မိူဝ်ႈဝႃး 20/03/2026 ယၢမ်းၵၢင်ၼႂ်ၸဝ်ႉ သိုၵ်းမၢၼ်ႈဢဝ်ႁိူဝ်းမိၼ်သိုၵ်းၵျႅတ်ႉၾၢႆႊတိူဝ်ႊ ယိုဝ်းသႂ်ႇတီႈဝတ်ႉဝႃးသင်ၶၸဝ်ႈ (မဟာလေးထပ်ဘုန်းတော်ကြီးကျောင်း) ဢၼ်မီးၵူၼ်းပၢႆႈၽေးသိုၵ်းမႃးသွၼ်ႈယူႇသဝ်းဝႆႉတင်းၼမ် ။

ဝတ်ႉဝႃးလင်ၼႆႉ မီးတီႈႁိမ်းၾင်ႇၼမ်ႉၵဵဝ် မီးၼႂ်းပွၵ်ႉ 3 ဝဵင်းၵၢတ်ႇသႃ တိူင်းၸႄႈၵႅင်း။

ၵူၼ်းမိူင်းဝဵင်းၵၢတ်ႇသႃလၢတ်ႈဝႃႈ – ၶိူင်ႈမိၼ်ၵျႅတ်ႊၾၢႆႊတိူဝ်ႊမႃး 2 လမ်း။ ပွႆႇမၢၵ်ႇလူင်သႅၼ်း 500 ပွင်ႊ တူၵ်းသႂ်ႇၼိူဝ်ဝတ်ႉလီလီ ႁဵတ်းႁႂ်ႈၾႆးမႆႈဝတ်ႉဝႃးၵႂႃႇတင်းလင်။ သိုၵ်းမၢၼ်ႈႁူႉယူႇတီႈဝတ်ႉၼၼ်ႉမီးၵူၼ်းပၢႆႈၽေးသိုၵ်းမႃးသွၼ်ႈယူႇသဝ်းဝႆႉ။ တင်းၵူၼ်းတင်းသင်ၶၸဝ်ႈ မီးလွင်ႈမၢတ်ႇၸဵပ်းလူႉတၢႆၼမ်။ – ဝႃႈၼႆ။

တီႈၼႂ်းၶလိပ်ႉဝီႊတီႊဢူဝ်ႊလႄႈၶႅပ်းႁၢင်ႈ ဢၼ်ၵူၼ်းပိုၼ်ႉတီႈထၢႆႇတၢင်ႇဝႆႉတၢင်းသိုဝ်ႇၼႅင်ႈသၢၼ်ၼၼ်ႉတႄႉ လႆႈႁၼ်တူဝ်ၵူၼ်းတၢႆတင်းၼမ်။ ပႃးၸဵမ်မုၼ်ၸဝ်ႈ၊ ၵူၼ်းထဝ်ႈ ၊ လုၵ်ႈဢွၼ်ႇလႄႈၼၢင်းယိင်း။

သိုဝ်ႇၶၢဝ်ႇမၢၼ်ႈပိုၼ်ၽၢဝ်ႇဝႃႈ တၢႆ/မၢတ်ႇတင်းမူတ်းလၢႆၵေႃႉဢမ်ႇၸၢင်ႈႁူႉလႆႈ။ ယွၼ်ႉဝႃႈ ၵျွင်းမုၼ်ၸဝ်ႈလင်ၼႆႉ မီးၼႂ်းပိုၼ်ႉတီႈသိုၵ်းမၢၼ်ႈၵုမ်းၵမ်လႄႈ တႃႇၵႂႃႇဢဝ်ၶၢဝ်ႇဢမ်ႇငၢႆႈ။ ၾၢႆႇၼိုင်ႈ ၼႂ်းၶလိပ်ႉဝီႊတီႊဢူဝ်ႊတႄႉလႆႈႁၼ် တူဝ်တၢႆမၢင်ၵေႃႉၼႆႉပုတ်းၶၢတ်ႇ ၵိုတ်းပဵၼ်ပိတ်းပဵၼ်ပွတ်းၵူၺ်း။ မၢင်ၵေႃႉၵေႃႈၺႃးၾႆးမႆႈဝႆႉလႄႈဢမ်ႇၸၢင်ႈယိုၼ်ယၼ်ဝႃႈပဵၼ်ၽႂ်ယူႇဝၢၼ်ႈလႂ်ၸိူဝ်းၼႆႉ ဝႃႈၼႆ။

လွင်ႈၼႆႉၵူၼ်းၼႂ်းပိုၼ်ႉတီႈလၢတ်ႈတီႈသိုဝ်ႇၶၢဝ်ႇမၢၼ်ႈဝႃႈ – ၵူၼ်းမၢတ်ႇၸဵပ်းလူႉတၢႆလႅပ်ႈတေမီးၼႂ်းၵႄႈ 80 ထိုင် 100 ၵေႃႉၼႆႉ ဝႃႈၼႆ။

တီႈဝဵင်းၵၢတ်ႇသႃၼႆႉ သိုၵ်းမၢၼ်ႈလႄႈသိုၵ်းၵႅတ်ႇၶႄၵူၼ်းမိူင်း PDF ၼႂ်းပိုၼ်ႉတီႈ တႄႇပိုတ်းယိုဝ်းတိုၵ်းတေႃးၵၼ်ႁႅင်း တင်ႈတႄႇလိူၼ်ၻီႊသႅမ်ႊပိူဝ်ႊမႃး။ ထိုင်မႃးၼႂ်းလိူၼ်ၵျႅၼ်ႊၼိဝ်ႊရီႊၼႆႉ ပၢင်တိုၵ်းယဵၼ်လူင်းၵႂႃႇ။ ၼႂ်းႁူဝ်လိူၼ်မၢတ်ႉၶျ်ၼႆႉမႃး ၶိုၼ်းယိုဝ်းၵၼ်။ ဢၼ်ယိုဝ်းၵၼ်ႁႅင်းသဵင်ၵွင်ႈဢမ်ႇထၢတ်ႇၼႆႉ မီးယူႇမွၵ်ႈ 5 ဝၼ်း ။ ၵူၼ်းဝၢၼ်ႈဢွၼ်ၵၼ်ပၢႆႈၽေးသိုၵ်းၶဝ်ႈယူႇၼႂ်းဝဵင်း။ ဢၼ်သဵင်ၵွင်ႈၸင်ႇႁႃယဵၼ်ၵႂႃႇၼႆႉတိုၵ်ႉလႆႈ ဝၼ်းသွင်ဝၼ်းၵူၺ်း။ ဝၢႆးသဵင်ၵွင်ႈယဵၼ် သိုၵ်းမၢၼ်ႈၵေႃႈဢဝ်ႁိူဝ်းမိၼ်မႃးပွႆႇမၢၵ်ႇဢမ်ႇထၢတ်ႇ။ မီးတင်းသႅၼ်း Y12 လႄႈတင်း ၵျႅတ်ႉၾၢႆႊတိူဝ်ႊ ။ မိူဝ်ႈဝႃးၵေႃႈ သိုၵ်း PDF ၶဝ်ႈယိုဝ်းသိုၵ်းမၢၼ်ႈတီႈၶွၵ်ႈလူင်ဝဵင်းၵၢတ်ႇသႃ၊ တၢင်းပွၵ်ႉတၽၢၼ်းၵၢႆး လႄႈ တင်းတပ်ႉမၢၼ်ႈ 309 ၸိူဝ်းၼၼ်ႉပႃး ဝႃႈၼႆ။