မိူဝ်ႈၼႆႉ ဝၼ်းတီႈ 11/05/2025 ယၢမ်းၵၢင်ၼႂ် 9 မူင်းထိုင် 11 မူင်းပၢႆ တီႈသုၼ်ပၢႆႈၽေးၵုင်းၵျေႃႇ ဢိူင်ႇပဵင်းလူင် ဝဵင်းႁႅင် လႅၼ်လိၼ်တႆး – ထႆး ၼႂ်းၸႄႈတွၼ်ႈၵဵင်းမႂ်ႇ ၸိုင်ႈထႆး ၸတ်းႁဵတ်းပွႆးလူင်းပၢင်သွၼ်ၾိင်ႈ ငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈ မီးၽူႈယႂ်ႇၵူၼ်းလူင်လႄႈ လုၵ်ႈႁဵၼ်းၶဝ်ႈႁူမ်ႈတင်းၼမ်လၢႆ။

ၶူးပီး ၽူႈၵွၼ်းႁူင်းသဝ်း တီႈသုၼ်ပၢႆႈၽေးၵုင်းၵျေႃႇ လၢတ်ႈတီႈၽူႈတွႆႇႁွၵ်ႈဝႃႈ -“ယွၼ်ႉဝႃႈ ယၢမ်းလဵဝ် ၼႆႉ လုၵ်ႈဢွၼ်ႇတႆးႁဝ်း ၸိူဝ်းယူႇၸွမ်းလႅၼ်လိၼ်တႆး – ထႆး မိူၼ်ၼင်ႇ ဝဵင်းႁႅင် – မိူင်းၾၢင် – မႄႈသၢႆ – တႃႈၶီႈလဵၵ်း ၸိူဝ်းၼႆႉ ၵမ်ႈၼမ် တေဢမ်ႇမႃးလိၵ်ႈတႆးၵႂၢမ်းတႆးယဝ်ႉ။ ဢၼ်မေႃၵေႃႈ တေမီးၵမ်ႉဢေႇၵူၺ်း။ ၵွပ်ႈၼႆလႄႈ တႆးႁဝ်းၼႆႉ သုမ်းယဝ်ႉသုမ်းထႅင်ႈ ၼင်ႇႁိုဝ် လုၵ်ႈဢွၼ်ႇတႆးႁဝ်း ပေႃးတေဢမ်ႇလႆႈ သုမ်းထႅင်ႈၼၼ်ႉ ႁဝ်းၶႃႈ ဝၢၵ်ႉလႆႈတဝ်းလႆႈ ၸိူင်ႉႁိုဝ်ၵေႃႈ ပူင်သွၼ်ပၼ်လုၵ်ႈဢွၼ်ႇတႆးႁဝ်းၵႂႃႇၶႃႈယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “လမ်ႇလွင်ႈတႄႉ တႃႇႁႂ်ႈလုၵ်ႈဢွၼ်ႇတႆးႁဝ်း တီႈၵုင်းၵျေႃႇလႄႈသင် ၵူႈတီႈတီႈၸွမ်း လႅၼ်လိၼ်ၼႆႉလႄႈသင် ႁႂ်ႈၶဝ်မေႃလိၵ်ႈတႆးၵႂၢမ်းတႆးသေဢမ်ႇၵႃး ႁႂ်ႈၶဝ်လႆႈႁဵၼ်းႁူႉပႃးၾိင်ႈငႄႈၾိင်ႈထုင်းႁဝ်း ၸိူဝ်းၼႆႉထႅင်ႈ။ ၵွပ်ႈၼႆလႄႈ ၸင်ႇလႆႈပိုတ်ႇပၢင်သွၼ်လိၵ်ႈတႆးမႃး”- ဝႃႈၼႆ။

ၼႂ်းပွႆးလူင်းပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး ၶၢဝ်းမႆႈၼႆႉ မီးၽူႈယႂ်ႇၵူၼ်းလူင်တႆး၊ ၽူႈမီးပုၼ်ႈၽွၼ်း၊ ၶူးသွၼ်မေႃသွၼ်လႄႈ မီးၽူႈယႂ်ႇၵူၼ်းလူင်တၢင်းၾင်ႇမိူင်းထႆး ၸိူဝ်းၼႆႉ ၶဝ်ႈႁူမ်ႈပၼ်ႁႅင်း ထႅင်ႈတင်းၼမ်။

ပၢင်သွၼ်လိၵ်ႈတႆး ၶၢဝ်းမႆႈ တီႈသုၼ်ပၢႆႈၽေးၵုင်းၵျေႃႇ ပီၼႆႉ လႆႈပိုတ်ႇမႃး မိူဝ်ႈဝၼ်းတီႈ 02/04/2025 ၼၼ်ႉမႃး တေႃႇၶၢဝ်းတၢင်း 1 လိူၼ် ၽွင်းလုၵ်ႈဢွၼ်ႇပိၵ်ႉႁူင်းႁဵၼ်းထႆး။ တီႈသုၼ်ပၢႆႈၽေးၵုင်းၵျေႃႇၼႆႉ ပေႃးထိုင်ၶၢဝ်းမႆႈ ၽွင်းလုၵ်ႈဢွၼ်ႇပိၵ်ႉႁူင်းႁဵၼ်းၼႆ တေပိုတ်ႇပၢင်သွၼ်လိၵ်ႈတႆးမႃးၵူႈပီ တင်ႈတႄႇ ပီ 2003 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ဢမ်ႇၶၢတ်ႇသေပီ။ မိူဝ်ႈၽွင်းၶူဝ်ႊဝိတ်ႉ – 19 လၢမ်းၽႄး ၼၼ်ႉတႄႉ လႆႈၵိုတ်းယင်ႉဝႆႉ ၵမ်းၼိုင်ႈ ၼႆယဝ်ႉ။