တႄႇဢဝ် ဝၼ်းတီႈ 28 လိူၼ်မၢတ်ႊၶျ် တေႃႇထိုင် ဝၼ်းတီႈ 18 လိူၼ်မေႊ ၶၢဝ်းတၢင်း လိူၼ်ပၢႆ ၸမ်သွင်လိူၼ်ၼႆႉ ဢိင်ႇသၼ်ႇ (ၽႅၼ်ႇလိၼ်ဝႆ) ယွၼ်ႉလင်တူင်ႉၼိုင်ၵႂႃႇထႅင်ႈ 176 ၵမ်း၊ ၼႂ်း ၼၼ်ႉ ဢိင်ႇသၼ်ႇ ဢၼ်မီးႁႅင်း ၾၢႆႇၼိူဝ် 5 ရိတ်ႊတႃႇသၵေႊ တူင်ႉၼိုင်ဝႆၶွၼ်းၵႂႃႇ 8 ၵမ်း ဝႃႈၼႆ။

ၼႂ်းဝၼ်းတီႈ 19 လိူၼ်မေႊ ယၢမ်းၵၢင်ၼႂ်ၸဝ်ႉ မွၵ်ႈ 2 မူင်းၼႆႉ ၽႅၼ်ႇလိၼ်ဝႆ ႁႅင်းဝႆ 5.1 သုၼ်ၵၢင် ၼႂ်းၼမ်ႉပၢင်ႇလၢႆႇ ႁိမ်းဝဵင်းၵျွၵ်ႉၽိဝ်ႇ မိူင်းရၶႅင်ႇသေ သၼ်ႇဝႆၵႂႃႇ။

ပူၼ်ႉမႃး ဝၼ်းတီႈ 17 ယၢမ်းၵၢင်ၶမ်ႈ 10 မူင်းၶိုင်ႈၼၼ်ႉၵေႃႈ ၽႅၼ်ႇလိၼ်ဝႆ ႁႅင်းဝႆ 5.2 သုၼ်ၵၢင် ႁိမ်းဝဵင်းမျိတ်ႉတႃးသၼ်ႇဝႆၵႂႃႇ၊ ယွၼ်ႈထိုင်ပႃး ဝဵင်းလိူဝ်ႇ ၸႄႈၵႅင်းလႄႈ ၼႂ်းမိူင်းတႆး လၢႆၸႄႈဝဵင်းထႅင်ႈ။ ဝၼ်းၼၼ်ႉ ယွၼ်ႉၽႅင်ႇလိၼ်ဝႆသေ တူၼ်ႈမႆႉယႂ်ႇလူမ်ႉတဵင်သႂ်ႇ ၼိူဝ်သုမ်ႉၵူၼ်းပၢႆႈၽေး တီႈဝဵင်းလိူဝ်ႇ၊ သွင်ပေႃႈလုၵ်ႈ တၢႆထင်တီႈ။

ၼႂ်းႁူဝ်လိူၼ်မေႊၼႆႉၵူၺ်း ၽႅၼ်ႇလိၼ်ဝႆတူင်ႉၼိုင်ၵႂႃႇ 17 ၵမ်း၊ ၵမ်ႈၼမ် ပဵၼ်ၼႂ်းတိူင်းဝဵင်းလိူဝ်ႇ၊ ၼေႇပျီႇတေႃႇလႄႈ တိူင်းပႃႇၵိူဝ်၊ ႁဵတ်းႁႂ်ႈၵူၼ်းမိူင်း မႆႈၸႂ်လွင်ႈႁူမ်ႇလူမ်ႈၵၼ်ဝႆႉ။