ်ဝႆယူႇ။ ဝၢႆးၽႅၼ်ႇလိၼ်ဝႆယဝ်ႉၵႂႃႇ ႁိုင်ၶၢဝ်းတၢင်းမွၵ်ႈ 2 လိူၼ် သေတႃႉ တႃႇတေႁဵတ်းသၢင်ႈၶိုၼ်း ၵၢၼ်ပူၵ်းပွင်ႈႁုၼ်ႈမုၼ်းၼၼ်ႉ ယွၼ်ႉငဝ်းလၢႆး ၼႂ်းမိူင်းႁူမ်ႈတုမ် ဢမ်ႇၼိမ်သဝ်း တိုၵ်ႉမီးလွင်ႈယၢပ်ႇၵိၼ်းၸႂ်ႁႅင်းဝႆႉလႄႈ လႆႈၸႂ်ႉလၢႆးတၢင်း ၵူၼ်းမိူင်းၼင်ႇၵၼ်ၸွႆႈထႅမ် ၵၼ်ၶိုၼ်းဝႆႉၵူၺ်း။
ဝၢႆးသေၽႅၼ်ႇလိၼ်ဝႆၵႂႃႇ ႁၢဝ်ႈႁႅင်းယဝ်ႉၼၼ်ႉ ၾၢႆႇလင်မႃး ၵိူတ်ႇပဵၼ်မႃးၸွမ်း ၽႅၼ်ႇလိၼ်ဝႆ ႁႅင်းလဵၵ်ႉႁႅင်းၼွႆႉ တၢမ်းၵၼ်ၼမ်ႁႅင်းလႄႈ ႁဵတ်းႁႂ်ႈၵူၼ်းၸိူဝ်းယူႇသဝ်းၼႂ်း မိူင်းႁူမ်ႈတုမ် တုမ်ႉတိူဝ်ႉပၢႆးတူဝ် ပၢႆးၸႂ် ဝႆႉထႅင်ႈ ၼႆယဝ်ႉ။
တွၼ်ႈတႃႇပူၵ်းပွင်လႄႈ ႁဵတ်းၵၢၼ်ႁုၼ်ႈမုၼ်းပၼ်ၶိုၼ်း ၵူၼ်းမိူင်းၼႆႉ ၾၢႆႇၸုမ်းၸွႆႈထႅမ် ၼႂ်းမိူင်းၼွၵ်ႈမိူင်း လႆႈၵမ်ႉၸွႆႈငိုၼ်းဝႆႉ တီႈသိုၵ်းမၢၼ်ႈ တႃႇ 115.876 ပီႊလီႊယႅၼ်ႊပျႃး၊ မိူင်းဢမေႊရိၵၼ်ႊသမ်ႉ ၵမ်ႉၸွႆႈဝႆႉတႃႇ 2.437 တေႃႊလႃႊပၢႆ၊ မိူင်းၵူဝ်ႊရီႊယိူဝ်ႊသမ်ႉ တႃႇ 5 လၢၼ်ႉဝမ်ႊ၊ မိူင်းဢိၼ်းတီးယိူဝ်း 15 လၢၼ်ႉရူႊပီႊ၊ မိူင်းထႆး 2 လၢၼ်ႉဝၢတ်ႇ၊ မိူင်းသိင်ႊၵပူဝ်ႊ 3,150 ပေႃႊလႃႊ ဢိၵ်ႇတင်း ၶိူင်ႈၵမ်ႉၸွႆႈ ၾၢႆႇပၢႆးယူႇလီ ၸဵမ်ၸိူဝ်းၼႆႉ။
ဢိင်ၼိူဝ် ငိုၼ်းၵမ်ႉၸွႆႈၸိူဝ်းၼၼ်ႉသေ ၾၢႆႇသိုၵ်းမၢၼ်ႈ ၸတ်းၸႅၵ်ႇပၼ်တႃႇ တိူင်းၸႄႈၵႅင်း 50 ပီႊလီႊယႅၼ်ႊပျႃး၊ တိူင်းဝဵင်းလိူဝ်ႇ (မၼ်းတလေး) 60 ပီႊလီႊယႅၼ်ႊ၊ တိူင်းၼေႇပျီႇတေႃႇ 10 ပီႊလီႊယႅၼ်ႊ၊ တႃႇမိူင်းတႆး 5 ပီႊလီႊယႅၼ်ႊပျႃး ယဝ်ႉတူဝ်ႈလီငၢမ်း ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ