ဝၼ်းတီႈ 13/05/2025 ယၢမ်းၵၢင်ၶမ်ႈ 7 မူင်းၶိုင်ႈ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်းပွႆႇမၢၵ်ႇသႂ်ႇ ၼႂ်းပွၵ်ႉတႃႈလူင် ဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ထိုင်မႃးယၢမ်းၵၢင်ၶမ်ႈမွၵ်ႈ 10 မူင်းၶိုင်ႈၵေႃႈ ပွႆႇမၢၵ်ႇသႂ်ႇ ၼႂ်းဝဵင်းမၢၼ်ႈတူင်ႈ 2 ပွၵ်ႈ ၸိုင်ႈတႆးပွတ်းႁွင်ႇ။

ၾၢႆႇႁွင်ႈၵၢၼ်ၶၢဝ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ – ၶမ်ႈၶိုၼ်းလဵဝ်ၵူၺ်း သိုၵ်းမၢၼ်ႈ ပွႆႇမၢၵ်ႇသႂ်ႇ 3 လုၵ်ႈ ၵႂႃႇတူၵ်းၺႃးႁိမ်းႁူင်းႁဵၼ်းသွၼ်လိၵ်ႈ တီႈပွၵ်ႉတႃႈလူင် – ဝႃႈၼႆ။

လွင်ႈတၢင်း ဢၼ်ႁဵတ်းႁႂ်ႈသိုၵ်းမၢၼ်ႈ မႃးပွႆႇမၢၵ်ႇသႂ်ႇၺႃးတီႈႁူင်းႁဵၼ်းၼႆႉ ၵူၼ်းၼႂ်းပိုၼ်ႉတီႈ ၵေႃႉၼိုင်ႈတႄႉ လၢတ်ႈၼႄဝႃႈ – “တီႈႁူင်းႁဵၼ်းၼၼ်ႉ သိုၵ်းလွႆ ၶဝ်ၵႂႃႇၼွၼ်းတီႈ ၼၼ်ႉသေ သွၼ်ၵၢၼ်သိုၵ်း။ တီႈဝၢၼ်ႈတႄႉ လႅင်းၾူၼ်းဢမ်ႇလႆႈ၊ ၵူၺ်းမီးၵူၼ်းပၼ်ၶၢဝ်ႇလႄႈ ၸင်ႇၵႂႃႇပွႆႇၵႂႃႈ။ မိူဝ်ႈလဵဝ် ၶဝ်ပၼ်ၵူၼ်းၶၢႆယူး၊ ၵူၼ်းလႅၵ်ႈငိုၼ်းၸိူဝ်းၼႆႉ ၶဝ်ႈၼႂ်းပိုၼ်ႉတီႈၸိူဝ်းၼၼ်ႉၼမ်ၼႃႇ” – ဝႃႈၼႆ။

ၾၢႆႇတပ်ႉသိုၵ်းတဢၢင်း TNLA တႄႉ ဢမ်ႇပိုၼ်ၽၢဝ်ႇပႃး လွင်ႈတုမ်ႉတိူဝ်ႉၺႃးၵူၼ်းမိူင်း ၼႂ်းပိုၼ်ႉတီႈသေတႃႉ လႆႈႁူႉဝႃႈ ႁိူၼ်းၵူၼ်းမိူင်းၸိူဝ်းယူႇၸမ်ႁူင်းႁဵၼ်းၼၼ်ႉ တိူဝ်ႉၺႃးမၢၵ်ႇလူင်ၶိူင်ႈမိၼ်တိုၵ်း သိုၵ်းမၢၼ်ႈသေ လူႉၵွႆၵႂႃႇ ၼႆယဝ်ႉ။

ၼႂ်းႁူဝ်လိူၼ်မေႊၼႆႉမႃး သိုၵ်းမၢၼ်ႈတင်း သိုၵ်းတဢၢင်း TNLA ႁူပ်ႉဢုပ်ႇဢူဝ်းၵၼ် တီႈမိူင်းၶႄႇ ဢမ်ႇဢွင်ႇမၢၼ်မႃး။ ဝၢႆးလင်ၼၼ်ႉဢမ်ႇႁိုင် တင်းသွင်ၾၢႆႇပိုၼ်ၽၢဝ်ႇ သိုပ်ႇယိုတ်ႈ ၵၢၼ်ၵိုတ်းတိုၵ်းဝႆႉ ပဵၼ်တၢင်းၵၢၼ်သေတႃႉ ၾၢႆႇသိုၵ်းမၢၼ်ႈယင်းတိုၵ်ႉဢဝ်တရူၼ်ႊ၊ ၶိူင်ႈၵွင်ႈလူင်ဢိၵ်ႇ ၶိူင်ႈမိၼ်ၸိူဝ်းၼႆႉ မႃးပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်း ၵုမ်းၵမ်ယူႇ ဢမ်ႇထၢတ်ႇဢမ်ႇဝၢႆး။

မိူဝ်ႈဝၼ်းတီႈ 11 ယၢမ်းဝၢႆးဝၼ်းမွၵ်ႈ 2 မူင်းၼၼ်ႉၵေႃႈ သိုၵ်းမၢၼ်ႈ ၸႂ်ႉၶိူင်ႈၵွင်ႈလူင် ယိုဝ်းၵႂႃႇၼႂ်းၼႃႈလိၼ် သိုၵ်းတဢၢင်းၵုမ်းၵမ် တီႈႁိမ်းဝၢၼ်ႈယႃႇပျိၼ်ႇ ၸႄႈဝဵင်းၼွင်ၶဵဝ် ထႅင်ႈ 4 ၵမ်း ဝႃႈၼႆ။

လႆႈႁူႉဝႃႈ သိုၵ်းမၢၼ်ႈတင်း သိုၵ်းတဢၢင်း TNLA ၼႆႉ ယင်းတိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ ၼႂ်းၸႄႈ ဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။ ၾၢႆႇသိုၵ်းမၢၼ်ႈ မုင်ႈၼႃႈလေႃႇတိုၵ်း တပ်ႉသိုၵ်းတဢၢင်း ႁိမ်းႁွမ်းဝၢၼ်ႈ တွင်းၶမ်း ၼႆသေတႃႉ ႁၢၼ်ႉတေႃႇထိုင်ယၢမ်းလဵဝ် ယင်းပႆႇၽိုတ်ႉၶဝ်ႈတိုၵ်းႁိမ်ဢဝ်လႆႈၶိုၼ်း တပ်ႉပၢင်သဝ်းတႄႉတႄႉဝႃႈဝႃႈ ၼႆယဝ်ႉ။

ၼႂ်းပိုၼ်ႉတီႈ တပ်ႉသိုၵ်းတဢၢင်း TNLA ၵုမ်းၵမ်ဝႆႉ ၼႂ်းၸႄႈဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းၵုတ်ႈ၊ မိူင်းမိတ်ႈ၊ ၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉတူႈ ၸိူဝ်းၼႆႉ ၵူၼ်းမိူင်းဢမ်ႇၸႂ်ႉတိုဝ်းလႆႈ လႅင်းၾူၼ်း၊ သင်ၶႂ်ႈၸႂ်ႉတိုဝ်း ဢိၼ်ႊထိူဝ်ႊၼႅတ်ႉၸိုင် လႆႈၵႂႃႇသိုဝ်ႉၸႂ်ႉတိုဝ်း StarLink ဢၼ်ၵူၼ်းႁဵတ်းၵၢၼ်မၢၵ်ႈမီးၶဝ် ႁူမ်ႈၵၼ်တင်း ၸုမ်းယိပ်းၵွင်ႈၵၢင်ႇသေ ပိုတ်ႇဝႆႉ ၼၼ်ႉၵူၺ်း။

တႅမ်ႈ – ၽူၺ်းၼုမ်ႇ