ၵေႃလိၵ်ႈလၢႆး ဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸတ်းႁဵတ်းပွႆးလူင်းပၢင်သွၼ် လိၵ်ႈတႆးၶၢဝ်းမႆႈ ပွၵ်ႈၵမ်း 3 မီးၽူႈယႂ်ႇၵူၼ်းလူင်လႄႈ လုၵ်ႈႁဵၼ်းၶဝ်ႈႁူမ်ႈတင်းၼမ်။

ဝၼ်းတီႈ 11/05/2025 (ဝၼ်းလိူၼ်ႁူၵ်းမူၼ်း) ယၢမ်းၵၢင်ၼႂ် ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဢွၼ်ႁူဝ်ၸတ်းႁဵတ်းပွႆးလူင်းပၢင်သွၼ်လိၵ်ႈတႆး ၶၢဝ်းမႆႈ တီႈဝၢၼ်ႈၼမ်ႉဝၼ်း ဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ မိူင်းၸီး လၢတ်ႈတီႈၽူႈတွႆႇႁွၵ်ႈဝႃႈ – “တီႈဢိူင်ႇမိူင်းၸီးၼႆႉ ႁဝ်းၶႃႈ လႆႈပိုတ်ႇပၢင်သွၼ် လိၵ်ႈတႆးမႃးၶၢဝ်းတၢင်း 2 လိူၼ်ပၢႆသေ ၸတ်းႁဵတ်းပွႆးလူင်းပၢင်သွၼ်ၵႂႃႇ တီႈဝၢၼ်ႈၼမ်ႉဝၼ်း။ တီႈပွႆးလူင်းပၢင်သွၼ်ၼႆႉ မီးလုၵ်ႈႁဵၼ်းၶဝ်ႈႁူမ်ႈ 40 ပၢႆ”- ဝႃႈၼႆ။

သိုပ်ႇလၢတ်ႈဝႃႈ – “ယဝ်ႉၵေႃႈ ၸတ်းႁဵတ်းပႃး ပၢင်ၾိုၵ်းၽွၼ်ႉၶေႉၼမ်ႉၵႂၢမ်းၵၼ်ထႅင်ႈ တႃႇၼေႃႇတႅၼ်း ၶိူဝ်းႁဝ်းၶႃႈ ႁႂ်ႈပဵၼ်ၽူႈဢွၼ်ႁူဝ်ၵႂႃႇဝၼ်းမိူဝ်းၼႃႈၼႆသေ ႁႂ်ႈၶဝ်ႁတ်းလၢတ်ႈၸႃ လုၵ်ႈႁဵၼ်း ၸိူဝ်းၶဝ်ႈၶဵင်ႇၵၼ်ၼႆႉ တေပဵၼ်လုၵ်ႈႁဵၼ်းသႅၼ်းဢႃယု 6-7 ၶူပ်ႇ”- ဝႃႈၼႆ။

ပၢင်သွၼ်လိၵ်ႈတႆး ၶၢဝ်းမႆႈ တီႈဢိူင်ႇမိူင်းၸီး ပီၼႆႉ တင်းမူတ်းမီး 6 ပၢင် မိူၼ်ၼင်ႇ – ဝၢၼ်ႈၼမ်ႉဝၼ်း၊ ဝၢၼ်ႈပုင်ႇ၊ ဝၢၼ်ႈတူၼ်ႈလူမ်း၊ ဝၢၼ်ႈႁူဝ်ၶင်း၊ ဝၢၼ်ႈဝဵင်းၵဝ်ႇလႄႈ ဝၢၼ်ႈၼမ်ႉၽိင်း။ ၼိုင်ႈဝၢၼ်ႈလႂ် လုၵ်ႈ ႁဵၼ်းတေမီး 40-50 ၵေႃႉ တင်းမူတ်းလုၵ်ႈႁဵၼ်းမီး 100 ပၢႆ။ လိူဝ်ၼၼ်ႉ လုၵ်ႈႁဵၼ်းဢၼ်လႆႈသွၼ်လေႃး ၼႂ်းႁူင်းႁဵၼ်းမၢၼ်ႈ တီႈဢိူင်ႇမိူင်းၸီးၼႆႉသမ်ႉ တေမီးထႅင်ႈ 100 ပၢႆ ။

ပပ်ႉႁဵၼ်း ဢၼ်ၸႂ်ႉတိုဝ်း ၼႂ်းႁူင်းႁဵၼ်းၼႆႉသမ်ႉ ယူႇတီႈ ၸုမ်းပၢႆးပၺ်ႇၺႃႇ ၸိုင်ႈတႆး ၶွင်ပႃႇတီႇမႂ်ႇသုင် ၸိုင်ႈတႆး ၵမ်ႉထႅမ်ပၼ် ၸၼ်ႉငဝ်ႈ – ၸၼ်ႉသီႇ တႃႇပပ်ႉႁဵၼ်း 200 ပၢႆ။ ပီၼႆႉ ပၢင်သွၼ်လိၵ်ႈတႆး ၶၢဝ်းမႆႈ တီႈဢိူင်ႇမိူင်းၸီး လႆႈၵိုတ်းယင်ႉဝႆႉ 3 ဝၢၼ်ႈ ၼႆယဝ်ႉ။

ဢိူင်ႇမိူင်းၸီးၼႆႉ တင်းမူတ်းမီး 21 ဝၢၼ်ႈ။ ၼႂ်းၼၼ်ႉ တႃႇဝၢၼ်ႈတႆးမီး 8 ဝၢၼ်ႈ။ ယဝ်ႉၵေႃႈ ယူႇတၢင်း ၸဵင်ႇႁွင်ႇဝၼ်းဢွၵ်ႇ ဝဵင်းၵူတ်ႉၶၢႆ ၼႂ်းၵႄႈၵူတ်ႉၶၢႆ – လဝ်ႇၵၢႆး။