မိူဝ်ႈၼႆႉ ဝၼ်းတီႈ 19/05/2025 သိုၵ်းမၢၼ်ႈ ၸီႉသင်ႇ ႁႂ်ႈၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ် ၾၢႆႇၵူတ်ႇထတ်း ၶဝ်ႈဢွၵ်ႇမိူင်း ပိုတ်ႇလုမ်းပဵၼ်တၢင်းၵၢၼ်သေ တႄႇပၼ်ႇၵၢၼ်ၵႂႃႇ တီႈဝဵင်းလႃႈ သဵဝ်ႈ ၸိုင်ႈတႆးပွတ်းႁွင်ႇ။

သိုၵ်းမၢၼ်ႈပိုတ်ႇၶိုၼ်း ႁွင်ႈၵၢၼ်လုမ်းၼႆသေတႃႉ တႃႇတေပၼ်ႇၵၢၼ်ၵႂႃႇလႆႈတႄႉတႄႉၼႆၼၼ်ႉ ယင်းတိုၵ်ႉမီးလွင်ႈယၢပ်ႇလၢႆလၢႆလွင်ႈယူႇလႄႈ ၾၢႆႇသိုၵ်းမၢၼ်ႈ တေႃႉတႄႉ တေပိုတ်ႇလႆႈ ပဵၼ်တၢင်းၵၢၼ်ဢဝ်ၼႃႈဢဝ်တႃ မွၵ်ႈၼၼ်ႉၵူၺ်းၼႆ – ပီႈၸၢႆး ၵူၼ်းမိူင်း ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶဝ်တေပႆႇၸၢင်ႈပၼ်ႇၵၢၼ်ႁင်လႆႈတႄႉတႄႉ။ ပေႃးလဝၵ ၽုၺ်ႇယဝ်ႉ ႁဵတ်းၵၢၼ်လႆႈတႄႉတႄႉယဝ်ႉ လုမ်း Passport ၸွင်ႇတေၸၢင်ႈၽုၺ်ႇ။ ၵူၺ်းလုမ်းလႂ်သေဢမ်ႇဝႃႈ ၶဝ်တေၽုၺ်ႇဢဝ် ႁႂ်ႈ ဢိင်ႇၵႃႇမၼ်းတဵမ်မွၵ်ႈၼၼ်ႉၵူၺ်း။ မိူဝ်ႈလဵဝ်ၼႆႉ ႁဝ်းတမ်ႉပႆႇႁၼ် လုမ်းလႂ်ႁဵတ်းၵၢၼ်လႆႈၶိုၼ်း တႄႉတႄႉ။ ဢၼ်ႁဝ်းႁၼ်ၼႆႉ မီးလုမ်းၸီႇပိၼ်ႇ ၾၢႆႇလိူမ်ႇလႆႇၼႆႉၵူၺ်း တိုၵ်ႉတႄႇႁဵတ်းၵၢၼ်လႆႈ။”

ဝၢႆးလင် သိုၵ်းမၢၼ်ႈ ၶဝ်ႈၵုမ်းၵမ်ၶိုၼ်း ဝဵင်းလႃႈသဵဝ်ႈ တႃႇ 12 ပွၵ်ႉယဝ်ႉဢမ်ႇႁိုင် ၾၢႆႇသိုၵ်းမၢၼ်ႈ တႄႇႁွင်ႉဢဝ် ၶႃႈႁၢပ်ႇၵၢၼ်ၶုၼ် ၼႂ်းဝဵင်းလႃႈသဵဝ်ႈ ၸိူဝ်းပၢႆႈဢွၵ်ႇဝဵင်းၵႂႃႇ မိူဝ်ႈၽွင်းပၢင်တိုၵ်း ၼၼ်ႉ ပွၵ်ႈမႃးယူႇၶိုၼ်းၼႂ်းဝဵင်းလႃႈသဵဝ်ႈ။ ၸီႉသင်ႇႁႂ်ႈႁၢင်ႈႁႅၼ်း ပိုတ်ႇၶိုၼ်းႁွင်ႈၵၢၼ်လူင်ပွင် ၸိုင်ႈၵူႈလုမ်းလုမ်း ဢိၵ်ႇပႃးႁူင်းယႃ၊ ႁူင်းႁဵၼ်း ၸဵမ်ၸိူဝ်းၼႆႉ။

ႁွင်ႈၵၢၼ်ၾၢႆႇပလိၵ်ႈ၊ ၾၢႆႇၸွပ်ႇၶၢဝ်ႇ (SP)၊ ပလိၵ်ႈၵုမ်းရူတ်ႉၵႃး (မော်တော်ပီကယ်)၊ ႁွင်ႈၵၢၼ် ၾၢႆႇၽွင်းငမ်း (ထွေအုပ်) ၸိူဝ်းၼႆႉၵေႃႈ ယင်းပႆႇႁတ်းတႄႇႁဵတ်းၵၢၼ်ၶိုၼ်း မိူၼ်ၵဝ်ႇတႄႉတႄႉၼႆ ၵူၼ်းမိူင်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ႁဝ်းတူၺ်းၼႆႉ ၶဝ်ၵေႃႈတေၵူဝ်ၵႃႈ ၶဝ်ဢမ်ႇပေႃးႁတ်းဢွၵ်ႇႁဵတ်းၵၢၼ်တႄႉတႄႉ။ လႆႈငိၼ်းဝႃႈ ၵူၼ်းလူင်ၶဝ် သၢင်ႉဢမိင်ႉ တီႈၶႃႈႁၢပ်ႇၵၢၼ်ၶုၼ် ၶဝ်ၸိူဝ်းၼႆႉဝႃႈ တေလႆႈဝႆႉသတိလွင်ႈလၢတ်ႈ ၸႃႁႄ ႁႂ်ႈဝႆႉသတိသေယူႇၵႂႃႇ။ ၵွပ်ႈဝႃႈ ငဝ်းလၢႆးမိူဝ်ႈလဵဝ် ဢမ်ႇမိူၼ်မိူဝ်ႈဢွၼ်တၢင်း။ မိူဝ်ႈဢွၼ် တၢင်းၼၼ်ႉ လုမ်းလဝၵၶဝ်ဝႃႇ လုမ်းၾၢႆႇတႅၵ်ႈတီႈလိၼ် (မြေစာရင်း) ၸိူဝ်းၼႆႉ ၶဝ်လၢတ်ႈတေႃႇ ႁဝ်း ၵူၼ်းမိူင်းၼႆႉ ၵျၢမ်းၼႃႇလူင်။ မိူဝ်ႈလဵဝ်တႄႉ ၶဝ်ၵေႃႈ တေဢမ်ႇပေႃးႁတ်းႁၢႆႉ မိူၼ်ဝၼ်းၼၼ်ႉယဝ်ႉ”။

လႆႈႁူႉဝႃႈ တင်ႈတႄႇသိုၵ်းမၢၼ်ႈၶဝ်ႈၵုမ်းၵမ် တႃႇ 12 ပွၵ်ႉသေ သိုၵ်းၵဝ်ႈၵၢင်ႉ ထွႆဢွၵ်ႇၵႂႃႇယူႇ သဝ်း ႁွပ်ႈႁွပ်ႈသၢပ်ႇဝဵင်းလႃႈသဵဝ်ႈၼႆႉ မီးၽူႈလၵ်ႉၸၵ်ႉၶုတ်ႈ ၵူၼ်းၸူၼ်လိူင်ႇၼမ်ႁႅင်းသေ ၾၢႆႇသိုၵ်းမၢၼ်ႈၵေႃႈ ဢမ်ႇၸတ်းၵၢၼ် ၵုမ်းၵမ်ၽဵဝ်ႈမူၺ်ႉပၼ်သင်လႄႈ ၵူၼ်းမိူင်းၸိူဝ်းယူႇသဝ်း ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ