မိူဝ်ႈဝႃး ဝၼ်းတီႈ 07/05/2025 ယၢမ်းၵၢင်ဝၼ်းမွၵ်ႈ 1 မူင်းပၢႆၼၼ်ႉ ပႅတ်ႇထရီႇတႅၵ်ႇၼႂ်းႁိူၼ်းသေ ႁဵတ်းႁႂ်ႈ ၾႆးမႆႈႁိူၼ်းယေး ၵူၼ်းမၢၼ်ႈတူင်ႈ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။

ယွၼ်ႉၾႆးမႆႈၼႂ်းႁိူၼ်းလႄႈ ၶူဝ်းၶွင်ဢၼ်မီးၼႂ်းႁိူၼ်းၼၼ်ႉမႆႈၵႂႃႇသဵင်ႈသေ ႁဵတ်းႁႂ်ႈၸဝ်ႈႁိူၼ်း လူႉသုမ်း ၵႂႃႇငိုၼ်းတႃႇ 24 သႅၼ်ပျႃး။

လႆႈႁူႉဝႃႈ မိူဝ်ႈဝၼ်းတီႈ 05/05/2025 ယၢမ်းၵၢင်ၼႂ် 8 မူင်းၼၼ်ႉ လုၵ်ႉတီႈၾႆးသူဝ်ႊလႃႊ (Sola) လူႉၵွႆသေ ႁဵတ်းႁႂ်ႈၾႆးမႆႈႁိူၼ်းလင်ၼိုင်ႈ တီႈဝၢၼ်ႈပိင်ႁွႆ ၼႂ်းဢိူင်ႇၽႃႉယိူင်း ၸႄႈဝဵင်းၵူတ်ႉၶၢႆ။ ၵိုင်ႉၵၢင်ႉၾႆးလၢမ်းမႆႈႁႅင်းလႄႈ ဢမ်ႇတၼ်းလႆႈၶူဝ်းႁိူၼ်းၶူဝ်းယေးသင် လူႉသုမ်းၵႂႃႇ တႃႇၵႃႈၶၼ်ငိုၼ်း 15 သႅၼ်ပျႃး ၼႆယဝ်ႉ။

ၸႄႈဝဵင်း ၼႂ်းမိူင်းတႆးပွတ်းႁွင်ႇ ပိုၼ်ႉတီႈၸိူဝ်းသိုၵ်းၸၢဝ်းၶိူဝ်း ၵုမ်းၵမ်ဝႆႉၵမ်ႈၼမ်ၼႆႉ ဢမ်ႇၸႂ်ႉတိုဝ်းလႆႈ ၾႆးၾႃႉသေ တႃႇသႂၢင်းႁႅင်းၾူၼ်းလႄႈ တႆႈၾႆးလႅင်းၸိူဝ်းၼႆႉ ၵူၼ်းမိူင်းလႆႈပိုင်ႈဢိင် ၾႆးသူဝ်ႊလႃႊ လႄႈ ပႅတ်ႇထရီႇဝႆႉၵူၺ်း။

လွင်ႈၼႆႉ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇၵိၼ်းၸွမ်းတင်းၼမ်သေတႃႉ ႁၢၼ်ႉတေႃႇထိုင်ယၢမ်းလဵဝ် ၵေႃႈ ယင်းပႆႇလႆႈႁၼ် သိုၵ်းၸုမ်းလႂ် ၶတ်းၸႂ်ၸွႆႈၵႄႈလိတ်ႈပၼ်ႁႃတႄႉတႄႉဝႃႈဝႃႈၼႆ ၵူၼ်းမိူင်း ၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄၼင်ႇၼႆ။

တႅမ်ႈ – ၽူၺ်းၼုမ်ႇ