မိူဝ်ႈဝၼ်းတီႈ 13/05/2025 ယၢမ်းတၢမ်းၶမ်ႈ 9 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ပွႆႇမၢၵ်ႇလူင် ႁႅင်း 500 ပွၼ်ႊ ပွႆႇသႂ်ႇတီႈပွၵ်ႉၵၢတ်ႇ ၾၢႆႇဢွၵ်ႇၵၢတ်ႇလူင် ၼႂ်းၵၢင်ဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ၾၢႆႇႁွင်ႈၵၢၼ် ပိုၼ်ၽၢဝ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ဢွၵ်ႇဝႆႉဝႃႈ – ယွၼ်ႉသိုၵ်းမၢၼ်ႈ မႃးပွႆႇမၢၵ်ႇၵႂႃႇသေ ႁိူၼ်းၵူၼ်းလူႉၵွႆၵႂႃႇ 7 လင် – ဝႃႈၼႆ။

ၵူၼ်းမိူင်းပိုၼ်ႉတီႈ ဝဵင်းၼွင်ၶဵဝ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸွမ်းၼႂ်းပွၵ်ႉၵၢတ်ႇၸိူဝ်းၼၼ်ႉ မၼ်းပဵၼ် ဢွင်ႈတီႈၸိူဝ်းသိုၵ်းလွႆၶဝ်ယူႇသဝ်းဝႆႉၸူဝ်ႈၵႅပ်ႉ၊ ပဵၼ်ဢွင်ႈတီႈဢၼ်မီးလုမ်း ၵဝ်ႇသိုၵ်းမၢၼ်ႈၶဝ်ၼမ်”- ဝႃႈၼႆ။

ၼႂ်းၶိုၼ်းလဵဝ်ၵၼ်ၵူၺ်းၼင်ႇၵဝ်ႇ ယၢမ်းၵၢင်ၶမ်ႈမွၵ်ႈ 12 မူင်းၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် တိုၵ်း ပွႆႇမၢၵ်ႇသႂ်ႇတီႈႁိမ်းသူၺ်ႇလဵၵ်ႉပျႃႇ ဝဵင်းမိူင်းၵုတ်ႈထႅင်ႈ။ လွင်ႈၵူၼ်းမိူင်းမၢတ်ႇၸဵပ်းလူႉတၢႆ လႄႈ ႁိူၼ်းယေး လူႉၵွႆ ၸိူဝ်းၼႆႉတႄႉ တၢင်းၾၢႆႇသိုၵ်းတဢၢင်းၶဝ် ယင်းပႆႇပိုၼ်ၽၢဝ်ႇဢွၵ်ႇမႃး သင်။

လႆႈႁူႉဝႃႈ ၼႂ်းၸႄႈဝဵင်းၼွင်ၶဵဝ်ၼႆႉ ယင်းတိုၵ်ႉလႆႈငိၼ်းသဵင်ၵွင်ႈသဵင်မၢၵ်ႇထတ်းၵၼ် ယူႇၵူႈဝၼ်းသေတႃႉ သိုၵ်းမၢၼ်ႈလႄႈ သိုၵ်းတဢၢင်း တင်းသွင်ၸုမ်းၼႆႉ ၽႂ်ၵေႃႈယင်းပႆႇႁုပ်ႈယိုတ်း ဢဝ်လႆႈ တပ်ႉပၢင်သဝ်းမႂ်ႇထႅင်ႈ။

ၽွင်းပၢင်တိုၵ်းၼႆႉ သိုၵ်းမၢၼ်ႈ ၸႂ်ႉၶိူင်ႈၵွင်ႈလူင်၊ ၶိူင်ႈတရူၼ်ႊ၊ ၶိူင်ႈမိၼ်ၸိူဝ်းၼႆႉ တိုၵ်းမႃးႁၢဝ်ႈႁႅင်းလိူဝ်ၵဝ်ႇ ဝႃႈၼႆ။

ၼႂ်းၼႃႈတီႈသိုၵ်းတဢၢင်း TNLA ၵုမ်းၵမ်ဝႆႉတင်းသဵင်ႈၼႆႉ ယွၼ်ႉဢမ်ႇၸႂ်ႉတိုဝ်းလႆႈ လႅင်းၾူၼ်း လႄႈ လႆႈပိုင်ႈဢိင် ၸႂ်ႉတိုဝ်း StarLink ၵူၺ်း ယင်းတိုၵ်ႉမီးလွင်ႈယၢပ်ႇၽိုတ်ႇ တႃႇၵၢၼ်ၵပ်းသိုပ်ႇ တိတ်းတေႃႇၵၼ်ယူႇ။ မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 12/05/2025 ယၢမ်းၵၢင်ၶမ်ႈ ၼၼ်ႉၵေႃႈ သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ တီႈဝဵင်းမၢၼ်ႈတူင်ႈလႄႈ ဝဵင်းမိူင်းငေႃႉသေ ႁဵတ်းႁႂ်ႈ ၵူၼ်းမိူင်းလူႉတၢႆၵႂႃႇ 1 ၵေႃႉ မၢတ်ႇၸဵပ်း 3 ၵေႃႉ။ ႁိူၼ်းယေးၵူၼ်းမိူင်းလူႉၵွႆ 27 လင် ၼႆယဝ်ႉ။

တႅမ်ႈ – ၽူၺ်းၼုမ်ႇ