သိုၵ်းမၢၼ်ႈယိုတ်းမိူင်း ၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၼႂ်းၸႄႈဝဵင်းမိၼ်းတႅတ်ႉ ၸႄႈမိူင်းၶျၢင်း 3 ဝၼ်းထပ်းၵၼ် ႁဵတ်းႁႂ်ႈၵူၼ်းမိူင်း မၢတ်ႇၸဵပ်းလူႉတၢႆ ႁိူၼ်းယေးၵေႃႈလူႉၵွႆၼမ်ၼႆ ၸုမ်း ၾၢႆႇၽွင်းငမ်း ပိုၼ် ၽၢဝ်ႇပဵၼ်တၢင်းၵၢၼ်ဝႆႉ ၼင်ႇၼႆ။

တႄႇဝၼ်းတီႈ 15 တေႃႇထိုင် 17 ၼႂ်းလိူၼ်မေႊၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇၼႂ်းၸႄႈဝဵင်း မိၼ်းတႅတ်ႉၵူႈဝၼ်း၊ ၸႂ်ႉပႃးမၢၵ်ႇသႅၼ်း ပလႅတ်ႈသတႃႊ (Cluster Bomb) ဢၼ်ပဵၼ်မၢၵ်ႇႁႅင်းယႂ်ႇ ပွႆႇသႂ်ႇၼႂ်းဝၢၼ်ႈ။

ပူၼ်ႉမႃး ဝၼ်းတီႈ 15 ၼၼ်ႉ ယွၼ်ႉၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇႁူင်းႁဵၼ်းၼႂ်းဝၢၼ်ႈလႄႈ ၵူၼ်းဝၢၼ်ႈၺႃးၸၢၵ်ႇမၢၵ်ႇ တၢႆ 2 ၵေႃႉ ပဵၼ်လုၵ်ႈႁဵၼ်း ဢႃယု 13 ၶူပ်ႇ ၵေႃႉၼိုင်ႈလႄႈ ၵူၼ်းယိင်း ဢႃယု 40 ပီၵေႃႉၼိုင်ႈ၊ လိူဝ်ၼၼ်ႉ မၢတ်ႇၸဵပ်းထႅင်ႈ 11 ၵေႃႉ ဝႃႈၼႆ။

ဝဵင်းမိၼ်းတႅတ်ႉၼႆႉ သိုၵ်းၶျၢင်းၶဝ် ယိုတ်းၵုမ်းလႆႈ ၼႂ်းလိူၼ်တီႊသႅမ်ႊပိူဝ်ႊ ပီၵၢႆ။ ၼႂ်းႁူဝ်ပီ 2025 တႄႇလိူၼ်ထူၼ်ႈသွင်ပူၼ်ႉမႃးၼႆႉ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇသႂ်ႇဢမ်ႇယွမ်း 13 ၵမ်း ႁိူၼ်းယေးလူႉၵွႆတင်းၼမ် လူဝ်ႇတၢင်းၸွႆႈထႅမ်ဝႆႉႁၢဝ်ႈႁႅင်းၼႆ – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇ ၼႆ။