မိူဝ်ႈဝၼ်းတီႈ 07/05/2025 ယၢမ်းၵၢင်ဝၼ်းမွၵ်ႈ 1 မူင်းၼႆႉ ၵူၼ်းဝၢၼ်ႈၵုင်းၸူင် ၵေႃႉၼိုင်ႈ ယဵပ်ႇၺႃးမၢၵ်ႇၾင်လိၼ် ၽွင်းၵႂႃႇႁႃၽိုၼ်း ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။

ၵူၼ်းမိူင်း ၵေႃႉယဵပ်ႇၺႃးမၢၵ်ႇၾင်လိၼ်ၼႆႉ ပဵၼ်ၸၢႆးဢၢႆႈလၢဝ် ဢႃယု 32 ပီ မၼ်းၸၢႆး ၵႂႃႇႁႃၽိုၼ်းႁိမ်း တပ်ႉပၢင်သဝ်းၵဝ်ႇ သိုၵ်းမၢၼ်ႈ ခလယ 23 ဢၼ်မီးၾၢႆႇၸၢၼ်းလႄႈ ယၢၼ်ၵႆၵၼ်တင်း ဝဵင်းသီႇပေႃႉ မွၵ်ႈ 5 လၵ်းၼၼ်ႉသေ ၵႂႃႇယဵပ်ႇၺႃးမၢၵ်ႇ ႁိမ်းႁူဝ်ႉတပ်ႉသိုၵ်းမၢၼ်ႈၼၼ်ႉ ဝႃႈၼႆ။

ၾၢႆႇႁွင်ႈၵၢၼ်ၶၢဝ်ႇ တပ်ႉသိုၵ်းတဢၢင်း TNLA ပိုၼ်ၽၢဝ်ႇဢွၵ်ႇဝႆႉဝႃႈ မိူဝ်ႈလိူၼ်ဢေႊပရိူဝ်ႊ ပူၼ်ႉမႃးၼၼ်ႉၵေႃႈ ၵူၼ်းမိူင်းဝၢၼ်ႈတူင်ႈၸၢင်ႉ ၵေႃႉၼိုင်ႈ ယၢမ်ႈၵႂႃႇယဵပ်ႇၺႃးမၢၵ်ႇၾင်လိၼ် ႁိမ်းတပ်ႉပၢင်သဝ်းၵဝ်ႇသိုၵ်းမၢၼ်ႈ ခလယ 23 ၼၼ်ႉသေ လႆႈတႅပ်းပႅတ်ႈၶႃမၼ်းၸၢႆးၵႂႃႇ ၶွၼ်ၼိုင်ႈ ၼႆယဝ်ႉ။

ဝၢႆးလင် ၽႅၼ်ယၼ်ႇသိုၵ်း 1027 မႃး ၸႄႈဝဵင်းသီႇပေႃႉၼႆႉ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း ပိုၼ်ၽၢဝ်ႇယိုတ်းၵုမ်းၵမ်ဝႆႉ ပဵၼ်တၢင်းၵၢၼ်သေတႃႉ ၼင်ႇႁိုဝ် ၵူၼ်းမိူင်း တေယူႇသဝ်းၵႂႃႇမႃးႁဵတ်းႁႃ ၵိၼ်လႆႈငၢႆႈလူမ်ၼၼ်ႉ ဢမ်ႇလႆႈႁၼ်ၾၢႆႇတပ်ႉသိုၵ်းတဢၢင်းၶဝ် ႁပ်ႉပုၼ်ႈၽွၼ်း ႁႃၵဵပ်းပႅတ်ႈပၼ် မၢၵ်ႇမႅင်းၾင်လိၼ်ၶိုၼ်း။

လိူဝ်ၼၼ်ႉ ႁၢၼ်ႉတေႃႇထိုင်ယၢမ်းလဵဝ်ၵေႃႈ ၵူၼ်းမိူင်းၸႄႈဝဵင်းသီႇပေႃႉ ယင်းတိုၵ်ႉယၢပ်ႇၽိုတ်ႇ လွင်ႈၵၢၼ်ၵပ်းသိုပ်ႇ လွင်ႈလႅင်းၾူၼ်း၊ ဢိၼ်ႊထိူဝ်ႊၼႅတ်ႉသေ သဵၼ်ႈတႃႈသၢႆတၢင်း တႃႇၵႃႉၶၢႆႁဵတ်းၵၢၼ်း ႁႃၵိၼ်လဵင်ႉတွင်ႉၵေႃႈ ယင်းပႆႇငၢႆႈလူမ်မိူၼ်ၵဝ်ႇၶိုၼ်း။

တႅမ်ႈ – ၽူၺ်းၼုမ်ႇ