ၵၢၼ်သင်သေဢမ်ႇဝႃႈ တႃႇတေလႆႈမႃးၼိုင်ႈဢၼ်ၼႆႉ မၼ်းဢမ်ႇငၢႆႈ။ တၵ်းလႆႈၶတ်းၸႂ်ဢဝ်တႄႉတႄႉဝႃႈဝႃႈလႄႈ ၸင်ႇဢွင်ႇမၢၼ်ႈႁွတ်ႈထိုင်ယိူင်းမၢႆ။ ၼႂ်းၵၢၼ်ဢွင်ႇမၢၼ်လူင် တင်းလၢႆၼႆႉ တႃႇလႆႈပဵၼ် ၼၢင်းႁိူဝ်းမိၼ် (Flight attendants/ Cabin Crew) ၼႆႉ ယိင်ႈၶႅၼ်းယၢပ်ႇၽိုတ်ႇ။ ၼႂ်းလွင်ႈၼႃႈၵၢၼ်ဢၼ်ယၢပ်ႇၽိုတ်ႇလူင်ၼႆႉ မီးယိင်းသၢဝ်တႆးၵေႃႉၼိုင်ႈ လႆႈၶတ်းၸႂ်သေ လႆႈတီႈယူႇမႃး တီႈသၢႆၵၢၼ်မိၼ် Qatar Airways မိူင်းဝၼ်းဢွၵ်ႇၵၢင်။ မၼ်းၼၢင်းပဵၼ်ၽႂ် လုၵ်ႉလႂ်မႃး။ သဵၼ်ႈတၢင်းဢၼ်မီးလွင်ႈၶဵင်ႇတႃႉလူင်ၼႆႉ မၼ်းၼၢင်း လႆႈၸႂ်ႉၶၢဝ်းယၢမ်းႁၢင်ႈႁႅၼ်း ၶတ်းၸႂ်မႃးၸိူင်ႉႁိုဝ်ၼႆၼၼ်ႉ ၼၢင်းငိုၼ်းႁွမ် ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ။

ထၢမ် – ဢွၼ်တၢင်းသုတ်း ၵပ်းသိုပ်ႇၼႄႉၼမ်းပၼ် ၸိုဝ်ႈသဵင် ၊ တီႈယူႇ ၊ ၼႃႈၵၢၼ် ဢိတ်ႉၼိုင်ႈၶႃႈ?

တွပ်ႇ – မႂ်ႇသုင်ၶႃႈ … ၶႃႈၸိုဝ်ႈ ၼွင်ႉဢွႆႉ ယူႇတႃႈတွၼ်း ဝဵင်းမႄႈဢၢႆး ၸႄႈတွၼ်ႈၵဵင်းမႂ်ႇ မိူင်းထႆးၶႃႈ။ ယၢမ်းလဵဝ် ၶႃႈႁဵတ်းၵၢၼ်ဝႆႉတီႈ သၢႆၵၢၼ်မိၼ် Qatar Airways တီႈဝဵင်း Doha မိူင်း Qatar (မိူင်းဝၼ်းဢွၵ်ႇ ၵၢင် – Middle East) ၶႃႈ။

ထၢမ် – ပေႃႈမႄႈ ပဵၼ်ၵူၼ်းမိူင်းထႆးၶႃႈႁႃႉ ၊ မီးပီႈၼွင်ႉ လၢႆၵေႃႉၶႃႈ?  

တွပ်ႇ – ပေႃႈမႄႈ ပဵၼ်ၵူၼ်းတႆးၶႃႈ။ ၵူၺ်းၵႃႈ မႃးယူႇတီႈမိူင်းထႆး ႁိုင်ယဝ်ႉဢေႃႈ။ မီးပီႈၼွင်ႉ 2 ၵေႃႉ ၊ ၶႃႈပဵၼ်ၼွင်ႉလိုၼ်း ၊ မီးဝႆႉပီႈဢၢႆႈၶႃႈ။

ထၢမ် – ၵၢၼ်ႁဵၼ်းလိၵ်ႈလၢႆးၸိူဝ်းၼႆႉလူး မႃးႁဵၼ်းတီႈမိူင်းထႆးၶႃႈႁႃႉ?

တွပ်ႇ – ဢေႃႈ… ယွၼ်ႉဝႃႈၶႃႈမႃးၵိူတ်ႇတီႈမိူင်းထႆးလႄႈ ႁဵၼ်းတီႈမိူင်းထႆးၶႃႈ။ မိူဝ်ႈတႄႇဢွၼ်တၢင်းတႄႉ ႁဵၼ်းတီႈမႄႈဢၢႆး ၊ ၸၼ်ႉၸွမ်သမ်ႉ မႃးႁဵၼ်းတီႈၸၼ်ႉၸွမ် ရၢတ်ႉၶျၽတ်း Rajabhat ဝဵင်းၵဵင်းမႂ်ႇၶႃႈ။

ထၢမ် – သၢႆၵၢၼ်မိၼ် Qatar Airways ပဵၼ်သၢႆၵၢၼ်မိၼ်သႅၼ်းၸိူင်ႉႁိုဝ်ၶႃႈ?  

တွပ်ႇ – သၢႆၵၢၼ်မိၼ် Qatar Airways ၼႆႉ တေမိၼ်ၵႂႃႇတီႈ 150 မိူင်းၶႃႈ။ သင်တေႁဵတ်းၵၢၼ်တီႈ သၢႆၵၢၼ် မိၼ်ၼႆႉၸိုင် တေလႆႈၵႂႃႇယူႇတီႈမိူင်း Qatar ၶႃႈ။ ယွၼ်ႉဝႃႈ သၢႆၵၢၼ်မိၼ် တေလုၵ်ႉတီႈမိူင်း Qatar သေ ၸင်ႇတေမိၼ်ၵႂႃႇတီႈၼွၵ်ႈမိူင်း။

ထၢမ် – ယွၼ်ႉသင်လႄႈ လႆႈလိူၵ်ႈၼႃႈၵၢၼ်ပဵၼ် ၼၢင်းႁိူဝ်းမိၼ်၊ လႆႈႁဵတ်းၵၢၼ် ဢၼ်ၼႆႉမႃး ႁိုင်လၢႆပီ ယဝ်ႉၶႃႈ?

တွပ်ႇ –  ၵၢၼ်ပဵၼ်ၼၢင်းႁိူဝ်းမိၼ်ၼႆႉ မိူၼ်ၼင်ႇဝႃႈ ပဵၼ်လွင်ႈၼွၼ်းၾၼ် လုၵ်ႈဢွၼ်ႇယိင်း/ ၼၢင်းယိင်း ယဝ်ႉၵေႃႈ ပဵၼ်လွင်ႈၼွၼ်းၾၼ်ၶႃႈပႃး။ မိူၼ်ဢွၼ်တၢင်းတႄႉ ၶႃႈဝူၼ်ႉဝႃႈ လႅပ်ႈဢမ်ႁဵတ်းလႆႈ ယွၼ်ႉၶႃႈ ပဵၼ်ၵူၼ်းတႆး။ ၵူၺ်းၵႃႈ ၶႃႈလႆႈႁဵၼ်း၊ လႆႈၸၢမ်းတူၺ်းလႄႈ ၶႂ်ႈႁဵၼ်းႁူႉ ၼႂ်းၵၢၼ်ပဵၼ်ၼၢင်းႁိူဝ်းမိၼ် ၊ ၶႂ်ႈ ၵႂႃႇဢႅဝ်ႇလႄႇလၢႆလၢႆမိူင်း ပိူဝ်ႈတႃႇပိုတ်ႇႁူပိုတ်ႇတႃၸိူဝ်းၼႆႉသေ ၸင်ႇပဵၼ်ႁဵတ်းၵၢၼ်ဢၼ်ၼႆႉမႃး ၶႃႈ ဢေႃႈ။ လႆႈႁဵတ်ၵၢၼ်ဢၼ်ၼႆႉမႃး ပေႃးထိုင်လိူၼ်ၵျုၼ်ႊပီ 2025 ၼႆႉ တေတဵမ် 2 ပီယဝ်ႉၶႃႈ။

ထၢမ် – တႃႇတေလႆႈၶဝ်ႈ ႁဵတ်းၵၢၼ်ပဵၼ် ၼၢင်းႁိူဝ်းမိၼ် တီႈသၢႆၵၢၼ်မိၼ် Qatar Airways ၼႆႉ မီးလွင်ႈ ယၢပ်ႇၽိုတ်ႇ၊ လွင်ႈၶဵင်ႇတႃႉၸိူင်ႉႁိုဝ်ၽွင်ႈၶႃႈ?

တွပ်ႇ – လွင်ႈၶဵင်ႇတႃႉတႄႉ မိူဝ်ႈၵႂႃႇထၢမ်/ တွပ်ႇ (interview) တႃႇတေလႆႈၵၢၼ်ၼၼ်ႉ မီးၵူၼ်းၶဝ်ႈတွပ်ႇ ၼမ် ႁႅင်းၼႃႇၶႃႈ။ မိူဝ်ႈပီဢၼ်ၶႃႈၶဝ်ႈတွပ်ႇၼၼ်ႉ တီႈဝဵင်းၵဵင်းမႂ်ႇ မီးၵူၼ်းမွၵ်ႈ 500 ၵေႃႉၼႆႉ ၊ တီႈဢူၺ်း ၵေႃႉ ၶႃႈၶဝ်ႈတွပ်ႇ တီႈဝဵင်းၵုင်းထဵပ်ႈသမ်ႉ ငိၼ်းဝႃႈမီး 3,000 ၵေႃႉၼႆဢေႃႈ။ ၵူၼ်းတေထၢမ် (interview) ႁဝ်းၼၼ်ႉသမ်ႉ ပဵၼ်ၵူၼ်းတၢင်ႇမိူင်းလႄႈ ႁဝ်းလူဝ်ႇလႆႈ ႁဵတ်းၼႄႁႂ်ႈပိူၼ်ႈႁၼ်ဝႃႈ ယွၼ်ႉသင်လႄႈ ပိူၼ်ႈ တေလႆႈလိူၵ်ႈႁဝ်းၼႆၶႃႈ။ ယဝ်ႉၵေႃႈ ႁဝ်းတေဢမ်ႇလႆႈၸႂ်တိုၼ်ႇတဵၼ်ႈႁႅင်းပူၼ်ႉ ၊ မၼ်းယူႇတီႈ ႁဝ်းၾိုၵ်း ဝႆႉပႃး ၊ ပေႃးႁဝ်းလႆႈၾိုၵ်းဝႆႉလီလီၸိုင် ၶႃႈဝူၼ်ႉဝႃႈ မၼ်းၵေႃႈတေႁဵတ်းလႆႈလီဢေႃႈ။

ထၢမ် – ၶၵ်ႉတွၼ်ႈထၢမ်တွပ်ႇ တႃႇတေလႆႈၵၢၼ်ၼၼ်ႉ မီးၸိူင်ႉႁိုဝ်ၽွင်ႈၶႃႈ?

တွပ်ႇ – တီႈသၢႆၵၢၼ်မိၼ် Qatar Airways ၼႆႉတႄႉ ၶၵ်ႉတွၼ်ႈ ထၢမ်တွပ်ႇတင်းမူတ်းတေႁိုင် (3) ဝၼ်းၶႃႈ။ ၼႂ်းဝၼ်းတီႈၼိုင်ႈ – တေလႆႈႁူပ်ႉၸွမ်းၵမ်မၵၢၼ်ၶဝ် ၶၢဝ်းတၢင်း 2 မိၼိတ်ႉ။ ပိူၼ်ႈတေထၢမ် ၸိုဝ်ႈႁဝ်း။ ပေႃးႁဝ်း တိုၼ်ႇတဵၼ်ႈႁႅင်း ပိူၼ်ႈၵေႃႈတေလၢတ်ႈဝႃႈ ၺႃးၵၼ်ပွၵ်ႈၼႃႈၼႆၵူၺ်း။ ပိူင်လူင်မၼ်း ႁဝ်းတေ လႆႈဢုပ်ႇ/ လၢတ်ႈ တေႃႇပိူၼ်ႈ ႁႂ်ႈပိူၼ်ႈပေႃးၶႂ်ႈဢုပ်ႇၸွမ်းႁဝ်း။ ပေႃးႁဝ်းတွပ်ႇပူၼ်ႉၼႂ်းဝၼ်းတီႈၼိုင်ႈ ပိူၼ်ႈတေပၼ် ဝႂ်ႁဝ်းဢၼ်ၼိုင်ႈသေ မိူဝ်ႈၽုၵ်ႈႁႂ်ႈႁဝ်းၵႂႃႇထႅင်ႈ။ ပေႃးဢမ်ႇလႆႈဝႂ်တႄႉ ပွင်ႇဝႃႈဢမ်ႇလူဝ်ႇ ၵႂႃႇၶိုၼ်းထႅင်ႈယဝ်ႉၶႃႈ။

ဝၼ်းတီႈ 2 သမ်ႉ တေလႆႈတွပ်ႇ ၶေႃႈတွပ်ႇ ဢၼ်သၢႆၵၢၼ်မိၼ်ၶဝ်ႁၢင်ႈႁႅၼ်းဝႆႉပၼ် လူၺ်ႈၽႃသႃဢင်း ၵိတ်း တေပဵၼ်ၵၢင်ၼႂ်တင်း ၵၢင်ဝၼ်း။ ပေႃးၽႂ်တွပ်ႇပူၼ်ႉ တွၼ်ႈၵၢင်ဝၼ်းၸိုင် တေမီးၶၵ်ႉတွၼ်ႈ ဢုပ်ႇ ဢူဝ်းၸွမ်းၵမ်မၵၢၼ် ၶဝ်ထႅင်ႈ။ ၶဝ်တေထၢမ် ၵႂၢမ်းထၢမ်မွၵ်ႈ 2-3 ၶေႃႈ။ တွၼ်ႈၼႆႉ ႁဝ်းလူဝ်ႇလႆႈတွပ်ႇ လူၺ်ႈမၼ်ႈၸႂ်လႄႈ ၵႂၢမ်းဢင်းၵိတ်း ႁႂ်ႈလီတီႈသုတ်း။ ၼႂ်းၶမ်ႈၼၼ်ႉ ပိူၼ်ႈတေလိူၵ်ႈၵူၼ်း ဢၼ်တေလႆႈၵႂႃႇတွပ်ႇထႅင်ႈ မိူဝ်ႈၽုၵ်ႈ ၊ ပိူၼ်ႈတေမီးမၢႆတူဝ် သႂ်ႇဝႆႉပၼ်တီႈၼႃႈသိူဝ်ႈ။ ပေႃးႁဝ်းထုၵ်ႇလိူၵ်ႈပႃး တႃႇ တေၵႂႃႇထႅင်ႈဝၼ်းလိုၼ်းသုတ်း ပိူၼ်ႈတေႁႂ်ႈယူႇဝႆႉၵွၼ်ႇ ၊ ပေႃးဢမ်ႇထုၵ်ႇလိူၵ်ႈၵေႃႈ တေလႆႈမိူဝ်းႁိူၼ်း။

ဝၼ်းတီႈ 3 ဝၼ်းၵမ်းလိုၼ်းသုတ်းသမ်ႉပဵၼ် Final Interview ။ ႁဝ်းတေလႆႈဢုပ်ႇၸွမ်း ၵမ်မၵၢၼ်မွၵ်ႈ 15 မိၼိတ်ႉၼႆႉ။တွၼ်ႈၼႆႉ ၵမ်မၵၢၼ်ၶဝ် တေထၢမ်ၶေႃႈထၢမ်ၼမ်ၼႃႇၶႃႈ မိူၼ်ၼင်ႇ ႁဝ်းယၢမ်ႈႁဵတ်းၵၢၼ် သင်မႃး၊ တေႃႈလဵဝ်ႁဵတ်းၵၢၼ်သင်ဝႆႉ၊ ပေႃးၵႂႃႇႁဵတ်းၵၢၼ်ၸွမ်းပိူၼ်ႈ ၸွင်ႇတေႁဵတ်းလႆႈ၊ ပေႃးၺႃးပၼ် ႁႃသေလွင်ႈလွင်ႈ တေႁဵတ်းႁိုဝ်ၵႄႈ ၼႆၸိူဝ်းၼႆႉ။ 

ပေႃးႁဝ်းတွပ်ႇပူၼ်ႉတၢင်း 3 ဝၼ်းသေ ထုၵ်ႇလိူၵ်ႈၵေႃႈ ၾၢႆႇသၢႆၵၢၼ်မိၼ်ၶဝ်တေသူင်ႇလိၵ်ႈမႃးတၢင်း Email ၶႃႈဢေႃႈ။ ၵူၺ်းၵႃႈ မၼ်းၵေႃႈတေမီးၶၵ်ႉတွၼ်ႈထႅင်ႈတင်းၼမ်ယူႇၶႃႈ သင်ဝႃႈပီႈၼွင်ႉႁဝ်းၶႂ်ႈ သူၼ်ၸႂ်ၼႆၸိုင် တၵ်ႉထၢမ်မႃးတီႈၶႃႈၵေႃႈ လႆႈယူႇဢေႃႈ။

ထၢမ် – ၶေႃႈလီလႄႈ ၶေႃႈယူပ်ႈယွမ်း ၼႂ်းၵၢၼ်ပဵၼ်ၼၢင်းႁိူဝ်းမိၼ်ၼႆႉ မီးၸိူင်ႉႁိုဝ်ၽွင်ႈၶႃႈ?

တွပ်ႇ – ၶေႃႈလီမၼ်းတႄႉ ဢွၼ်တၢင်းသုတ်း ႁဝ်းတေလႆႈၵႂႃႇလႄႇ တၢင်ႇတီႈတၢင်ႇမိူင်း ၊ ႁဝ်းတေလႆႈႁၼ် မိူင်းတီႈဢၼ် ႁဝ်းဝူၼ်ႉဝႃႈတေဢမ်ႇလႆႈၵႂႃႇ ။ ထီႉသွင်သမ်ႉ လႆႈငိုၼ်းလိူၼ်လီ ။ တီႈသၢႆၵၢၼ်မိၼ် ဢၼ် ၶႃႈ ႁဵတ်းၵၢၼ်ယူႇ တီႈဝၼ်းဢွၵ်ႇၵၢင်ၼႆႉ ပိူၼ်ႈတေပၼ်ပႃး ဢွင်ႈတီႈယူႇသဝ်း ၊ မီးရူတ်ႉ ႁပ်ႉသူင်ႇပၼ် ထိုင်တီႈဝၢင်းႁိူဝ်းမိၼ် ဢမ်ႇလူဝ်ႇလႆႈသဵင်ႈငိုၼ်း။ ၵူၺ်းၵႃႈ သၢႆၵၢၼ်မိၼ် ဢၼ်ၼိုင်ႈလႄႈ ဢၼ်ၼိုင်ႈ ၶေႃႈလီမၼ်းတေဢမ်ႇမိူၼ်ၵၼ်ၶႃႈ။

ၶေႃႈယူပ်ႈယွမ်းတႄႉ ဢွၼ်တၢင်းသုတ်း ပေႃးႁဝ်းၵႂႃႇႁဵတ်းၵၢၼ် တၢင်ႇဝၢၼ်ႈတၢင်ႇမိူင်း ႁဝ်းတေဢမ်ႇလႆႈ  ယူႇမိူင်းႁဝ်း၊ တေလႆႈၽၢတ်ႇယၢၼ်ပေႃႈမႄႈ ၊ လူဝ်ႇလႆႈမေႃၸႂ်ႉၸၢတ်ႈပၢၼ်ၵေႃႉလဵဝ် တီႈဝၢၼ်ႈမိူင်းပိူၼ်ႈ ၵွပ်ႈပိူဝ်ႈၽႃသႃ၊ ၾိင်ႈငႄႈၾိင်ႈထုင်းၵေႃႈ ဢမ်ႇမိူၼ်ၵၼ်။ မိူၼ်ၼင်ႇၵူႈၵေႃႉႁူႉ မိူင်းတႃဝၼ်းဢွၵ်ႇၵၢင် ၼႆႉ ပဵၼ်မိူင်းမူႇသလိမ်ႇ ႁဝ်းၵေႃႈလူဝ်ႇမေႃယူႇသဝ်း ႁႂ်ႈမႅၼ်ႈၸွမ်းပိူၼ်ႈ။ ယဝ်ႉၵေႃႈ ၵၢၼ်ပဵၼ်ၼၢင်းႁိူဝ်း မိၼ်ၼႆႉ ၵၢၼ်ၵိၼ်ၵၢၼ်ၼွၼ်း ဢမ်ႇမႅၼ်ႈၸွမ်းၶၢဝ်းယၢမ်းလႄႈ ႁဵတ်းႁႂ်ႈတုမ်ႉတိူဝ်ႉပၢႆးယူႇလီႁဝ်း ၊ ပေႃး ၵႂႃႇယူႇႁိုင်သမ်ႉ ၸႂ်ထိုင်မိူင်းႁဝ်းလႄႈ ၶဝ်ႈၽၵ်းတႆးႁဝ်း ၸိူဝ်းၼႆႉဢေႃႈ။

ထၢမ် – သင်ၶႂ်ႈႁဵတ်းၵၢၼ်ပဵၼ် ၼၢင်းႁိူဝ်းမိၼ်ၸိုင် တေလႆႈမီးၼမ်ႉၵတ်ႉၸိူင်ႉႁိုဝ် ၊ တေလႆႈႁၢင်ႈႁႅၼ်း တူဝ်ၸိူင်ႉႁိုင်ၽွင်ႈၶႃႈ?

တွပ်ႇ – တႃႇတေပဵၼ်ၼၢင်းႁိူဝ်းမိၼ်ၼႆႉ မီးၵၢၼ်လႆႈၶေႉၶဵင်ႇသုင်ဢေႃႈ ။ ႁဝ်းလူဝ်ႇလႆႈႁၢင်ႈႁႅၼ်းတူဝ်ႁႂ်ႈ ၽွမ်ႉ မိူဝ်ႈၽွင်းသၢႆၵၢၼ်မိၼ်ပိူၼ်ႈ ပိုတ်ႇႁပ်ႉၵူၼ်း။ မိူၼ်ၼင်ႇတူဝ်ၶႃႈၵေႃႈ လႆႈႁၢင်ႈႁႅၼ်းတူဝ် ၊ ႁဵၼ်း ၸွမ်းပိူၼ်ႈ ၸိူဝ်းမီးတူဝ်ထူပ်းယၢမ်ႈပဵၼ်ၼၢင်းႁိူဝ်းမိၼ်ၵဝ်ႇ၊ ပိူၼ်ႈတေသွၼ်ပၼ်ႁဝ်း လၢႆးတွပ်ႇၵႂၢမ်း ထၢမ်၊ လၢႆးႁၢင်ႈၶိူင်ႈတႅင်ႇတူဝ် ၼႃႈတႃသိူဝ်ႈၶူဝ်း။ ၶႃႈလႆႈႁဵၼ်းမွၵ်ႈ 10 လိူၼ်ၼႆႉသေ ၸင်ႇၵွႆႈယိုၼ်ႈ တၢင်ႇ ၵၢၼ်ဢေႃႈ။

ၵၢၼ်ႁၢင်ႈႁႅၼ်း ဢၼ်လမ်ႇလွင်ႈလိူဝ်သေပိူၼ်ႈသမ်ႉ တေပဵၼ်ၽႃသႃၵႂၢမ်းဢင်းၵိတ်း (English) ဢေႃႈ။ ပေႃးပဵၼ်သၢႆၵၢၼ်မိၼ်ဝၼ်းဢွၵ်ႇၵၢင်ၼႆႉတႄႉ ပိူၼ်ႈတေႁပ်ႉၵူၼ်းၸိူဝ်းပူၼ်ႉ မေႃး (6) ၊ႁႂ်ႈႁဵၼ်းယဝ်ႉ High School ၊ ဢမ်ႇယဝ်ႉၸၼ်ႉၸွမ်ၵေႃႈလႆႈယူႇ။ ၵူၺ်းၵႃႈ ပေႃးပဵၼ်သၢႆၵၢၼ်မိၼ် ၼႂ်းဢေးသျႃးတႄႉ ပိူၼ်ႈတေႁပ်ႉၵူၼ်းၸိူဝ်း ႁဵၼ်းယဝ်ႉၸၼ်ႉၸွမ်။ ပေႃးႁဵၼ်းသုတ်း တီႈမိူင်းမၢၼ်ႈမႃးၵေႃႈ တေလႆႈၸႂ်ႉ Passport မိူင်းမၢၼ်ႈသေတၢင်ႇယိုၼ်ႈၵၢၼ်၊ ပေႃးပဵၼ်ၵူၼ်းမိူင်းထႆးၵေႃႈ တေလႆႈၸႂ်ႉ Passport ထႆးၶႃႈ။

ပေႃးၾိုၵ်းၵႂၢမ်း ဢင်းၵိတ်းလႆႈယဝ်ႉသမ်ႉ လူဝ်ႇၶိုၼ်းထၢမ်တူဝ်ၸဝ်ႈၵဝ်ႇဝႃႈ ၸွင်ႇႁဝ်းၶႂ်ႈႁဵတ်းၵၢၼ်ဢၼ် ၼႆႉတႄႉတႄႉ ၵွပ်ႈပိူဝ်ႈဝႃႈ ၵၢၼ်ဢၼ်ၼႆႉမၼ်းဢမ်ႇငၢႆႈမိူၼ်ၼင်ႇတီႈတႃ ႁဝ်းႁၼ် ၊ ဢမ်ႇၸႂ်ႈဝႃႈႁဵတ်း ႁၢင်ႈသေ ၵႂႃႇႁပ်ႉတွၼ်ႈၶႅၵ်ႇဢွၵ်ႇၶၢဝ်းတၢင်း ဢၼ်လဵဝ်ၵူၺ်း။ ႁဝ်းတေလႆႈႁဵၼ်းပႃး ၵၢၼ်တူၺ်းထိုင် လွင်ႈလွတ်ႈၽေး တႃႇၵူၼ်းဢွၵ်ႇၶၢဝ်းတၢင်း၊ ယဝ်ႉၵေႃႈ တေလႆႈမီးလွင်ႈယိူၼ်ႉၵၼ်ႈ ယွၼ်ႉဝႃႈ ၵူၼ်း ဢွၵ်ႇၶၢဝ်းတၢင်းလႄႈ ၵူၼ်းဢၼ်ႁဝ်းလႆႈ ႁဵတ်းၵၢၼ်ၸွမ်းၵၼ်ၼႆႉ ပဵၼ်ၵူၼ်းတၢင်ႇၸိူဝ်ႉၶိူဝ်း မၼ်း တေဢမ်ႇမိူၼ်ၵၼ် သေဝၼ်း၊ ႁဝ်းတေလႆႈမေႃႁဵတ်းၵၢၼ် ၸွမ်းၵူၼ်းတင်းၼမ် ၸိူင်ႉၼၼ်ၶႃႈ။

ထၢမ် – ၶႂ်ႈၼႄပၼ် လွင်ႈႁၢင်ႈႁႅၼ်းတူဝ် ၵွၼ်ႇၶိူင်ႈမိၼ်တေမိၼ် ဢမ်ႇၼၼ်ႉ ၼႂ်းၼိုင်ႈဝၼ်းၼႆႉ လႆႈ ႁဵတ်းၵၢၼ်ၸိူင်ႉႁိုဝ်ၽွင်ႈၶႃႈ?

တွပ်ႇ – ပေႃးတေၵႂႃႇမိၼ် ၼိုင်ႈပွၵ်ႈၼႆ တေလႆႈႁၢင်ႈၶိူင်ႈဝႆႉလူင်ႈၼႃႈ 2 ၸူဝ်ႈမူင်း ၊ တေလႆႈၵႂႃႇတီႈလုမ်း (office) ၶွင်သၢႆၵၢၼ်မိၼ် ၊ မၢင်တီႈၵေႃႈ တေပဵၼ်တီႈဝၢင်းၶိူင်ႈမိၼ်ၵမ်းလဵဝ် ၊ တေလႆႈၵႂႃႇႁူပ်ႉၸုမ်း (Team) ဢၼ်ႁဝ်းတေလႆႈႁဵတ်းၵၢၼ်ၸွမ်းၵၼ် ၊ ပိူၼ်ႈတေဢုပ်ႇၵၼ်ဝႃႈ ႁဝ်းတေမိၼ်ၵႂႃႇတီႈလႂ် ၊ တေလႆႈၸွႆႈထႅမ်ပၼ်ၶႅၵ်ႇ/ ၵူၼ်းဢွၵ်ႇၶၢဝ်းတၢင်းၵေႃႉလႂ် ၸိူင်ႉႁိုဝ်၊ ပေႃးဢုပ်ႇၵၼ်ယဝ်ႉၵေႃႈ တေၵႂႃႇၼိူဝ် ႁိူဝ်းမိၼ် ။ ပေႃးထိုင်ၼိူဝ်ႁိူဝ်းမိၼ်ယဝ်ႉ ဢွၼ်တၢင်းသုတ်း တေလႆႈၵူတ်ႇထတ်း(check) လွင်ႈလွတ်ႈၽေး ၼိူဝ်ၶိူင်ႈမိၼ် ၊ ယဝ်ႉတေၸႅၵ်ႇၼႃႈတီႈပၼ်ၵၼ်ဝႃႈၽႂ်တေလႆႈႁဵတ်းသင်။ တူဝ်ယၢင်ႇမၼ်း – မိူၼ်ၼင်ႇ လႆႈႁပ်ႉပုၼ်ႈၽွၼ်း ယူႇၼႂ်းသိုင်ႇၾႆးၼႆၸိုင် ႁဝ်းတေလႆႈၵူတ်ႇထတ်းဝႃႈ တၢင်းၵိၼ်ဢၼ်ပႃးၵႂႃႇၼၼ်ႉ ၸွင်ႇမႅၼ်ႈၵၼ်တင်း ၶႅၵ်ႇဢၼ်တေဢွၵ်ႇၶၢဝ်းတၢင်း။ ပေႃးၼၼ်ႉယဝ်ႉ ပိူၼ်ႈတေႁႂ်ႈၵူၼ်းဢွၵ်ႇၶၢဝ်း တၢင်း ၶိုၼ်ႈမႃးၼိူဝ်ၶိူင်ႈမိၼ် ႁဝ်းၶႃႈၵေႃႈတေလႆႈပႂ်ႉႁပ်ႉတွၼ်ႈသေ ဢဝ်ထူင်ၶူဝ်းဢၼ်ၶႅၵ်ႇ ပႃးမႃးၸွမ်း ၸိူဝ်းၼၼ်ႉ ဝၢင်းဝႆႉႁႂ်ႈမႅၼ်ႈ တီႈၵဵပ်းမၼ်းၶႃႈ။ ပေႃးၼၼ်ႉယဝ်ႉတႄႉ ၶိူင်ႈမိၼ်တေတႄႇမိၼ် (take off) ၶႃႈ။

ၶၢဝ်းတၢင်းၵၢၼ်မိၼ်တႄႉ ၶၢဝ်းယၢမ်းမၼ်းတေပိူင်ႈၵၼ်ၶႃႈ။ ပေႃးလႆႈမိၼ်ၶၢဝ်းယၢမ်းႁိုင် တေမီးပႃး ၵၢၼ်လဵင်ႉလူၶဝ်ႈၽၵ်း ၊ ပေႃးမိၼ်ၶၢဝ်းယၢမ်းပွတ်းတႄႉ တေလဵင်ႉၼမ်ႉလႄႈ ၶဝ်းမုၼ်း ၸိူဝ်းၼႆႉၵူၺ်း ၶႃႈ။

ယူႇတီႈၶႃႈသေ ဢၼ်လႆႈမိၼ်ၼႆႉ ပွတ်းသုတ်းပဵၼ် 45 မိၼိတ်ႉ ႁိုင်သုတ်းသမ်ႉတေပဵၼ် 16 ၸူဝ်ႈမူင်း ၼႆႉၶႃႈ။

ထၢမ် – တီႈသၢႆၵၢၼ်မိၼ် Qatar Airways ၼႆႉၸွင်ႇမီးမၢဝ်ႇ/  သၢဝ်တႆး ဢမ်ႇၼၼ် ပီႈၼွင်ႉတႆးႁဝ်းႁဵတ်း ၵၢၼ်ဝႆႉၼမ်ယူႇၶႃႈႁႃႉ?

တွပ်ႇ – ယူႇတီႈတူဝ်ၶႃႈ ႁဵတ်းၵၢၼ်မႃးတႄႉ ဢမ်ႇပႆႇတွၼ်ႉလႆႈထူပ်းၺႃး မၢဝ်ႇသၢဝ်တႆးၶႃႈ ။ ၵူၺ်းၵႃႈ ယၢမ်ႈႁၼ်မီး ပီႈၼွင်ႉၵူၼ်းမၢၼ်ႈၶဝ်မွၵ်ႈ 4-5 ၵေႃႉၼႆႉ ယူႇၶႃႈ။

ထၢမ် – ဢၼ်ႁဵတ်းၵၢၼ်ဝႆႉတီႈ သၢႆၵၢၼ်မိၼ် Qatar Airways ၼႆႉ တေမီးၵူၼ်းမိူင်းလႂ် ၼမ်လိူဝ်ပိူၼ်ႈ ၶႃႈၼေႃ?

တွပ်ႇ – ၵမ်ႈၼမ် ပဵၼ်ၵူၼ်းမိူင်းဢိၼ်ႊတီႊယိူဝ်ႊ (India) လႄႈ ၵူၼ်းထႆးဢေႃႈ ။ ယဝ်ႉၵေႃႈ တေမီးၵူၼ်း မိူင်းၾလိပ်ႊပိၼ်ႊ၊ ၵူဝ်ႊရီႊယိူဝ်ႊၸၢၼ်း ၸိူဝ်းၼႆႉၶႃႈ။

ထၢမ် – သၢႆၵၢၼ်မိၼ်ၼိုင်ႈဢၼ်ၼႆႉ ၸွင်ႇမီးဝႆႉမိူၼ်ၼင်ႇဝႃႈ 1 ပီ တေႁပ်ႉၵူၼ်းႁဵတ်းၵၢၼ် လၢႆပွၵ်ႈၸိူင်ႉ ၼၼ်ၶႃႈ?

တွပ်ႇ – ၸိူင်ႉၼၼ်ႉတႄႉ တေဢမ်ႇမီးၶႃႈ။ ၵူၺ်းၵႃႈ ႁဝ်းတေလႆႈတိတ်းတၢမ်း ၶၢဝ်ႇသၢႆၵၢၼ်မိၼ် ဢၼ် ႁဝ်း တေၶႂ်ႈႁဵတ်းၵၢၼ်ၼၼ်ႉဢေႃႈ။ သၢႆၵၢၼ်မိၼ်ၸိူဝ်းပိုတ်ႇႁပ်ႉၵူၼ်းႁဵတ်းၵၢၼ်ၼႆႉ မီးလၢႆဢၼ်ယူႇ ။ ႁဝ်းၵေႃႈ ၵႂႃႇၸၢမ်းတူၺ်းလႆႈယူႇၶႃႈ။ ၵွပ်ႈပိူဝ်ႈဝႃႈ ဝၼ်းဢွၵ်ႇၵၢင်ၼႆႉ မီးသၢႆၵၢၼ်မိၼ်ၼမ်ၼႃႇၶႃႈ။

ထၢမ် – ၼွင်ႉဢွႆႉ မႃးၵိူတ်ႇတီႈမိူင်းထႆး/ ယႂ်ႇမိူင်းထႆးသေတႃႉ ၼင်ႇႁိုဝ် တေဢမ်ႇလိုမ်းၵႂၢမ်းတႆးႁဝ်းၼၼ်ႉ ပေႃႈမႄႈႁဵတ်းႁိုဝ်သင်ႇသွၼ် ၸုင်ၸၼ်ပၼ်ၶႃႈ?

တွပ်ႇ – ပေႃႈမႄႈၶႃႈ ပဵၼ်ၵူၼ်းတႆးလႄႈ ၸႂ်ႉၵႂၢမ်းတႆးလၢတ်ႈတေႃႇၵၼ်ဢေႃႈ ။ ယဝ်ႉၵေႃႈ ပေႃႈမႄႈၶႃႈ ၵဵပ်းလဵင်ႉလုၵ်ႈဢွၼ်ႇတႆး ၸိူဝ်းဢမ်ႇမီးပေႃႈမႄႈၼၼ်ႉၶႃႈ ၵွပ်ႈပိူဝ်ႈဝႃႈ ၶႂ်ႈၸွႆႈထႅမ်ၵူၼ်းတႆး။ လွင်ႈၼႆႉ ႁဵတ်းႁႂ်ႈတူင်ႇဝူင်ႇတီႈၶႃႈယူႇမီးတႆးၼမ် ၊ ၶႃႈၵေႃႈလႆႈၵေႃႉယႂ်ႇမႃးၼႂ်းၵႄႈၵူၼ်းတႆး။

ထၢမ် – ယွၼ်ႉမႃးၵိူတ်ႇတီႈမိူင်းထႆးလႄႈ မိူင်းတႆးႁဝ်းၶႃႈလူး ၸွင်ႇယၢမ်ႈမိူဝ်းထိုင် ၊ မိူဝ်းဢႅဝ်ႇလႄႇၶႃႈ  ။ ဝၢၼ်ႈမိူင်းတႆးႁဝ်းလူး ႁူႉၸၵ်းဝဵင်းလႂ်ၽွင်ႈၶႃႈ?

တွပ်ႇ – ၶႃႈဢမ်ႇယၢမ်ႈမိူဝ်းထိုင်မိူင်းတႆးၶႃႈ။ ပေႃးမီးတိုဝ်ႉတၢင်းတႄႉ ၶႂ်ႈမိူဝ်းလႄႇတူၺ်းယူႇၶႃႈ။ မႄႈၶႃႈ ယၢမ်ႈလၢတ်ႈၼႄတႄႉ မႄးၶႃႈပဵၼ်ၵူၼ်းၸႃတိ ဝဵင်းၵဵင်းတွင်း ၸိုင်ႈတႆးပွတ်းၸၢၼ်း ၊ တီႈဝဵင်းၵဵင်းတွင်း ၼႆႉ မီးၼမ်ႉတူၵ်းတၢတ်ႇ ၼႆဢေႃႈ။ ယဝ်ႉၵေႃႈဝဵင်းၼႂ်းမိူင်းတႆးၼႆႉ ယၢမ်ႈငိၼ်း မိူင်းသူႈ ၊ လႃႈသဵဝ်ႈ ၸိူဝ်း ၼႆႉၶႃႈ။

ထၢမ် – ယွၼ်ႉသင်လႄႈ ၶႂ်ႈမိူဝ်းလႄႇ မိူင်းတႆးၶႃႈ?

တွပ်ႇ – ၶႃႈၶႂ်ႈမိူဝ်းဢႅဝ်ႇလႄႇတူၺ်း မိူင်းႁဝ်းဝႃႈမၼ်းပဵၼ် ၸိူင်ႉႁိုဝ်ၼႆဢေႃႈ။

ထၢမ် – ၶေႃႈၵႂၢမ်းဢၼ်ၶႂ်ႈလၢတ်ႈပၼ်ႁႅင်းၸႂ် ၵူၼ်းၼုမ်ႇတႆးႁဝ်းလူး ၸွင်ႇတေမီးၸိူင်ႉႁိုဝ်ၽွင်ႈၶႃႈ?

တွပ်ႇ – ၵၢၼ်ပဵၼ်ၼၢင်းႁိူဝ်းမိၼ် ဢၼ်ၶႃႈႁဵတ်းၼႆႉ ၶႃႈၵေႃႈပဵၼ်လုၵ်ႈဢွၼ်ႇတႆးၵေႃႉၼိုင်ႈ ဢၼ်ၶႂ်ႈႁဵတ်း ၼႂ်းလွင်ႈဢၼ်ႁဝ်းဝူၼ်ႉဝႃႈ ႁဝ်းတေဢမ်ႇႁဵတ်းလႆႈ။ ၶႃႈၶႂ်ႈပၼ်ႁႅင်းၸႂ် ၵူၼ်းၼုမ်ႇတႆးႁဝ်းဝႃႈ ပေႃးႁဝ်းမီး လွင်ႈၼွၼ်းၾၼ်ဝႆႉၸိုင် ယႃႇပွႆႇလွင်ႈၼွၼ်းၾၼ်ႁဝ်းပႅတ်ႈ။ မၼ်းမီးတိုဝ်ႉတၢင်း တႃႇတေႁဵတ်းႁႂ်ႈလွင်ႈ ၼွၼ်းၾၼ်ႁဝ်းၼၼ်ႉ ပဵၼ်မႃးတႄႉယူႇ ၊ သဵၼ်ႈတၢင်းမၼ်းမီးၼမ်ၼႃႇ။ ဢမ်ႇလူဝ်ႇဝူၼ်ႉဝႃႈ ႁဝ်းပဵၼ် ၵူၼ်းတႆး ႁဝ်းဢမ်ႇမီးဝတ်းဝႂ် ၊ ႁဝ်းႁဵတ်းဢမ်ႇလႆႈၼႆ။ ပေႃးႁဝ်းၶႂ်ႈႁဵတ်းသင်ၵေႃႈ ႁႂ်ႈႁဝ်းမီးဝႆႉ လွင်ႈၼွၼ်း ၾၼ်သုင်သုင်ၶႃႈ။

ထၢမ် – ဢၼ်ဢမ်ႇလႆႈထၢမ်မႅၼ်ႈသေ ၶႂ်ႈလၢတ်ႈၸွင်ႇမီးသင်ထႅင်ႈၶႃႈ?

တွပ်ႇ – ၸွမ်းၼင်ႇပီႈၼွင်ႉႁဝ်းၶႃႈႁူႉ ၶႃႈၵေႃႈမီးဝႆႉ ဢၵွင်ႉ (TikTok) သုၼ်ႇတူဝ် သႂ်ႇၸိုဝ်ႈတႅမ်ႈလိၵ်ႈထႆး ဝႆႉဝႃႈ อ้อยสาวไทยใหญ่ที่เป็นแอร์ ၼႆၶႃႈ။ ၶႃႈတၢင်ႇဝႆႉ ၶလိပ်ႉ (Video) တီႈလၢတ်ႈဝႆႉပႃးၵႂၢမ်းတႆး။ ယွၼ်ႉပိူဝ်ႈ ၶႃႈၶႂ်ႈႁႂ်ႈပီႈၼွင်ႉတႆး လႆႈႁူႉလႆႈႁၼ်ၸွမ်း။ ပီႈၼွင်ႉႁဝ်းၶႃႈၸိူဝ်းတိတ်းတၢမ်း (follow) ၶႃႈဝႆႉၼၼ်ႉၼႆၵေႃႈ ပဵၼ်ဢၼ်ယိၼ်းၸူမ်းတႄႉၶႃႈ။ သင်ဝႃႈပႆႇလႆႈတိတ်းတၢမ်းၼႆၵေႃႈ ပိုင်ႈတိတ်းတၢမ်းပၼ်ႁႅင်းၸႂ်ၶႃႈ လႆႈ ဢေႃႈ။ ယဝ်ႉၵေႃႈ ၶႂ်ႈၾၢၵ်ႇထိုင် ၵူၼ်းၸိူဝ်းၶႂ်ႈႁဵတ်းၵၢၼ်ဢၼ်ၼႆႉႁႂ်ႈႁၢင်ႈႁႅၼ်းတူဝ်ႈတၼ်းဝႆႉ ယွၼ်ႉဝႃႈ သၢႆၵၢၼ်မိၼ် ပိူၼ်ႈမႃးပိုတ်ႇႁပ်ႉၵၢၼ်ၼၼ်ႉ ၼမ်ၼႃႇၶႃႈ။ ပေႃးသၢႆၵၢၼ်မိၼ်မႃးပိုတ်ႇႁပ်ႉၵူၼ်းသေ ႁဝ်းလႆႈႁၢင်ႈႁႅၼ်းတူဝ်ဝႆႉ ႁဝ်းၵေႃႈတေၽွမ်ႉလိူဝ်သေ ၵူၼ်းၸိူဝ်းဢမ်ႇလႆႈႁၢင်ႈႁႅၼ်းတူဝ် ၊ ႁဝ်းတေ ၸၢင်ႈပဵၼ်ၵူၼ်း ပႃးၵႂႃႇၼႂ်းဢၼ်ပိူၼ်ႈလိူၵ်ႈၼၼ်ႉၶႃႈ။

ယဝ်ႉၵေႃႈ ယွၼ်ႉၶႃႈဢမ်ႇပႆႇယၢမ်ႈႁၼ် ၵူၼ်းတႆးၼႂ်းသၢႆၵၢၼ်မိၼ် ဢၼ်ၶႃႈႁဵတ်းၵၢၼ်ဝႆႉၼႆႉလႄႈ ၶႃႈ ၵေႃႈၶႂ်ႈႁႂ်ႈပီႈၼွင်ႉတႆး ႁဝ်းမႃးႁဵတ်းၵၢၼ်ဢၼ်ၼႆႉဢေႃႈ။ ပေႃးၽႂ်ၶႂ်ႈႁူႉဝႃႈ တေလႆႈႁၢင်ႈႁႅၼ်းၸိူင်ႉႁိုဝ် ၊ ဢမ်ႇႁူႉဝႃႈ တေလႆႈတႄႇတီႈလႂ်ၼႆၵေႃႈ တၵ်ႉထၢမ်မႃး ၼႂ်း TikTok ဢမ်ႇၼၼ် Facebook ၶႃႈၵေႃႈ လႆႈယူႇၶႃႈ။ ယိၼ်းၸူမ်းထိုင် ပီႈၼွင်ႉႁဝ်းၶႃႈ ၵူႈၵေႃႉ ဢၼ်ပၼ်ႁႅင်းၶႃႈဢေႃႈ။ မႂ်ႇသုင်ၶႃႈ။