ဝၼ်းတီႈ 20/05/2025 ၼႆႉ ႁွင်ႈၵၢၼ်ၶၢဝ်ႇ သိုၵ်းတဢၢင်း ပိုၼ်ၽၢဝ်ႇဝႃႈ ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇလူင် ႁႅင်း 500 ပွၼ်ႊ သႂ်ႇၼႂ်းၸႄႈဝဵင်းၼွင်ၶဵဝ် မိူဝ်ႈဝၼ်းတီႈ 11 ယၢမ်းၵၢင်ဝၼ်းမွၵ်ႈ 12 မူင်းၶိုင်ႈၼၼ်ႉသမ်ႉ 2 လုၵ်ႈ။

မၢၵ်ႇလူင်တူၵ်းသႂ်ႇ ၶွမ်ႊပၼီႊၶုတ်းႁႄႈ တိူဝ်ႉၺႃးၶိူင်ႈၸၢၵ်ႈလူင် ဢၼ်ၸႂ်ႉတိုဝ်းၼႂ်းၵၢၼ်ၶုတ်းႁႄႈၼၼ်ႉသေ လူႉၵွႆၵႂႃႇတင်းၼမ် သုမ်းၵႂႃႇၵႃႈၶၼ်ငိုၼ်းၶႄႇ 1,680,000 ယႂၼ်ႊ ဝႃႈၼႆ။

လိူဝ်ၼၼ်ႉ မိူဝ်ႈဝၼ်းတီႈ 18 ယၢမ်းႁူဝ်ၶမ်ႈမွၵ်ႈ 5 မူင်းၶိုင်ႈၼၼ်ႉၵေႃႈ သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇလူင်ႁႅင်း 250 ပွၼ်ႊ တႃႇ 6 လုၵ်ႈ တူၵ်းသႂ်ႇႁိမ်းဝၢၼ်ႈရတၼႃႇတဵင်ႇၵီႇ ဢိူင်ႇတူဝ်းပိၼ်ႇ ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ၼႂ်းၸႄႈဝဵင်းၼွင်ၶဵဝ်ၼႆႉ ယွၼ်ႉလႅင်းၾူၼ်းဢမ်ႇမီးလႄႈ ဢမ်ႇၸႂ်ႉတိုဝ်းလႆႈ လႅင်းဢိၼ်ႊထိူဝ်ႊၼႅတ်ႊ ၵူၺ်းဢမ်ႇၵႃး ယင်းတိုၵ်ႉပဵၼ်ၽွင်းသိုၵ်းမၢၼ်ႈတင်း သိုၵ်းတဢၢင်း ၶဵင်ႈၶႅင်ၵၢၼ်သိုၵ်းတေႃႇၵၼ်ယူႇလႄႈ ႁဵတ်းႁႂ်ႈၵၢၼ်ၵပ်းသိုပ်ႇတိတ်းတေႃႇယၢပ်ႇၽိုတ်ႇၵိၼ်းၸႂ်ႁႅင်း။

လႆႈႁူႉဝႃႈ ၼႂ်းၵၢင်လိူၼ်မေႊၼႆႉၵူၺ်း ၵူၼ်းမိူင်းဝၢၼ်ႈၶူၵ်ႉၼမ်ႉလႄႈ ဝၢၼ်ႈတၢင်းၽႄဢုမ်တီး ၸိူဝ်းပၢႆႈၽေးပၢင်တိုၵ်း ၵႂႃႇသွၼ်ႈယူႇတီႈၵျွင်းၶဵဝ်ၶမ်း ႁိမ်းတၢင်းၽႄဢုမ်တီး ၼႂ်းဝဵင်းၼွင်ၶဵဝ် ၼၼ်ႉၵေႃႈ ၺႃးၸုမ်းယိပ်းၵွင်ႈၵၢင်ႇယိုဝ်းတၢႆၵႂႃႇ 3 ၵေႃႉ မၢတ်ႇၸဵပ်း 1 ၵေႃႉ ဝႃႈၼႆ။

တႅမ်ႈ – ၽူၺ်းၼုမ်ႇ