ဝၼ်းတီႈ 21/05/2025 ယၢမ်းၵၢင်ၼႂ်ၸဝ်ႉ 6 မူင်းပၢႆ ၵူၼ်းယိပ်းၵွင်ႈၵၢင်ႇ မွၵ်ႈႁႃႈၵေႃႉ ၶီႇၵႃးမႃးသေ ၶဝ်ႈၸူၼ်ဢဝ် ၶူဝ်းၶွင်ငိုၼ်းၶမ်း ၼႂ်းႁိူၼ်းၵူၼ်းၶၢႆၶမ်း တီႈပွၵ်ႉၵၢတ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
“ၵူၼ်းၸိူဝ်းယိပ်းၵွင်ႈၵၢင်ႇမႃးၸူၼ်ၼၼ်ႉ ၶီႇၵႃး Crown သီႇၽိူၵ်ႇ မႃးၵိုတ်းႁႄႉသႂ်ႇတၢင်းၼႃႈႁိူၼ်း ၽွင်းၸဝ်ႈႁိူၼ်းတိုၵ်ႉတေၵႂႃႇသူင်ႇလုၵ်ႈဢွၼ်ႇ တီႈႁူင်းႁဵၼ်း။ ဢဝ်ၵွင်ႈငႃသႂ်ႇၸဝ်ႈႁိူၼ်းသေ ၸႂ်ႉ ၵႂႃႇ ပိုတ်ႇပၼ်တူႈၵဵပ်းငိုၼ်းၶမ်း (မီးခံသေတ္တာ) ယဝ်ႉ ဢဝ်ငိုၼ်းၶမ်းၵႂႃႇတင်းသဵင်ႈ” – ၵူၼ်းမိူင်း ဝဵင်းမူႇၸေႊၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။
လႆႈႁူႉဝႃႈ ၺႃးၸူၼ်ၵႂႃႇ ၶမ်းတႃႇ 1 ၸွႆႉပၢႆ၊ ငိုၼ်းမၢၼ်ႈ မွၵ်ႈ 60 သႅၼ်ပျႃး၊ ငိုၼ်းၶႄႇ 10,000 ယႂၼ်ႊပၢႆ ။ ၵူၼ်းၸူၼ်ၸိူဝ်းၶီႇၵႃးမႃး 5 ၵေႃႉ ပႃးမႃးၶိူင်ႈၸၢၵ်ႈလၢတ်ႈႁင်းၽႂ်မၼ်း ၵူၺ်းဢမ်ႇၵႃး ၵွင်ႈယၢဝ်းၵွင်ႈပွတ်းၸိူဝ်းၼႆႉၵေႃႈ ပႃးမႃးၸေးၸုမ်ႇၵုမ်ႇထူၼ်ႈႁင်းၽႂ်မၼ်းသေ လၢတ်ႈတေႃႇၵၼ် ၵႂၢမ်းၶႄႇလႄႈ ၵႂၢမ်းမၢၼ်ႈ ဝႃႈၼႆ။
ဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းၵၼ်တင်း လႅၼ်လိၼ်တႆး – ၶႄႇသေ ယၢမ်းလဵဝ် ၾၢႆႇသိုၵ်းမၢၼ်ႈ ၵုမ်းၵမ်ဝႆႉ ပဵၼ်တၢင်းၵၢၼ်ၼႆသေတႃႉ ယွၼ်ႉမီးပၢင်တေႃႇလွင်းဢိၵ်ႇ တင်း ၸုမ်းၵျႃး ၽႅၼ်ႉယူႇသဝ်းဝႆႉလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ဢမ်ႇမီးလွင်ႈႁူမ်ႈလူမ်ႈ။ မီးၽူႈလၵ်ႉၸၵ်ႉၶုတ်ႈၼမ်သေ ၵမ်းၵမ်းၵိူတ်ႇပဵၼ်ပၼ်ႁႃ ၸူၼ်ၵၼ် ၶႃႈႁႅမ်ၵၼ်တၢႆ ၸဵမ်ၸိူဝ်းၼႆႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ