ဝၼ်းတီႈ 21/05/2025 DPLA ပိုၼ်ၽၢဝ်ႇဝႃႈ သိုၵ်းမၢၼ်ႈတင်း တပ်ႉသိုၵ်းပူတ်းပွႆႇၵူၼ်းမိူင်းထၼု DPLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းဢိူင်ႇၵျွၵ်ႉၵူႇ ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း ၾၢႆႇတၢင်းသိုၵ်းမၢၼ်ႈ ဢဝ်မၢၵ်ႇၵွင်ႉငူၼ်ႉထၢတ်ႈပိုတ်းယိုဝ်းၸွႆႈ ဝႃႈၼႆ။

ပၢင်တိုၵ်းၼႆႉ ပဵၼ်တၢင်းဝၢၼ်ႈလွႆႁွင်ႇလႄႈ ၽႅတ်ႉယိၼ်းၵူင်း (ဖက်ရင်းကုန်းရွာ) ဝၼ်းတီႈ 21/04/2025 ယၢမ်းၵၢင်ဝၼ်း 12 မူင်းၶိုင်ႈထိုင် 1 မူင်း ၾၢႆႇတၢင်းသိုၵ်းမၢၼ်ႈ ယိုဝ်းမၢၵ်ႇၵွင်ႉငူၼ်ႉထၢတ်ႈ 4 လုၵ်ႈ၊ ယၢမ်း ၵၢင်ဝၼ်း 3 မူင်း 1 လုၵ်ႈ ၊ 3 မူင်းၶိုင်ႈ 2 လုၵ်ႈ ဝႃႈၼႆ။

လုၵ်ႈၸုမ်း DPLA ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ဢွၼ်တၢင်းၵေႃႈ ၶဝ်ၵႆႉဢဝ် မၢၵ်ႇၵွင်ႉငူၼ်ႉယိုဝ်း၊ ပေႃးၺႃးဢၢႆမၢၵ်ႇၵွင်ႉငူၼ်ႉၼႆ လႆႈသမ်းယႃ ၵိၼ်ယႃ  ႁၵ်ႉသႃတူဝ်မွၵ်ႈသၢမ်ဝၼ်းၼႆႉၸင်ႇပေႇ ၊ ၵူၼ်း ဝၢၼ်ႈဢၼ်ၸမ်ႁိမ်းႁွမ်းပၢင်တိုၵ်းၼၼ်ႉၵေႃႈ လႆႈပၢႆႈ၊ လႆႈႁူႉဝႃႈ ဢၼ်ပၢႆႈၼႆႉ မီးဝႆႉ 3 ဝၢၼ်ႈယဝ်ႉ”- ဝႃႈၼႆ။

ယၢမ်းလဵဝ် တီႈထုင်ႉၵျွၵ်ႉၵူႇၼႆႉ ပၢင်တိုၵ်းသိုပ်ႇပဵၼ်ႁၢဝ်ႈႁႅင်း။ ၵူၼ်းပိုၼ်ႉတီႈ လႆႈပၢႆႈၽေးသိုၵ်း ၼပ်ႉႁူဝ်ႁဵင်။ ၵူၼ်းဝၢၼ်ႈပယိၼ်း (ပယင်း) ၊ ဝၢၼ်ႈထမိၼ်းပွင်း (ထမင်းပေါင်း) လႄႈ ဝၢၼ်ႈၼွင်ဝူဝ်း လႆႈပၢႆႈဝႆႉ တင်းဝၢၼ်ႈ တႃႇလင်ႁိူၼ်းၵူၼ်း 100 ပၢႆ ဝႃႈၼႆ။

ထိုင်ဝၼ်းမိူဝ်ႈၼႆႉ ၾၢႆႇတၢင်းသိုၵ်းမၢၼ်ႈ ဢဝ်ၵွင်ႈလူင်လၢမ်းယိုဝ်းၼႂ်းၸႄႈဝဵင်းလွၵ်ႉၸွၵ်ႇသေ ထူဝ်းသိုၵ်း လေႃႇတိုၵ်းႁၢဝ်ႈႁႅင်း။ ၵူၼ်းပိုၼ်ႉတီႈ ႁႂ်ႈၾၢင်ႉၽေးသိုၵ်း တၢင်းၵၢင်ႁၢဝ်လႄႈ ၾၢင်ႉထွမ်ႇၶၢဝ်ႇငၢဝ်းၵႂႃႇမႃး သေၵမ်း ၾၢႆႇတၢင်း DPLA ပိုၼ်ၽၢဝ်ႇ ပၼ်ၾၢင်ႉပႃးဝႆႉၼင်ႇၼႆ။

ပၢင်တိုၵ်း ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းၼႆႉ တႄႇယိုဝ်းၵၼ် မိူဝ်ႈဝၼ်းတီႈ 04/01/2025 မႃး။ မိူဝ်ႈၽွင်းၽႅၼ်ယၼ်ႇသိုၵ်း 1027 ပၢင်တိုၵ်း ယိုတ်းဝဵင်းၼွင်ၶဵဝ်၊ သီႇပေႃႉၼၼ်ႉ တပ်ႉသိုၵ်းထၼု လႆႈ ႁူမ်ႈၸွမ်း သိုၵ်းတဢၢင်း TNLA သေ ယိုဝ်းတိုၵ်းသိုၵ်းမၢၼ်ႈမႃး ၼင်ႇၵဝ်ႇ။

ထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇၼႆႉ ပဵၼ်ဢွင်ႈတီႈလႅၼ်လိၼ် မိူင်းတႆးပွတ်းၸၢၼ်း – ပွတ်းႁွင်ႇ တိတ်းၸပ်းၵၼ်ဝႆႉလႄႈ ၵွပ်ႈၼႆ မီးဝႆႉသိုၵ်းတႆး RCSS တင်း SSPP တူင်ႉၼိုင်ယူႇဝႆႉသေဢမ်ႇၵႃး ယဝ်ႉၵေႃႈ မီးပႃး ၸုမ်းပျီႇတူႉၸိတ်ႉပဢူဝ်း PNO ၸိူဝ်းၼႆႉထႅင်ႈ ယၢမ်းလဵဝ် တပ်ႉသိုၵ်းထၼု (DPLF/ DPLA) ၵေႃႈ မႃးတူင်ႉၼိုင်ဝႆႉထႅင်ႈ လႆႈႁူႉၼင်ႇၼႆ။