ၾူၼ်တူၵ်း လိၼ်ၵူၼ်ႇတဵင်တၢင်း ၼႂ်းၵႄႈတူၼ်ႈတီး – လွႆလႅမ်လႄႈ ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇၽိုတ်ႇႁႅင်း ယၢမ်းလဵဝ် ၽူႈမီးပုၼ်ႈၽွၼ်းၶဝ် တိုၵ်ႉမႄးတၢင်းဝႆႉယူႇ ဝႃႈၼႆ။

ဝၼ်းတီႈ 15/05/2025 ၼၼ်ႉ ၾူၼ်တူၵ်းႁႅင်း သဵၼ်ႈတၢင်းၶၢတ်ႇၵွႆ ၼႂ်းၵႄႈတူၼ်ႈတီး – လွႆလႅမ် ၊ တင်ႈတႄႇဝၼ်းတီႈ 20/05/2025 ထိုင် ဝၼ်းတီႈ 03/06/2025 တေမီးလွင်ႈမႄးတၢင်း ၼႂ်းၵႄႈ ႁူဝ် ပူင်း – မိူင်းပွၼ် ၸွမ်းဝၢၼ်ႈၼွင်ၶႃး – ထမ်ႈၸၢင်ႉ – လွႆဝူဝ်း ၸိူဝ်းၼၼ်ႉလႄႈ ၸဝ်ႈၵႃးၾၢင်ႉၵၼ် ႁၢမ်ႈၵႂႃႇမႃး တင်ႈတႄႇယၢမ်းၵၢင်ၶမ်ႈ 10 မူင်းထိုင် ၵၢင်ၼႂ် 4 မူင်း တႃႇၶၢဝ်းတၢင်း 15 ဝၼ်း။  

ၸဝ်ႈၵႃး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးၾူၼ်မႃးၼႆ လိၼ်ၵူၼ်ႇႁႅင်းၼႃႇ ၵႃးၵႂႃႇဢမ်ႇလႆႈ၊ လိၼ်ၼႆႉ လႆႈဢီးဢွၵ်ႇ၊ တေႃႈလဵဝ် ၵူၼ်းမႄးတၢင်းၶဝ် တေမႄးတၢင်းလႄႈ ၶဝ်ဢိုတ်း ဝႆႉ ၵၢင်ၶမ်ႈ 10 မူင်းထိုင် ၵၢင်ၼႂ် 4 မူင်း ဢမ်ႇပၼ်ၵႃးၵႂႃႇမႃး။ ယၢမ်းလဵဝ် တၢင်းပၢင်လူင် ၵျွၵ်ႉတၢၼ်းၵေႃႈ ၵႂႃႇဢမ်ႇလႆႈ၊ ၼႂ်းၵႄႈထမ်ႈၸၢင်ႉထိုင် မိူင်းပွၼ်ၵေႃႈ ၵႂႃႇဢမ်ႇလႆႈ မိူၼ်ၶဝ်ဢိုတ်းဝႆႉ မူတ်းယဝ်ႉ”- ဝႃႈၼႆ။

ယွၼ်ႉသဵၼ်ႈတၢင်းဢိုတ်းဝႆႉၸိူင်ႉၼၼ်သေ တွၼ်ႈတႃႇၵႃးလူင်ၵႂႃႇမႃး ၽွင်းၵၢင်ၶမ်ႈၵၢင်ၶိုၼ်းၼၼ်ႉ လႆႈၵိုတ်းၶမ်ဝႆႉလႄႈ ပဵၼ်ဢၼ်ယၢပ်ႇၽိုတ်ႇၵိၼ်းၸႂ်ဝႆႉ ဝႃႈၼႆ။

“ပေႃးတေၸႂ်ႉ ၶၢဝ်းယၢမ်းမႄးတၢင်းႁိုင်ၼၢၼ်း ၸိူင်ႉၼႆတႄႉ ဢမ်ႇလီတွၼ်ႈတႃႇ ၵႃးတၢင်ႇၶူဝ်း ၵုၼ်ႇၽၵ်းၶဵဝ် ၵူၺ်းဢမ်ႇၵႃး ပိူင်လူင် တွၼ်ႈတႃႇၵူၼ်းၸိူဝ်းဢမ်ႇယူႇလီ ၊ ရူတ်ႉၵႃးတၢင်ႇၵူၼ်း ပဵၼ် Ambulances ၸိူဝ်းၼႆႉ တေၵိၼ်းၸႂ်တႄႉတႄႉ”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၸႄႈတွၼ်ႈလွႆလႅမ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။

တီႈသဵၼ်ႈတၢင်း တူၼ်ႈတီး- လွႆလႅမ်ၼႆႉ ပေႃးပဵၼ်ၶၢဝ်းၾူၼ် လိၼ်လွႆၵႆႉၵူၼ်ႇပင်းလႄႈ ၶႂ်ႈႁႂ်ႈၾၢင်ႉၵၼ်ၵႂႃႇမႃး ယွၼ်ႉမီးၽေးၼမ် ဝႃႈၼႆ။  

ရူတ်ႉၵႃးယႂ်ႇဢၼ်ၶမ်ဝႆႉ မၢင်ၸိူဝ်း ပဵၼ်ရူတ်ႉၵႃးပဝ်ႇ ဢၼ်လုၵ်ႉတၢင်း ဝဵင်းတူၼ်ႈတီး လူင်းမႃး တႃႇတေၵႂႃႇတၢင်ႇထၢၼ်ႇႁိၼ် ၼႂ်းမိူင်းတႆးပွတ်းၸၢၼ်း – ပွတ်းႁွင်ႇ။ မၢင်ၸိူဝ်းသမ်ႉ ပဵၼ်ဢၼ် တၢင်ႇထၢၼ်ႇႁိၼ် မိူင်းတႆးၶိုၼ်ႈမႃး ဢၢၼ်းတေၵႂႃႇသူင်ႇတၢင်းမိူင်းမၢၼ်ႈ တူင်ႈပဵင်း။ မၢင်ၸိူဝ်း ပဵၼ်ရူတ်ႉၵႃး တၢင်ႇၶူဝ်းၵုၼ်ႇ ဢၼ်လုၵ်ႉတၢင်းမိူင်းလႃး – ၵဵင်းတုင် – တႃႈၶီႈလဵၵ်းမႃး ဢၢၼ်းတေၵႂႃႇတၢင်းမိူင်းမၢၼ်ႈ ယၢမ်းလဵဝ် ရူတ်ႉၵႃး ၵူႈသႅၼ်းဢမ်ႇၸၢင်ႈၵႂႃႇမႃး ၵိုတ်းၶမ်ၼပ်ႁူဝ်ပၢၵ်ႇလမ်း၊ ၶူဝ်းၵုၼ်ႇမၢၵ်ႇမႆႉမၢၵ်ႇတွၵ်ႇ မွၵ်ႇမၢၵ်ႇၽၵ်းၶဵဝ်ၸိူဝ်းဝႆႉႁိုင် ဢမ်ႇလႆႈၸိူဝ်းၼၼ်ႉ ၶူဝ်းၵုၼ်ႇ ၼဝ်ႈသုမ်းပႅတ်ႈၼမ်လႄႈ ၵူၼ်းမိူင်းထူပ်းတၢင်းယၢပ်ႇၽိုတ်ႇဝႆႉ လၢႆလွင်ႈ။