မိူင်းၶႄႇတင်း မိူင်းဢိၼ်ႊတီႊယိူဝ်ႊ တူၵ်းလူင်းလႆႈၸႂ်ၵၼ် တႃႇတေတႄႇလႅၼ်ႈၶိုၼ်း ၶၢဝ်းတၢင်းသၢႆၵၢၼ်မိၼ် ၵႂႃႇမႃးၵမ်းသိုဝ်ႈ ၼႂ်းၵႄႈၵၢင်သွင်ၸိုင်ႈမိူင်း ဝၢႆးသေၵိုတ်းလိုဝ်ႈဝႆႉ ႁိုင် ၶၢဝ်းတၢင်း 5 ပီ တႃႇႁူမ်ႈၵၼ်ႁဵတ်းသၢင်ႈ ယုၵ်ႉမုၼ်းၼႂ်းၵၢၼ်ပၢႆးမၢၵ်ႈမီးလႄႈ ၵၢၼ်လူင်းတိုၼ်းလၢင်း ဝႃႈၼႆ။

မိူင်းၶႄႇတင်း မိူင်းဢိၼ်ႊတီႊယိူဝ်ႊၼႆႉ ပဵၼ်မိူင်းဢၼ်မီးႁူဝ်ၼပ်ႉၵူၼ်းၼမ်လိူဝ်ပိူၼ်ႈ ၼႂ်းၵုၼ်ဢေးသျႃး၊ ၵူၺ်းၵႃႈ သွင်မိူင်းၼႆႉ မီးလွင်ႈၶဵင်ႈၶႅင် လွင်ႈၶေႉၶဵင်ႇၵၼ်ဝႆႉႁၢဝ်ႈႁႅင်း။ မိူဝ်ႈပီ 2020 ၼၼ်ႉ ယွၼ်ႉပၼ်ႁႃၵၢၼ်သိုၵ်း ၸွမ်းသၼ်လွႆ ႁိမဝုၼ်ႇတႃႇ လႅၼ်လိၼ်သွင်မိူင်းၼၼ်ႉသေ ႁဵတ်းႁႂ်ႈလွင်ႈၵပ်းသိုပ်ႇ ၵႄႈၵၢင်ၶႄႇတင်း ဢိၼ်ႊတီႊယိူဝ်ႊ တိူဝ်းၶဵင်ႈၶႅင် ၶိုၼ်ႈမႃး။

ၵူၺ်းၵႃႈ ဝၢႆးသေၽူႈဢွၼ်ႁူဝ်သွင်ၸိုင်ႈမိူင်း ႁူပ်ႉထူပ်းၵၼ်တီႈမိူင်းရတ်ႉသျႃး ၼႂ်းလိူၼ်ဢွၵ်ႊထူဝ်ႊပိူဝ်ႊ ပီ 2024 ၼၼ်ႉယဝ်ႉ ငဝ်းလၢႆးၵႄႈၵၢင်သွင်မိူင်းၵေႃႈ ၶိုၼ်းလီၶိုၼ်ႈမႃး။ ၼႂ်းဝူင်ႈၼႆႉ ၽွင်းလူင် ၾၢႆႇၼွၵ်ႈမိူင်း မိူင်းၶႄႇဝမ်ႊယီႊ ဢွၵ်ႇၶၢဝ်းတၢင်းၵႂႃႇထိုင်တီႈမိူင်းဢိၼ်ႊတီႊယိူဝ်ႊသေ ဢုပ်ႇၵၼ်လွင်ႈသွင်ၸိုင်ႈမိူင်း တေႁူမ်ႈၵၼ်ႁဵတ်းသၢင်ႈၵႂႃႇ။

ႁွင်ႈၵၢၼ် ၽွင်းလူင် ၾၢႆႇၼွၵ်ႈမိူင်း မိူင်းဢိၼ်ႊတီႊယိူဝ်ႊ ပိုၼ်ႇၽၢဝ်ႇဝႆႉ ၼႂ်းဝၼ်းတီႈ 19/08/2025 ၼႆႉဝႃႈ  – ယွၼ်ႉတၢင်းပဵၼ်ၶူဝ်ႊဝိတ်ႉ 19 သေ ၶၢဝ်းတၢင်းသၢႆၵၢၼ်မိၼ်ၵႄႈၵၢင်သွင်ၸိုင်ႈမိူင်း ဢၼ်လႆႈပိၵ်ႉဢိုတ်းမႃး ၸဵမ်မိူဝ်ႈပီ 2020 ၼၼ်ႉသေ တေတႄႇပိုတ်ႇၶိုၼ်း ဝႃႈၼႆ။ ၵူၺ်းၵႃႈ တေတႄႇၵႂႃႇၼႂ်းဝၼ်းလႂ် ၼႆၼၼ်ႉတႄႉ ဢမ်ႇလၢတ်ႈဝႆႉပႃး။

လိူဝ်ၼၼ်ႉ လႆႈဢုပ်ႇၵုမ်ၵၼ်ၵႂႃႇ တႃႇတပ်ႉသိုၵ်းသွင်ၾၢႆႇ တေထွႆဢွၵ်ႇၸွမ်းသၼ်လွႆႁိမဝုၼ်ႇတႃႇ (ၸွမ်းလႅၼ်လိၼ် သွင်မိူင်း)၊ ၵဵဝ်ႇလူၺ်ႈပၼ်ႁႃၸွမ်းလႅၼ်လိၼ်ၼၼ်ႉ ႁႂ်ႈၸႂ်ႉတိုဝ်းမူႇပိူင်ဢူၼ်ႈဢွၼ်ႇလႄႈ ဢုပ်ႇဢူဝ်းငူပ်ႉငီႉၵၼ်ၵႂႃႇ ၸဵမ်ၸိူဝ်းၼႆႉ။

ၾၢႆႇၼိုင်ႈၵေႃႈ ၼႂ်းႁၢင်လိူၼ်ဢေႃႊၵတ်ႊသ်ၼႆႉ ၸွမ်ၽွင်းလူင် မိူင်းဢိၼ်ႊတီႊယိူဝ်ႊ တေဢွၵ်ႇၶၢဝ်းတၢင်း ၵႂႃႇၶိုၼ်ႈပၢင်ၵုမ်တီႈမိူင်းၶႄႇ၊ ပဵၼ်ၵၢၼ်ဢွၵ်ႇၶၢဝ်းတၢင်းၵႂႃႇမိူင်းၶႄႇ ပွၵ်ႈၵမ်းႁႅၵ်ႈ ၼႂ်းၶၢဝ်းတၢင်း 7 ပီ။

ဝၢႆးသေ ၻူဝ်ႊၼေႃႊ ထရမ်ႉ ၶိုၼ်ႈမႃးပဵၼ်ၸွမ်ၸိုင်ႈ မိူင်းဢမေႊရိၵၼ်ႊ ၵမ်းထူၼ်ႈသွင်ၼႆႉ ၶဵင်ႈၶႅင်ၸႂ်ႉတိုဝ်းမူႇပိူင် ၵဵပ်းၶွၼ်ႇၼိူဝ်ၶူဝ်းၵုၼ်ႇ မိူင်းဢိၼ်ႊတီႊယိူဝ်ႊလႄႈ မိူင်းၶႄႇ ႁၢဝ်ႈႁႅင်း။ လွင်ႈၼႆႉ မိူၼ်ၵၼ် တင်းပၼ်ႁႅင်းဢီး ႁႂ်ႈမိူင်းၶႄႇတင်း ဢိၼ်ႊတီႊယိူဝ်ႊ တိူဝ်းၸမ်ၸႂ်ၵၼ်မႃးလိူဝ်သေၵဝ်ႇ။

ၵဵဝ်ႇလူၺ်ႈၵၢၼ်ဢွၵ်ႇၶၢဝ်းတၢင်းပွၵ်ႈၼႆႉသေ ႁွင်ႈၵၢၼ် ၽွင်းလူင်ၾၢႆႇၼွၵ်ႈမိူင်း မိူင်းၶႄႇတႄႉ ပိုၼ်ၽၢဝ်ႇဝႆႉဝႃႈ – တီႈၼႂ်းပၢင်ၵုမ်ၼၼ်ႉ လႆႈဢုပ်ႇပႃးလွင်ႈမိူင်းၶႄႇ တေၵေႃႇသၢင်ႈ ၾၢႆၾႆးၾႃႉ ၼႂ်းထုင်ႉတီႉပႅတ်ႉ (ၾၢႆဢၼ်ယႂ်ႇလိူဝ်ပိူၼ်ႈသုတ်း ၼႂ်းလုမ်ႈၾႃႉ)။ ၽူႈလူင်ႉလႅၼ်ႇၶဝ် ပၼ်ၾၢင်ႉဝႆႉဝႃႈ တေၸၢင်ႈတုမ်ႉတိူဝ်ႉ ၼိူဝ်ဝၢၼ်ႈမိူင်းၸိူဝ်းယူႇသဝ်းဝႆႉ ၾၢႆႇတႂ်ႈ ၾၢႆတင်းၼမ်။ ၵွပ်ႈၼၼ် ယူႇတီႈမိူင်းၶႄႇ လႆႈတူၵ်းလူင်း တႃႇတေၸႅၵ်ႇၽႄ ၽႅၼ်ၵၢၼ်တူၺ်းထိုင်လုမ်းလႃး သိင်ႇဝႅတ်ႉလွမ်ႉလႄႈ မႄႈၼမ်ႉၸိူဝ်းၼႆႉ ၸွမ်းၵၼ်တင်း မိူင်းဢိၼ်ႊတီႊယိူဝ်ႊ – သိုဝ်ႇၶၢဝ်ႇ Reuters ဢွၵ်ႇဝႆႉၼင်ႇၼႆ။