ၶမ်ႈၶိုၼ်းလိုၵ်းယဵၼ် ၽွင်းၵူၼ်းလပ်းမွႆႈၼွၼ်းဝၢၼ် ပႃႈၼၢင်းၵေႃႉၼိုင်ႈ  ဢမ်ႇၸၢင်ႈလပ်း ၸၢင်ႈၼွၼ်း ။ တေဝႃႈ  ယွၼ်ႉပၢႆးယူႇလီၵေႃႈဢမ်ႇၸႂ်ႈ၊ ယွၼ်ႉငဝ်းလၢႆးပၢင်တိုၵ်းသိုၵ်းသိူဝ် ၼႆၵေႃႈဢမ်ႇၸႂ်ႈ ယွၼ်ႉဝႃႈ မိူင်းတႆးပွတ်းၸၢၼ်းၼႆႉဢမ်ႇမီးပၢင်တိုၵ်းဢၼ်ထိုင်တီႈလႆႈၵူဝ် ၶိူင်ႈမိၼ်မႃးပွႆႇမၢၵ်ႇ။ ပဵၼ်ယွၼ်ႉ ပႃႈၼၢင်း ၵပ်းသိုပ်ႇၽူၼ်ႊတေႃႇၸူးလုၵ်ႈယိင်း ဢမ်ႇလႆႈလႄႈ ၼႂ်းၸႂ်ၼႆႉမႆႈမိူၼ်ၼင်ႇၾႆး။  ၼွၼ်းဢမ်ႇလပ်း တေလုၵ်ႉဢမ်ႇၸၢင်ႈ တေယၢင်ႈဢမ်ႇထုၵ်ႇ။ ၶွင်ပိူဝ်ႈလုၵ်ႈယိင်းပႃႈၼၢင်း ၸိုဝ်ႈႁွင်ႉ ၼၢင်းဢေးၼွင်ႉ ဢႃယု တိုၵ်ႉလႆႈ  18 ပီ  ပီၼႆႉၵူၺ်း။

ၵူႈၵေႃႉထၢင်ႇဝႃႈ  ၼၢင်းဢေးၼွင်ႉ ၺႃးတီႉႁႃႉၼႆယူႇပဵၼ်ၵမ်း။ တီႈတႄႉမၼ်း   ၼၢင်းဢေးၼွင်ႉ ဢမ်ႇၺႃးတီႉ။ ဝၼ်းတီႈ 1/4/2025 ၼႆႉပဵၼ်ဝၼ်းၵိူတ်ႇမၼ်းၼၢင်းလႄႈ မၼ်းၼၢင်း ၵႂႃႇၵိၼ်ၵျေႃႇမူၼ်ႈ သိူဝ်း ၸွမ်းဢူၺ်းၵေႃႉမၼ်း တီႈႁၢၼ်ႉ KTV ထႅဝ်ၼွၵ်ႈဝဵင်း။    မၼ်းၼၢင်း ဢွၵ်ႇႁိူၼ်း ၵႂႃႇၸဵမ်မိူဝ်ႈႁူဝ်ၶမ်ႈ။ တေႃႇထိုင် တဵင်ႈၶိုၼ်းၸၢႆႉသေ ယၢမ်းၵၢင်ၼႂ်ၸဝ်ႉ 1 မူင်းၵေႃႈယင်းပႆႇ ပွၵ်ႈႁိူၼ်းၶိုၼ်း။ ၵေႃႉပဵၼ်မႄႈ သိုပ်ႇၾူၼ်ႊၸူးၵေႃႈဢမ်ႇႁပ်ႉလႄႈႁဵတ်းႁႂ်ႈ ပႃႈၼၢင်းမႆႈၸႂ် မႃးၼင်ႈပႂ်ႉယူႇတီႈၽၵ်းတူႁိူၼ်းၶဝ်။

ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းႁၢၼ်ႉ ၵိၼ် ၵျေႃႇ KTV  လိူင်ႇၼမ်မႃးႁႅင်။ ဢွၼ်ၵၼ်ပိုတ်ႇ  တင်းဝၼ်းတင်းၶိုၼ်း ၊ မၢင်ႁၢၼ်ႉပိုတ်ႇ 24 ၸူဝ်ႈမူင်း။  ပေႃးမီးငိုၼ်းယဵတ်ႈမွၼ်တီႈၸဝ်ႈၼႃႈတီႈ တင်းၾၢႆႇသိုၵ်းမၢၼ်ႈလႄႈ တင်းၾၢႆႇၸုမ်းယိပ်းၵွင်ႈ ၼႂ်းပိုၼ်ႉတီႈတႄႉ ပိုၼ်ႇလႆႈလွတ်ႈလွတ်ႈလႅဝ်းလႅဝ်း။ ဢမ်ႇဝူၼ်ႉထိုင်ၵၢင်ၸႂ်ၽႂ်ၽူႈလႂ်၊  ၼႂ်းၶၢဝ်းတၢင်း 2-3 ပီမႃးၼႆႉၵူၺ်း တီႈဝဵင်းၼမ်ႉၸၢင် ႁၢၼ်ႉ KTV မီးမွၵ်ႈ 30 ႁၢၼ်ႉယဝ်ႉ – ပႃႈၼၢင်း လၢတ်ႈၼႄလူၺ်ႈတၢင်းမႆႈၸႂ်ယႂ်ႇၼမ်။

“ၼႂ်းပီ သွင်ပီၼႆႉ ပေႃးႁူဝ်ၶမ်ႈမႃး ၼႂ်းဝဵင်းၼႆႉ ဢမ်ႇမီးၵူၼ်းၵႂႃႇမႃး သမ်ႉပေႃးယဵၼ်သႅပ်ႉယဵၼ်သွႆလူင်ဝႆႉ။ ပေႃးဢမ်ႇႁူႉတႄႉတေထၢင်ႇဝႃႈ ပဵၼ်ယွၼ်ႉငဝ်းလၢႆးဝၢၼ်ႈမိူင်းဢမ်ႇလီလႄႈ ပိူၼ်ႈဢမ်ႇႁတ်းဢွၵ်ႇႁိူၼ်း ဢွၵ်ႇယေးယူဝ်ႉၼႆ။ တီႈတႄႉမၼ်း ႁၢၼ်ႉၶေႇထီႇဝီႇ ၵႂႃႇမီးတၢင်းၼွၵ်ႈဝဵင်း။ လုၵ်ႈဢွၼ်ႇၵူၼ်းၼုမ်ႇ ၸဵမ်ယိင်းၸဵမ်ၸၢႆး ၵႂႃႇမီးၼၼ်ႉမူတ်း။ ၵူၼ်းသႅၼ်းပၢၼ်ၵၢင် သမ်ႉၵႂႃႇၶၢႆတၢင်းၵိၼ်တၢင်းယမ်ႉ ။ ၵႂႃႇၵူၼ်းၵိုၼ်းငိုၼ်းၶွၼ်ႈလူင်ယူႇတီႈပုၼ်ႉမူတ်းယဝ်ႉ”  – ဝႃႈၼႆ။

ႁၢၼ်ႉမူၼ်ႈသိူဝ်း KTV ၼွၵ်ႈဝဵင်းၼၼ်ႉၵေႃႈ ပေႃးၵႂႃႇၵိၼ်ၵႂႃႇၵျေႃႇၼိုင်ႈၶမ်ႈၼႆႉ သဵင်ႈငိုၼ်းၼမ်။ဢိင်ၼိူဝ်ႁွင်ႈယႂ်ႇႁွင်ႈလဵၵ်ႉ သႅၼ်းၶႅမ်ႉ ဢမ်ႇၶႅမ်ႉသေ ၵႃႈၶၼ်ၵေႃႈဢမ်ႇပဵင်းၵၼ်။ ယိင်ႈၵိၼ်ၼမ်ၵႃႈႁိုဝ်ၵေႃႈ သဵင်ႈၵႃႈယႂ်ႇၶႃႈၼၼ်ႉ- ၼၢင်းယိင်းၵူၼ်းမိူင်းဝဵင်းၼမ်ႉၸၢင် ဢႃယုမွၵ်ႈ 30 ပီလၢတ်ႈၼင်ႇၼႆ။

 “ပေႃးၵႂႃႇႁၢၼ်ႉ KTV ၼႆႉ  ၼိုင်ႈၶိုၼ်းသဵင်ႈ 40-50 သႅၼ် ၊မီးႁွင်ႈ  3D – 5D ၊ႁွင်ႈလဵၵ်ႉ ႁွင်ႈယႂ်ႇ ၼႆၸႅၵ်ႇဝႆႉၸိူင်ႉၼႆ။ ၵႃႈႁွင်ႈလၢႆလၢႆၵူၺ်းပႆႇပႃးတၢင်းၵိၼ်ၼႆႉ တေတူၵ်း 8 သႅၼ်ထိုင် 16 သႅၼ်ပျႃးၸိူဝ်းၼႆႉ။ ႁွင်ႈၶႅမ်ႉႁွင်ႈယႂ်ႇၼႂ်းဝဵင်းၼမ်ႉၸၢင်ၼႆႉမီး 4-5 ႁွင်ႈဢေႃႈ။ ႁွင်ႈလဵၵ်ႉတႄႉ မီးယူႇ 30 ပၢႆဢေႃႈတင်းဝဵင်း။ ႁွင်ႈလဵၼ်ႈၵဵမ်း တေႃႇလွင်းၸိူဝ်းၼႆႉ မီး 2 ဢၼ်ဢေႃႈ” 

 ၵူၼ်းၼုမ်ႇသႅၼ်းပၢႆမႂ်ႇ လုၵ်ႈႁဵၼ်းႁူင်းႁဵၼ်းၸၼ်ႉၵၢင် ၸၼ်ႉသုင်ၸိူဝ်းၼႆႉ ႁူမ်ႈၵၼ်သေၵႂႃႇၵိၼ်ၵႂႃႇမူၼ်ႈ ၵႂႃႇႁွင်ႉၵႂၢမ်း ပဵၼ်မူႇပဵၼ်ၾုင်။  ပေႃးပဵၼ်လုၵ်ႈဢွၼ်ႇသႅၼ်းၵေႃႉလဵၵ်ႉတႄႉ ၵႂႃႇတီႈႁွင်ႈလဵၼ်ႈၵဵမ်းၵမ်ႈၼမ်။ ႁဵတ်းႁႂ်ႈတၢင်းယၢမ်ႈလုၵ်ႈဢွၼ်ႇလူႉ။ ပေႃးလဵၼ်ႈသုမ်းမႃး ပႃးမႃးၶူဝ်းၶွင်မီးၵႃႈၶၼ်သင်ၵေႃႈၵဵပ်းၶၢႆမူတ်း လုၵ်ႈႁဵၼ်းၸၼ်ႉသုင်ၵေႃႉၼိုင်ႈ လၢတ်ႈၼေၽူႈတွႆႇႁွၵ်ႈၼင်ႇၼႆ။

“ ႁၢင်လိူၼ်မၢတ်ႉၶျ်ပူၼ်ႉမႃး မီးလုၵ်ႈဢွၼ်ႇၸၢႆးၵေႃႉၼိုင်ႈ ႁၢႆၵႂႃႇ 3 ဝၼ်း ။ ၽိူဝ်ႇပေႃႈမႄႈၵႂႃႇလမ်းႁႃမၼ်း ၵႂႃႇႁၼ်တီႈ သႅင်ႇလဵၼ်ႈၵဵမ်း ဢၼ်မီးၼႂ်းပွၵ်ႉ 4 ၼၼ်ႉ။ မၼ်းလဵၼ်ႈၵဵမ်းသုမ်းလႄႈ ရူတ်ႉမၼ်း ၾူၼ်ႊမၼ်း ၵဵပ်းၶၢႆမူတ်း။ တူဝ်မၼ်းၵေႃႈ ႁိပ်ႈၼႅတ်ႈလဵၼ်ႈၵဵမ်း တင်းၶိုၼ်းတင်းဝၼ်း ဢမ်ႇလပ်းဢမ်ႇၼွၼ်း ။ မုင်ႈမွင်းတေပေႉၶိုၼ်းၼၼ်ႉၼႃႇ”

  ပေႃးပဵၼ်လုၵ်ႈဢွၼ်ႇၸၢႆးသမ်ႉၵႂႃႇတီႈႁူင်းလဵၼ်ႈၵဵမ်း၊ ပေႃးပဵၼ်လုၵ်ႈဢွၼ်ႇယိင်း 13-14 ၶိုၼ်ႈၼိူဝ်သမ်ႉၵႂႃႇႁဵတ်းၵၢၼ်တီႈႁၢၼ်ႉ KTV ယွၼ်ႉပိူဝ်ႈလႆႈငိုၼ်းငၢႆႈလႄႈလႆႈငိုၼ်းၼမ်။

ယွၼ်ႉငဝ်းလၢႆးဝၢၼ်ႈမိူင်းဢမ်ႇလီ ၊ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်လႄႈ လုၵ်ႈဢွၼ်ႇယိင်းသႅၼ်းပၢၼ်လုၵ်ႈႁဵၼ်းတီႈႁူင်းႁဵၼ်းၸၼ်ႉသုင် ဢမ်ႇၵႃးၼႂ်းဝဵင်းၼမ်ႉၸၢင်ၵူၺ်း ၊ လုၵ်ႈဢွၼ်ႇယိင်းတီႈဝၢၼ်ႈႁၢႆးၽၵ်း ဝဵင်းမိူင်းၼၢႆးၵေႃႈ မႃးႁဵတ်းၵၢၼ်တီႈႁၢၼ်ႉ   KTV တီႈဝဵင်းၼမ်ႉၸၢင်ၵေႃႈမီး  ။ ၼၢင်းသႅင်   ၵူၼ်းမိူင်းဝဵင်းၼမ်ႉၸၢင် လၢတ်ႈၼင်ႇၼႆ။

“လုၵ်ႈဢွၼ်ႇယိင်းဢၼ်ၵႂႃႇႁဵတ်းၵၢၼ်တီႈ KTV ၸိူဝ်းၼႆႉ ၵေႃႉလဵၵ်ႉၵေႃႉလွၵ်ႉ ႁၢင်ႈလီႁၢင်ႈငၢမ်းလၢႆလၢႆ ၊   ဢႃယုၵေႃႈ 16-17 ၸိူဝ်းၼႆႉၵူၺ်း ၊   ဢႃယု ပႆႇတဵမ် 18  တင်းၼမ် ၊ လီသေးလၢႆၼႃႇ”  ။

ပီႈၸၢႆးၸၢႆး ၸဝ်ႈပၢႆးမၢၵ်ႈမီး ၵူၼ်းမိူင်းဝဵင်းၼမ်ႉၸၢင်ၵေႃႉၼိုင်ႈ ၵေႃႈလၢတ်ႈဝႃႈ –“ ယွၼ်ႉသင်ၼႆ ၶဝ်တေလႆႈငိုၼ်းလိူင်ႇ ၊ ၶဝ်ဢမ်ႇဝူၼ်ႉမိူဝ်းၼႃႈၶၢဝ်းယၢဝ်း။ ၶဝ်ဝူၼ်ႉတႃႇလႆႈငိုၼ်း ဢၼ်လူဝ်ႇၵိၼ်လူဝ်ႇၸၢႆႇယူႇယၢမ်းလဵဝ်ၼႆႉၵူၺ်း။  တႃႇႁႂ်ႈလႆႈၸၢႆႇလိူင်ႇၼၼ်ႉၵူၺ်း ၊ ပေႃးဢမ်ႇမီးငိုၼ်းၶဝ်ႈ ၊ ၵၢၼ်ငၢၼ်းဢမ်ႇလီၼႆႉ ငၢႆႈလၢႆးလႂ်ၵေႃႈ ၶဝ်သူင်ႇႁဵတ်းဢၼ်ၼႆႉၵူၺ်း ၊ ယွၼ်ႉသင်ၼႆ ၼိုင်ႈလိူၼ် ငိုၼ်းလိူၼ်ၶဝ် မီးၸမ် 10 သႅၼ် ယဝ်ႉ”– ဝႃႈၼႆ ။

လုၵ်ႈဢွၼ်ႇယိင်း ဢၼ်ၵႂႃႇႁဵတ်းၵၢၼ်တီႈ ႁၢၼ်ႉKTV ၼႆႉ လႆႈငိုၼ်းလိူၼ် ၼိုင်ႈလိူၼ် 5 – 6 သႅၼ်ပျႃး။ ပေႃးႁဵတ်းၵေႃႉၶႅၵ်ႇၼႆ တီႈၵႄႇသုတ်း 1 ၸူဝ်ႈမူင်း လႆႈငိုၼ်းထႅင်ႈ 5- 6 မိုၼ်ႇပျႃး။ ပေႃးႁွင်ႉႁူၺ်းလႆႈဢူၺ်းၵေႃႉဢူၺ်းသႄႈ ဢၼ်မီးႁၢင်ႈမီးၾၢင်၊ မေႃလၢတ်ႈမေႃဢုပ်ႇ ၸိုင် လႆႈငိုၼ်းသူးထႅင်ႈလူးၵွၼ်ႇ – ၼႆ ၼၢင်းသႅင် လၢတ်ႈၼေထႅင်ႈၼင်ႇၼႆ။

ၼၢင်းယိင်းတႆး ဢၼ်တူင်ႉၼိုင်သုၼ်ႇလႆႈသုၼ်ႇပဵၼ်ၵူၼ်းၼုမ်ႇ​​ၵေႃႉၼိုင်ႈ ၵေႃႈလၢတ်ႈၽူႈတွႆႇႁွၵ်ႈဝႃႈ- ႁူႉယူႇဝႃႈဢမ်ႇၸႂ်ႈတီႈဢၼ်မီးလွင်ႈႁူမ်ႇလူမ်ႈ ၊ ႁူႉယူႇဝႃႈပဵၼ်တီႈဢမ်ႇလွတ်ႈၽေးၵေႃႈ  လုၵ်ႈဢွၼ်ႇယိင်း ၊ၼၢင်းယိင်း  ဢမ်ႇမီးတၢင်းလိူၵ်ႈ ၊ ၵႃႈလႆႈၶဵင်ႇတႃႉၵူႈလွင်ႈသေလႆႈၵႂႃႇႁဵတ်းၵၢၼ်ယူႇသဝ်းတီႈႁၢၼ်ႉ KTV ၼႆႉၵေႃႈ  ပဵၼ်ယွၼ်ႉ သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ယဝ်ႉဝႃႈၼႆ။ 

 “ဢွၼ်ၼႃႈၼႆႉ လွင်ႈယၢပ်ႇၽိုတ်ႇၼၢင်းယိင်းၼႆ ဢမ်ႇမီးႁႃႉၵေႃႈ ဢမ်ႇၸႂ်ႈ ၊ ၵူၺ်းၵႃႈဝၢႆးလင် ဝၢၼ်ႈမိူင်းသုၵ်ႉသၵ်ႉမႃးၼႆႉ လွင်ႈယၢပ်ႇၽိုတ်ႇလၵ်းလၵ်းမၼ်းၼႆႉပဵၼ်လွင်ႈလွတ်ႈၽေး ၊ ၼၢင်းယိင်းႁဝ်းၶႃႈၼႆႉ ပေႃးပဵၼ်ပၢင်တိုၵ်းလႄႈလႆႈပၢႆႈၼႆႉ လွင်ႈယၢပ်ႇတေမီးတင်းၼမ်၊ လွင်ႈပၢႆးယူႇလီၸိူဝ်းၼႆႉ ၊  တႃႇႁႃၵိၼ်လဵင်ႉတွင်ႉၸိူဝ်းၼႆႉ၊  ၵွပ်ႈၼႆ ၸူဝ်ႈမီးတိုဝ်ႉတၢင်းႁဵတ်းၼႆႉ တီႈလႂ်ၵၢၼ်လီ တီႈလႂ်ႁႃငိုၼ်းငၢႆၵေႃႈတိုၼ်းတေၵႂႃႇႁဵတ်းၵၢၼ်ဝႆႉထႃႈၵွၼ်ႇယဝ်ႉ။ ယၢမ်းလဵဝ် တီႈ ဢၼ်ႁႃငိုၼ်းငၢႆႈသုတ်းပဵၼ်တီႈ KTV ၵျႃႊၽႅၼ်ႉ ၸိူဝ်းၼႆႉတင်းၼမ်၊ ဝၢၼ်ႈမိူင်းသမ်ႉ ဢမ်ႇမီးၶွပ်ႇမီးပိူင်လႄႈ မီးလွင်ႈၶဵင်ႇတႃႉ လွင်ႈလွတ်ႈၽေး၊ တီႈၼၼ်ႉသမ်ႉမီးယႃႈမဝ်းၵမ်လိူင်ႇၼမ်လႄႈ တုမ်ႉတိူဝ်ႉပႃးၵူႈလွင်ႈ။ ဢၼ်ႁၢႆႉၸႃႉႁႅင်းၼႆႉ ၼၢင်းယိင်းဢွၼ်ႇၸိူဝ်းၵႂႃႇႁဵတ်းၵၢၼ် တီႈၼၼ်ႉၼႆ လႆႈၶၢႆတူဝ်ပႃး။ ”– ဝႃႈၼႆ ။

တီႈပွၵ်ႉ KTV  ၼၼ်ႉ မိူၼ်ၼင်ႇ  ယႃႈမႃႉ ၊  ယႃႈၽိူၵ်ႇ၊  Happy Water  ၊ ယႃႈ  K  ၸိူဝ်းၼႆႉ   သိုဝ်ႉငၢႆႈၶၢႆလီ ၊  လုၵ်ႈယိင်းၼၢင်းသၢဝ်ဢွၼ်ႇၸိူဝ်းၵႂႃႇႁဵတ်းၵၢၼ်တီႈႁၢၼ်ႉၸိူဝ်းၼၼ်ႉၵေႃႈ မီးၽေးၼမ်။ ၸိူဝ်းထုၵ်ႇ ၸၵ်ႉလၢၵ်ႈၶိုၼ်ႈရူတ်ႉၵႃးၵႂႃႇၵေႃႈမီး ၵမ်ႈၽွင်ႈ ၺႃးၶႃႈႁႅမ်တၢႆႈၵေႃႈမီး။

ဢၼ်ၵႂႃႇၵိၼ်ၵႂႃႇမူၼ်ႈတီႈ  KTV ၼႆႉပဵၼ်လုၵ်ႈၽူႈမၢၵ်ႈၵူၼ်းမီးလွၼ်ႉလွၼ်ႉ။ ၸၢႆႇငိုၼ်းလႆႈလိူင်ႇလိူဝ်။ ၵွပ်ႈၼႆ ၵူၼ်းၼုမ်ႇ လုၵ်ႈဢွၼ်ႇၸိူဝ်းႁဵတ်းၵၢၼ်တီႈႁၢၼ်ႉ  KTV ၵေႃႈ လႆႈႁၼ်လွင်ႈၵိၼ်ၵျေႃႇမိင်းမဝ်း တဵၼ်ႈဝႅၼ်ႁုၼ်ႉၶူဝ်ယူႇၵူႈဝၼ်းလႄႈ ႁၼ်ထိုင်ဝႃႈ ပဵၼ်တၢင်းမူၼ်ႈတၢင်းၵျေႃႇၼႆလၢႆးလဵဝ်ၵူၺ်းယဝ်ႉ။ ဢမ်ႇဝူၼ်ႉထိုင်ၽွၼ်းယွၼ်ႈဢၼ်ႁၢႆႉၸႃႉ ဢၼ်တေမႃးၸွမ်းတၢင်းလင်။  ဢမ်ႇဝႃႈယိင်းဝႃႈၸၢႆး ပေႃးလႆႈသုတ်ႇယႃႈ K  ၊ Happy  ၸိူဝ်းၼႆႉယဝ်ႉၸိုင် ဢမ်ႇၵုမ်းသတိ ဢမ်ႇၵုမ်းတူဝ်လႆႈ၊ ဢမ်ႇသၢင်ႇ ထုၵ်ႇသေလႆႈလူႉလႆႈတၢႆၵႂႃႇၵေႃႈမီး ။  ပဵၼ်ၵူၼ်းၶူဝ်လမ်ၵေႃႉၼိုင်ႈ ၊ ၵူၼ်းၵုၼ်ႁိင်းၵေႃႉၼိုင်ႈ ။   ဝႃႈၼၼ်သေတႃႉၵေႃႈ ဢမ်ႇမီးၽႂ်မႃးသႂ်ႇၸႂ်ဢဝ်လိူင်ႈဢဝ်လၢဝ်းပၼ်။ ယွၼ်ႉပိူဝ်ႈပေႃႈလဵင်ႉၸဝ်ႈငိုၼ်းသႃး ၸဝ်ႈၶွင်ႁၢၼ်ႉ KTV ၵေႃႈ ဢမ်ႇၸႂ်ႈၵူၼ်းမိူင်းၽၵ်းၵႃႇသေၵေႃႉ – ၼႆ ၵူၼ်းမိူင်းဝဵင်းၼမ်ႉၸၢင် ဢၼ်ႁူႉၸၵ်းၸမ်ၸႂ်ၵၼ်တင်း ပေႃႈလဵင်ႉၸဝ်ႈႁၢၼ်ႉၶဝ် ၵေႃႉၼိုင်ႈလၢတ်ႈၼင်ႇၼႆ။

ယႃႈမဝ်းၵမ်  K ၼႆႉတီႈတႄႉမၼ်း ပဵၼ်ယႃႈယႃသမ်းပၼ်တူဝ်သတ်း ။  ႁဵတ်းႁႂ်ႈမိင်း၊ မိုၼ် ၊ လိုမ်းတူဝ် ၸူဝ်ႈၶၢဝ်း မိူဝ်ႈၽွင်းၽႃႇတတ်း။ ယႃႈယႃၼႆႉ ပေႃးၵိၼ်ႁူမ်ႈတင်းလဝ်ႈၸိုင် တေတုမ်ႉတိူဝ်ႉပၢႆးၸႂ်၊ ဢွၵ်းဢေႃ၊ ႁူဝ်တေမဝ်းႁႅင်း၊ ႁၢၵ်ႈ၊ လိုမ်းတူဝ် ၊ ထိုင်လူႉသုမ်းသၢႆၸႂ် ။

တီႈဝဵင်းၼမ်ႉၸၢင်ၼႆႉ  ယႃႈမဝ်းၵမ်လိူင်ႇၼမ် သိုဝ်ႉၶၢႆၵၼ် ၶၼ်ထုၵ်ႇၶၼ်ပေႃး၊   ယႃႈမႃႉ ၵူႈပွၵ်ႈ သႅၼ်းသိုဝ်ႉၶၢႆ  ၼိုင်ႈမဵတ့် 2000 ပျႃးၼၼ်ႉ ယၢမ်းလဵဝ်သိုဝ်ႉၶၢႆၵၼ်  300 ပျႃး ၵူၺ်းယဝ့်  ၊ ၵူၼ်းၵူႈသႅၼ်းထၢၼ်ႈ သိုဝ်ႉၵိၼ်သူႇသမ်း ငၢႆႈ၊ သိုဝ်ႉလႆႈၵူႈတီႈ။ 

ၶဝ်ႈ KTV ၼႆႉ ဢမ်ႇၸႂ်ႈၵႂႃႇၵိၼ်ၵျေႃႇမဝ်းသေႁွင်ႉၵႂၢမ်းယဝ်ႉပွၵ်ႈၶိုၼ်းႁိူၼ်း ၶႃႈၼၼ်ႉၵူၺ်း။  ၵမ်ႈၼမ်တႄႉ ၵႂႃႇၶဝ်ႈၵၢင်ၶမ်ႈမွၵ်ႈ 8 မူင်းၼႆႉသေယူႇၼႂ်းၼၼ်ႉတင်းၶိုၼ်း။ ၵၢင်ၼႂ်မိူင်းလႅင်း  5-6 မူင်း ၸင်ႇဢွၼ်ၵၼ်ပွၵ်ႈႁိူၼ်းၶိုၼ်း။ ပေႃးပဵၼ်ဝၼ်းလိုဝ်ႈၵၢၼ် ၶဝ်တေဢွၼ်ၵၼ်ၵႂႃႇၶဝ်ႈ KTV  ယၢမ်းၵၢင်ၶမ်ႈ 9 မူင်း 10 မူင်း သေ ယူႇတေႃႇမိူင်းလႅင်း ထိုင်ၵၢင်ၼႂ် 9 မူင်း 10 မူင်း ၸင်ႇပွၵ်ႈႁိူၼ်းၶိုၼ်းၵေႃႈမီး။

 မိူဝ်ႈဢွၼ်တၢင်း  KTV ( Karaoke )  ၼႆႉ ၵူၼ်းတင်းလၢႆ ယုမ်ႇယမ်ဝႃႈ ပဵၼ်တီႈ ဢၼ်ယူတ်းယႃၸႂ် ႁွင်ႉၽဵင်းၵႂၢမ်းၸူဝ်ႈၵႅပ်ႉၸူဝ်ႈၵမ်း၊ ပဵၼ်တီႈပၼ်ႁူးဢွၵ်ႇၸႂ်လႄႈပၢႆးဝူၼ်ႉဢၼ်သုၵ်ႉသၵ်ႉယူႇၼၼ်ႉၵူၺ်း ဝႃႈၼႆ သေတႃႉ  ၼႂ်းၵၢပ်ႈပၢၼ်ဝၼ်းမိူဝ်ႈၼႆႉတႄႉ ဢိင်ၼိူဝ်ပၵ်းပိူင်မၢႆမီႈၸိုင်ႈမိူင်းဢမ်ႇသုမ်ႇငမ်းလႆႈတူဝ်ႈထိုင်ၼၼ်ႉသေ  ႁၢၼ်ႉ KTV ၼႆႉ ဢမ်ႇၸႂ်ႈတီႈယူတ်းယႃၸႂ် တႃႇသူႇၸူး လွင်ႈတၢင်းလီယဝ်ႉ။ ၵူၺ်းယဵၼ်းပဵၼ် မိူင်းငရၢႆး – ပဵၼ်ဢွင်ႈတီႈ ယႃႉဢၼႃႇၵၢတ်ႈ ၵူၼ်းၼုမ်ႇ သႅၼ်းႁုၼ်ႈမႂ်ႇၵႂႃႇယဝ်ႉ – ပေႃႈမႄႈလုၵ်ႈဢွၼ်ႇၼုမ်ႇ ၵူၼ်းမိူင်းဝဵင်းၼမ်ႉၸၢင်တႄႉထတ်းသၢင်ၼင်ႇၼႆသေ ပဵၼ်ဢၼ်ၼၵ်းၸႂ်လူင်ဢၼ်ၼိုင်ႈယူႇယဝ်ႉၶႃႈဢေႃႈ။