မိူဝ်ႈဝႃး ဝၼ်းတီႈ 14/05/2025 ယၢမ်းၵၢင်ၶမ်ႈ 9 မူင်း သိုၵ်းမၢၼ်ႈ ဢဝ်ၶိူင်ႈမိၼ် Jet Fighter သႅၼ်း 500 ပွၼ်ႊ မႃးပွႆႇလႄႈ တိူဝ်ႉသႂ်ႇၵူၼ်းပၢႆႈၽေးသိုၵ်း ဢၼ်မီးတီႈႁိမ်းဝၢၼ်ႈလဢိ ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း။

ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ 2 ၵမ်း ပွႆႇတူၵ်းသႂ်ႇ တၢင်းဝၢၼ်ႈလဢိ ဢွင်ႈတီႈၵူၼ်းပၢႆးၽေးသိုၵ်း “ပၢင်ၵွၵ်ႇ” ၊ ၵူၼ်းမၢတ်ႇၸဵပ်းလူႉတၢႆတႄႉ ပႆႇလႆႈႁူႉ၊ ဢွင်ႈတီႈပၢႆႈ ၽေးသိုၵ်းၼၼ်ႉ သိုၵ်းမၢၼ်ႈ ၵႆႉမႃးပွႆႇမၢၵ်ႇၼႃႇ ဢမ်ႇယွမ်း 2-3 ၵမ်းယဝ်ႉ”- ဝႃႈၼႆ။

ဢွင်ႈတီႈ ၵူၼ်းပၢႆးၽေးသိုၵ်းပၢင်ၵွၵ်ႇၼႆႉ ၵူၼ်းမိူင်းတၢင်းဝဵင်းၾၢႆၶုၼ်လႄႈ မိူင်းပၢႆး ပၢႆႈၽေးသိုၵ်း မႃးယူႇသဝ်းဝႆႉ။ ယၢမ်းလဵဝ် ပဵၼ်ပၢင်တိုၵ်း ၾၢႆႇတၢင်းဝဵင်းၾၢႆၶုၼ် မိူင်းပၢႆးဝႆႉလႄႈ ၵူၼ်းပၢႆႈၽေးသိုၵ်း ဢၼ်ယူႇသဝ်းဝႆႉႁိမ်းၸမ်ဝဵင်းၾၢႆၶုၼ် မိူင်းပၢႆးၼႆႉ လႆႈၾၢင်ႉသေယူႇသဝ်းဝႆႉ ဝႃႈၼႆ ။

ဢၼ်သိုၵ်းမၢၼ်ႈ ပွႆႇမၢၵ်ႇဢွင်ႈတီႈၵူၼ်းပၢႆႈၽေးသိုၵ်းပၢင်ၵွၵ်ႇၼႆႉ ပဵၼ်ပွၵ်ႈၵမ်း 3 ၊ ပီၵၢႆ 2024 ၽွင်း လိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 18 ၼၼ်ႉၵေႃႈ သိုၵ်းမၢၼ်ႈမႃးပွႆႇမၢၵ်ႇ တီႈပၢင်သဝ်း ၵူၼ်းပၢႆႈၽေးသိုၵ်း ပၢင်ၵွၵ်ႇ ၼၢင်းယိင်းဢႃယု 40 ၺႃးၸၢၵ်ႇမၢၵ်ႇလူႉတၢႆ ။ ၼႂ်းလိူၼ်သႅပ်ႊထႅမ်ႊပိူဝ်ႊ ဝၼ်းတီႈ 5 ၼၼ်ႉၵေႃႈ သိုၵ်းမၢၼ်ႈ မႃးပွႆႇမၢၵ်ႇဢွင်ႈတီႈ ၵူၼ်းပၢႆႈၽေးသိုၵ်းပၢင်ၵွၵ်ႇ လုၵ်ႈဢွၼ်ႇလႄႈ ၼၢင်းယိင်းလူႉတၢႆမွၵ်ႈ 10 ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၸႄႈဝဵင်းမိူင်းပၢႆး၊ ၾၢႆၶုၼ်လႄႈ ၸွမ်းလႅၼ်လိၼ်တႆး – ယၢင်းလႅင် ၼႂ်းၸႄႈဝဵင်းလွႆၶေႃ သိုၵ်းမၢၼ်ႈယိုတ်းမိူင်းတင်း သိုၵ်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ၸွမ်းထုင်ႉသၼ်လွႆ။ ယၢမ်းလဵဝ် ၾၢႆႇတၢင်းသိုၵ်းမၢၼ်ႈ ထူဝ်းသိုၵ်းၶဝ်ႈမႃးလႄႈ ပၢင်တိုၵ်းသိုပ်ႇပဵၼ်ႁၢဝ်ႈႁႅင်း။

ၽူႈမီးပုၼ်ႈၽွၼ်း ၸုမ်း SSNDF/ KNDF လၢတ်ႈၽူႈတွႆႇႁွၵ်ႈဝႃႈ – “ပိူင်လူင်မၼ်းတႄႉ ပေႃးဢဝ်ပိဝ်ႇႁႃႇ ၶဝ်တူၺ်းတႄႉ ၶဝ်ၶႂ်ႈသိမ်းဢဝ်ၶိုၼ်း တၢင်းဝဵင်းပၢင်လွင်း ၊ ၾၢႆၶုၼ် ၊ မိူင်းပၢႆး ၊ လွႆၶေႃ သဵၼ်ႈတၢင်းလူင်ၼၼ်ႉ။ ယဝ်ႉၵေႃႈ ယၢင်းလႅင်လွႆၶေႃၼႆႉ လွင်ႈယႂ်ႇတွၼ်ႈတႃႇပၢင်လိူၵ်ႈတင်ႈသိုၵ်းမၢၼ်ႈ”- ဝႃႈၼႆ။

တႄႇႁူဝ်လိူၼ်မေႊၼႆႉမႃး သိုၵ်းမၢၼ်ႈဢဝ် ဢဵၼ်ႁႅင်းသိုၵ်းပျီႇတူႉၸိတ်ႉပဢူဝ်း PNO သေ ဢဝ်ငႃးသိုၵ်း 6 သၢႆ ထူဝ်းသိုၵ်းၶဝ်ႈၼႂ်းတၢင်းဝဵင်းယွင်ႁူၺ်ႈ ၊ ဝၢၼ်ႈၸၢင်ႉ မႃးႁၢဝ်ႈႁႅင်းၼႆ မၼ်းၸၢႆးသိုပ်ႇလၢတ်ႈထႅင်ႈ ၼင်ႇၼႆ။   

သိုၵ်းမၢၼ်ႈလႄႈ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ပိုတ်းယိုဝ်းတိုၵ်းတေႃးၵၼ် တီႈဝဵင်း မိူင်းပၢႆးႁၢဝ်ႈႁႅင်း တႄႇၸဵမ်သိုၵ်းမၢၼ်ႈယိုတ်းမိူင်းၽွင်း ပီ 2021 မႃး ။ ပီ 2023 သိုၵ်းယၢင်းလႅင် ပိုတ်းယိုဝ်း တပ်ႉသိုၵ်းမၢၼ်ႈသေ ယိုတ်းလႆႈ မိူၼ်ၼင်ႇ – ဝၢၼ်ႈဝႃႇရီႇသူးၽလၢႆႇ၊ ၻူင်းတူးထၢၼ်ႇ၊ ပွႆးၵူင်း 3 ၊ ပွႆးၵူင်း 1 ၊ ၺွင်ႇဝႅင်း၊ ပီႇၵိၼ်းၵေႃးၶူႇ၊ သွင်ႇ ၵၢၼ်း၊ သီႇၵႃး၊ ၵုင်းပိဝ်ႇႁႃႇ ၸိူဝ်းၼႆႉသေတႃႉ ဢမ်ႇယိုတ်းလႆႈပႃး တပ်ႉၶမယ 422 ။ ယွၼ်ႉၼၼ်ယၢမ်းလဵဝ် ၾၢႆႇတၢင်းသိုၵ်းမၢၼ်ႈ ထႅမ်ႁႅင်းသိုၵ်းလေႃႇတိုၵ်း တႃႇတေယိုတ်း ဢဝ်လႆႈၶိုၼ်း ဝဵင်းမိူင်းပၢႆး ပၢင်တိုၵ်းသိုပ်ႇပဵၼ်ႁၢဝ်ႈႁႅင်းဝႆႉ ဝႃႈၼႆ။