သိုၵ်းမၢၼ်ႈ ၸႂ်ႉၵူၼ်းဝၢၼ်ႈၼွင်တွင်း ဢိူင်ႇလူင်ၶူၵ်ႉ(လုံခုတ်) ၸႄႈဝဵင်းႁူဝ်ပူင်း ၶၢႆႉပၢႆႈတႃႇလင်ႁိူၼ်း 200 ပၢႆ ၼႄးဝႃႈပူၼ်ႉပႅၼ်ၶဝ်ႈမႃးယူႇၼႂ်းတီႈလိၼ်တပ်ႉ 560 ဢေႊၶိူဝ်ႊ ဝႃႈၼႆ။

ဝၼ်းတီႈ 26/04/2025 ပူၼ်ႉမႃးၼႆႉ ႁွင်ႈၵၢၼ် ၾၢႆႇၽွင်းငမ်း ဝဵင်းႁူဝ်ပူင်း ဢွၵ်ႇလိၵ်ႈပိုၼ်ၽၢဝ်ႇ ႁႂ်ႈၵူၼ်းဝၢၼ်ႈၼွင်တွင်း ၶၢႆႉတီႈယူႇ ႁႂ်ႈယဝ်ႉၼႂ်းၶၢဝ်းတၢင်း 15 ဝၼ်း ဝႃႈၼႆ။ 

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ -“လိၵ်ႈဢၼ်သိုၵ်းမၢၼ်ႈ ပိုၼ်ဢွၵ်ႇမႃးတလဵဝ်ၼႆႉ ပဵၼ်ပွၵ်ႈၵမ်း 3 ၊ လင်ႁိူၼ်းဢၼ်တေလႆႈၶၢႆႉပႃး 200 လင်၊ တလဵဝ် ၵူၼ်းဝၢၼ်ႈ ဢွၼ်ၵၼ်တႅမ်ႈ ၽိုၼ်လိၵ်ႈယိုၼ်ႈ ယွၼ်းတီႈၽွင်းလူင်၊ မၢင်ၸိူဝ်းၵေႃႈ တေပႂ်ႉတူၺ်းၵွၼ်ႇၼႆ ၾၢႆႇတၢင်းသိုၵ်းမၢၼ်ႈတႄႉ ၸႂ်ႉၶၢႆႉယူႇယဝ်ႉ”- ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ ၼႃႈလိၼ်ဢၼ်မီးႁိမ်းၵျွင်းမုၼ်ၸဝ်ႈၼွင်တွင်း ၸိူဝ်းပဵၼ်လွၵ်းလိၼ်ပဝ်ႇ၊ လိၼ်ၸိူဝ်းလွမ်ႉႁူဝ်ႉဝႆႉ၊ လိၼ်ၸိူဝ်းႁဵတ်းႁိူၼ်းဝႆႉ ၸိူဝ်းၼႆႉ။ သိုၵ်းမၢၼ်ႈၼႄးဝႃႈ ပဵၼ်ၼႂ်းလိၼ်တပ်ႉသိုၵ်း 561.75 ဢေႊၶိူဝ်ႊ။ ၵွပ်ႈၼၼ်လႄႈ ႁႂ်ႈၶၢႆႉပၼ်ႁႂ်ႈယဝ်ႉ ၼႂ်းၶၢဝ်းတၢင်း 15 ဝၼ်း ဝႃႈၼႆ။  

ၼႂ်းၼၼ်ႉ ယွၼ်ႉဝႃႈပႃးႁိူၼ်းယေးၵူၼ်းဝၢၼ်ႈ ဢၼ်သၢင်ႈသေယူႇသဝ်းမႃးပီယၢဝ်းၶၢဝ်းႁိုင်ယဝ်ႉလႄႈ ၵိုင်ႉၵၢင်ႉမႃးၸႂ်ႉၶၢႆႉၸိူင်ႉၼႆ ပဵၼ်ဢၼ်ယၢပ်ႇၽိုတ်ႇတႄႉတႄႉ ဝႃႈၼႆ။

“ၼင်လိၼ်ႁိမ်းဝၢၼ်ႈႁဝ်းၶႃႈၼႆႉ ပဵၼ်တီႈလိၼ်ၵျွင်းမုၼ်ၸဝ်ႈ။ ဢၼ်သိုၵ်းမၢၼ်ႈ ၸႂ်ႉၶၢႆႉပၢႆႈပၼ်ၼႆႉ ပႃးတင်းၵျွင်းမုၼ်ၸဝ်ႈၼၼ်ႉယဝ်ႉၶႃႈ။ ႁဝ်းၶႃႈၼႆႉ ယူႇသဝ်းမႃးတီႈဝၢၼ်ႈၼႆႉ လၢႆသိပ်းပီယဝ်ႉ။ ဝၢၼ်ႈႁဝ်းၶႃႈၼႆႉ ဢမ်ႇပေႃးၵႆဝဵင်းၵႃႈႁိုဝ်။ ယူႇၼိူဝ်သဵၼ်ႈတၢင်းလူင် ထုင်ႉပဵင်းဢွၼ်ႇလႄႈ ဝဵင်းႁူဝ်ပူင်း”– ၵူၼ်းပိုၼ်ႉတီႈလၢတ်ႈ။

ယၢမ်းလဵဝ် ပဵၼ်ၶၢဝ်းသိုၵ်းမၢၼ်ႈယိပ်းၵွင်ႈ ၽွင်းငမ်းဝၢၼ်ႈမိူင်းဝႆႉလႄႈ ဢဝ်ၸႂ်ၶဝ်ပေႉၵိၼ်တဵၵ်းတဵင် ပုၼ်ႉပႅၼ်သုၼ်ႇလႆႈၵူၼ်းမိူင်းၵႃႈဝႃႈၵႃႈပဵၼ်။ တီႉၺွပ်းၵုမ်းၶင်ၵူၼ်းမိူင်းၸိူဝ်းတူင်ႉၼိုင် ၼႂ်းဝၢၼ်ႈၼႂ်း ၶူင်ႇမႃးဢမ်ႇထၢတ်ႇ။ ၸုမ်းၸွႆႈထႅမ်လွင်ႈသုၼ်ႇလႆႈသုၼ်ႇပဵၼ်၊ လွင်ႈၸဝ်ႈႁႆႈၸဝ်ႈၼႃး ၸိူဝ်းၼႆႉၵေႃႈ ဢမ်ႇၸၢင်ႈတူင်ႉၼိုင်ႁဵတ်းၵၢၼ်။ ၵွပ်ႈၼႆ ၵူၼ်းမိူင်းၵေႃႈ ဢမ်ႇၸၢင်ႈပိုင်ႈဢိင်ၸႂ်ယႂ်ႇၽႂ်ၸုမ်းလႂ်။

ၵွပ်ႈၼႆ ၼင်ႇႁိုဝ်တေဢမ်ႇလႆႈသုမ်းငိုၼ်း၊ သုမ်းတီႈလိၼ်ၼၼ်ႉ မိူဝ်ႈၽွင်းတေသိုဝ်ႉတီႈလိၼ် ၸိူဝ်းၼႆႉ ထုၵ်ႇလီလဵပ်ႈႁဵၼ်း ၸွပ်ႇထၢမ်ထတ်းသၢင်တူၺ်း လွင်ႈပိုၼ်းပဵၼ်မႃး တီႈလိၼ်ၼၼ်ႉ လီလီၵွၼ်ႇၼႆ – ၽူႈတၢင်ႇၼႃႈ ၵေႃႉၼိုင်ႈ ပၼ်ၾၢင်ႉဝႆႉၼင်ႇၼႆ။

ၽူႈတၢင်ႇၼႃႈ ဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“ႁိူၼ်းဢၼ် ၾၢႆႇသိုၵ်းမၢၼ်ႈၶဝ်ၸႂ်ႉယႃႉၼႆႉ ပဵၼ်ႁိူၼ်းတိူၵ်ႈယႂ်ႇတိူၵ်ႈလူင်လၢႆလၢႆ ၊ မၢင်ၸိူဝ်းပဵၼ် ႁိူၼ်းတိူၵ်ႈ 3 ၸၼ်ႉၸိူဝ်းၼႆႉ၊ လီသေးလၢႆၼႃႇ ယွၼ်ႉၼၼ် ပေႃးတေႁဵတ်းႁိူၼ်းၼႆ လူဝ်တိူင်ႇပၢင်ၵၼ်တၢင်းၽူႈတၢင်ႇၼႃႈ ၵိုင်ႇလီႁဵတ်းၸိူင်ႉႁိုဝ်ၼႆၸိူဝ်းၼႆႉ”- ဝႃႈၼႆ။

သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃး ၶၢဝ်းတၢင်း 4 ပီပၢႆၼႆႉ တီႈလိၼ်ၵူၼ်းမိူင်း ဢၼ်ထုၵ်ႇသိုၵ်းမၢၼ်ႈ ယိုတ်းဢဝ်လၢႆၼႆႉ မီးမႃးလၢႆတီႈယဝ်ႉ။ မိူၼ်ၼင်ႇ မိူဝ်ႈဝၼ်းတီႈ 21 လိူၼ်မၢတ်ႊၶျ် ပီ 2025 ၼႆႉၵေႃႈ တီႈလိၼ်ၵူၼ်းမိူင်း ၼႂ်းဝၢၼ်ႈႁူၵ်းလၵ်းလႄႈ ႁိမ်းၸၼ်ႉၸွမ်ပုတ်ႉထ ၼႂ်းၸႄႈဝဵင်းတူၼ်ႈတီး ၸိူဝ်းၼႆႉၵေႃႈ ထုၵ်ႇယိုတ်းၵႂႃႇၽွင်ႈ။ ၵမ်ႈၽွင်ႈ ယင်းၺႃးတူတ်ႈတၢမ်ႇမႂ်ငိုၼ်း ၸိူဝ်းၼႆႉထႅင်ႈလူးၵွၼ်ႇ။