ဝၼ်းတီႈ 12/05/2025 ယၢမ်းၵၢင်ၼႂ်မွၵ်ႈ 10 မူင်းၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇႁူင်းႁဵၼ်း ၼႂ်းၸႄႈ ဝဵင်းတီႇပႄးယိၼ်း တိူင်းၸႄႈၵႅင်း လုၵ်ႈႁဵၼ်းလႄႈ မေႃသွၼ် မၢတ်ႇၸဵပ်းလူႉတၢႆၼပ်ႉႁူဝ်သိပ်း ႁူင်းႁဵၼ်း ၵေႃႈ လူႉၵွႆၸွမ်းထႅင်ႈတင်းၼမ်။

မၢၵ်ႇၶိူင်ႈမိၼ်သိုၵ်းမၢၼ်ႈ တူၵ်းသႂ်ႇၼိူဝ်ႁူင်းႁဵၼ်းၵမ်းသိုဝ်ႈ ဢၼ်မီးတီႈဝၢၼ်ႈဢူဝ်းထဵင်းၵုၼ်း (အိုးထိမ်းကွင်း) ၼႂ်းၸႄႈဝဵင်းတီႇပႄးယိၼ်း ၶၢပ်ႈတူဝ်လုၵ်ႈႁဵၼ်းမၢင်ၵေႃႉ ပုတ်းၶၢတ်ႇမၢၵ်ႇမိူဝ်ဝႆႉ ထိုင်တီႈ ဢမ်ႇႁူႉလႆႈဝႃႈ ပဵၼ်ၽႂ်ၵေႃႉလႂ် ဝႃႈၼႆ။

ယူႇတီႈ သိုဝ်ႇၶၢဝ်ႇ Khit Thit Media တႅမ်ႈတၢင်ႇဝႆႉဝႃႈ – လုၵ်ႈႁဵၼ်းလႄႈ မေႃသွၼ် လႆႈမၢတ်ႇၸဵပ်းလူႉတၢႆ ၵႂႃႇမွၵ်ႈ 50 ၵေႃႉ ဝႃႈၼႆသေတႃႉ ၵူၺ်းၵႃႈ ပႆႇၸၢင်ႈယိုၼ်ယၼ် – ဝႃႈၼႆ။  

ဢွင်ႈတီႈသိုၵ်းမၢၼ်ႈပွႆႇမၢၵ်ႇသႂ်ႇၼႆႉ ပဵၼ်ႁူင်းႁဵၼ်း ဢၼ်ပူင်သွၼ်ပၼ် ၸွမ်းၼင်ႇၶၵ်ႉၵၢၼ်ပၢႆးပၺ်ႇၺႃႇ လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ဝႃႈၼႆ။

ဝဵင်းတီႇပႄးယိၼ်းၼႆႉ PDF ၶဝ် လေႃႇတိုၵ်းတပ်ႉသိုၵ်းမၢၼ်ႈသေ ယိုတ်းၵုမ်းလႆႈဝႆႉ ၸဵမ်မိူဝ်ႈလိူၼ် ထူၼ်ႈပႅတ်ႇ ပီၵၢႆ။ ၵူၺ်းၵႃႈ သိုၵ်းမၢၼ်ႈ ထႅမ်ႁႅင်းသိုၵ်းလေႃႇတိုၵ်းသေ ယိုတ်းၵုမ်းလႆႈၶိုၼ်း ၼႃႈတီႈၵမ်ႈၽွင်ႈ၊ တေႃႇထိုင်ယၢမ်းလဵဝ် တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ။

ၼႂ်းႁူဝ်လိူၼ်ၼႆႉ သိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းထႅင်ႈ တေႃႇထိုင် ဝၼ်းတီႈ 31 လိူၼ်ၼႆႉသဵင်ႈသေတႃႉ သိုၵ်းမၢၼ်ႈ တိုၵ်ႉၸႂ်ႉၶိူင်ႈမိၼ်၊ ၶိူင်ႈတရူၼ်ႊ၊ ၶိူင်ႈၵွင်ႈလူင် ပွႆႇမၢၵ်ႇယိုဝ်းတိုၵ်းယူႇၵူႈဝၼ်း ႁဵတ်းႁႂ်ႈၵူၼ်းမိူင်းမၢတ်ႇၸဵပ်းလူႉတၢႆၼမ်။